1. Tam ango ma jo matino myero gumok ma lubbe ki kwogi me anyim? Gin ango ma twero konyo jo matino wek pe gubed ki par mapol? (Nen cal ma tye i pot karatac man.)

WUN jo matino, twero bedo ni wuye ni ma peya wucako wot me cito ka mo, bedo me ryeko ka kong wugoyo pulan pi ka ma wucito iye. Kwo bedo calo watye ka wot me cito ka mo, dok kare ma itye kwede me keto yub pi ka ma ibicito iye en aye ma pud itidi-ni. Ki lok ada, pe twero bedo yot me keto yub ma kit meno. Nyako mo ma nyinge Heather owaco ni: “Kelo lworo adada. Myero imok tam ma lubbe ki kit ma ibikwo kwede.” Ka iwinyo kit man, myero wii opo i kom gin ma Jehovah owaco ni: “Cwinyi pe opoti, pien an Lubangani; abimiyi tek, dok abikonyi.”​—Icaya 41:10.

2. Ingeyo nining ni Jehovah mito ni igo pulan ma keli yomcwiny i anyim?

² Jehovah cuko cwinyi me goyo pulan ki ryeko pi anyim. (Latitlok 12:1; Matayo 6:20) En mito ni ibed ki yomcwiny. Man nen ka maleng ka ineno, iwinyo, dok ibilo jami ma en ocweyogi. Jehovah bene paro piwa i yo mukene. En  miniwa tam dok pwonyowa wek walub yo maber loyo. Pi meno, cwero cwinye adada ka dano gikwero tamme me ryeko. En waco bot jo ma kwero lubo tirane ni: “Wuyero bene gin ma pe yomo cwinya. . . . Nen, luticca gibibedo ki yomcwiny, ento wun gibimiyo lewic makowu; yomcwiny bimiyo luticca giwera.” (Icaya 65:12-14) Ka wamoko tam me ryeko, keto deyo i kom Jehovah.​—Carolok 27:11.

3. Gin ango ma Jehovah mito ni itim?

³ Yub ango ma Jehovah mito ni ibedo kwede? Wek ibed ki yomcwiny, mitte ni inge Jehovah dok iti pire. Man aye kit ma Jehovah ocweyo kwede dano. (Jabuli 128:1; Matayo 5:3) Lee ticgi mere me cam ki nywal keken. Ento Jehovah mito ni iket yub maber pi kwoni wek ibed ki yomcwiny. Lacwecci aye “Lubanga ma won mar” ki ‘ma layomcwiny’ dok ocweyo dano ducu i calle. (2 Jo Korint 13:11; 1 Temceo 1:11; Acakki 1:27) Ibibedo ki yomcwiny ka ilubo kit pa Lubangawa ma lamar-ri. Baibul waco ni: “Miyo mot kelo gum makato gamo agama.” (Tic pa Lukwena 20:35) Pe iwinyo kit meno? Man aye lok ada ma timme i kwo. Pi meno Jehovah mito iket yub pi anyimmi ma cung i kom mar pi jo mukene ki pire.​—Kwan Matayo 22:36-39.

4, 5. Gin ango ma oweko cwiny Yecu onongo yom?

⁴ Yecu oweko lanen maber adada pi jo matino. Nen calo i kare ma en pud tidi, en otuko kacel ki luwote dok obedo ki yomcwiny. Kit ma Lok pa Lubanga waco kwede, tye “kare me nyero” ki “kare me myel.” (Latitlok 3:4) Yecu bene onyikke cok ki Jehovah kun kwano Ginacoya. I kare ma en tye ki mwaka 12, lupwonye ma onongo gitye i ot pa Lubanga guuro “niangnge, ki kit ma en dok kwede i peny.”​—Luka 2:42, 46, 47.

⁵ I kare ma Yecu dong odoko dit, timo miti pa Lubanga onongo yomo cwinye. Me labolle, Lubanga onongo mito ni en otit “lok me kwena maber bot lucan” ki dok otit “bot jo ma wanggi oto ni gibiyabo wanggi.” (Luka 4:18) Jabuli 40:8 tito kit ma Yecu owinyo kwede ni: “Cwinya bedo yom me tiyo gin ducu ma imito, ai Lubanga.” Yecu onongo maro pwonyo dano lok madok i kom Wonne. (Kwan Luka 10:21.) I nino mo acel i nge tito ki dako mo lok madok i kom woro me ada, Yecu owaco ki lupwonyene ni: “Camma en tiyo gin ma ngat ma oora mito, ki cobo ticce.” (Jon 4:31-34) Yecu onongo cwinye yom pien onyuto mar pi Lubanga ki pi jo mukene. Ka in bene itimo kit meno, ci cwinyi bibedo yom.

6. Pingo ber me tito bot jo mukene yubbi me anyim?

⁶ Lukricitayo mapol gucako tic macalo painia ma pud gitino dok man okeligi  yomcwiny. Tika itwero lok ki jo magi ma lubbe ki yub ma itye kwede? “Yub mo ma giyubo labongo nongo tam muromo pe twero cobbe maber, dong yub ma giyubo ma kong gipenyo tam bot jo mapol cobbe kakare.” (Carolok 15:22) Utmege magi gitwero titi kit ma tic macalo painia mini pwony ma twero konyi pi kare me kwoni ducu. Yecu opwonyo jami mapol ki bot Wonne i kare ma tye i polo. I ticce me pwony i lobo, Yecu pud omedde ki nongo pwony. En obedo ki yomcwiny i nywako kwena maber ki jo mukene dok ogwoko gennene kadi bed ni kwo onongo tek. (Kwan Icaya 50:4; Jo Ibru 5:8; 12:2) Kong dong wanen pingo tic pi Jehovah pi kare malac twero keli yomcwiny.

7. Pingo jo matino gimaro tic me loko dano wek gudok lupwonnye?

⁷ Yecu owacciwa ni “wucilok” dano dok wupwonygi. (Matayo 28:19, 20) Ka itye ki yub me timo tic man pi kare malac i anyim, ci ibedo ki kwo maber dok ma keto deyo i kom Lubanga. Kit macalo timme i dog tic ducu-ni, tero kare bene wek idong dironi i tic man. Omego mo ma nyinge Timothy ma ocako tic macalo painia i kare ma pud tye ki mwaka apar ki wiye owaco ni: “Amaro tic pi Jehovah pi kare malac pien obedo yo ma anyuto kwede ki mara i kome. I acakkine onongo pe atwero cako kwano Baibul ki ngat mo keken, ento lacen akobo i wang tic mukene dok i kine ka dwe acel keken acako kwano Baibul ki dano mapol. Latin kwanna acel ocako bino i Ot me Ker. Lacen abedo i Cukul pi Omege ma Wigi Nono pi dwe aryo, ci kimina mot me tic mukene ka ma acako kwano Baibul ki dano angwen. Amaro pwonyo dano, pien atwero neno kit ma cwiny maleng konyogi kwede me loko kwogi.” * (Nen lok ma tye i tere piny.)​—1 Jo Tecalonika 2:19.

8. Gin ango ma jo matino mogo gutimo wek gitit kwena ki dano mapol?

⁸ Jo matino mogo gupwonyo leb mukene. Me Labolle, Jacob, omego mo ma a ki i North America ocoyo ni: “I kare ma atye ki mwaki abiro, lurema mapol onongo gubedo jo Vietnam. Onongo amito tito botgi lok i kom Jehovah, pi meno, i nge kare mo aketo yub me cako pwonyo lebgi. Tutwalle onongo aporo Wi Lubele ma tye i lebgi ki i me leb Munu. Omako bene lirem ki jo mogo ma i kacokke ma bedo leb pa jo Vietnam. Ma ao mwaka 18, acako tic macalo painia. Lacen, acito i Cukul pi Omege ma Wigi Nono. Man okonya adada i ticca macalo painia i gurup ma kiloko iye leb meno, ka ma an kena aye atye laelda. Jo Vietnam mapol gitye ki ur adada me niang ni apwonyo lebgi. Gijola maber i ganggi, dok pol kare acako kwano Baibul kwedgi. Jo mukene gudongo i yo me cwiny nio wa i nongo batija.”​—Por ki Tic pa Lukwena 2:7, 8.

9. Tic me tito kwena pwonyowa me timo gin ango?

⁹ Tic me tito kwena pwonyi ki kit  mabeco, kit me lok ki dano i yo maber, ki dok me lok ki tekcwiny kacel ki diro. (Carolok 21:5; 2 Temceo 2:24) Ento tic man kelo yomcwiny adada pien ipwonyo kit me tic ki Ginacoya me tito pi niyeni. Ipwonyo bene kit me tic kacel ki Jehovah.​—1 Jo Korint 3:9.

10. Itwero nongo yomcwiny i tic me tito kwena nining kadi bed ni pe yot me tic i wang tic ma itye iye?

¹⁰ Pud watwero nongo yomcwiny kadi bed ni jo manok keken aye giye kwano Baibul i wang ticwa. Wek walok dano me doko lupwonnye, lutit kwena ducu me kacokke myero guti kacel. Kadi bed ni latit kwena twero nongo ngat acel keken me doko lapwonnye, wan ducu cwinywa bed yom pien nongo wanywako i tic meno. Me labolle, Brandon, ma otiyo macalo painia pi mwaka abongwen i kabedo ma jo manok keken aye gikwano Baibul, owaco ni: “Amaro tito kwena maber pien meno aye gin ma Jehovah owaco ni watim. Acako tic macalo painia cutcut i nge tyeko kwan. Amaro cuko cwiny utmege i kacokke ki dok neno kit ma gitye ka dongo kwede i yo me cwiny. I nge cito i Cukul pa Omege ma Wigi Nono, kicwala me tic i wang tic manyen. Tye lok ada ni peya anongo ngat mo ma okwano Baibul nio wa i nongo batija i wang tic meno, ento lutit kwena mukene dong gunongo. Atye ki yomcwiny ni aketo yub me nywako i tic me tito kwena ki cwinya ducu.”​—Latitlok 11:6.

11. Kit tic ango i dul pa Jehovah ma okelo yomcwiny bot jo matino?

¹¹ Tye yo mapol me tic pi Jehovah. Me labolle, jo matino mapol gikonyo i tic me gedo Odi me Kerwa. Ot me Ker miya mapol pud mitte. Kabedo magi keto deyo i kom Jehovah, pi meno miyo kony me gerone twero kelo boti yomcwiny. Itwero bene nongo yomcwiny i tic kacel ki utmege. Dok itwero pwonyo jami mabeco mapol, calo kit me tic i yo maber ma pe kelo awano ki dok winyo lok pa jo ma kiketogi me neno kit ma tic woto kwede.

12. Tic macalo painia twero yabo yo pi gin ango mukene?

¹² Omego mo ma nyinge Kevin owaco ni: “Nicakke ma pud atidi, onongo amito donyo i tic pi Jehovah pi kare malac i anyim. Acako tic macalo painia ma atye ki mwaka 19. Abedo ka timo tic mogo matino tino bot omego mo ma onongo obedo lagedo wek anong jami ma mitte. Apwonyo kit me guro wi ot, doggola ki dong wang ot. Lacen, abedo ki kare me tic pi mwaka aryo kacel ki utmege ma gimiyo kony ka ma peko ma poto atura otimme iye, yubo Odi me Ker ma guballe kacel ki odi pa utmege. I kare ma awinyo ni kitye ka mito jo ma gimito jalle me gedo i South Africa,  apongo fom ci kilwonga. Ki kany i lobo Afrika, i nge cabit mogo manok, nongo watye ka gedo Odi me Ker mapat pat. Wabedo kacel ki lugedo magi calo jo me ot acel. Wakwo kacel, wakwano Baibul kacel ki dok watiyo kacel. Amaro tic kacel ki utmege i tic me tito kwena cabit ki cabit. Yub ma aketo macalo awobi oweko anongo yomcwiny ma onongo pe atwero byekone.”

13. Pingo jo matino mapol cwinygi yom me tic pi Jehovah i Betel?

¹³ Jo mogo ma gutiyo calo painia dong i kare-ni gitiyo i Betel. Tic i Betel tye yo me kwo me yomcwiny pien tic ducu ma itiyo tye pi Jehovah. Jo ma gitiyo i Betel gikonyo i tic me gonyo ki goyo Baibul ki buke wek dano gupwony lok ada. Labetel mo ma nyinge Dustin owaco ni: “Aketo yub me tic pi kare malac i kare ma atye ki mwaka 9, dok acako tic macalo painia i kare ma atyeko kwan. I nge mwaka acel ki nucu, kilwonga me tic i Betel, ci apwonyo tic ki macin me goyo bukke ka dok lacen atiyo i kompiuta. Ki i Betel amaro winyo kit ma tic me loko dano wek gudok lupwonnye tye ka medde kwede i twok lobo ducu. Amaro tic kany pien gin ma watimo konyo dano me nyikke cok bot Jehovah.”

14. Gin ango ma itwero timone i kare-ni wek iyubbe me tic pi kare malac?

¹⁴ Itwero yubbe nining me donyo i tic pi kare malac pi Jehovah? Wek iti pi Jehovah pi kare malac, mitte ni kong idong kit mogo mabeco pi Lakricitayo. Kwan Lok pa Lubanga nino ducu, lwod lok matut iye, dok temme me tito pi niyeni i kacokke. Itwero tic ki kare ma itye kwede i gang kwan me dongo dironi i tito kwena maber bot jo mukene. Pwony kit me nyuto miti i kom dano kun ipenyo tamgi i yo me diro ki dok iwinyo lagamgi. Medo i kom meno, jalle me timo tic i kacokke, calo gwoko ki yubo ka muballe i Ot me Ker. Cwiny Jehovah bedo yom me tic ki jo ma gimwol dok ma gitye atera me tic. (Kwan Jabuli 110:3; Tic pa Lubanga 6:1-3) Lakwena Paulo olwongo Temceo me tic kacel kwede calo lamiconari pien dano onongo “giloko ki nying Temceo maber.”​—Tic pa Lubanga 16:1-5.

15. Gin ango ma iromo timone wek inong tic ma twero konyi me tic macalo painia?

¹⁵ Pol pa jo ma gitiyo pi Jehovah pi kare malac olo myero gubed ki tic me atiya. (Tic pa Lubanga 18:2, 3) Iromo bene kwano tic cing mogo ma pe tero kare malac ma bikonyi me nongo tic mo olo to. Lok ki laneno me adwol ki lupainia mogo ma lubbe ki yub ma itye kwede, dok ipeny tamgi. Ci dong, kit ma Baibul waco kwede, “leg Rwot [Jehovah] okonyi i ticci ducu ma itiyo, ci yub ducu ma itye kwede bicobbe maber.”​—Carolok 16:3; 20:18.

16. Tic pi kare malac twero yubi pi tic mukene i anyim nining?

¹⁶ Itwero bedo ki gen ni Jehovah mito ni ‘imak’ matek kwo me yomcwiny i anyim. (Kwan 1 Temceo 6:18, 19.) Tic pi Jehovah pi kare malac weko iteggi macalo Lakricitayo ka nongo itiyo kacel ki jo mukene ma bene gitye i tic pi kare malac. Medo i kom meno, jo mapol gunongo ni tic pi Jehovah pi kare malac okonyogi lacen i nyomgi. Pol kare, jo ma gutiyo calo painia ma peya gunyomme gimedde ki tic macalo painia ka dong gunyomme.​—Jo Roma 16:3, 4.

17, 18. Pingo pulan ma itye kwede myero oa ki i cwinyi?

¹⁷ Jabuli 20:4 loko i kom Jehovah ni: “En omiyi gin ma cwinyi mito, dok omi yub meri ducu ocobbe kakare.” Ka itye ka goyo pulan pi anyim, tam matut i kom gin ma imito timone ki kwoni. Tam i kom gin ma Jehovah tye ka timone i kare-ni ki gin ma itwero timone i ticce. Ci dong igo pulan me timo gin ma yomo cwinye.

¹⁸ Ka itiyo ki kwoni me tic pi Jehovah ki cwinyi ducu kun iketo deyo i kome, ci ibedo ki yomcwiny. Dok Ibinongo ‘yomcwiny i Jehovah ci en bimiyi gin ducu ma cwinyi mito.’​—Jabuli 37:4.