1. Gin ango ma Jehovah otimo pi wan ducu ki acel acel?

JEHOVAH onyiko wan ducu ki acel acel bote. (Jon 6:44) Tam kong i kom lok meno. I kare ma Jehovah obedo ka ngiyo cwiny dano bilion mapol ma gitye i lobo-ni, en oneno gin mo maber i cwinyi​—ni in imwol dok itwero marre. Meno obedo gin mamwonya adada i wang Jehovah. (1 Tekwaro 28:9) Jehovah ngeyi, niang gin ma timme i komi, dok marri matek. Man pud dong obedo tam ma cuko cwinywa ya!

2. Lapor mene ma Yecu omiyo me konyowa niang kit ma Jehovah paro kwede pi wan ducu ki acel acel?

² Jehovah paro piri adada, dok en paro pi omegini ki lumegini ducu me kacokke. Me konyowa niang man, Yecu oporo Jehovah ki lakwat. Ka romo 1 ki i kin romi 100 orwenyo woko, ngo ma lakwat bitimone? En “biweko romi pyerabongwen wiye abongwen-ni i wi cere-gu, ci cito ka yenyo en murwenyo-ni.” Ka lakwat onongo romo-ni, en pe bikeco i kom romo-ni pi rwenyo. Cwinye bibedo yom. Pwony ango ma wanongo? Romi ducu pigi tek bot Jehovah. Yecu owaco ni: “Wora ma tye i polo bene pe mito ni ngat mo acel i kin jo magi matino myero oto.”​—Mat. 18:12-14.

3. Gin ango ma wabinyamo i pwony man?

³ Ngene kene ni pe wamito timo gin mo ma balo cwiny omegiwa ki lumegiwa. Watwero gwokke nining wek pe waket ariya i nyim jo mukene? Dok gin ango ma watwero timone ka ngat mo ocwero cwinywa? Wabigamo lapeny magi i pwony man. Ento mukwongo, kong wapwony jami mogo i kom “jo  magi matino-ni” ma kiloko i komgi i Matayo cura 18.

4. “Jo magi matino-ni” gubedo angagi?

⁴ “Jo magi matino-ni” gubedo lupwonnye pa Yecu ma mwakagi patpat. Kadi bed gitino nyo guti woko, gitye “macalo litino” pien gin ducu gitye atera me nongo pwony ki bot Yecu. (Mat. 18:3) Kadi bed gia ki i kabedo ki tekwaro mapatpat, dok tamgi ki kitgi bene pat, gin ducu ginyuto niye i kom Kricito. Man oweko Kricito bene marogi adada.​—Mat. 18:6; Jon 1:12.

5. Jehovah winyo nining ka ngat mo ocwero cwiny ngat acel i kin Jone?

⁵ “Jo magi matino-ni” ducu pigi tek bot Jehovah. Me konyowa niang kit ma en winyo kwede, tam kong kit ma wawinyo kwede i kom lutino. Pigi tek adada botwa. Wamito ni wagwokgi pien pe gitye ki ngec, ryeko, ki teko ma ludito tye kwede. Pe wamito neno ka kiketo awano i kom ngat mo keken, ento cwinywa cwer makato ka ngat mo omiyo latin matidi odeno can. I yo acel-lu, Jehovah mito gwokowa. Iye wang matek ka ngat mo ocwero cwiny ngat acel i kin Jone nyo oketo ariya i nyimme!​—Ic. 63:9; Mar. 9:42.

6. Ma lubbe ki 1 Jo Korint 1:26-29, jo me lobo-ni gineno lupwonnye pa Yecu nining?

⁶ I yo mukene ango ma lupwonnye pa Yecu gitye calo ‘lutino’? Angagi ma kinenogi calo jo ma pigi tego i lobo-ni? Lulonyo, jo muywek, kacel ki jo ma gitye ki twero. Ento lupwonnye pa Yecu pol kare pe gitye kit meno. Pi meno, jo ma i lobo-ni ginenogi calo jo ma pigi pe tek, konygi pe, dok ‘jo matino.’ (Kwan 1 Jo Korint 1:26-29.) Ento Jehovah pe nenowa kit meno.

7. Jehovah mito ni wawiny nining i kom omegiwa ki lumegiwa?

⁷ Jehovah maro luticce ducu, kadi bed dong gutiyo pire pi mwaki mapol nyo pud ginyen i ada. Omegiwa ki lumegiwa ducu pigi tek bot Jehovah, pi meno pigi myero obed tek botwa bene. Wamito ni ‘wamar utmegiwa ducu’ pe mogo keken. (1 Pet. 2:17) Omyero wabed atera me gwokogi ki nyuto ni waparo pigi. Ka waniang ni wacwero cwiny ngat mo, pe myero waca acaya kun watamo ni en cwinye cwer oyot tutwal dok myero otim kica dok wiye owil woko i kom gin mutimme. Ngo ma oweko jo mukene cwinygi cwer oyotoyot? Twero bedo ni pi kit ma gudongo kwede, omege ki lumege mukene giwinyo calo rwomgi lapiny ka kiporogi ki jo mukene. Jo mukene pud ginyen i ada, dok peya gupwonyo kit me timo kica ki luwotgi. Labongo paro pi tyen lok mumiyo cwinywa nyo cwinygi ocwer, omyero watute me yubo wat. Medo i kom meno, ngat ma pol kare cwinye cwer oyotoyot myero onge ni meno pe obedo kit maber dok myero otute me jwayone woko. Mitte ni en otim meno wek obed ki yomcwiny ki wat maber ki utmegine.

8. Tam ango ma jo ma i kare pa Yecu onongo gitye kwede ma ogudo lupwonnyene?

⁸ Pingo Yecu oloko i kom “jo magi matino-ni”? Lupwonnyene onongo gupenye lapeny ni: “Anga ma loyo ki dit i ker me polo?” (Mat. 18:1) Pol pa Lujudaya i kare meno onongo gimito ni jo mukene onengi calo pigi tek adada. Lacoc mo acel owaco ni: “Nongo deyo ki bot jo mukene ki bedo ngat muywek onongo obedo gin ma pire tek loyo i kwogi.”

9. Gin ango ma onongo mitte ni lupwonnye pa Yecu gutim?

⁹ Yecu onongo ngeyo maber ni mitte ni  lupwonnyene guti matek me jwayo cwiny me laro dito ma ocwalo lwite matut i tekwaro pa Lujudaya. En owaco botgi ni: “Ngat madit i kinwu myero odok macalo ngat matidi, ki latel-wic myero obed macalo ngat ma tiyo pi dano.” (Luka 22:26) Wabedo calo “ngat matidi” ka ‘waworo luwotwa macalo jo madito loyowa.’ (Pil. 2:3) Ka wamedde ki dongo kodi cwiny meno, ci pe wabiketo ariya i nyim jo mukene.

10. Tira mene ma lakwena Paulo omiyo ma omyero waket i tic?

¹⁰ Omegiwa ki lumegiwa ducu gidito giloyowa i yo mo olo. Pe tek me niang lok man ka waketo cwinywa i kom kitgi mabeco. Omyero watute me lubo tam ma lakwena Paulo omiyo bot Lukricitayo me Korint ni: “Anga mono ma neno in macalo dano mapat ki jo mukene? Gin ango ma itye kwede ma pe gimii amiya? Ka gimii amiya, pingo iwakke kwede kumeno calo pe gimii amiya nono?” (1 Kor. 4:7) Omyero wagwokke ki atematema me ywayo tam pa dano i komwa nyo me tamo ni piwa tek loyo jo mukene. Me labolle, omege ma gimiyo pwony mabeco adada nyo lumege ma gitye ki diro me cako kwano Baibul ki dano myero gumi pak ki deyo bot Jehovah pi jami ma gitwero cobone.

11. Pwony ango ma wanongo ki i lapor pa Yecu madok i kom kabaka ki laticce?

¹¹ I nge ciko lulub kore ni omyero pe guket ariya i nyim jo mukene, Yecu omiyo lapor i kom kabaka mo ki laticce. Kabaka man ogonyo laticce-ni ki i banya mo madit ma en onongo pe bitwero culone matwal. Lacen, laticce meno okwero gonyo latic lawote ma onongo tye ki banyane mo matidi. I agikkine, kabaka otweyo laticce ma pe lakica-ni i buc. Pwony ango ma wanongo? Yecu owaco ni: “Wora ma tye i polo bene bitimowu kit meno, ka ce pe wutimo kica bot dano ki i cwinywu, dano acel acel ki ominne.”​—Mat. 18:21-35.

12. Ka wakwero timo kica, wacwero cwiny jo mukene nining?

¹² Gin ma laticci otimo pe okelo peko i kome keken ento ocwero cwiny jo mukene bene. Mukwongo, en pe otimo kica ki latic lawote dok “ocito otweye i mabuc nio ka biculo banyane.” Me aryo, en ocwero cwiny lutic luwote ma guneno gin ma en otimo. “Ka lutic wadgi guneno gin ma otimme-ni, ci cwinygi ocwer matek twatwal.” I yo acel-lu, jami ma watimo gudo jo mukene. Ka ngat mo oterowa marac ci wakwero timme kica woko, ngo ma romo timme? Mukwongo, wacwero cwinye pien nongo wakwero timme kica, nyo bene wakwero lok kwede ki nyutte mar. Me aryo, waweko jo mukene me kacokke pe gibedo agonya ka guneno ni wat i kinwa ki ngat meno pe tye maber.

13. Ngo ma wapwonyo ki i gin mutimme i kom painia mo acel?

¹³ Ka watimo kica ki omegiwa ki lumegiwa, wawinyo maber dok wakonyo jo mukene bene me winyo maber. Meno aye gin ma otimme i kom lapainia mo ma wabilwongo nyinge ni Crystal. Lamego mo i kacokkene ocwero cwinye adada. Crystal wiye po ni: “Lokke i kare mukene onongo rac adada ma onongo weko awinyo calo kicoba ki pala. Onongo pe amito wot kacel kwede i tic me tito kwena. Mit koma i tic me pwony kacel ki yomcwinya ocako rweny woko.” Crystal otamo ni etye ki tyen lok mupore me bedo ki cwercwiny. Ento en pe omako lok i cwinye nyo oketo tamme tutwal i kom kit ma en winyo kwede. Pingo? Pien en onongo obedo ngat mamwol dok olubo tam me Baibul  ma nonge i pwony ma wiye tye ni “Tim Kica ki i Cwinyi” ma okatti i Wi Lubele me Oktoba 15, 1999. En otimo kica ki lamego-ni. Crystal owaco ni: “Aniang ni wan ducu watye ka tute me ruko kit pa dano manyen dok ni Jehovah timiwa kica nino ducu labongo penyo gin mo. Awinyo calo kitingo yec mo mapek adada ki i wi gwoka. I kare-ni atye ki yomcwiny odoco.”

14. Ma lubbe ki Matayo 18:21, 22, peko ango ma nen calo lakwena Petero obedo ka yelle kwede dok ngo ma ipwonyo ki i lagam pa Yecu bote?

¹⁴ Wangeyo ni omyero watim kica; meno aye obedo gin ma atir me atima. Ento pud waromo nongo ni tek me timone. Lakwena Petero nen calo i kare mogo bene owinyo kit meno. (Kwan Matayo 18:21, 22.) Ngo ma romo konyowa? Mukwongo, tam matut i kom kit ma Jehovah otimmi kica kwede. (Mat. 18:32, 33) Pe wapore me nongo kicane, ento en timiwa kica labongo penyo gin mo. (Jab. 103:8-10) Medo i kom meno, “wan bene myero wamarre kekenwa.” Pi meno, pe watwero yero ayera ka wamito timo kica nyo pe. Man obedo banya ma omyero wacul bot omegiwa ki lumegiwa ducu. (1 Jon 4:11) Me aryo, lwod gin ma timme ka watimo kica. Waromo konyo ngat ma owango iwa-ni, wakonyo me ribo kacokke, wagwoko watwa ki Jehovah, dok wakwanyo yec mapek ma tye i wiwa woko. (2 Kor. 2:7; Kol. 3:14) Me agikkine, leg bot Ngat ma owaco ni omyero watim kica. Pe iye ni Catan obal kuc ma tye i kin in ki luye luwoti. (Ep. 4:26, 27) Wamito kony pa Jehovah wek wabed ki kuc i kacokke.

15. Gin ango ma Jo Kolocai 3:13 waco ni omyero itim, ka omego nyo lamego mo ocwero cwinyi?

¹⁵ Ka omego nyo lamego mo otimo gin mo ma ocwero cwinyi adada kono? Gin ango ma  omyero itim? Tute ki tekki ducu me gwoko kuc i kinwu. Leg bot Jehovah kun ititte kit ma iwinyo kwede. Lege ni ogo laane i kom ngat ma ocwero cwinyi-ni dok okonyi me neno kit mabeco pa ngat meno​—ma gin aye kit ma Jehovah maro ki i kom ngat meno. (Luka 6:28) Ka pe itwero jalo gin marac ma omeru otimo, tam i kom yo maber loyo ma itwero lok kwede. Ber kare ducu me tamo ni omego nyo lamego-ni pe ocwero cwinyi akaka. (Mat. 5:23, 24; 1 Kor. 13:7) Ka itye ka lok kwede, tam ni en tye ki cwiny maber. Ento ka en okwero yubo wat kono? ‘Medde ki diyo cwinyi’ i kome. Pe iil cingi woko i kom omeru. (Kwan Jo Kolocai 3:13.) Ma dong pire tek loyo ducu, pe imak lok i cwinyi, pien man twero balo watti woko ki Jehovah. Pe iwek gin mo keken odok ariya boti. Ka itimo kit meno, inyuto ni imaro Jehovah loyo gin mo keken.​—Jab. 119:165.

16. Tic ango ma wan ducu watye kwede?

¹⁶ Watye ki pwoc madit ni watwero tic pi Jehovah kacel ma wanote macalo “lwak acel” i te “lakwat acel”! (Jon 10:16) Buk me Organized to Do Jehovah’s Will, pot karatac 165, tito ni: “Kit macalo in itye ka nongo mit pa note meno, itye ki tic i wi me gwokone.” Pi meno, mitte ni “wapwonnye me neno omegiwa ki lumegiwa kit ma Jehovah nenogi kwede.” Ki i wang Jehovah, wan ducu wabedo ‘jo matino’ ma pigi tek. Tika meno aye kit ma ineno kwede omegini ki lumegini? Jehovah neno dok pwoyo jami ducu ma itimo me konyogi ki gwokogi.​—Mat. 10:42.

17. Gin ango ma wamoko tamwa me timone?

¹⁷ Wamaro omegiwa ki lumegiwa. Pi meno, wamoku tamwa “pe me tiyo gin mo ma bimiyo ominwa yokke nyo poto i bal.” (Rom. 14:13) Watero omegiwa ki lumegiwa ni pigi tek loyowa, dok wamito timmigi kica ki i cwinywa. Dong walego ni pe omyero waye ni goro pa jo mukene odok ariya botwa. Me ka meno, omyero “watamu pi gin ma kelo kuc ki gin ma dongo niyewa i kinwa kekenwa.”​—Rom. 14:19.