Tika dong ikwano maber Wi Lubele ma kibedo ka goyone cokcok-ki? Nen kong ka wi po i kom lapeny magi:

Pingo Jehovah onongo cwako lweny pa Luicrael i kom lumerokgi?

Jehovah lamar. Ento, kicel kicel en onongo ye ni jone gulweny ka lumonegi gitye ka diyogi nyo ka bwurogi. Lubanga keken aye ma onongo moko anga ma myero ociti i lweny ki dok awene ma myero kilweny iye.​—wp15 11/1, pot 3-5.

Gin ango ma pire tek ma lunyodo gitwero timone me pwonyo lutinogi me mwaka apar ki wiye me tic pi Jehovah?

Pire tek ni lunyodo myero gunyut mar bot lutinogi me mwaka apar ki wiye kun bene ginyutigi lanen me mwolo. Pire bene tek ni lunyodo myero gunyut niango dok gutute me niang lutinogi me mwaka apar ki wiye.​—wp15 11/1, pot 14-16.

Pingo pe myero kiter papa calo ngat ma leyo ka wang Petero?

Matayo 16:17, 18 pe waco ni Petero bibedo lawi kacokke pa Lukricitayo. Baibul nyuto ni Yecu aye bibedo got madit me kacokke ento pe Petero. (1 Pet. 2:4-8) ​—wp15 12/1, pot. 12-14.

Ngo ma myero kong watam iye ma peya waloko?

Wek wati ki lebwa i yo maber, myero watam i kom jami magi (1) kare ma myero walok iye (Latit. 3:7), (2) gin ma myero waloki (Car. 12:18), ki dong (3) kit ma myero walok kwede (Car. 25:15).​—wp15 12/1, pot 19-21.

Jami mene ma pe gitye atir ma Lukricitayo myero gugwokke kwede?

Lukricitayo me ada gigwoko ki i loko lok goba ki kwoto nying jo mukene. Pe gipiro lok marac me cwero cwiny jo mukene, nyo bene pe gikwalo kwo.​—wp16.1, pot. 5.

Angagi ma gubedo ‘lulamdog madito’ ma kiloko i komgi i Baibul?

Lok man ni, ‘lulamdog madito’ pol kare onongo kitiyo kwede me lok i kom jo ma gubedo ka telo wi lulamdog mogo, man onongo kwako bene lulamdog mogo ma dong guweko ticgi woko.​—wp16.1, pot. 10.

Omyero water ngat ma camo mukati nyo mato vino i kwer me Nipo nining?

Lukricitayo pe gitero jo ma gicamo mukati nyo gimato vino i kwer me Nipo i yo mapat. Ngat ma kiwiro pe mito ni dok kitere i yo mapat; nyo ni meno kiywek pi nyinge macalo ngat me kiwiro. (Mat. 23:8-12)​—w16.01, pot. 23-24.

Gin ango ma wapwonyo ki i kom kit Abraim odoko kwede larem Lubanga?

Abraim ongeyo Lubanga ki bot Cem. Ngec pa Abraim i kom Lubanga odongo i kare ma obedo ka neno kit ma Lubanga tere kwede kacel jo me ode. Wan bene watwero timo kit meno.​—w16.02, pot. 9-10.

Dano gucako tic ki cura ki tyeng i Baibul nining?

I cencwari me 13, latela dini mo ma nyinge Stephen Langton opoko coc me Baibul kun ketogi i cura mapol. Lacoc mo ma obedo Lajudaya ocako keto tyeng i Ginacoya me leb Ibru, ka lacen i cencwari me 16, Robert Estienne bene oketo tyeng i Ginacoya me leb Grik.​—w16.3, pot 26-27.

Tika ada Catan otero Yecu kikome-ni wa i wi labila me ot pa Lubanga?

Pe watwero wacone ni meno tye ada. Te lok ma i Matayo 4:5 ki Luka 4:9 pe twero weko wamoko ni meno kitero Yecu i wang lek nyo ni en otere wa i wi labila ot pa Lubanga.​—w16.03, pot. 31-32.

I yo ango ma ticwa me pwony twero bedo calo toyo?

Toyo bedo ka ton motmot dok miyo kom ginapita bedo maber dok mayot. Ki lok ada, toyo obedo mot mua ki bot Lubanga. (Nwo. 33:13) Tute pa jo pa Lubanga ducu i ticwa me pwony bene rom ki toyo.​—w16.04, pot. 3-4.