Wek wayom cwiny Jehovah, mitte ni wabed ki niye i kome. Ento, Baibul tito ni “jo mogo pe gitye ki niye.” (2 Tec. 3:2) I kare ma lakwena Paulo owaco lok meno, en onongo tye ka lok i kom “jo maraco, ma kitgi oballe woko” ma gubedo ka keto aunauna i kome. Ento lok ma en oloko i kom niye meno, gudo wa jo mukene. Jo mogo pe gimito ye ni tye Lubanga ma ocweyo jami ducu. (Rom. 1:20) Jo mukene giwaco ni gitye ki niye i kom gin mo nyo ngat mo ma tye ki teko madwong adada. Ento niye ma kit meno pe romo me yomo cwiny Jehovah.

Mitte ni wamok ni Jehovah tye ada dok ni “en miyo bakacic” bot jo ma gitye ki niye matek i kome. (Ibru 11:6) Wek wadong niye ma kit man, wamito kony pa cwiny maleng pa Lubanga. Me nongo cwiny maleng, omyero waleg Jehovah pire. (Luka 11:​9, 10, 13) Yo mukene ma pire tek ma watwero nongo kwede cwiny maleng aye ki kwano Baibul, ma kicoyo ki teko pa cwiny maleng pa Jehovah. Omyero bene walwod gin ma wakwano dok watute matek me ketone i tic. Ka watimo meno, ci nongo watye ka ye ki cwiny maleng pa Jehovah me konyowa kwo i yo ma nyuto ni watye ki niye ma yomo cwiny Lubanga.