1, 2. (a) Gin ango ma Yecu oloko iye bot lupwonyene i dyewor ma en peya oto? (Nen cal ma tye i pot karatac man.) (b) Pingo pire tek ni wiwa opo i kom tyen lok mumiyo watito kwena? (c) Ngo ma wabinyamo i pwony man?

I DYEWOR ma Yecu peya oto, en oloko ki lukwenane pi cawa malac. En ocuko cwinygi ni emarogi mada. En bene otitigi carolok i kom olok, ma wanyamo i pwony mukato-ni. Yecu owaco bot lupwonyene ni myero ‘gunyak nyig mapol.’ I leb Grik, lok man bene niange ni Yecu onongo tye ka cuko cwinygi me medde ki nyako nyig mapol, nyo me diyo cwinygi i tito kwena me Ker-ri.​—Jon 15:8.

² Kadi bed kit meno, Yecu pe owaco bot lupwonyene gin ma myero gutim keken, ento bene pingo myero gutim. En ominigi tyen lok mumiyo myero gumedde ki tito kwena. Pire tek ni wiwa opo pingo wan bene myero wamedde ki tito kwena. Bedo ka tamo lok man bitugo cwinywa me medde ki miyo “caden bot rok ducu” kun wadiyo cwinywa. (Matayo 24:13, 14) I pwony man, wabinyamo tyen lok angwen ma Ginacoya miniwa me medde ki tito kwena. Dok  bene wabinyamo mic angwen mapatpat ma Jehovah ominiwa ma konyowa me medde ki nyako nyig mapol.

3. (a) Ma lubbe ki Jon 15:8, tyen lok ma pire loyo ma omiyo watito kwena obedo ngo? (b) Nyig olok ma i lapor pa Yecu-ni cung pi gin ango, dok pingo lapor man rwatte?

³ Tyen lok ma pire tek loyo mumiyo watito kwena aye ni wamito kelo deyo bot Jehovah kun walonyo nyinge. (Kwan Jon 15:1, 8.) I kare ma Yecu otito lapor i kom olok, en oporo Jehovah ki lapur ma opito olok. Yecu owaco ni en kikome aye olok, dok lulub kore aye jange. (Jon 15:5) Dong i lapor man, nyig olok cung pi nyig ma lulub kor Yecu ginyako, nyo tic me tito kwena ma gitimo. Yecu owaco bot lukwenane ni: “Man bikelo deyo i kom Abana, ka wunyako nyig mapol.” Ka olok onyako nyige mabeco, ci man kelo deyo i kom lapur. I yo acel-li, ka watute matek me tito kwena me Ker-ri, ci wakelo pak ki deyo bot Jehovah.​—Matayo 25:20-23.

4. (a) Walonyo nying Lubanga nining? (b) Iwinyo nining pi mot ma itye kwede me lonyo nying Lubanga?

⁴ Nying Lubanga dong leng nicakke wa con. Pe tye gin mo keken ma dok waromo timone wek odok leng makato. Dong i yo ango ma watwero lonyo nying Lubanga ka watito kwena? Nen kong lok pa lanebi Icaya. En owaco ni: ‘Myero wuter Jehovah me mony calo Ngat maleng.’ (Icaya 8:13) Walonyo nying Lubanga Jehovah, ka watero calo nying ma pire tek loyo ducu dok ka wakonyo jo mukene me niang ni obedo nying maleng. (Matayo 6:9) Me labolle, ka wapwonyo dano lok ada i kom kit pa Jehovah ki yubbe pi dano me kwo i Paradic i lobo kany, ci wakonyogi me ngeyone ni jami ducu maraco ma Catan owaco i kom Jehovah obedo lok goba. (Acakki 3:1-5) Walonyo bene nying Lubanga ka wakonyo dano me ngeyo ni Jehovah aye opore me “nongo deyo ki woro ki teko.” (Niyabo 4:11) Lapainia mo ma nyinge Ronald, ma dong otiyo pi mwaki 16 owaco ni: “Ngeyo ni kimiyo bota kare me bedo lacaden pa Lacwe polo ki lobo miyo abedo ki pwoc madit. Dongo mitina me medde ki tito kwena.”

5. (a) Jon 15:9, 10 miniwa tyen lok ango me medde ki tito kwena? (b) Yecu okonyo lulub kore nining wek guniang ni myero gidi cwinygi?

⁵ Kwan Jon 15:9, 10. Tyen lok me aryo muweko watito kwena me Ker-ri aye pien wamaro Jehovah ki Yecu. (Marako 12:30; Jon 14:15) Yecu owaco bot lupwonyene ni myero ‘gubed i marre.’ Pingo en owaco lok meno? Pien en onongo ngeyo ni bimitte ni lulub kore gudi cwinygi wek gumedde ki kwo calo Lukricitayo me ada. Ki lok ada, i Jon 15: 4-10, waneno ni Yecu otiyo ki nyig lok calo “wubed” tyen mapol me konyo lulub kore wek guniang ni bimitte ni gidi cwinygi.

6. Wanyuto nining ni wamito bedo i mar pa Kricito?

⁶ Watwero nyutone nining ni wan wamito bedo i mar pa Kricito dok wamito nongo cwakke? Wanyuto meno ka wan wabedo luwiny bote. Yecu kwayowa me timo gin ma en kikome bene otimo. En owaco ni: “Agwoko cik pa Abana, abedo i marre.” (Jon 15:10) Yecu onyutiwa lanen maber me aluba.​—Jon 13:15.

7. Bedo lawiny kubbe ki mar nining?

⁷ Yecu onyuto ka maleng ni bedo lawiny kubbe ki mar i kare ma en owaco ni: “Ngat ma tye i cikka, ma gwokogi, en aye ngat ma mara.” (Jon 14:21) Cik pa Yecu a ki bot Wonne, pi meno, ka walubo cik pa Yecu me tito kwena maber me Ker pa Lubanga, ci wanyuto ni wamaro Jehovah. (Matayo 17:5; Jon 8:28) Dok ka wanyuto bot Jehovah gin ki Yecu ni wamarogi, ci gin bene gibimarowa.

8, 9. (a) Tyen lok mukene me tito kwena obedo ngo? (b) Lok pa Jehovah ma nonge i Ejekiel 3:18, 19 ki 18:23 tugo cwinywa me medde ki tito kwena nining?

⁸ Tyen lok me adek muweko watito kwena aye pien wamito ciko dano i kom nino pa Jehovah ma tye ka bino-ni. I Baibul, kiloko i kom Nua ni en obedo “latit lok.” (Kwan 2 Petero 2:5.) Ma peya Pii Aluka ocorre i lobo, kwena ma Nua otito nen calo onongo tye me ciko dano i kom nino pa Jehovah me tyeko lubalo. Pingo wawaco kumeno? Pien Yecu owaco ni ‘I kare ca ma peya pii aluka ocorre i wi lobo onongo gicamo, gimato, dok awobe ki anyira ginyomme, nio wa i nino ma Nua odonyo kwede i yeya; pe gumedo ki ngeyo gin mo * (Nen lok ma tye i tere piny) nio ka Pii Aluka opong, ci omologi woko ducu. Bibedo kit meno bene i kare ma Wod pa dano bidwogo iye.’ (Matayo 24:38, 39) Kadi bed pol pa dano gucayo lok pa Nua, en omedde ki tito kwena ma Jehovah omiye.

 ⁹ I kare-ni, watito kwena me Ker-ri wek wami bot dano kare me pwonyo gin ma Lubanga bitimo pigi i anyim. Calo Jehovah, wan bene wamito ni dano guket cwinygi i kom kwena meno wek ‘gubed kwo.’ (Ejekiel 18:23) Ka watito kwena i ot ki ot nyo i dye lwak, waciko dano mapol kit ma watwero, ni Ker pa Lubanga bibino dok bijwero lobo marac-ci woko.​—Ejekiel 3:18, 19; Daniel 2:44; Niyabo 14:6, 7.

10. (a) Matayo 22:39 miniwa tyen lok ango me tito kwena? (b) Paulo gin ki Cira gukonyo lalo mabuc mo i Pilipi nining?

¹⁰ Tyen lok me angwen muweko wamedde ki tito kwena aye pien wamaro dano. (Matayo 22:39) Mar meno konyowa me medde ki tito kwena pien wangeyo ni tam pa dano twero lokke ka kwogi olokke. Me labolle, lwak ma gukeco gutweyo Paulo gin ki Cira i buc i boma me Pilipi. Ento i cwiny dyewor, oyengyeng mo matek oyengo ot buc ci doggola ducu guyabbe woko. Lworo omako lalo mabuc adada pien otamo ni lumabuc ducu gulwi woko. Pi meno, en otemo nekke kekene. Ento Paulo ojuke kun dange ni: “Pe itimme kekeni marac. Wan ducu watye kany.” Lalo mabuc openyogi ni: “Myero atim ango wek alarre?” Paulo gin ki Cira guwacce ni: “Ye Rwot Yecu, ci ibilarre.”​—Tic pa Lukwena 16:25-34.

11, 12. (a) Gin mutimme i kom lalo mabuc-ci pwonyowa ngo i kom ticwa me pwony? (b) Pingo watye ki miti me medde ki tito kwena?

¹¹ Gin mutimme i kom lalo mabuc-ci pwonyowa gin ango i kom ticwa me tito kwena? Lalo mabuc-ci oloko tamme ci openyo pi kony i nge oyengyeng. I yo acel-li, jo mogo ma onongo pe gimito winyo lok me Baibul gitwero loko tamgi ci giyenyo kony ka gin mo marac otimme i kwogi. Me labolle, jo mogo wigi twero cung woko ka gurwenyo ticgi nyo nyomgi oket. Jo mukene gibedo ki cwercwiny madit ka guniang ni gitye ki two mo malit nyo gurwenyo dano macok kwedgi. Ka gin ma kit meno otimme, dano gitwero cako penyo lapeny ma pigi tego i kwo, lapeny ma onongo pe gutamo iye con. Giromo bene penye ni, “Myero atim ango wek alarre?” Gitwero bedo ki miti me winyo kwenawa me gen pi tyen mukwongo i kwogi.

¹² Pi meno, ka wamedde ki tito kwena ki gen, ci wabibedo tye ka dano gimito jolo lok me kwecwiny ma watero botgi. (Icaya 61:1) Charlotte, ma dong otiyo macalo painia pi mwaki 38 owaco ni: “I kare-ni, dano gurweny woko. Mitte ni giminigi kare me winyo kwena maber.” Eva, ma dong otiyo macalo painia pi mwaki 34 owaco ni: “Dano gitye ki cwercwiny madit i kare-ni ma loyo i kare mo keken. Amito konyogi adada. Dok meno aye gin ma tugo cwinya me tito kwena.” Nen ka maleng ni, mar pi dano obedo tyen lok maber adada me medde ki tito kwena!

13, 14. (a) Mic mene ma kiloko iye i Jon 15:11? (b) Watwero nongo yomcwiny ma Yecu tye kwede-ni nining? (c) Yomcwiny konyowa nining i ticwa me pwony?

¹³ I dyewor ma Yecu peya oto, en bene oloko i kom mic mogo ma bikonyo lukwenane  me medde ki nyako nyig mapol. Mic meno gubedo ngo, dok gitwero konyowa nining i kare-ni?

¹⁴ Mic me yomcwiny. Tika tic me tito kwena obedo yec mapek tutwal? Pe matwal. I ngeye ma Yecu otito lapor i kom olok, en owaco ni, ka watito kwena ci wabinongo yomcwiny. (Kwan Jon 15:11.) Meno twere nining? Wi myero opo ni i lapor pa Yecu-ni, en onyuto ni olok cung pi en, ki jange cung pi lukwenane. Jang olok nongo pii ki moc cam ka tye i kom yat olok. I yo acel-lu, watwero bedo ki yomcwiny calo Yecu ka wanote kwede dok walubo lanenne macok. (Jon 4:34; 17:13; 1 Petero 2:21) Anna, ma dong otiyo macalo painia pi mwaki 40 owaco ni: “Yomcwiny ma anongo ka atito kwena cuko cwinya me medde ki tic pi Jehovah.” Yomcwiny ma wanongo biminiwa kero me medde ki tito kwena kadi bed jo mapol pe giwinyo lokwa.​—Matayo 5:10-12.

15. (a) Mic mene ma kiloko iye i Jon 14:27? (b) Kuc konyowa nining me medde ki nyako nyig mapol?

¹⁵ Mic me kuc. (Kwan Jon 14:27.) I otyeno ma Yecu peya oto, en owaco bot lukwenane ni: ‘Awekiwu kuc, kuc mera amiyo botwu.’ Kuc meno konyowa nining me medde ki tito kwena? Ka wamedde ki tito kwena, wabedo ki kuc, pien nongo wangeyo ni watye ka yomo cwiny Jehovah gin ki Yecu. (Jabuli 149:4; Jo Roma 5:3, 4; Jo Kolocai 3:15) Alfred, ma dong otiyo macalo painia pi mwaka 45 owaco ni, “Tic me pwony miyo aol mada, ento kela yengo i cwinya dok weko kwona bedo ki tyen lok.” Watye ki pwoc ni wanongo kuc marii nakanaka!

16. (a) Mic ango ma kiloko pire i Jon 15:15? (b) Lukwena onongo gitwero medde ki bedo lurem Yecu nining?

¹⁶ Mic me bedo larem Yecu. I ngeye ma Yecu owaco bot lukwenane ni emito ni gubed ki yomcwiny, en otito pingo pire tek ni gunyut mar ma pe paro pire kene. (Jon 15:11-13) Lacen en owaco ni: ‘Alwongowu ni lurema.’ Pud dong obedo mot madit me bedo larem Yecu! Ento lukwenane onongo gitwero medde ki bedo lureme nining? Yecu otito ni: “Wuciti, wunyak nyigwu.” (Kwan Jon 15:14-16.) I yo macek, wumedde ki tito kwena. Mwaki aryo angec, Yecu onongo  owaco bot lukwenane ni: ‘Ka wutye ka wot, wutit lok, kun wuwaco ni, “Ker me polo dong onyiko cok.”’ (Matayo 10:7) Meno aye tyen lok muweko i dyewor ma en peya oto, Yecu ocuko cwiny lukwenane me diyo cwinygi i tic me tito kwena. (Matayo 24:13; Marako 3:14) Ki lok ada, Yecu onongo ngeyo ni cobo cik man pe bibedo yot. Ento onongo gitwero medde ki timone wek gubed lureme. I yo ango? Ki kony pa mic mukene.

17, 18. (a) Mic ango ma kiloko pire i Jon 15:7? (b) Mic meno okonyo lupwonnye pa Yecu nining? (c) Mic mapatpat mene ma konyowa i kare-ni?

¹⁷ Mic me lega. Yecu owaco ni: “Wuleg gin ducu ma wumito, gibitimo piwu.” (Jon 15:7, 16) Cikke pa Yecu-ni nen calo ojingo cwiny lukwenane adada! * (Nen lok ma tye i tere piny.) Lukwena pe guniang maber ni Yecu onongo dong cok to. Pi meno, i kare ma en oto, gin guwinyo ni gitye kengi. Ento i ada, onongo pe gitye kengi, pien Jehovah onongo tye atera me gamo legagi, kun konyogi me medde ki tito kwena. Dok meno aye gin ma en otimo. I nge kare manok ma Yecu ocer, lukwena gulego Jehovah ni ominigi tekcwiny, dok Jehovah ogamo legagi.​—Tic pa Lukwena 4:29, 31.

¹⁸ Meno aye gin ma timme wa i kare-ni. Ka wadiyo cwinywa i tic me tito kwena, wabedo lurem Yecu. Dok watwero bedo ki gen ni Jehovah tye atera me gamo legawa ka wanongo tito kwena tek. (Jo Pilipi 4:13) Watye ki pwoc madit ni Jehovah gamo legawa dok ni Yecu obedo laremwa macok. Mic magi ma Jehovah omiyo botwa-ni konyowa me medde ki nyako nyig mapol.​—Yakobo 1:17.

19. (a) Pingo wamedde ki tito kwena? (b) Ngo ma konyowa me medde ki timo tic ma Lubanga ominiwa nio wa i agikki?

¹⁹ I pwony man, wanyamo tyen lok angwen mumiyo wamedde ki tito kwena: me kelo deyo bot Jehovah ki lonyo nyinge, me nyuto marwa pi Jehovah ki Yecu, me ciko dano, ki dong me nyuto marwa pi luwotwa. Wapwonyo bene lok i kom mic angwen mapatpat: yomcwiny, kuc, bedo lurem Yecu, ki dong mic me lega. Mic magi giminiwa kero me medde ki timo tic ma Lubanga ominiwa nio wa i agikki. Cwiny Jehovah bedo yom adada ka en neno watye ka tute matek me ‘nyako nyig mapol!’