Pe Iwek Marri Okwe Woko
“Kit macalo tim maraco bibedo ka medde ameda-ni, mar pa jo mapol bikwe woko.”
WER: 60, 135
1, 2. (a) Lok pa Yecu ma kicoyo i Matayo 24:12 onongo kwako angagi mukwongo? (b) Buk me Tic pa Lukwena nyuto nining ni pol pa Lukricitayo me cencwari me acel gugwoko margi obedo matek? (Nen cal ma tye i pot karatac man.)
I KARE ma Yecu tye i lobo, en otito kit ma dano gibingeyo kwede ni gitye ka kwo i kare me “agikki piny.” I kin jami mukene, en owaco ni: “mar pa jo mapol bikwe woko.” (Matayo 24:3, 12) Lujudaya ma i cencwari me acel onongo giwaco ni gin jo pa Lubanga ento guweko margi pi Lubanga okwe woko.
2 Ento, pol pa Lukricitayo me kare meno onongo gitye ki cwiny mapat. Onongo gitye ki mit kom me tito “lok me kwena maber ni Yecu en aye Kricito” kun ginyuto mar pi Lubanga, luye luwotgi ki wa jo ma peya gungeyo lok ada. Lukricitayo magi gugwoko margi pi Lubanga obedo matek. (Tic pa Lukwena 2:44-47; 5:42) Ki cwercwiny madit, mar pa Lukricitayo mogo okwe woko. Wangeyo man nining?
3. Gin ango ma oweko mar pa Lukricitayo mogo okwe woko?
Niyabo 2:4) Twero bedo ni Lukricitayo me Epeco onongo gitye ka lubo kit pa jo ma guromo ngetgi ma onongo gimito yomo cwinygi kekengi. (Jo Epeco 2:2, 3) Jo ma i boma me Epeco onongo gin lulonyo adada dok gimaro kwo mayot ki jami me wel makato gin mo keken. Pol jo me Epeco onongo bene gimaro tim me carocaro dok pe gilubo cik pa Lubanga. Onongo gimaro camo kwo makato maro Lubanga ki jo mukene.
3 Yecu owaco ki Lukricitayo me Epeco ni: ‘Dong wuweko mar ma onongo yam wutye kwede mukwongo ca-ni okwe woko.’ (4. (a) Mar pa dano tye ka kwe nining i karewa-ni? (b) Myero wawek marwa obed matek i kabedo adek mene?
4 Lok pa Yecu madok i kom kit ma mar pa jo mukene bikwe kwede bene gudowa i kare-ni. Dano i kare-ni pe gitye ki mar pi Lubanga kulu. Ma ka keto gengi i kom Lubanga pi cobo pekogi, dano milion mapol giketo gengi i kom dano. Mar pa dano mapol tye ka medde ki kwe woko. Kadi wa mar pa Lucaden pa Jehovah bene twero kwe woko, kit ma otimme kwede i kacokke me Epeco i kare macon. Kong dong wanyamo kabedo adek ka ma myero wawek marwa obed matek iye: (1) marwa pi Jehovah, (2) marwa pi lok ada me Baibul, ki (3) marwa pi utmegiwa.
MARWA PI JEHOVAH
5. Pingo myero wamar Lubanga?
5 Anga ma myero wamar ma loyo? Yecu owaco ni: ‘Mar Rwot Lubangani ki cwinyi ducu, ki kwoni ducu, ki tammi ducu. Man aye cik madit dok mukwongo.’ (Matayo 22:37, 38) Marwa pi Lubanga konyowa me lubo cikke, ciro jami ducu, ki me kwero gin marac. (Kwan Jabuli 97:10.) Ento Catan kacel ki lobo-ni tye ka tute matek wek marwa pi Lubanga okwe woko.
6. Gin ango ma timme ka marwa pi Lubanga okwe woko?
6 Jo me lobo-ni pe gitye ki neno matir madok i kom mar. Ma ka maro Lubanga, dano mapol gimaro “komgi kengi.” (2 Temceo 3:2) Giketo cwinygi i kom ‘miti me komgi ma ginywalogi kwede, ki miti marac pi gin ma gineno ki wanggi, ki dok wakke ki jami ma gitye kwede i kwogi.’ (1 Jon 2:16) Lakwena Paulo ocikowa i kom gin marac ma twero timme ka waketo pi mitiwa mukwongo. En owaco ni: “Tam ma lubo kit pa dano kelo to.” Pingo? Pien jo ma gitimo meno gidoko lumone pa Lubanga. (Jo Roma 8:6, 7) Jo ma giketo cwinygi ducu i yenyo lim nyo cobo mitigi me kom pe ginongo yomcwiny mo i agikkine.
7. Tam marac ango ma twero gudo Lukricitayo i kare-ni?
7 Jo mapol ma pe giye ni Lubanga tye nyo gikalo akala ka Lubanga tye ada, kacel ki jo ma giwacci kwo ocakke pire kene gitemme matek me bito jo mukene wek pe gumar nyo pe gubed ki niye i kom Lubanga. Giweko jo mukene tamo ni luming nyo jo ma pe gukwano aye gitwero ye ni Lacwec tye. Medo i kom meno, jo mapol giworo lucayan ma kato Lacwec. (Jo Roma 1:25) Tam magi bene twero gudo kadi wa Lakricitayo. Watwa ki Jehovah twero doko goro dok marwa pire twero kwe woko.
8. (a) Jami ango ma gitwero turo cwiny lutic pa Jehovah? (b) Jabuli 136 kweyo cwinywa nining?
8 Kit macalo watye ka kwo i lobo pa Catan-ni, tye tyen lok mapol ma twero weko cwinywa cwer i kine mukene. (1 Jon 5:19) Ka waweko cwinywa otur matek, niyewa ki marwa pi Lubanga twero kwe woko. Me labolle, watwero kemme ki pekki mapol pien nongo dong watye ka tii woko, watye ki two, nyo pi can lim. Watwero bedo ki cwer cwiny pien nongo pe watwero timo jami mogo maber kit ma wamito kwede. Cwinywa bene twero tur pien jami mogo pe otimme kit ma onongo wageno kwede. Kadi bed watye ka kato ki i atematema madit lakwene, pe myero watam ni Jehovah dong owekowa kenwa. Tam kong i kom lok me kwe cwiny ma tye i Jabuli 136:23 ma waco ni: “En opo piwa i kare ma dong giloyowa woko marac, pien mar mere ma pe lokke bedo nakanaka.” Watwero bedo labongo akalakala ni Jehovah winyo kokowa me “bako dog” dok en bigamogi ducu.
9. Gin ango ma omiyo teko bot Paulo me gwoko marre pi Lubanga matek?
9 Lakwena Paulo obedo ngat acel ma otamo matut i kom kit ma Jehovah okonye kwede, dok man oweko en ocung matek. En ocoyo ni: Jehovah “en lakony mera, pe abibedo ki lworo; ngo kono ma dano twero timo i koma?” (Jo Ibru 13:6) Gen ma onongo Paulo tye kwede i kom Jehovah okonye me lweny ki ariya mapol i kwone. I kare ma Paulo tye ka wok ki i kwo matek, en pud omedde ki geno Jehovah. Kadi wa i kare ma en tye i buc en obedo ka coyo waraga me cuko cwiny Lukricitayo. (Jo Epeco 4:1; Jo Pilipi 1:7; ) Paulo ogwoko marre pi Jehovah matek kadi bed ni en onongo tye ki peko. En oketo genne i kom ‘Lubanga ma kweyo cwinywa i can ducu ma walimo.’ ( Pilemon 12 Jo Korint 1:3, 4) Watwero lubo lanen pa Paulo nining?
Nyut mar pi Jehovah (Nen paragraf 10)
10. Watwero gwoko marwa pi Jehovah bedo matek nining?
10 Paulo otito yo acel ma watwero gwoko kwede ki marwa pi Lubanga wek obed matek i kare ma ocoyo ni: “Wuleg Lubanga ma pe wukeng.” Lacen en dok ocoyo ni: “Wumine kenwu i lego Lubanga ki cwinywu ducu.” (1 Jo Tecalonika 5:17; Jo Roma 12:12) Pingo lega nyikowa cok bot Lubanga? Ka watye ka lega, nongo watye ka lok ki Jehovah. Man weko wabedo ki wat macok kwede. (Jabuli 86:3) Ka watito tam ma tye i cwinywa ki kit ma wawinyo kwede bot Wonwa me polo, ci wanyikke cok bote. (Jabuli 65:2) Medo i kom meno, marwa pi Jehovah dongo ka waneno kit ma en gamo kwede ki legawa. Watye ki gen ni Jehovah “tye cok bot jo ducu ma kok bote.” (Jabuli 145:18) Genwa i kom mar kacel ki cwak pa Jehovah bikonyowa me ciro kit peko mo keken i kare-ni ki dong i anyim.
MARWA PI LOK ADA ME BAIBUL
11, 12. Watwero dongo marwa pi lok ada me Baibul nining?
11 Macalo Lukricitayo, wamaro ada. Lok pa Lubanga aye ka ma wanongo iye ada. Yecu owaco ki Wonne ni: “Lokki en ada.” (Jon 17:17) Myero wange lok ma tye i Baibul wek wamar ada ma tye iye. (Jo Kolocai 1:10) Ento tye jami mukene ma mitte. Nen kong gin ma laco Jabuli 119 owaco ni myero watim. (Kwan Jabuli 119:97-100.) Mitte ni walwod lok, nyo watam matut i kom gin ma wakwano ki i Baibul kare ducu. Ka walwodo lok i kom adwogi maber ma wanongo ka waketo lok ma i Baibul i tic, ci wabidongo marwa pire.
12 Laco Jabuli bene owaco ni: “Lokki bille mamit adada ki bota lim i doga makato moo kic woko!” (Jabuli 119:103) Buke ma gijenge i Baibul ma dul pa Jehovah goyo rom ki dek ma kitedo mamit. Pe warune ka watye ka camo dek ma wamaro. I yo acel-li, pe myero warune ka watye ka kwan. Ka watimo meno wabinongo mit pa “lok [ada] ma kweyo cwiny dano,” dok bibedo yot me po i kom gin ma wakwano ki dok me tic kwede me konyo jo mukene.
13. Gin ango ma okonyo Jeremia me dongo mar pi Lok pa Lubanga? Dok man ogudo cwinye nining?
13 Lanebi Jeremia onongo maro Lok pa Lubanga. En owaco ni: “Ka yam lokki obino bota, ci acamo ki cwinya matek, lokki olokke odoko gin me yomcwiny bota, dok obedo gin ma yomo cwinya adada; pien an dong gilwonga ki nyingi, ai Rwot Lubanga me mony.” (Jeremia 15:16) Jeremia otamo matut i kom lok pa Lubanga ci odongo mar pire. Obedo ki pwoc pi mot ma kimiye me cung pi Jehovah ki dok me tito kwena ma a ki bote. Ka wamaro lok ada me Baibul, ci wabiniang ni obedo mot madit adada me bedo Lacaden pa Jehovah ki dok me tito lok me Ker i kare man me agikki-ni.
Nyut mar pi lok ada me Baibul (Nen paragraf 14)
14. Gin ango mukene ma watwero timone wek marwa pi ada ma tye i Baibul odong?
14 Gin ango mukene ma twero konyowa me dongo marwa pi ada ma tye i Baibul? Myero wabed tye i cokke kare ducu ka ma kipwonyowa ki lok i kom Jehovah. Cabit ki cabit kitiyo ki Wi Lubele macalo yo ma pire tek loyo me pwonyowa. Ka wamito ni wanong adwogi maber ki i cokke, myero wayubbe pire con. Me labolle, watwero ngiyo wang Ginacoya ducu ma kiketogi iye. I kare-ni, dano mapol giketo Wi Lubele i tabuletgi, pien tye i leb mapol i kabedowa me intanet me jw.org ki JW Library app. Tabulet konyowa me nongo ginacoya ma kiketogi oyotoyot. I yo mo keken ma wayero me kwano magajin, ka wangiyo ginacoya ducu dok walwodo lok iye, ci marwa pi lok ada me Baibul bidongo.
MARWA PI UTMEGIWA
15, 16. (a) Ma lubbe ki Jon 13:34, 35, cik ango ma Yecu ominiwa? (b) Marwa pi Lubanga ki Baibul kubbe ki marwa pi utmegiwa nining?
15 I dyewor ma kineko iye Yecu, en owaco bot lupwonyene ni: “Amiyowu cik manyen, ni, wumarre kekenwu; wumarre kekenwu macalo ceng amarowu. Pi man dano ducu bingeyo ni wun lupwonnyena, ka mer tye i kinwu.”
16 Bedo ki mar pi utmegiwa kubbe ki mar pi Jehovah. Ka pe wamaro Lubanga, pe bene watwero maro utmegiwa. Ki bene ka pe wamaro utmegiwa, ci pe watwero maro Lubanga. Lukwena Jon ocoyo ni: “Ngat ma pe maro ominne ma en oneno kome, pe twero maro Lubanga ma pe oneno kome.” (1 Jon 4:20) Marwa pi Jehovah ki pi utmegiwa bene kubbe ki marwa pi Baibul. Pingo? Pien ka wamaro gin ma wapwonyo ki i Baibul, ci wabilubo cik ma wanongo ki iye ma waco ni myero wamar Lubanga ki utmegiwa.
Nyut mar pi utmege (Nen paragraf 17)
17. I yo ango ma watwero nyuto kwede ki mar?
17 Kwan 1 Jo Tecalonika 4:9, 10. I yo ango ma watwero nyuto kwede ki mar bot jo ma i kacokkewa? Twero bedo ni omego nyo lamego mo muteggi mito kony me cito i kacokke nyo me dwogo gang. Nyo gwok dato mo mito ni gikonye ki yubo gin mo ma oballe i gange. (Yakobo 1:27) Omege ki lumege ma cwinygi otur nyo ma gitye ka wok ki i peko gimito ni wawiny lokgi, wakwe cwinygi ki dok wacuk cwinygi. (Carolok 12:25; Jo Kolocai 4:11) Wanyuto ni wamaro “utmegiwa ma guye Kricito” i lokwa kacel ki i ticwa.
18. Gin ango ma bikonyowa me cobo winye manok ma tye i kinwa ki utmegiwa?
18 Baibul waco ni “i kare me agikki” me lobo man marac-ci, pol pa dano gibibedo jo ma paro pigi kekengi ki dok luworo. (2 Temceo 3:1, 2) Macalo Lukricitayo, myero wati matek me medde ki dongo marwa pi Jehovah, Lokke, ki bene mar pi jo mukene. Pi roc ma watye kwede, i cawa mukene winye manok twero bedo tye i kin utmege. Ento pien wamaro luwota, wabitute me cobo winye manok ma tye oyotoyot i yo me mwolo. (Jo Epeco 4:32; Jo Kolocai 3:14) Pe myero wawek marwa okwe woko! Ma ka meno, wamedde ki dongo marwa pi Jehovah, pi Lokke, ki dong pi utmegiwa.