1. Peko mene ma Lukricitayo guwok ki iye i cencwari me acel?

I KINE ka mwaka 62 me o 64, lakwena Petero ocoyo waraga “bot jo pa Lubanga ma guket woko ata, ma gubedo welo i Ponto, Galatia, Kapadokia, Acia ki Bitunia.” (1 Petero 1:1) Utmege magi onongo gua ki i kabedo mapatpat. Onongo gitye ka kemme ki “can ma rom ki mac,” nyo aunauna makwar adada dok onongo gimito cuko cwiny ki tira. Gin bene gukwo i kare marac adada. Petero ocoyo ni: “Agikki me jami ducu dong cok.” Onongo kibijwero Jerucalem i nge mwaki ma pe o apar. Gin ango ma onongo bikonyo Lukricitayo i kabedo ducu i kare meno ma kwo onongo tek tutwal-li?​—1 Petero 4:4, 7, 12.

2, 3. Pingo Petero ocuko cwiny utmegine me bedo jo ma jolo welo? (Nen cal ma tye i karatac man.)

² Gin acel ma Petero ocuko iye cwiny utmegine me timo aye me bedo “jo ma jolo welo.” (1 Petero 4:9) I leb Grik, lok man ma kigonyo ni “jolo welo” bene niange ni “bedo ki mar nyo kica bot jo ma pe wangeyogi.” Ento Petero onongo tye ka cuko cwiny utmege me bedo jo ma jolo welo  “ngat man ki lawote” nyo ni i kingi kekengi, kadi bed ni onongo dong gingene dok gitimo jami kacel. Man onongo bikonyogi nining?

³ Man onongo biweko gibedo ki wat macok i kingi. In kono? Tika wi po kit ma ibedo kwede ki yomcwiny i kare mo ma ngat mo olwongi i gange? Ki dok kit ma wat i kin in wun ki ngat mo odoko cok kwede i kare ma ilwonge i gangi? Yo maber me ngeyo utmegiwa aye me jologi i gangiwa. Onongo mitte ni Lukricitayo ma i kare pa Petero gubed ki wat macok i kare me peko. Mitte ni wabed kit meno bene ‘i kare man me agikki-ni.’​—2 Temceo 3:1.

4. Lapeny mene ma wabinyamogi i pwony man?

⁴ Watwero nyuto cwiny me jolo welo i kinwa kekenwa nining? Gin ango ma weko i kine mukene pe wajolo wele, dok ngo ma watwero timone wek wabed jo ma jolo welo? Ngo ma twero konyowa wek wabed wele maber?

5. Watwero nyuto cwiny me jolo welo i cokkewa nining?

⁵ I cokke: Jehovah kacel ki dulle jolo wan ducu i cokke. Wamito ni jo ducu ma gibino i cokkewa gubed agonya, tutwalle jo manyen. (Jo Roma 15:7) Gin bene gitye wele pa Jehovah, pi meno myero wawek guwiny agonya, labongo paro kit ma ginen kwede nyo kit ma gurukke kwede. (Yakobo 2:1-4) Tika itwero bedo ki welo mo ma ineno ni obedo kene? En bibedo ki pwoc madit ka ikonye me niang kit ma yub me cokke woto kwede nyo me yabo ginacoya ma kitye ka kwanogi. Man obedo yo maber adada ma weko ‘waketo cwinywa ka gwoko welo.’​—Jo Roma 12:13.

6. Angagi ma dong myero wagwokgi ma loyo?

⁶ Cam kacel: I kare me Baibul, dano onongo pol kare gilwongo jo mukene i ganggi ka cam, man onongo nyuto ni gimito bedo luremgi dok ki kuc i kingi. (Acakki 18:1-8; Lungolkop 13:15; Luka 24:28-30) Angagi ma dong myero wagwokgi ma loyo? Myero obed omege ki lumege ma i kacokke. Ka kwo i lobo man medde ki doko matek, bimitte bene ni wajenge i kom utmegiwa dok wabed bene lurem ma genne. I mwaka 2011, Lukiko Madit oloko cawa me Nyamo Wi Lubele pa Lubetel ma i United States me a ki i cawa 12:45 me otyeno wek obed i cawa 12:15 me otyeno. Pingo? Lok angeya ma kikwano waco ni ka cokke meno otum con ci onongo weko bedo yot ma loyo pi Lubetel me limo ki lwongo luwotgi. Jang gang kal mukene bene gutimme kit meno. Man omiyo kare maber adada bot Lubetel me ngeyo luwotgi.

7, 8. Watwero nyuto cwiny me jolo welo bot omege ma gibino ka miyo pwony nining?

⁷ I kine mukene omege ma gia ki i kacokke mukene, luneno me adwol, nyo omege ma gia ki i Betel gibino ka miyo pwony i kacokkewu. Tika itwero nyuto cwiny me jolo welo botgi? (Kwan 3 Jon 5-8.) Yo acel ma watimo kwede meno aye me lwongogi i gangiwa ka camo gin mo manok.

⁸ Lamego mo i United States owaco ni: “Pi mwaki mapol, an kacel ki cwara wabedo ki kare me jolo omege mapol ma gibino ka miyo pwony i cokkewa kacel  ki mongi i gangwa.” En winyo ni jami ducu mutimme i kare magi ojingo niyegi dok okelo botgi yomcwiny madit adada. En owaco ni: “Pe wakoko ange matwal.”

9, 10. (a) Angagi ma gitwero bedo i gangiwa pi kare malac? (b) Tika jo ma gitye ki gangi matidi bene gitwero miyo kony? Mi labol.

⁹ Wele ma gilimowa pi kare malac: I kare me Baibul, dano onongo gimaro gwoko wele i gangigi. (Yubu 31:32; Pilemon 22) I kare-ni, watwero timo kit meno bene. Pol kare luneno me adwol nongo gimito kabuto ka gubino ka limo kacokkewa. Kabuto bene mitte pi lutino kwan ma gibino i cukul me Ker mapatpat kacel ki utmege ma gujalle me miyo kony me gedo. Gin ango ma waromo timone pi jo ma gangigi oballe pi can ma poto atura? Gin bene nongo gimito kabedo mo nio wang ma kiroco gangigi. Pe myero watam ni jo ma gitye ki odi madongo keken aye gitwero miyo kony. Gwok nyo gin dong gutimo meno wang mapol i kare mukato angec. Tika itwero miyo kabedo ki ngat mo, kadi bed ni otti tidi?

¹⁰ Omego mo i South Korea wiye po i kom kare ma lutino kwan ma gucito i cukul me Ker gubedo i gange. En ocoyo ni: “I acakkine, onongo pe amito pien onongo pud wanyomme nyen dok otwa onongo ding adada. Ento bedo ki utmege magi i gangwa obedo me yomcwiny adada. Macalo jo munyomme nyen, onongo watwero neno kit ma luot gitwero bedo kwede ki yomcwiny ka gitye ka tic pi Jehovah dok giketo yub me timo jami me cwiny kacel.”

11. Pingo mitte ni wajol jo manyen ma gudak i kacokkewa?

¹¹ Omege ki lumege ma gubino nyen i kacokkewa: Omege ki lumege nyo jo me ot mo ma gua ki i kacokke mukene giromo dak i kabedowu. Romo bedo ni gubino pien kacokkewu mito kony. Nyo nongo kicwalogi macalo painia i kacokkewu. Man nongo obedo alokaloka madit adada i kwogi. Nongo gitye i kabedo manyen, kacokke manyen, ki dok kadi wa leb ki tekwaro nongo bene nyen. Tika itwero lwongogi ka camo gin mo kacel, nyo wucito kwedgi kacel ka mo? Man bikonyogi me mako lirem manyen ki dok me ngi ki jami ma nongo nyen botgi.

12. Gin ango mutimme ma nyuto ni pe mitte ni wayub jami mapol ka wek dong wajol welo?

¹² Pe mitte ni iyub jami mapol ka dong wek inyut cwiny me jolo welo. (Kwan Luka 10:41, 42.) Omego mo wiye po i kom gin mutimme i kare ma en gin ki dakone gudoko lumiconari. En owaco ni: “Onongo pud watino, yamo pud peya okuto wiwa tutwal, dok onongo waparo gangwa adada. I otyeno mo acel, dakona onongo tye ka paro gang adada, dok gin mo keken ma  atemme me timone onongo pe twero yomo cwinye. Ento i kine ka cawa 1:30 me otyeno, wawinyo ka ngat mo dwongo doggola. Meno onongo latin kwan mo me Baibul dok onongo okeliwa mucungwa adek. En onongo obino ka jolo lumiconari manyen. Wajole i ot ci wamine pii amata. I ngeye, wayubbe cai ki mugati. Onongo pud pe wangeyo leb Swahili, dok en onongo pe ngeyo leb Munu.” Omego man owaco ni gin meno mutimme-ni okonyogi me cako mako lirem ki jo me kacokkegi manyen-ni, ki dok me bedo ki yomcwiny.

13. Adwogi mabeco ango ma wanongo ka wajolo wele?

¹³ Tika i nino mo dong ikwero jolo welo mo? Ka otimme, ci ikeng yomcwiny ma onongo itwero nongone i kare meno kacel ki mako lirem ma onongo itwero bedo kwede pi kwoni ducu. Jolo welo aye yo maber loyo ma twero konyi wek pe ibed kekeni. Ci dong pingo ngat moni pe bedo ki cwiny me jolo welo? Tye tyen lok mogo manok nok.

14. Gin ango ma itwero timone ka ipe ki cawa muromo me jolo welo nyo me ye lwongo pa jo mukene?

¹⁴ Cawa ki kerowa: Lutic pa Jehovah gidwong ki tic me atima adada. Dong jo mukene giwinyo ni pe gitye ki cawa kacel ki kero me jolo welo. Ka iwinyo kit meno, ci bedo ber ka iloko yub ma megi manok wek ibed ki kare me jolo welo ki me ye lwongo pa jo mukene. Man pire tek adada pien Baibul cuko cwinywa me jolo welo. (Jo Ibru 13:2) Pi meno, jolo welo obedo gin maber me atima. Ento me nyuto cwiny me jolo welo, mitte ni idwok piny cawa ma itero i timo jami ma pigi pe tek.

15. Pingo jo mukene giwinyo ni pe gitwero jolo welo?

¹⁵ Kit ma inene kwede kekeni: Tiko dong i nino mo ibedo ki miti me jolo ngat mo ento dok lacen iwinyo ni pe itwero? Twero bedo ni ibedo lalewic dok iparo ni pe wutwero bedo ki lok mapol me aboka. Nyo gwok ipe ki cente muromo dok itye ki par ni pe itwero miyo bot weleni jami ma omege mukene gimiyo. Ento wii myero opo ni pe mitte ni ibed ki gang maber adada ka wek dong ijol welo. Weleni gibibedo ki yomcwiny ka gangi leng dok igwoko maber ki bene ka itye dano ma maro jo mukene.

16, 17. Gin ango ma itwero timone ka itye ki par mapol pi gwoko welo?

¹⁶ Ka iwinyo ni pe itwero gwoko welo, ci nge ni pe itye keni. Laelda mo i Britain owaco ni: “Lworo twero bedo tye ka itye ka yubbe me jolo welo. Ento kit ma calo timme kwede ka watye ka tic pi Jehovah i yo mukene mapatpat, adwogi mabeco kacel ki yomcwiny ma wanongo dwong loyo par ma wabedo kwede. Kadi bed watye ka boko lok ki wele kun wamato kofi keken pud wanongo yomcwiny madit.” Pire tek adada ni wanyut cwiny me mar bot welewa. (Jo Pilipi 2:4) Jo mapol gimaro tito jami mutimme i kwogi. Yo acel keken ma watwero ngeyo kwede ki kit kwo ma guwok ki iye aye ka wabedo kacel kwedgi. Laelda mukene dok owaco ni: “Lwongo utmege ma i kacokke me bino i ganga konya me ngeyogi maber, tutwalle kit ma gunongo kwede ki ada.” Ka inyuto mar bot wele,  ci itwero bedo labongo akalakala mo ni wun ducu wubibedo ki yomcwiny.

¹⁷ Lamego mo ma tye painia ma pol kare gwoko lutino kwan me cukul me Ker owaco ni: “I acakkine, abedo ki lworo pien jami ma atye kwede pe gibeco dok kimina amiya. Dako pa omego mo ma tye lapwony me cukul man odiyo cwinya adada. En owacca ni ka en gin ki cware gitye ka limo adwol, gibedo ki yomcwiny madwong loyo ka gitye ka bedo bot ngat ma maro jami me cwiny ma bene i kine mukene pe tye ki jami me kom mapol ento nongo tamme rwatte ki meggi​—tic pi Jehovah ki dong kwo i rwom ma lapiny. Man opoyo wiya i kom gin ma mamana onongo maro waco bot lutinone ni: ‘Camo pot dek i paco pa jo ma gimari ber kato.’” (Carolok 15:17) Pe mitte ni wabed ki par, pien gin ma pire tek loyo aye ni myero wanyut mar bot welewa.

18, 19. Cwiny me jolo welo bikonyowa nining me jwayo cwiny marac ma watye kwede i kom jo mukene?

¹⁸ Kit ma ineno kwede jo mukene: Tika tye ngat mo ma deg i ki i kacokke? Ka pe itute matek me jwayo cwiny meno, ci pe bia ki i cwinyi. Pe ibibedo ki cwiny me lwongo ngat mo i gangi ka pe imaro kite. Nyo gwok ngat mo ocwero cwinyi i kare mukato angec, dok wii pe twero wil iye.

¹⁹ Baibul waco ni itwero yubo wat i kin in ki jo mukene, kadi wa ki lumoneni, ka itye ki cwiny me gwoko welo. (Kwan  Carolok 25:21, 22.) Ka ijolo ngat mo i gangi, ci man twero konyi me jwayo cwiny marac ki dok bedo ki wat maber kwede. Itwero cako neno kite mogo mabeco ma Jehovah oneno i kare ma onyiko ngat meno cok bote. (Jon 6:44) Ka mar aye oweko ilwongo ngat mo ma onongo pe byeko ni itwero lwonge, ci man twero weko ibedo ki wat macok kwede. Itwero ngeyone nining ni mar aye ma tugo cwinyi me timo meno? Yo acel aye me keto cik ma iye lac ma nonge i Jo Pilipi 2:3 i tic, ma waco ni: “Wubed ki mwolo, kun dano acel acel woro lawote macalo ngat madit loye.” Myero watam i kom gin ma weko waneno omege ki lumege ni gidito giloyowa. Gwok watwero nongo pwony ki i lanengi me niye, diyo cwinygi, nyo kit mogo mabeco ma gitye kwede. Bedo ka tam i kom kitgi mabeco bidongo marwa pigi dok bikonyowa me bedo ki cwiny me lwongogi i gangiwa.

20. Gin ango ma myero watim ka dong waye cito ka mo ma kilwongowa iye?

²⁰ Daudi openyo Jehovah ni: “Ai Rwot [Jehovah], anga ma bibedo i kemani?” (Jabuli 15:1) I nge meno, en oloko i kom kit mogo mabeco ma Jehovah mito ni welene myero gubed kwede. Acel i kingi aye ni: “Pe loko kwong ma yam okwongo kadi bed kwonge-ni kelle can.” (Jabuli 15:4) Ka waye lwongo pa ngat mo, myero pe wangol lwongo meno labongo tyen lok mo matir. Romo bedo ni en nongo dong oyubbe pi limwa, dok ka wangolo, ci nongo en oyelle nono. (Matayo 5:37) Jo mogo gikwero lwongo moni wek gicit i ma gitamo ni dok ber ma kato meno. Tika meno nyuto woro ki mar? Myero wabed ki pwoc pi gin mo keken ma kiminiwa. (Luka 10:7) Ka mitte ni wangol lwongo ma dong waye woko, ci bedo me mar ka wawaco ki ngat meno con.

21. Woro tekwaro me kabedo moni konyowa nining me bedo wele maber?

²¹ Pire tek bene ni wawor tekwaro pa jo mukene. I tekwaro mogo, kijolo welo ma obino atura. Ento ka mukene, bedo ber ka iniango dano ma pud peya ilimogi. I kabedo mogo, won gang miyo cam maber loyo bot welone, ka dong i ngeye bot jo me gange. I kabedo mukene, gitero dano ducu ma rom, welo wa ki jo ma gang. Ka mogo, wele bene gitero gin mo manok me acama ka ma kilwongogi iye. Ento i kabedo mukene wele giwoto ki cingi nono. I tekwaro mogo, wele kong pe giye lwongo me acel nyo me aryo. Ento ka mukene, pe nyuto woro ka pe iye lwongo me acel. Myero watute matek wek won gang obed ki yomcwiny pi lwongowa i gange.

22. Pingo pire tek adada ni ‘wabed jo ma jolo welo’?

²² Petero owaco ni: “Agikki me jami ducu dong cok.” (1 Petero 4:7) Cokcok-ki, wabikemme ki twon can madit atika ma naka yam peya onen i lobo. Ka kwo i lobo man medde ki balle, mitte ni wabed ki mar matut pi utmegiwa. Tira ma Petero omiyo ma waco ni “wubed jo ma jolo welo” pire tek dong i kare-ni makato kare mo keken. (1 Petero 4:9) Ada, cwiny me jolo welo keliwa yomcwiny dok pire tek adada i kare-ni, ki dok pi naka.