Cik ma igi lac magi nyuto ni pe pore ki Lakricitayo me tic ki jami lweny mo keken calo muduku me gwokke ki i cing jo mukene. Tam kong i kom lok magi:

Kwo pa dano tye gin maleng i wang Jehovah. Daudi oloko i kom Jehovah ni: “In aye i wang it me kwo ducu.” (Jabuli 36:9) Pi meno, ka Lakricitayo mo oyero me gwoko kwone nyo jamine, en bitute matek me timo gin mo keken ma etwero wek pe ebed ki alii me remo pa ngat mo keken, nyo wek pe ekwany kwo ma ngat mukene.​—Nwoyo Cik 22:8; Jabuli 51:14.

Tye lok ada ni gin mo keken ma ngat moni tiyo kwede me gwoko kwone twero weko en bedo ki alii me remo i wiye. Ento muduku dok weko bedo yot adada me neko ngat mo, kadi bed ni otimme atura nyo akaka. * (Nen lok ma tye i tere piny.) Dok bene latim aranyi meno nongo kome tye ka myel con, ci dong ka oneno muduku, jamine romo balle medde ameda dok ngat mo olo romo to iye.

I kare ma Yecu owaco ki lulub kore ni guwot ki pala lucwan i dye wor ma onongo kibineke iye, meno onongo pe me gwokke ki i cing lumonegi. (Luka 22:36, 38) Ma ka meno, Yecu onongo mito pwonyogi ni: Lulub kore myero pe guti ki gero, kadi bed ni lwak ma gubino i komgi onongo gitye ki jami lweny. (Luka 22:52) I ngeye ma Petero otiyo ki pala lucwan me lweny i kom latic pa lalamdog madit, Yecu ociko Petero ni: “Dwok pala lucwanni kakare i akura.” Ci Yecu otittigi cik ma iye lac ma telo Lukricitayo ducu wa i kare-ni: “Jo ducu ma mako pala lucwan, gibinekogi bene ki pala lucwan.”​—Matayo 26:51, 52.

Kit ma kitito kwede i Mika 4:3, jo pa Lubanga “gibiteto pala lucwangi doko lak kweri dyang, ki tongigi doko pala me ngolo jang olok.” Lukricitayo me ada gingene pi bedo ki kuc. Gilubo cik ma Lubanga omiyo kun tiyo ki lakwena Paulo ni “pe wucul wang gin marac ki gin marac i kom dano mo.” (Jo Roma 12:17, 18) Kadi bed ni Paulo owok ki i kwo matek calo “can mua bot luyak,” en pe oturo cik ma igi lac me Baibul wek egwok kwone. (2 Jo Korint 11:26) Ma ka meno, en oketo genne i kom Jehovah kun ngeyo ni tira ma Baibul miyo “ber loyo jami lweny.”​—Latitlok 9:18.

Ki bot Lukricitayo, kwo pire tek loyo jami me kom. Wangeyo ni “kwo pa dano pe cung i wel lim mapol ma en tye kwede.” (Luka 12:15) Pi meno, ka waneno ni lok ki mwolo bot layak mo ma tye ki muduku pe tye ka konyo gin mo, walubo tira pa Yecu ni: “Pe icul kwor [ijem] i kom dano mo ma otimo gin marac i komi.” Man te lokke ni waweko en kwanyo gin mo keken ma mito. (Matayo 5:39, 40; Luka 6:29) * (Nen lok ma  tye i tere piny.) Ngene kene ni myero wagwokke ki timo gin ma weko luyak giciko wangi i komwa. Pe wabiywayo tam pa luyak i komwa ka walubo tam ma Baibul miyo ni myero pe ‘wawakke ki jami ma watye kwede i kwowa.’ (1 Jon 2:16) Dok bene bibedo ber ka waweko jiraniwa gungeyo ni wan Lucaden pa Jehovah dok wabedo ki kuc.​—Carolok 18:10.

Lukricitayo giworo cwiny ma ngolo ki jo mukene kop. (Jo Roma 14:21) Utmege mukene gibibedo ki ur nyo bene cwinygi biballe, ka guniang ni lakricitayo mo tye ki muduku me gwoko kwone. I kine mukene nongo cik ye ki wan me bedo ki muduku, ento pi mar ma watye kwede pi utmegiwa, pe wabitimo gin mo keken ma wangeyo ni bibedo macalo ariya botgi.​—1 Jo Korint 10:32, 33; 13:4, 5.

Lukricitayo gimito ni ginyut lanen maber bot jo mukene. (2 Jo Korint 4:2; 1 Petero 5:2, 3) Ka Lakricitayo mo tye ki muduku me gwoko kwone, luelda gibimine tira ma a ki i Baibul. Ka en omoko tamme me bedo ki muduku, nongo pe tye ka nyuto lanen maber. Macalo adwogine, en pe bibedo ki mot me tic mo keken i kacokke. Man bene gudo kadi wa Lakricitayo ma ticce mito ni obed ki muduku. Bibedo ber ma loyo ka en oyenyo tic mukene. *​—Nen lok ma tye i tere piny.

Lakricitayo myero omok tamme pire kene ma lubbe ki kit ma en bigwoko kwone ki pa jo me gange kacel ki jamine, ki bene kit tic ma myero etim. Ento ka en moko tam meno, myero ojenge i kom cik ma igi lac me Baibul. Lubangawa ma ryek-ki ominiwa cik ma igi lac magi pien en marowa. Meno gin muweko Lukricitayo ma gitye ki wat macok ki Jehovah giyero pe me bedo ki muduku me gwoko kwogi ki i cing jo mukene. Gingeyo ni ka gigeno Lubanga kun gilubo cik ma igi lac me Baibul, ci Jehovah bigwokogi pi naka.​—Jabuli 97:10; Carolok 1:33; 2:6, 7.