LUNYODONA gua ki i Tbilisi, Georgia, ci gudak i Canada i mwaka 1910. Onongo gibedo i ot mo matidi i fam macok ki Pelly, Saskatchewan i kupoto ceng me lobo Canada. Kinywala i 1928, dok an aye latin cogo i kin lutino abicel. Babana oto ma pud atye ki dwe adek keken i ic, mamana bene oto ma pud onongo atidi adada. I nge kare manok, lamera madit ma nyinge Lucy bene oto woko ma tye ki mwaka 17. Pi meno, nera Nick aye obedo ka gwokowa.

I nino mo acel ma pud atidi, jo ma gangwa guneno ka atye ka telo yib kana. Gubedo ki lworo adada pien onongo gitamo ni kana twero gweya, pi meno gudange matek ni awek yib kana. Pe aniang ngo ma onongo gitye ka wacone pien onongo aloko ngeya botgi. Ento gin mo marac pe otimo, pe awanne. Meno aye nino ma kiniang ni an kara ita oding woko.

Laremwa mo acel ominiwa tam ni meno bedo ber ka kitera i cukul pa luding it. Pi meno, nera Nick otera i cukul pa luding it i Saskatoon, Saskatchewan. Cukul meno onongo bor adada ki gang, dok onongo alwor pien onongo pud atye ki mwaka abic keken. Onongo alimo lupacowa i kare me yweyo ki i  kare me oro keken. I nge kare manok, apwonyo leb pa luding it dok acako tuku ki lutino mukene.

I 1939, Marion, lamera madit onyomme gin ki Bill Danylchuck, ci gucako gwoko an ki lamera Frances. Gin aye gukwongo cako kwano Baibul ki Lucaden pa Jehovah. I kare ma atye i yweyo i oro, gutemme ki tekgi ducu me nywako gin ma onongo gitye ka pwonyone ki i Baibul kweda. Onongo pe yot ki wan me lok pien onongo pe gingeyo leb pa luding it. Ento onongo gitwero nenone ni amaro gin ma atye ka pwonyone madok i kom Jehovah. Onongo angeyo ni gin ma gitye ka timone-ni onongo kubbe ki gin ma Baibul waco, pi meno acako wot kacel kwedgi ka gicito ka tito kwena. I nge kare mo manok, adongo miti me nongo batija, ci i Sektemba 5, 1941, Bill obatija an i tang mo madit ma pii opong iye. Piine onongo ngic adada!

I 1946, ma adwogo gang i yweyo, wacito i gure madit i Cleveland, Ohio, U.S.A. I nino me acel me gure meno, lamera obedo ka cona pwony ma gitye ka miyone wek abed ka lubo yub me gure meno. Ento i nino me aryo, cwinya obedo yom me niang ni tye gurup mo pa luding it ma gitye ka gonyigi pwony i leb pa luding it. Abedo ki yomcwiny madit me nongo mit pa yub man, dok bene aniang gin ma Baibul pwonyo maber adada!

I kare meno, Lweny me II me Wi Lobo onongo pud ogik agika, dok dano ducu onongo mito nyuto cwak pi lobogi. Ento i kare ma adwogo ki i gure me dok cen i gang kwan, onongo amoko tamma me gwoko gennena bot Jehovah. Pi meno aweko goyo calut i nyim bendera, ajuko wero wer me lubaro, ki kwer mogo me lobo. Aweko wot i kanica kacel ki lutino kwan mukene-ni. Lupwonye me gang kwan onongo cwinygi pe yom i koma dok gucako bura kun giloko lok goba wek alok tamma. Lutino kwan luwota guniang gin ma onongo tye ka timme, dok man omiya kare me miyo caden botgi. Lutino kwan luwota me labolle, Larry Androsoff, Norman Dittrick, ki Emil Schneider guye lok ada, dok pud gitye ka tic pi Jehovah wa i kare-ni.

Onongo atute ki teka ducu me tito kwena bot luding it ka alimo boma mukene. Me labolle, i kare ma atye i Montreal acito ka ma luding it gigure iye. Ki kunnu, atito kwena bot Eddie Tager, awobi mo ma onongo tye i gurup pa lutim aranyi. En obedo i kacokke pa luding it ma tye i Laval, Quebec nio wa i tone i mwaka mukato-ni. Arwatte bene ki bulu mo ma nyinge Juan Ardanez. En obedo ka kwedo lok me niang ka ce gin ma etye ka pwonyone jenge i Baibul kit macalo jo me Berea i kare-ca gutimo-ni. (Tic pa Lukwena 17:10, 11) En ojolo lok ada, dok otiyo macalo laelda i Ottawa, Ontario nio wa i tone.

I 1950, adak i Vancouver. Kadi bed ni amaro tito kwena bot luding it, ento wiya pe biwil i kom gin mutimme i kare ma atito kwena bot Chris Spicer, dako mo ma pe tye lading it i teng gudo. Oye culo pi magajin wek ebed ka nongone  kare ki kare dok onongo mito ni acit arwatte ki cware, Gary. Alimogi, dok wabedo ka nyamo lok pi cawa malac kun wacoyo i karatac. Pe wamedo ki nonge i ngeye nio wa i kare ma gubino ka motte i gure mo ma obedo i Toronto, Ontario. Gary onongo obinongo batija i nino meno. Gin mutimme-ni opoyo wiya i kom kit ma pire tek kwede me tito kwena kare ducu pien gwok nyo ngat ma watito kwena bote-ni bijolo ada lacen.

Lacen, adok cen i Saskatoon. Ci arwatte ki dako mo ma openyo ni akwan Baibul ki Jean gin ki Joan Rothenberger, lutino rudine, ma onongo itgi oding. Gin bene onongo gikwano i cukul pa luding it ma an akwano iye con. Ma pe otero kare malac, lutino rudi-ni gucako nywako gin ma gikwano ki lutino kwan luwotgi. Lacen, dano abic ki ot kwangi gudoko Lucaden pa Jehovah. Ngat acel i kingi nyinge Eunice Colin. Onongo kong arwatte kwede con i cukul pa luding it i kare ma onongo adong ki mwaka acel me tyeko kwanna. I kare meno en omina cwit, ci openya ka watwero bedo lurem. Lacen en odoko ngat mo ma pire tek adada i kwona. En odoko dakona!

I kare ma min Eunice oniang ni Eunice tye ka kwano Baibul, en oloko ki ngat ma loyo gang kwan ni obit Eunice wek pe omedde ki kwano Baibul. Kadi bed ni en otute me genge dok okwanyo wa bukke me kwanne woko, Eunice omoko tamme me bedo lagen bot Jehovah. I kare ma en mito nongo batija, lunyodone guwacce ni, “Ka idoko Lacaden pa Jehovah, ci myero ia iwek gangwa woko!” Pi meno, i kare ma Eunice oo mwaka 17, en oweko gang ci ocako bedo ki luot mo ma gubedo Lucaden. En omedde ki kwanne ka lacen onongo batija. I kare ma wanyomme i 1960, lunyodone pe gubino i nyomwa.  Ento ka kare woto ki kato, gucako dongo woro pi niyewa ki kit ma watye ka pwonyo kwede lutinowa.

Macalo lunyodo ma itgi oding, onongo pe yot me pwonyo lutino awobe abiro ma giwinyo lok. Ento watute me nenone ni gupwonyo leb pa luding it wek lok kwedgi ki pwonyogi ki lok ada obed yot. Utmege ma i kacokke gukonyowa adada. Me labolle, i nino mo lanyodo mo ocoyo botwa waraga kun wacciwa ni awobiwa acel tye ka tic ki leb marac i Ot me Ker. Man okonyowa me cobo lok meno oyotoyot adada. Lutino angwen—James, Jerry, Nicholas, ki Steven—gitye luelda dok gitye ka tic pi Jehovah ki gen kacel ki mongi. Nicholas gin ki dakone, Deborah, gikonyo me gonyo buke i leb pa luding it i jang gang kal ma i lobo Amerika.

Ki cwercwiny madit, ma onongo dong wacok o mwaka 40 i nyomwa, Eunice oto ki two kanca. I kare ma en tye ka two, genne i kom nicer omine teko me cung matek. Atye ki miti matek me rwatte kwede i kare me nicer.

 I Febuari 2012, apoto ci amuku bama. Onongo amito kony pa jo mukene, pi meno, acito ka bedo bot woda gin ki dakone. I kare-ni dong watye i kacokke pa luding it ma tye i Calgary, ka ma atye ka tic macalo laelda. Man aye tyen mukwongo ma abedo i kacokke ma kiloko iye leb pa luding it! Gin ango ma okonya me gwoko watta ki Jehovah wek obed matek i kare man ducu ma onongo atye i kacokke me leb muno-ni? Jehovah aye ma okonya. En ogwoko cikkene me gwoko lutino kic. (Jabuli 10:14) Atye ki pwoc madit bot jo ducu ma gubedo ki miti me coona coc, me pwonyo leb pa luding it, ki dong ma gutute me gonyo leb bota ducu.

I kare mogo onongo pe atwero niang gin ma kitye ka wacone nyo awinyo calo pe tye ngat mo ma ngeyo kit me konyo luding it. I kare macalo meno ma nongo cwinya otur adada dok nongo amito ilo cinga woko-ni, atamo i kom lok ma Petero owaco bot Yecu ni: “Rwot, wabicito bot anga? In itye ki lok me kwo ma pe tum.” (Jon 6:66-68) Apwonye me diyo cwinya calo utmege mapol ma itgi oding ma dong gurii i ada pi kare malac. Dok apwonye me jenge i kom Jehovah kacel ki dulle dok man okela mot mapol. I kare-ni dong tye jami mapol i leb ma aniang, dok cwinya yom ni dong atwero bedo i cokke ki gure i leb pa luding it ma kigonyo i leb pa jo Amerika. Ki lok ada, anongo yomcwiny kacel ki mot mapol i tic pi Jehovah, Lubangawa.