1, 2. (a) Pingo jo matino gitye ka loyo lweny i kom Catan ki jogine? (Nen cal ma tye i pot karatac man.) (b) Ngo ma wabinyamo i pwony man?

LAKWENA Paulo oporo Lukricitayo ki lumony. Wan watye i dog lweny, dok lumonewa gitego adada! Pe walwenyo ki dano adana; ento i kom Catan ki jogine. Gin dong gulwenyo pi mwaki alip mapol, dok gitye ki diro mapatpat me lweny. Pi meno, romo nen calo pe watwero loyo lweny man, tutwalle ka wan pud watino. Jo matino tika gitwero loyo lweny i kom lumone ma gitego magi? Ada, gitwero, dok bene gitye ka loyo lweny meno! Pingo? Pien ginongo teko ki bot Jehovah. Dok calo lumony ma gupwonye me lweny, gin bene ‘giruko jami lweny ducu ma Lubanga miyo’ wek gubed ma guyubbe pi lweny.​—Kwan Jo Epeco 6:10-12.

² I kare ma Paulo otiyo ki lapor meno, oromo bedo ni en onongo tye ka tam i kom jami lweny ma lumony me Roma giruko. (Tic pa Lukwena 28:16) I pwony man, wabinyamo lapor meno. Wabinyamo bene gin ma jo matino mogo  giwaco i kom kit ma ruko jami lweny me cwiny tek kwede, ki dong adwogi mabeco ma bino pi rukone.

3, 4. Lok ada me Baibul bedo calo del pyer lamony me Roma nining?

³ Kwan Jo Epeco 6:14. Del ma lumony me Roma giruko onongo gimwono nyonyo i wiye wek ogwok pyer lamony dok omak nyonyo mapek me gengo kore-ni. Del mogo bene onongo tye ki nyonyo mo matek me kodo akura me rwako pala lucwan ki pala lweny mukene. Ka lamony otweyo delle matek, ci en onongo bedo ki tekcwiny ka ocito i dog lweny.

⁴ Calo del pyer, ada ma wapwonyo ki i Lok pa Lubanga gwokowa ki i pwony goba. (Jon 8:31, 32; 1 Jon 4:1) Dok ka wamedde ki maro ada ma wapwonyo ki i Lok pa Lubanga, ci bidoko yot botwa bene me kwo ma lubbe ki cik matir pa Lubanga, nyo i yo macek, me ruko ‘nyonyo me gengo korwa.’ (Jabuli 111:7, 8; 1 Jon 5:3) Dong ka waniang ada magi, ci bibedo yot botwa bene me dok i lok ma lumonewa giwaco.​—1 Petero 3:15.

5. Pingo myero walok lok ada kare ducu?

⁵ Kit macalo ada ma tye i Lok pa Lubanga pire tek tutwal botwa, walubo pwony me Baibul dok waloko lok ada kare ducu. Goba obedo jami lweny pa Catan ma tiyo maber adada. Lok goba wano lagoba-ni kacel ki jo ma giye lokke ducu. (Jon 8:44) Dong kadi bed watye ki roc, watute ki kerowa ducu pe me loko lok goba. (Jo Epeco 4:25) Man romo bedo tek. Abigail, ma tye ki mwaka 18, owaco ni: “Loko lok ada kare ducu twero nen calo gin ma pe konyo, tutwalle ka loko lok goba twero wotti ki i peko.” Ci dong pingo en tute me loko lok ada kare ducu? En owaco ni: “Ka aloko lok ada, ci abedo ma cwinya pe pida i nyim Jehovah. Dok lunyodona ki lurema gingeyo ni gitwero genna.” Victoria, ma tye ki mwaka 23, owaco ni: “Ka iloko lok ada dok icung matek pi niyeni, ci gitwero bwuri. Ento gire inongo adwogi mabeco mapol: Ibedo ma cwinyi tek, iwinyo ni itye cok ki Jehovah, dok inongo woro pa jo ma gimari.” Dong ineno pingo pire tek ni kare ducu ‘itwe pyeri woko ki ada?’

6, 7. Pingo kiporo kit matir ki nyonyo me gengo kor?

⁶ Nyonyo me gengo kor lamony me Roma onongo giyubo ki nyonyo ma kicanogi arii arii dok nongo kigomogi manok wek orom kor lamony meno. Nyonyo ma kicanogi arii-ni nongo kitweyogi ki del matinotino i kom lakod ma nyonyo. Pal gwoke onongo bene kiumo ki nyonyo ma kitweyogi ki del matinotino. Nyonyo me gengo kor-ri onongo weko lamony pe bedo agonya tutwal me wot, dok mitte ni en obed ka rotone kare ki kare wek onen ni nyonyone ocanne maber.  Ento nyonyo meno onongo gwoko adunune [nyo etao] kacel ki jami mukene calo acwiny [emany] ki oborgi-ni [ewuku] wek pala lucwan nyo atero pe ocobgi.

⁷ Cik matir pa Jehovah, ma gwoko ‘cwinywa,’ nyo kitwa ma pe nen ki woko, gitwero porone ki nyonyo me gengo korwa. (Carolok 4:23) Lamony onongo pe ye loko lageng kore ma kiyubo ki nyonyo matek ki mukene ma kiyubo ki nyonyo magoro. I yo acel-lu, pe wabiye loko cik matir pa Jehovah ci waleyo kakare ki tamwa pi gin ma waneno ni tye atir. Wan pe waryek calo Jehovah, pi meno, pe watwero gwoko cwinywa piwa kenwa. (Carolok 3:5, 6) Meno aye gin mumiyo myero wabed ka roto ‘nyonyo me gengo korwa’ kare ki kare wek wanen ka pud tye ka gwoko cwinywa.

8. Pingo myero walub cik pa Jehovah?

⁸ Tika i kine mukene iwinyo calo cik pa Jehovah gengi ki bedo agonya, nyo ki timo gin ma imito? Daniel, ma tye ki mwaka 21, owaco ni: “Lupwonye ki lutino kwan luwota onongo ginyera pien ni akwo ma lubbe ki cik me Baibul. Pi kare mo, arwenyo gen i koma kekena, dok cwiny otur adada.” Ento en dong winyo nining kombeddi? En owaco ni: “Lacen, acako neno ber pa kwo i yo ma lubbe ki cik pa Jehovah. Luwota mogo gucako tic ki jami calo jayigi-ni; mukene guweko kwan woko. Obedo me cwercwiny me neno kit ma kwogi oballe kwede. Ada, Jehovah gwokowa.” Madison, ma tye ki mwaka 15, owaco ni: “Pe yot bota me lubo cik pa Jehovah ki me kwero timo gin ma luwota gitamo ni obedo camo kwo.” Dong ngo ma en otimo? “Abedo ka poyo wiya kekena ni kilwonga ki nying Jehovah dok ni abita obedo yo ma Catan bayo kwede atero i koma. Ka aloyo abita mo, awinyo maber.”

9-11. (a) War ango ma Lukricitayo giruko? (b) Ngo ma twero konyowa me tito kwena labongo lworo?

⁹ Kwan Jo Epeco 6:15. Lamony me Roma onongo pe twero cito i dog lweny ki tyene nono. Warne onongo kiyubo ma kipamo del adek mapatpat, dok kikwoyogi kacel. Pi meno, warne onongo tek mada. Ento onongo wot kwede yot ma weko lamony twero wot labongo lworo ni ebicer epoto woko.

¹⁰ Kadi bed war pa lumony me Roma onongo konyogi i lweny, war ma wan waruko-ni konyowa me ‘tito lok me kwena maber me kuc.’ (Icaya 52:7; Jo Roma 10:15) Kadi bed kumeno, i kine mukene myero wabed ki tekcwiny wek watit kwena. Roberto, ma tye ki mwaka 20, owaco ni: “Onongo alworo miyo caden bot lutino kwan me kilaciwa. Nen calo onongo lewic maka. Ka atamo iye, pe angeyo pingo lewic onongo myero omaka. I kare-ni dong cwinywa yom me miyo caden bot luwota.”

 ¹¹ Pol pa Lukricitayo matino gunongo ni tito kwena doko yot ka guyubbe con. Ngo ma iromo timone me yubbe? Julia, ma mwakane 16, owaco ni: “Abedo ki bukkewa i kicaana me cukul, dok aciko ita me winyo gin ma lutino kwan luwota giwaco i kom niyegi. Man konya me tam i kom kit ma atwero konyogi. Ka ayubbe con, ci atwero lok kwedgi i kom gin mo ma romo konyogi.” Maria, ma tye ki mwaka 23, owaco ni: “Ka in lakica dok iciko iti me winyo lok, ci ibiniang peko ma luwoti gitye ka lweny kwede. Aketo tek me neno ni akwano jami ducu ma kiyubo pi jo matino. Man weko atwero nyuto bot luwota gin ma tye i Baibul nyo jw.org ma bikonyogi.” Yubbe maber pi tito kwena bedo calo iruko “war” ma romi maber.

12, 13. “Atero” mene ma Catan twero bayo i komi?

¹² Kwan Jo Epeco 6:16. Lamony me Roma onongo tingo kwot malac ma twoke tye angwen. Kwot man onongo umo  kome cakke ki i pal gwoke me o wa i conge dok gwoke ki i pala lucwan, tong, ki atero pa lumonene.

¹³ “Atero” mene ma Catan twero bayo i komi? En romo celli ki lok goba i kom Jehovah. Catan mito ni itam ni Jehovah pe mari dok pe tye ngat mo ma paro piri. Aida, ma tye ki mwaka 19, owacci: “An pol kare awinyo calo Jehovah pe cok kweda dok en pe mito bedo Larema.” Gin ango ma en timo ka ocako winyo kit man? En omedde ni, “Cokke konya tutwal me jingo niyena. Onongo yam abedo mot labongo miyo lagam, kun atamo ni pe tye ngat mo ma mito winyo lagamma. Ento, i kare-ni ayubbe maber pi cokke, dok atute me miyo lagam kiryo nyo kidek. Pe yot, ento awinyo maber ka amiyo lagam. Dok omege ki lumege bene gicuko cwinya mada. Kare ducu ka cokke otum, aa ma awinyo ni Jehovah mara.”

14. Ngo ma wapwonyo ki i gin mutimme i kom Aida?

¹⁴ Kwot pa lamony pe doko dit nyo doko tidi. Ento kit ma wapwonyo kwede ki i lok pa Aida-ni, niyewa pe tye kit meno. Niyewa twero dongo nyo nweng doko matidi, twero doko matek nyo magoro. Obedo ticwa ki acel acel me gwoko niyewa. (Matayo 14:31; 2 Jo Tecalonika 1:3) Wek ‘niyewa obed calo kwot,’ omyero wagwok obed matek dok madit!

15, 16. I yo ango ma genwa tye calo tok nyonyo?

¹⁵ Kwan Jo Epeco 6:17. Lamony me Roma onongo ruko tok nyonyo me gwoko wiye, ngute, ki wange. I kine mukene tok man onongo tye ki lamakke ma weko lamony twero kodone i cinge.

¹⁶ Kit macalo tok nyonyo gwoko wi lamony-nyi, “gen me larre” bene gwoko tamwa. (1 Jo Tecalonika 5:8; Carolok 3:21) Gen konyowa me keto tamwa i kom cikke pa Lubanga dok pe weko cwinywa tur ka watye ka wok ki i peko. (Jabuli 27:1, 14; Tic pa Lukwena 24:15) Ento ka wamito ni genwa ogwokwa, ci myero obed gen ma kome. Myero waruk “tok nyonyo” man i wiwa, ento pe wating i cingwa!

17, 18. (a) Catan twero bwolowa wek wagony tok nyonyo woko ki i wiwa nining? (b) I yo ango ma watwero nyutone ni Catan pe obwolowa?

¹⁷ Catan twero bwolowa wek wagony tok nyonyo woko ki i wiwa nining? Tam kong i kom gin ma en otemo timo i kom Yecu. Catan onongo ngeyo ni Yecu bidoko laloc me lobo. Ento ma meno peya otimme, Yecu onongo bideno can ci to woko. Ka dok i nge meno, en myero obed mot okur wang ma kare pa Jehovah oromo me kette macalo Kabaka. Pi meno, Catan ocikke me miyo Yecu doko laloc lobo cutcut. Catan ocikke ni ka Yecu owore kicel keken, ci Yecu bidoko laloc me lobo ducu. (Luka 4:5-7) Catan bene ngeyo ni Jehovah ocikke me miyo botwa jami mabeco mapol i lobo manyen. Ento, myero kong wakur wang ma cikke man ocobbe, kun ma wakuro-ni wawoto ki i pekki mapol. Dong Catan tye ka bitowa ni watwero bedo ki kwo ma yot kombeddi. En mito ni waket mitiwa obed mukwongo, ka dong Ker pa Lubanga bedo me aryo.​—Matayo 6:31-33.

 ¹⁸ Pol pa Lukricitayo matino pe guweko Catan obwologi. Me labolle, Karina, ma tye ki mwaka 20, owacci: “Angeyo ni gen ma watye kwede pi cobo pekkiwa ducu obedo Ker pa Lubanga keken.” Gen man mono gudo tamme ki kit ma en kwo kwede nining? Konye weko wiye pe wil ni jami me lobo-ni pe rii naka. Me ka tic ki tekone ducu me bedo ki dog tic madit i lobo-ni, Karina tye ka tic ki cawane kacel ki kerone pi Jehovah.

19, 20. Watwero dongo dirowa me tic ki Lok pa Lubanga nining?

¹⁹ Lumony me Roma onongo gitiyo ki pala lucwan ma lebe borre romo centimita 50 nyo incic 20. Lumony magi onongo gin ludiro adada i tic ki pala lucwangi pien gipwonyo kit me tic kwede nino ducu.

²⁰ Lakwena Paulo owaco ni Lok pa Lubanga tye calo pala lucwan. Jehovah aye omiyo botwa. Ento omyero wapwony kit me tic kwede ki diro wek wacung pi niyewa nyo walok kit ma watamo kwede. (2 Jo Korint 10:4, 5; 2 Temceo 2:15) Itwero dongo dironi nining? Sebastian, ma tye ki mwaka 21, owaco ni: “Abedo ka coyo piny tyeng acel ki i cura ducu me Baibul ma akwano. Atye ka coyo piny wang Baibul ducu ma amaro.” Man konye me niang kit ma Jehovah tamo kwede. Daniel owaco ni: “Ka atye ka kwano Baibul, ayero tyeng mogo ma atamo ni twero konyo dano ma arwatte kwedgi i ticwa me pwony. Anongo ni dano gijolo lokwa ka guneno ni imaro Baibul dok itye ka tute matek me konyogi.”

21. Pingo pe myero walwor Catan ki jogine?

²¹ Kit ma wapwonyo kwede ki i lanen pa jo matino ma kicoyo lok komgi i pwony man, pe omyero walwor Catan ki jogine. Tye ada gire ni gitek, ento pe gitek giloyo Jehovah. Dok pe gibimedde ki kwo pi naka. Kibitweyogi woko ci pe gibibedo ki teko me wano ngat mo keken i kare me Loc me Mwaka Alip Acel pa Kricito, ka dong i nge meno kibinekogi woko. (Niyabo 20:1-3, 7-10) Wangeyo lamonewa, dirone, ki dong mitine. Ki kony pa Jehovah, watwero cung matek i kome!