I KA gwoko jami macon i boma me Jerucalem, tye got mo ma kigoro coc i kome, nen calo i kine ka mwaka 700-600 K.M.P. Got man kinongo i boro mo ma onongo kitiyo kwede me yik, i kabedo macok i Kebron i lobo Icrael. Coc ma kigoro i kome-ni waco ni: “Yahweh Sabaot oceno Hagaf wod pa Hagav.” Coc man moko lok ma i Baibul nining? Nyuto ni nying Lubanga Jehovah nyo Yawe, ma i leb Ibru macon kicoyo ni YHWH, onongo dano ngeyo maber dok gitiyo kwede i kwogi me nino ducu i kare me Baibul. Boro magi onongo tye ki coc pa jo ma gigure dok gikane kunu. Pol kare onongo gicoyo nying Lubanga, kacel ki nying dano mukene ma nyingi cal ki nying Lubanga i kor boro.

Lakwan ma nyinge Dr. Rachel Nabulsi ma tiyo i University of Georgia owaco ni: “Nying man ni, YHWH nonge tyen mapol i coc macon magi. Man pwonyowa jami mapol. . . . Lok ma i Baibul kacel ki coc ma kigoro nyuto kit ma Lubanga ma nyinge YHWH onongo pire tek kwede i kwo pa dano me Icrael ki Juda.” Ki lok ada, i Baibul, nying Lubanga, ma kicoyo ki nukuta me leb Ibru ni YHWH, nonge tyen alip mapol. Pol kare nying Luicrael bene onongo bedo ki nying Lubanga iye.

Lok man ni “Yahweh Sabaot,” ma kigoro i kom got apada-ni tyen lokke tye ni “Jehovah me mony.” Man nen calo nyuto ni jo ma gukwo i kare me Baibul onongo gitiyo ki nying Lubanga kacel ki lok man ni “Jehovah me mony.” Man bene nyuto ni rwatte ki Baibul me tic ki lok man ni “Jehovah me mony,” ma nonge tyen makato 250 i Cik Macon, tutwalle i coc pa Icaya, Jeremia, ki Jekaria.