DANIEL GIN KI MIRIAM gunyomme i Sektemba 2000 dok onongo gitye ki kwo mayot i Barcelona, i lobo Spain. Daniel owaco ni: “Tic ma onongo watiyo onongo culle ber dok weko wacamo i otel maber, walimo piny i lobo ma woko, ki dok waruko bongi mabeco. Onongo bene wanywako i tic me tito kwena kare ki kare.” Ento gin mo dok otimme.

I gure madit ma obedo i 2006, Daniel owinyo pwony mo ma kipenyo iye lapeny ni: “Tika watye ka timo jami ducu me konyo ‘jo ma gimakogi giterogi woko me aneka’ me nongo yo ma terogi i kwo ma pe tum?” (Carolok 24:11) Pwony meno otito ka maleng ni watye ki tic me pwonyo dano ki kwena ma tye i Baibul pien kwo jenge iye. (Tic pa Lukwena 20:26, 27) Daniel owaco ni, “Awinyo calo Jehovah aye tye ka lok kweda.” I pwony meno bene kiwaco ni wabedo ki yomcwiny madwong loyo ka watye ka tic matek i tic pi Jehovah. Daniel onongo ngeyo ni meno tye ada pien neno Miriam, ma dong ocako tic macalo painia con bene cwinye yom adada.

Pwony man ogudo cwiny Daniel adada ma oweko en omoko tamme ni myero elok kit me kwone. En ocako tiyo tic pi cawa manok, ocako tic macalo painia, ci dok obedo ka tam kit ma en gin ki Miriam gitwero bedo ki yomcwiny ka gicito ka tito kwena ka ma can lutit kwena me Ker tye iye.

I Mai 2007, Daniel gin ki Miriam guweko ticgi ci gudak i Panama, i lobo mo ma onongo kong gulimo con. Wang ticgi onongo opong ki cula nam mapol i Bocas del Toro Archipelago i nam me Caribbean. Pol jo ma gibedo kunnu gubedo Guaymi. Daniel gin ki Miriam onongo gitamo ni cente ma gigwoko-ni twero terogi dwe aboro i Panama.

Onongo giwoto i cula nam magi ki yeya dok ginyono lela. Wigi pud po i kom nino mo acel ma ginyono lela pi mairo 20 me ito cere mo mabor adada dok piny onongo lyet matek. Daniel ool adada ma onongo cok wille woko. Kadi bed kumeno, jo ma i Guaymi onong gijolo wele maber, tutwalle i kare ma dong luot man gupwonyo lebgi. I nge kare manok, gin onongo dong gitye ki lutino kwan me Baibul 23.

Gin ango ma otimme i kare ma cente ma gugwoko otum? Daniel owaco ni: “Ki cwercwiny madit wacako tam me dok i Spain. Cwinywa onongo tye ka cwer me weko lutino kwanwa me Baibul.” Ento i nge dwe acel, gunongo kwena maber adada. Miriam owaco ni: “Wanongo waraga me tic macalo painia keken. Pud dong cwinywa obedo yom ya me medde ki tic man!”

Pi alokaloka ma obedo ka timme i dul pa Jehovah, Daniel gin ki Miriam gugiko tic macalo painia keken i 2015. Gin ango ma gin gutimo? Gubedo ki gen i kom cikke ma tye i Jabuli 37:5: “Mi kwoni bot Rwot [Jehovah]; gen en, ci en bikonyi.” Gunongo tic ma twero konyogi me medde ki tito kwena macalo painia marii, dok i kare-ni gitye i kacokke mo i Veraguas, Panama.

Daniel owaco ni: “Ma peya waa ki i Spain, onongo pe wangeyo ka watwero kwo i rwom ma lapiny. I kare-ni watye ka kwo kwo ma rwomme lapiny, dok watye ki jami ducu ma pigi tek.” Gin ango ma ominigi yomcwiny madit adada? Guwaco ni: “Konyo jo mamwol me ngeyo Jehovah kelo yomcwiny ma lapore pe!”