Kinywala i nino dwe 22 me Decemba, 1929, i Noville, caro mo matidi ma tye ki fam abongwen, cok ki taun me Bastogne, i kabedo ma kilwongo ni Ardennes i lobo Belgium. Abedo ki kwo me yomcwiny i kare me tinona ma wadongo i fam kacel ki lunywalwa. An kacel ki omera matidi, Raymond, onongo wanyeto cak ki cingwa nino ducu dok wakonyo bene tic me kayo kac. I carowa, dano ducu onongo giribo cinggi kacel me konyo lupwur luwotgi.

Babana ma nyinge Emile ki mamana Alice, onongo gubedo Lukatoli mucwiny. Onongo gicito i lega i Ceng Cabit ducu. Ento i mwaka 1939, omege ma lupainia ma gua ki i England gubino i carowa ci gumiyo ki Babana kare me bedo ka gamo ki i posta magajin me Consolation (ma i kare-ni kilwongo ni Awake!). Cutcut, babana oniang ni lok ma i magajin magi obedo lok ada dok man otugo cwinye me cako kwano Baibul. I kare ma en ojuko cito i kanica, jiraniwa, ma yam gubedo luremwa adada, gucako nyuto adegadega i kome. Guketo lyeto matek i kom babana ni myero omedde ki bedo Katoli, dok gwenyo lok obedo magwar pi lok man.

Ocwero cwinya matek me neno lyeto ma kiketo i kom babana. Man otugo cwinya me bako doga bot Lubanga ni okony babana ma lubbe ki lega ma atito pire i acakki me pwony man. Cwinya obedo yom adada i kare ma lyeto ma jiraniwa guketo ocako dok motmot. Man oweko amoko ada ni Jehovah obedo ‘Lagam lega.’

Nazi Germany omonyo lobo Belgium i nino  dwe 10 me Mai, 1940, dok macalo adwogine, lwak dano mapol guringo woko ki i lobo meno. Jo me pacowa guringo tung kupiny me lobo France. Ma wabedo ka wot, onongo kare mogo kwowa bedo ka mading pien nongo wao i kabedo ma lweny okur i kin mony me Germany ki France.

Lacen, ma wadwogo i famwa, wanongo kiyako cokcok jamiwa ducu. Gwokwa, ma nyinge Bobbie, aye obedo tye me jolowa. Jami mutimme magi oweko abedo ka pennye kekena ni, ‘Pingo lweny ki can tye onya tutwal?’

I kare meno, wanongo cuko cwiny matek adada ki i lim pa Omego Emile Schrantz, a laelda mo ma obedo lapainia ma lagen. En otito ka maleng ki i Baibul pingo peko tye i lobo dok ogamo lapenya mukene madok i kom kwo. Adongo wat matut ki Jehovah dok oweko amoko ni en obedo Lubanga ma lamar.

Kadi wa i kare ma lweny peya ogik, jo me pacowa onongo gitwero kubbe ki Lucaden mukene. I Agucito mwaka 1943, Omego José-Nicolas Minet olimo famwa me miyo pwony. En openyo ni, “Anga ma mito nongo batija?” Babana oilo cinge, ci an bene ailo cinga. Wanongo batija i kulu mo matidi macok ki famwa.

I Decemba 1944, mony me Germany ooto lwenygi me agikki i kare me Lweny me Aryo me Wi Lobo, tung kupoto ceng me Ulaya, dok lweny man kilwongo ni Battle of the Bulge. Onongo wabedo cok ki ka ma lweny man otimme iye, dok cokcok pi dwe acel wabedo i rum ma i te otwa. Nino mo acel ma akato woko ka pito lee, bom opoto i famwa, ci oketo wi ot ban woko. Lamony mo me Amerika ma onongo tye i ot gwoko lee odange ni, “But idarre piny!” Aringo ci abuto i ka ngete, dok en oketo otok nyonyone i wiya me gwoka.

I nge lweny, wabedo ki kare me kubbe ki omege ki lumege ma gitye i kacokke me Liège, ma tye kilomita 90 (mairo 56) tung kumalo ki ka ma wabedo iye. I nge kare mo, wacako gurup mo matidi i Bastogne. Acako tic i opic ma neno lok i kom mucoro dok abedo ki kare me kwano cik. Lacen, atiyo macalo lapilida i opic pa gamente me tedero. I mwaka 1951, wayubo gure me adwol mo matidi  i Bastogne. Dano ma romo miya acel gubedo tye i gure man, kadi wa lamego mo ma lapainia ma kome mit adada, ma nyinge Elly Reuter. En onongo onyono lela pi kilomita 50 (mairo 31) me bino i gure man. Ma pe otero kare, wacako winnye ci wamoko tamwa me nyomme. Elly onongo pud onongo waraga me cito i Cukul me Gilead i lobo Amerika anonga. En ocoyo waraga i gang kalwa madit me tito pingo pe ebitwero jolo lwongo meno. Omego Knorr, ma onongo tye ka telo wi jo pa Jehovah i kare meno, odwoko waragane kun waco ni gwok nyo i nino mo Elly bibedo ki kare me cito i Gilead kacel ki cware. Wanyomme i Febuari 1953.

I mwaka meno, an kacel ki Elly wabedo ki kare me cito i gure me New World Society Assembly ma obedo tye i Yankee Stadium, i New York. Ma watye kunnu, arwatte ki omego mo ma omiya tic maber adada dok olwonga me kobo i lobo Amerika. I nge lega bot Jehovah pi lok man, wamoko tamwa me kwero tic meno woko ci wadok cen i Belgium me konyo gurup matidi ma tye ki lutit kwena apar i Bastogne. I mwaka ma lubo meno, cwinywa obedo yom adada i kare ma Elly onywalo wodwa, Serge. Ki cwercwiny madit, i nge dwe abiro keken, Serge kome odoko lit ci oto woko. Wanywako arem cwinywa ki Jehovah i lega, dok wanongo teko ki i genwa me nicer.

I Oktoba 1961, abedo ki kare me nongo dog tic ma atiyo i nino mogo kun onongo mina kare me tic macalo painia. Ento i nino meno kikome, omego ma doro wi tic i jang gang kal me Belgium ogona cim. En openya ka atwero cako tic macalo laneno me adwol. Apenye ni, “Pe kong waromo cakone ki tic macalo painia ma peya waye tic meno?” Omege guye. I nge tic macalo painia pi dwe aboro, wacako tic me limo adwol i Sektemba 1962.

I nge bedo i tic me limo adwol pi mwaki aryo, kilwongowa me tic i Betel ma i Brussels. Wacako tic kunnu i Oktoba 1964. Tic manyen man okeliwa mot mapol. I nge kare manok keken ma Omego Knorr olimo Betelwa i mwaka 1965, abedo ki ur ma kicima me doro wi tic ma i jang gang kal man. Lacen, wan ki Elly kilwongowa me cito i kilaci me 41 me Gilead. Lok ma Omego Knorr onongo owaco mwaki ma romo 13 angec ocobbe kakare! I nge tyeko kwan, wadok cen ka tic i Betel ma i Belgium.

Pi mwaki mapol, abedo ki kare me tic ki ngecca i kom cik me cung pi twero pa jo pa Jehovah me wore i Ulaya kacel ki kabedo mukene. (Pil. 1:7) Macalo adwogi me tic man, arwatte ki ludito ma gia ki i lobe makato 55 kulu ka ma kiketo iye kigeng i kom ticwa mogo nyo ducu. Me kaka tito bot ludito magi ni atye ki ngec madwong madok i kom cik, onongo acako ki nyutte ni abedo “dano pa Lubanga.” Kare ducu, onongo apenyo Jehovah  pi tirane i lega, pien angeyo ni “[Jehovah] aye ma loyo cwiny kabaka [nyo langolkop], macalo kulu ma mol, en loko piine mol cito ka ma en mito.”—Car. 21:1.

Wiya pud po i kom lok mo ma wabedo kwede ki lamemba mo me ot moko cik me European Parliament. Onongo dong apenyo me lok kwede tyen mapol, ci i agikkine en oye me rwatte kweda. En owacca ni, “Abimiyi dakika abic keken, dok pe abimedo kadi tonne mo i wiye.” Akulo wiya piny ci acako lega. Ki lworo manok, laco man openya ngo ma atye ka timo. Ailo wiya ci awacce ni, “Abedo ka pwoyo Lubanga pien in bene itye laticce.” En openya ni, “Itye ka lok i kom ngo?” Anyutte Jo Roma 13:4. En onongo obedo Lapurutanti ma ngeyo Baibul, pi meno wang Baibul man ogudo cwinye. Adwogine obedo nining? En oloko kweda pi dakika 30, dok lokwa owoto maber adada. En bene owaco ni etye ki woro pi tic pa Lucaden pa Jehovah.

Pi mwaki mapol, jo pa Jehovah dong gulwenyo pi twerogi i kot ma i Ulaya ma kwako bedo ma pe gicwako tung ka mo, twero me gwoko lutinogi, lok kom culo mucoro, ki mukene. Obedo twon mot madit adada bota me tic kacel kwedgi ki me neno kit ma Jehovah okonyowa me loyo kot magi. Lucaden pa Jehovah dong guloyo kot makato 140 kulu i European Court of Human Rights!

Lacen, atiyo kacel ki Omego Philip Brumley, ma a ki i gang kalwa madit kacel ki Omego Valter Farneti, ma a ki i lobo Italy, me konyo omegiwa ki lumegiwa me Cuba me woro Jehovah agonya, pien onongo kiketo kigeng i kom ticwa kunnu. Acoyo waraga i gang kal me Cuba ma tye i lobo Belgium ci arwatte ki ladit ma kicimo me cobo lokwa. I cokkewa mogo mukwongo, pe wamedo ki cobo niang manok ma oweko gamentegi oketo kigeng i kom ticwa.

I nge penyo pi tira ki bot Jehovah i lega, wapenyo pi twero me cwalo Baibul ma romo 5,000 i Cuba, ci guye. Baibul magi oo maber ci kipokogi bot utmege, pi meno wamoko ni Jehovah tye ka goyo laane i kom ticwa. I nge meno, wapenyo pi twero me cwalo Baibul mukene ma romo 27,500. Gamente guminiwa twero man bene. Konyo omegiwa ki lumegiwa me Cuba me bedo ki Baibul ma meggi omiya twon yomcwiny madit adada.

Abedo ka limo Cuba tyen mapol me konyo me yabo ticwa. Pi meno, abedo ki kare me  dongo wat maber ki ludito mapol me gamente.

I mwaka 1994, dano makato 1,000,000 kulu kinekogi nek alany macalo adwogi me adage i kom kaka me Tutsi ma gibedo i lobo Rwanda. Ki cwercwiny, utmegiwa mogo bene kinekogi. Ma pe orii, kicimo gurup pa omege mo me miyo kony bot omege ki lumege me lobo meno.

I kare ma gurupwa oo i Kigali, wanongo ni kor ot me opic me gonyo leb kacel ki ka gwoko bukke opong ki bur keken ma ricac otuco. Wawinyo jami mogo malik ma otimme i kom omegiwa ki lumegiwa ma kitongogi ki panga. Ento bene wawinyo pi labol mabeco pa omege ki lumege ma gukonyo luwotgi. Me labolle, warwatte ki omego mo ma obedo Tutsi ma okanne i bur mo i te ngom pi nino 28, kun Lucaden ma gubedo Hutu aye gubedo ka gwokke. I kare ma wabedo ki cokke i Kigali, watute matek me kweyo cwiny utmege makato 900.

I ngeye, wangolo boda me donyo i Zaire (ma i kare-ni kilwongo ni Democratic Republic of the Congo) me yenyo gurup madit pa Lucaden ma gua ki i Rwanda ci guringo i kam pa luring ayela i boma me Goma. Wayenyogi kwe, pi meno, walego Jehovah ni oterwa ka ma gitye iye. I nge meno waneno ka laco mo bino tung botwa, dok wapenye ka en ngeyo Lacaden pa Jehovah mo keken. En ogamo ni: “Ada, an atye Lacaden. Atwero terowu ka ma komitti ma miyo kony tye iye.” I nge bedo ki cokke me cuko cwiny kacel ki komitti man, warwatte ki luring ayela ma romo 1,600 me minigi kwe cwiny. Wanywako kwedgi bene waraga ma oa ki bot Lukiko Madit. Omege ki lumege gubedo ki yomcwiny me winyo cuko cwiny man ki i waraga meno: “Watye ka lega piwu kare ducu. Wangeyo ni Jehovah pe biwekowu.” Lok meno mua ki bot Lukiko Madit onongo tye ada. I kare-ni, Lucaden makato 30,000 gitye ka tic pi Jehovah i Rwanda!

I nge rii i nyom pi mwaki 58, arwenyo dakona me amara Elly i mwaka 2011. Atito ki Jehovah kit ma cwinya otur kwede dok en okweyo cwinya. Anongo bene cuko cwiny ki i nywako kwena maber me Ker-ri ki jo mukene.

Kadi bed dong atye ki mwaka 90 ki wiye, ento pud anywako i tito kwena cabit ducu. Cwinya yom ni atwero miyo kony bot Dipatmen ma Neno Lok kom Cik kany i jang gang kal me Belgium, me nywako ngecca ki jo mukene, ki me cuko cwiny Lubetel ma pud giyot.

Mwaki ma romo 84 angec, alego bot Jehovah pi tyen mukwongo. Obedo acakki me wot mamwonya adada ma onyika cok ki Jehovah. Pud dong atye ki pwoc madit ya ni i kare me kwona ducu Jehovah owinyo legana.—Jab. 66:19. b