Paulo ocoyo ni: “Pi temo tiyo gin ma cik mito omiyo yam ato pi cik, wek abed kwo tung bot Lubanga.”​—Gal. 2:19.

Lupwonye ma lugoba gubedo ka bwolo Lukricitayo mogo ma onongo gitye i kacokke ma i Galatia. Co magi onongo gitye ka pwonyo ni wek ngat moni onong larre, en myero olub Cik pa Moses, tutwalle cik me lirre. Ento Paulo onongo ngeyo ni Lubanga dong pe mito ni jo ma giye i kome gulirre. En oloko kwedgi i yo ma niang iye yot adada ci onyuto ni lupwonye magi gubedo lupwonye goba dok en ojingo niye pa utmege magi i kom ginkok pa Yecu Kricito.​—Gal. 2:4; 5:2.

Baibul nyuto ka maleng ni ka dano oto, en pe ngeyo gin mo keken dok jami ma tye ka timme i ngete pe gude. (Latit. 9:5) I kare ma Paulo ocoyo ni: “Yam ato pi cik,” en onongo tye ka waco ni Cik pa Moses onongo dong pe tye ki teko mo keken i kome. Me ka meno, Paulo onongo tye ki gen matek ni niyene i kom ginkok oweko ‘ebedo kwo tung bot Lubanga.’

Alokaloka man i kwo pa Paulo-ni otimme “pi temo tiyo gin ma cik mito.” Man twerre nining? En onongo otito ni “dano pe gikwano ni kite atir pien tiyo gin ma cik mito, kono pi ye Yecu Kricito keken.” (Gal. 2:16) Ki lok ada, Cik onongo ocobo gin mo ma pire tek adada. Paulo otito ki jo Galatia ni: “Cik yam gimedo ni wek turo cik onen woko ka maleng, nio wang ma lakwaro Abraim ma giketo cikke pire-ni obino.” (Gal. 3:19) Ada, Cik oweko onen ka maleng ni dano ma tye ki roc dok labalo pe twero lubo Cik labongo turone dok ni dano mito gityer mo ma roc pe iye. Pi meno, Cik okonyo dano me niang ni “lakwaro Abraim,” aye obedo Kricito. Ka ngat moni oketo niyene i kom Yecu Kricito, ci Lubanga romo kwanne ni kite atir. (Gal. 3:24) Kikwano Paulo ni kite atir pien Cik okonye me ye ki keto niyene i kom Yecu. Pi meno, waromo waco ni Paulo ‘oto pi cik’ dok odoko “kwo tung bot Lubanga.” Cik onongo dong pe ki teko mo i kome, kono ka Lubanga keken.

Paulo otito tam ma kit meno i waragane bot jo Roma. I kare ma ocoyo ni: “Utmegina, wun bene yam wuto tung bot cik pi Kricito . . . gigonyowa woko i kom cik, dong wato ki tung bot gin ma con omakowa.” (Rom. 7:4, 6) Tyeng magi kacel ki Jo Galatia 2:19, nyuto ni Paulo onongo pe tye ka lok i kom to macalo labalo i te Cik. Me ka meno, en onongo tye ka lok i kom bedo agonya. Cik onongo dong pe ki twero mo keken i kome kacel ki Lukricitayo mukene-ni. Niyegi i kom ginkok pa Yecu aye oweko onongo gitye agonya.