1, 2. Gin ango ma Petero opwonyo i nge ciko rec dyewor lung?

LUPWONNYE abiro pa Yecu gubedo ka ciko rec dyewor benebene i nam me Galilaya. Ento pe gumako kadi rec acel mo. Odikone, Yecu onyutte botgi i dong nam i nge cere. “En owaccigi ni, ‘Wubol obwo tung malacuc me yeya, ci wubinongo.’ Gubolo, tingo obwo ongayogi pi pol rec.”—Jon 21:1-6.

² Yecu ominigi mugati ki rec ni gucam. Ci olokke bot Cimon Petero kun penye ni: ‘Cimon wod pa Jon, in imara makato gin-ni?’ Yecu onongo ngeyo ni Petero maro mako rec. Oromo bedo ni Yecu onongo tye ka penyo Petero ka ce maro en kacel ki pwonnye makato ticce me mako rec. Petero ogamo ni: “Rwot, in ingeyo an amari.” (Jon 21:15) Nicakke i nino meno, Petero onyuto ni eloko lok ada. En onyuto ni emaro Kricito kun lungo wiye i tic me tito kwena, dok en odoko ngat ma pire tek i kacokke pa Lukricitayo.

3. Gin ango ma Lukricitayo myero gugwokke kwede?

 ³ Gin ango ma wapwonyo ki i lok ma Yecu owaco bot Petero? Myero waket tek wek marwa pi Kricito pe okwe. Yecu onongo ngeyo ni kwo i lobo man ma rac-ci bibedo tek adada, dok ni wabikemme ki par kacel ki pekki mapol. I lapor ma Yecu omiyo madok i kom laco kodi, en owaco ni jo mukene gibiye “lok me ker” dok gibibedo ki arima i acakkine. Ento i nge kare mo, “paro lok me lobo man, ki maro lonyo,” ‘bidiyo lok me ker woko,’ dok arima pa jo magi bikwe woko. (Matayo 13:19-22; Marako 4:19) Ka pe wagwokke, ci paro pi kwo me nino ducu bibedo macalo ariya i ticwa pi Jehovah. Pi tyen lok meno, Yecu ociko lupwonnyene ni: “wugwokke kenwu, cwinywu owek doko nwang pi woro cam, ki mero kongo, ki pi lok me kwo man ma miyo wubedo ki tam mapol.”—Luka 21:34.

4. Gin ango ma bikonyowa me niang kace marwa pi Kricito tye matek? (Nen cal ma tye i pot karatac 21.)

⁴ Calo Petero, wan bene watwero nyutone ni wamaro Kricito ka waketo pi tic me tito kwena maber bedo mukwongo i kwowa. Watwero medde ki timo meno nining? Penye kekeni ni: ‘Gin ango ma amaro loyo i kwona? Yomcwinya tika a ki i tic pi Jehovah nyo kece ki i gin mukene?’ Me gamo lapeny magi, kong dong wanen jami adek ma gitwero weko marwa pi Kricito kwe woko. Jami magi aye dog ticwa, galowang, ki dong jami me kom.

5. Luwi odi gitye ki tic ango?

⁵ Petero onongo mako rec pe ni pien obedo tic ma en maro keken ento man onongo obedo tic ma en timo me gwoko jo me gange. I kare-ni bene, Jehovah omiyo tic bot luwi odi me gwoko jo ma ganggi. (1 Temceo 5:8) Myero guti matek me cobo tic man. Kadi bed kumeno, i kare man me agikki-ni dog ticwa twero weko wabedo ki par mapol.

6. Pingo tic ma watimo twero keliwa par mapol?

⁶ Pol kare, dano ma gimito tic dwong loyo tic ma tye. Man weko pyem bedo tye pi nongo tic. Jo mapol gitiyo pi cawa malac kadi bed ni culle nok. I kare-ni, lubiacara gimito ni giti ki jo manok me timo tic mapol. Pi meno, lutic gibedo ki par mapol, giol adada dok bene twero kelo wa two. Jo mukene gibedo ki par ni ka pe gitimo gin ma ladit ticgi miti ci gitwero rwenyo ticgi woko.

7, 8. (a) Anga ma myero wabed lugen bote mukwongo? (b) Pwony ango ma pire tek ma omego mo acel i Thailand onongo?

⁷ Macalo Lukricitayo, myero wabed lugen bot Jehovah makato ngat mo keken, man kwako wa ludito me dog ticwa. (Luka 10:27) Dog ticwa konyowa me nongo jami ma mitte pi kwowa ki pi ticwa me pwony. Ento pi ticwa twero bedo tek makato worowa ka pe wagwokke.  Watwero nongo pwony ki i gin mutimme i kom ominwa mo i lobo Thailand. En owaco ni: “Ticca me yubo kompiuta onongo mit adada, ento onongo mitte ni ati pi cawa malac. Macalo adwogine, onongo dong ape ki cawa pi jami me cwiny. Lacen, acako niang ni wek aket pi Ker-ri mukwongo, myero alok tic ma atiyo.” Ngo ma omego man otimo?

⁸ En owaco ni: “I nge goyo pulan pi mwaka acel, amoko tam me cako cato ice cream i teng gudi. I acakkine, jamine onongo pe yot dok cwinya otur adada. Ka arwatte ki jo ma abedo ka tic kwedgi con, onongo ginyera dok gipenya pingo atamo ni cato ice cream dok ber loyo tic i kom kompiuta ma nongo abedo ka ma ngic. Alego bot Jehovah, dok akwaye ni okonya wek acob yub ma atye kwede me bedo ki cawa muromo pi jami me cwiny. Ma pe otero kare malac, jamine ocako yubbe. Acako niang i kom kit ice cream ma luwil gimaro dok adongo dirona me yubo ice cream mamit. I nge kare manok, onongo acato ice cream ducu ma ayubo nino ducu. Ki lok ada, cente ma anongo onongo dwong loyo ma onongo anongo i kare ma ayubo kompiuta. Cwinya yom i kare-ni loyo pien ape ki par ma onongo atye kwede i kare ma atiyo ticca macon. Dong ma pire tek loyo, awinyo ni atye cok ki Jehovah loyo kit macon.”—Kwan Matayo 5:3, 6.

9. Watwero medde ki bedo ki neno mupore pi dog ticwa nining?

⁹ Jehovah tye ki pwoc madit pi tic matek ma watiyo. Dok ka watiyo matek ci wanongo adwogi maber. (Carolok 12:14) Ento myero wanen ni dog ticwa pire pe odoko tek makato pi ticwa pi Jehovah. I kare ma Yecu tye ka lok i kom jami ma mitte me kom, en owaco ni: “Kong wukwong keto cwinywu i kom kerre, ki nongo kit ma atir ma en tye kwede, ci jami magi ducu gibimedo botwu.” (Matayo 6:33) Ento wangeyo nining ka watye ki neno mupore pi dog ticwa? Watwero pennye kekenwa ni, ‘Tika anongo yomcwiny i dog ticca ma weko aneno ticca pi Lubanga calo gin ma konnye pe?’ Lwodo lok i kom lapeny magi twero konyowa me niang gin ma wamaro.

10. Pwony ango ma pire tek ma Yecu omiyo?

¹⁰ Yecu onyutiwa ngo ma myero pire obed tek loyo i kwowa. I nino mo acel, en ocito ka limo Maliam gin ki Marita. Marita ocako yubo cam, ento Maliam obedo i nget Yecu ka winyo pwonnye. Marita ocako lok ni Maliam pe tye ka konye. Yecu owaco ki Marita ni: “Maliam oyero dul maber ma pe gibikwanyo woko ki bote.” (Luka 10:38-42) Yecu  omiyo pwony mo ma pire tek adada botgi. Wek mitiwa pe ogengwa ki woro Jehovah ki dok wek wanyut marwa pi Kricito, myero wayer “dul maber.” Man nyuto ni watwa ki Jehovah myero pire obed tek loyo gin mo keken i kwowa.

11. Gin ango ma Baibul waco madok i kom yweyo?

¹¹ Wadwong ki jami me atima adada, pi meno i kine mukene myero wanong kare me yweyo. Baibul waco ni: “Gin maber makato ma dano myero otim en aye ni en myero ocam cam dok omat mat, wek onong yomcwiny i tic ma en tiyo.” (Latitlok 2:24) Yecu onongo ngeyo ni pire tek bot lupwonnyene me nongo yweyo. Me labolle, i nge tic matek i ticgi me tito kwena Yecu owaccigi ni: “Wubin kenwu ka ma dano pe iye, wuywe manok.”—Marako 6:31, 32.

12. Pingo myero wagwokke ki galowang? Mi labol.

¹² Galowang twero konyowa me yweyo wiwa ki komwa. Ento myero waket tek wek galowang pe dok odok gin ma pire tek loyo i kwowa. I cencwari me acel, jo mapol onongo gitye ki lakodi tam ni: “Wacamu, wamatu, pien diki wabito woko.” (1 Jo Korint 15:32) Tam ma kit meno bene pud tye i kare-ni. Me labolle, laco mo matidi i tung Kupoto ceng me lobo Ulaya ocako cito i cokke pa Lukricitayo. Ento en onongo maro galowang adada ma oweko en ojuko ribbe kacel ki Lucaden pa Jehovah woko. Lacen, en oniang ni mitine pi galowang tye ka kele peko mapol. En dok ocako kwano Baibul, ci lacen ocako tito kwena maber. I nge batijane, en owaco ni: “Akoko ange i kare-ni pi kare ma abalo ma onongo pud peya aniang ni tic pi Jehovah kelo yomcwiny madit ma loyo galowang ma lobo-ni miyo.”

13. (a) Mi lapor ma nyuto pingo rac me tero cawa malac i galowang. (b) Gin ango ma twero konyowa me bedo ki neno mupore i kom galowang?

¹³ Galowang myero okonywa me yweyo wiwa ki me nongo kero. Pi meno, cawa ma rom mene ma myero water i galowang? Me konyowa gamo lapeny man, kong watam i kom lok man. Dano mapol gimaro camo cake ki cwit. Ento wangeyo ni ka wamaro camo jami magi kare ducu ci twero balo yotkomwa. Ka wamito bedo ma komwa yot, myero wacam cam maber. I yo acel-li, ka watero cawa malac i galowang, ci bigudo watwa ki Jehovah i yo marac. Gin ango ma twero konyowa me niang kace watye ki neno matir i kom galowang? Gin acel ma watwero timone aye me coyo piny wel cawa ma wacwalo i cabit mo acel i timo jami ma kubbe ki worowa pi Jehovah, calo cokke pa Lukricitayo, tic me tito kwena, ki dong kwano Baibul. Ci dok wacoyo wel cawa ma wacwalo i cabit meno i galowang calo tuku me ryeyo lee, neno telebijon, ki dong tuku me vidio. Ka waporo cawa ma wacwalo i timo jami ma kubbe ki worowa pi Jehovah ki cawa ma wacwalo i galowang, mene madit kato lawote? Tika mitte ni watim alokaloka?—Kwan Jo Epeco 5:15, 16.

14. Gin ango ma twero konyowa me yero galowang mupore?

¹⁴ Jehovah ye ki wan me yero galowang,  dok luwi odi bene gitwero yero galowang pi jo me ganggi. Jehovah otiyo ki Baibul me miniwa cik ma igi lac ma nyutiwa tamme. Cik ma igi lac magi twero konyowa me moko tam matir. * (Nen lok ma tye i tere piny.) Galowang maber obedo “mot ma Lubanga omiyo.” (Latitlok 3:12, 13) Tye lok ada ni galowang ma dano ducu maro pe girom. (Jo Galatia 6:4, 5) Ento, myero wagwokke ki galowang ma wayero. Yecu owaco ni: “Ka ma lonyowu tye iye cwinywu bene bedo iye.” (Matayo 6:21) Mar pi Kabakawa Yecu, bicuko cwinywa me tam, lok ki timo jami ma nyuto ni Ker-ri pire tek botwa loyo gin mo keken.—Jo Pilipi 1:9, 10.

15, 16. (a) Miti pi jami me kom twero bedo macalo owic botwa nining? (b) Tam me ryeko ango ma Yecu omiyo madok i kom jami me kom?

¹⁵ Jo mapol i kare-ni gitamo ni myero gibed ki bongi, cim nyo kompiuta manyen loyo i cuk. Gimaro jami me kom adada, dok gitamo ni cente pire tek loyo gin mo keken. Macalo Lakricitayo, gin ango ma pire tek loyo boti? Penye kekeni ni: ‘An mono atero cawa malac i tamo pi mutoka nyo ruk manyen loyo i cuk ma ka yubbe pi cokke? Tika alungu wiya i timo jami me nino ducu ma weko  pe anongo cawa muromo me lega nyo kwano Baibul? Ka pe wagwokke, marwa pi jami me kom twero bedo tek loyo marwa pi Kricito. Myero watam i kom lok ma Yecu owaco ni: “wugwokke i paro lim.” (Luka 12:15) Pingo en owaco meno?

¹⁶ Yecu owaco ni “pe tye dano mo ma twero tic ki rwodi aryo.” Dok omedde ni: “Pe wutwero tic pi Lubanga ka dok wutiyo pi lim bene.” Pe twere me tic pi Jehovah ki cwinywa ducu kun kitungcel nongo watye ka keto cwinywa i kom jami me kom. Yecu owaco ni ‘wabikwero ngat acel ci wamaro mukene-ni, nyo wabimoko i kom ngat acel, ci wacayo ngat mukene-ni.’ (Matayo 6:24) Pi roc ma watye kwede, mitte ni wamedde ki lweny matek ki “miti me komwa” ma man bene kwako miti pi jami me kom.—Jo Epeco 2:3.

17. (a) Pingo jo mukene ginongo tek tutwal me bedo ki neno mupore pi jami me kom? (b) Gin ango ma twero konyowa me lweny ki miti me kom?

¹⁷ Jo mapol giketo cwinygi ducu i mitigi pigi kekengi dok man weko bedo tek botgi adada me bedo ki neno mupore i kom jami me kom. (Kwan 1 Jo Korint 2:14.) Twero bedo tek botgi adada me poko kin gin maber ki marac pien nongo pe gitwero tam i yo matir. (Jo Ibru 5:11-14) Mitigi pi jami me kom dongo medde ameda. Dok mitigi dongo medde ka gunongo jami me kom mapol. (Latitlok 5:10) Ento tye gin mo ma watwero timone me lweny ki kodi tam meno. Kwano Lok pa Lubanga kare ducu bijingowa wek walweny ki miti pi jami me kom. (1 Petero 2:2) Yecu obedo ka lwodo lok me ryeko pa Jehovah, dok man okonye me cung matek i kom abita pa Larac. (Matayo 4:8-10) I kare-ni bene, ka wamito lweny ki miti me jami me kom, myero wati ki lok me ryeko pa Jehovah i kwowa. Man binyuto bot Yecu ni wamarre makato jami me kom.

18. Gin ango ma imoko tammi me timone?

¹⁸ I kare ma Yecu openyo Petero ni: ‘In imara makato gin-ni?’ en onongo tye ka pwonyo Petero ni tic pi Jehovah myero obed gin ma pire tek loyo gin mo keken. Meno bene rwatte pien nying Petero te lokke ni “Pata Got.” Kit Petero mabecone gitwero porone ki got. (Tic pa Lukwena 4:5-20) I kare-ni, wan bene wamito ni marwa pi Kricito obed matek. Pi meno, wabedo ki neno mupore pi dog ticwa, galowang, ki jami me kom. Man binyuto ni calo Petero, wan bene watye ka wacci: “Rwot, in ingeyo an amari.”