WAN ducu waye ni Jehovah tye ka telo wi jone ki gwokogi i yo me cwiny “i kare me agikki” man. (2 Tem. 3:1) Ento, ngene kene ni omyero wabed luwiny bot Jehovah. Watwero poro kwo ma watye ka wok ki iye ki pa Luicrael i kare ma gubedo ka wot i tim. Ka guwinyo kikuto tum, onongo mitte ni gudok iye oyotoyot.

Jehovah owaco ki Moses ni oyub tum aryo me ryal ma kitetogi ki nyol, ci kibitic kwedgi me “lwongo lwak ki pi cako wot.” (Wel 10:2) Lulamdog onongo gikuto tum i yo mapatpat me nyuto ki dano gin ma omyero gutim. (Wel 10:3-8) I kare-ni, jo pa Lubanga ginongo tira i yo mapatpat. I pwony man, wabinyamo yo adek ma wanongo kwede tira kun waporogi ki dwan tum ma onongo kikuto i lobo Icrael macon. Yo adek magi gin aye, ka kilwongowa pi gure madito, ka kilwongo luelda me nongo pwonnye, ki ka kiloko niangowa nyo tira ma kimiyo bot kacokke.

Ka onongo Jehovah mito ni kicok “lwak ducu” kacel i doggola kema me rwatte, ci lulamdog onongo gikuto tum aryo ducu. (Wel 10:3) Kaki ducu ma gugony gulworo kema me rwatte i dul angwen mapatpat, onongo giwinyo dwan tum. Jo ma gugony cok ki doggola kema me rwatte onongo gibino oyotoyot. Jo ma gugony mabor onongo gimito cawa malac ki tute matek wek guo kunnu. Ento kadi bed onongo gicok nyo gitye ka mabor, Jehovah onongo mito ni gin ducu gugure wek guwiny tirane.

I kare-ni, pe wagure i doggola kema me rwatte, ento kilwongowa me cito i gure pa jo pa Lubanga ducu. I kin gure magi tye iye gure me rijon ki gure pi yub mukene ma pigi tek, ka ma wanongo iye ngec ki tira ma pire tek. I but lobo-ni ducu, jo pa Jehovah ginongo mit pa yub acel-li. Pi meno, jo ducu ma gijolo lwongo me bino i gure madito magi ginongo yomcwiny me ribbe kacel macalo gurup. Jo mukene gia ki i bor piny ma loyo luwotgi. Kadi bed kit meno, jo ma gijolo lwongo man giye ni tutegi nyako nyige.

Tika jo ma gitye i gurup matino ka mabor ki ka gure madito bene ginongo adwogi maber ki i gure magi? Pi jami tet manyen, jo magi bene ginongo adwogi maber ki i yub acel meno dok giwinyo calo gitye i gure magi. Me labolle, i kare ma lacungo pi gang kal madit olimo jang gang kal me lobo Benin, kikubo purogram me limme bot jo ma gibedo i Arlit, taun mo matidi ma tye i lobo Niger, i Aroo me Sahara. Dano 21, ma i kine tye iye omege, lumege, ki jo ma gitye ki miti gucokke kacel. Kadi bed onongo gitye ka mabor, ento guwinyo calo  guribbe kacel ki dano 44,131 ma gubedo tye i gure man. Omego mo acel ocoyo ni: “Wapwoyowu matek me kubo ki wan purogram man. Man onyuto kit ma wumarowa kwede matek.”

Ka lalamdog me Icrael okuto tum acel keken, ci “lutel wic, ma gin ludito ma i kaka ducu pa jo Icrael” aye onongo gicokke kacel i doggola kema me rwatte. (Wel 10:4) Ki kunnu, onongo ginongo ngec ki pwonnye ki bot Moses. Man onongo konyogi me cobo ticgi macalo luwi kakigi. Ka onongo in ibed i kin luwi kaki magi, onongo pe ibitute ki tekki ducu me bedo tye wek inong adwogi maber?

I kare-ni, luelda me kacokke pe gitye “ludito”; dok pe giloyo romi pa Lubanga ma giketo i cinggi ki tek. (1 Pet. 5:1-3) Ento gitiyo matek me kwayo romi magi. Pi meno, gidok iye oyotoyot ka kilwongogi ka nongo pwonnye, calo i Cukul me Ticwa me Ker. I cukul magi, luelda gipwonyo kit me dongo dirogi i cobo tic me kacokke. Pi pwonnye man, luelda kacel ki jo me kacokke gitwero nyikke cok ki Jehovah. Kadi bed in peya inongo mot me cito i cukul magi, nen calo itye ka nongo adwogi maber ki bot jo ma gucito iye.

I kare mogo, lulamdog me Icrael onongo gikuto tum ma dwanne lokke aloka. Man onongo nyuto ni Jehovah mito ni lwak ducu gucak wot. (Wel 10:5, 6) Ka dano gua ki i gony me cako wot, onongo gitimo kore ki kore, ento man onongo kelo tic matek i wi dano ducu. Twero bedo ni Luicrael mukene i kare mogo onongo ginongo tek me kobo i kabedo manyen. Pingo?

Gwok nyo jo mukene onongo gibedo ki tam ni kicwalo lwongo me kobo i kabedo manyen ma onongo peya giywe nyo giyubbe pire. Baibul waco ni: “Ka ce pol pud omedde ki umo wi kema, kun bedo kenyo, ci jo Icrael bene kong gibedo i gonygi.” Ento, i “kine mukene pol bedo cakke otyeno nio wa odiko” keken. I kare mukene, onongo rii pi “nino aryo, nyo dwe acel, nyo pi kare mo malac” ci dong warre woko. (Wel 9:21, 22) Dok jo Icrael gudak tyen adi? Wel cura 33 otito kabedo 40 mapatpat ma Luicrael gubedo ka tongo iye gony.

I kare mukene, jo Icrael onongo gitongo gony ka ma tipo tye iye. Tongo gony i te tipo onongo yomo cwiny dano adada tutwalle kit ma gubedo ka wot ‘i dye tim malac dok malik-ki.’ (Nwo. 1:19) Pi meno, onongo guromo tamo ni ka gikobo, ci gibicito i kabedo ma pe ber.

Ka Luicrael dong gucako wot, onongo mitte ni kaki mukene kong gudi cwinygi kun gikuro karegi me wot. Gin ducu onongo giwinyo dwan tum ma lokke aloka-ni ento pe gin ducu gicako wot lawang acel. Dwan tum ma lokke aloka-ni onongo nyuto ni kaki ma giguro kemagi yo tung wokceng, ma gin aye Juda, Icakar, ki Jabulon, myero gucak wot. (Wel 2:3-7; 10:5, 6) Ka dong gua woko, ci lulamdog onongo gikuto tum ma dwanne lokke aloka tyen me aryone, wek kaki adek ma gitongo gonygi tung kupiny gucak wot. Lulamdog onongo gimedde ki kutu tum kit man wang ma jo Icrael ducu dong gua woko.

Twero bedo ni in bene inongo tek me jolo alokaloka mo ma dulwa omiyo. Pingo? Gwok nyo itamo ni alokaloka pol tutwal. Nyo oromo bedo ni onongo imaro kit ma jami yam tye kwede con dok pe imito ni kitim iye alokaloka. Twero bedo ni otero kare dok inongo tek me diyo cwinyi i kare me alokaloka meno. Kadi bed kit meno, ka watute me lubo tira manyen man, wabineno ni alokaloka man ber piwa dok ni Jehovah cwinye yom i komwa.

I kare pa Moses, Jehovah otelo wi co, mon, ki lutino milion mapol i dye tim aroo. Labongo gwok ki tela pa Jehovah, joni onongo pe gubibwot. Kombeddi, Jehovah tye ka gwokowa i kare man me agikki ma kwo tek-ki. En konyowa me bedo cok kwede ki me gwoko niyewa wek obed matek! Dong, wan ducu omyero wamoku tamwa calo Luicrael ma lugen ma gubedo ka dok iye cutcut i kare ma guwinyo kikuto tum!