1-3. Gin ango ma romo bedo ni okelo anywena anywena ma obedo i kin Euodia gin ki Cintuke-ni, dok peko ma kit meno gitwero gengone nining? (Nen cal ma i pot karatac man.)

LUTIC pa Jehovah gineno Baibul, buk maleng pa Lubanga calo gin ma pire tek adada. Pi roc ma watye kwede, wanongo tira ma a ki i Ginacoya kare ducu. Wadok i tira magi nining? Nen kong labol pa Euodia ki Cintuke, Lukricitayo ma gukwo i cencwari me acel. Peko mo madit obedo i kin lumego aryo magi ma kiwirogi-ni. Peko ango? Baibul pe otito. Ento kong waket ni magi aye gin mutimme.

² Ket ni Euodia olwongo omege ki lumego mogo ka cam ki namo gange. Pe kilwongo Cintuke ento en owinyo pi namo meno. Romo bedo ni Cintuke atamo ni: ‘Pe atwero ye ni Euodia pe olwonga! Onongo atamo ni wan lurem macok adada.’ Pi cwercwiny, Cintuke orwenyo gen ma onongo en tye kwede i kom Euodia woko. Pi meno Cintuke bene oyubo namo i gange ci olwongo en omege ki lumege ma Euodia olwongogi-ni​—ento pe olwongo Euodia! Peko ma obedo i  kin Euodia gin ki Cintuke-ni onongo romo balo kuc ma tye i kin jo ducu me kacokke. Baibul pe tittiwa adwogi me peko man, ento nen calo lumege aryo magi gulubo tira me mar ma lakwena Paulo ominigi.​—Pil. 4:2, 3.

³ Peko ma kit man bene twero kelo arubaruba i kacokke i kare-ni. Ento peko man kitwero cobone nyo bene gengone i kacokke ka walubu tira ma nonge i Baibul. Dok ka watero Baibul calo buk ma pire tek, ci wabilubu tira ma nonge iye.​—Jab. 27:11.

4, 5. Lok pa Lubanga miniwa tira ango ma lubbe ki kit me juko kinigawa?

⁴ Pe yot me juko kinigawa ka watamo ni kiterowa i yo marac. Twero cwero cwinywa adada ka giterowa i yo marac pi tekwarowa, rangi del komwa, nyo kit ma wanen kwede. Dong twero bedo lit ma loyo ka Lakricitayo lawotwa aye otimo gin meno! Tika lok pa Lubanga miniwa tira ka watye ka kemme ki goro pa dano i yo meno?

⁵ Jehovah ocako neno kit ma dano gikwo kwede ki luwotgi wa i acakki piny. En neno kit ma wawinyo kwede kacel ki ticwa. Tamwa, kadi wa pa ngat ma tye ka winyo marac, twero weko waloko nyo watimo gin mo ma watwero koko iye ange. Pud dong bedo me ryeko ya me lubo tira ma Baibul miyo me juko kinigawa kun pe waweko cwinywa cwer oyot! (Kwan Carolok 16:32; Latitlok 7:9.) Ngene kene ni wan ducu myero waket tek wek wabed jo ma kiniga pe makogi oyot kun wabedo lukica. Jehovah gin ki Yecu gimito ni omyero wabed jo ma timo kica. (Mat. 6:14, 15) Tika mitte ni ibed lakica loyo kit ma onongo itye kwede con nyo iket cwinye me juko kinigani?

6. Pingo pe myero wabed ki kec cwiny?

⁶ Jo ma pe kijuko kiniga pol kare cwinygi bedo kec. Macalo adwogine, man gengo jo mukene me bedo cok kwedgi. Ngat ma cwinye kec twero balo kuc ma tye i kacokke. En twero kano kec cwinye nyo adegadega me tye i cwinye ento ‘lwak ma i kacokke gibineno gin marac’ ma i cwinye-ni woko. (Car. 26:24-26) Luelda gitwero konyo ngat meno wek oniang ni ngat ma tye ki kec cwiny, adegadega, nyo ma mako akemo i cwinywa myero obed pe i dul pa Lubanga. Baibul miyo tira ma niange maber i kom lok man. (Levi 19:17, 18; Roma 3:11-18) In bene iye lok man?

7, 8. (a) Jehovah telo dulle ma i lobo kany nining? (b) Tira ango ma nonge i Lok pa Lubanga, ki dok pingo myero walubgi?

⁷ Jehovah telo dok pito dulle ma i lobo kany kun tiyo ki “lagwok ot ma lagen dok maryek” i te tela pa Kricito “lawi lwak muye.” (Mat. 24:45-47; Ep. 5:23) Calo lukiko madit me cencwari me acel, jo man bene giye i kom lok pa Lubanga, dok gitero calo obedo lok nyo kwena ma pire tek. (Kwan 1 Jo Tecalonika 2:13.) Tira macalo mene ma Baibul miniwa me konyowa?

⁸ Baibul miniwa tira ni omyero wawot i cokke kare ducu. (Ibru 10:24, 25) Cuko cwinywa me bedo ki niye acel. (1 Kor. 1:10) Lok pa Lubanga wacciwa ni myero waket pi Ker-ri obed mukwongo i kwowa. (Mat. 6:33) Ginacoya bene tito pi tic ma watye kwede me tito kwena  i ot ki ot, i dye lwak, ki dok ka kare mo keken owec. (Mat. 28:19, 20; Tic 5:42; 17:17; 20:20) Baibul bene miyo tira bot luelda ni myero guwek dul pa Jehovah obed maleng. (1 Kor. 5:1-5, 13; 1 Tem. 5:19-21) Jehovah bene miniwa cik ni jo ducu ma i dulle myero gubed maleng i komgi kacel ki i yo me cwiny.​—2 Kor. 7:1.

9. Yo mene ma kitye ka tic kwede me konyowa me niang Lok pa Lubanga?

⁹ Jo mukene gitwero tamone ni giromo gonyo lok ma i Baibul pigi kengi. Ento Yecu ocimo “lagwok ot ma lagen” keken aye me miniwa cam me cwiny. Nicakke i 1919, Yecu Kricito macalo kabaka obedo ka tic ki luticce magi me konyowa me niang Lok pa Lubanga kacel ki me lubo tira ma nonge iye. Ka walubu tira ma nonge i Baibul, ci wabikelo kuc ki note i kacokke dok wabiweko kacokke bedo maleng. Wan ducu omyero wapenye kekenwa ni, ‘An mono tika atye lagen i kom yo ma Yecu tiyo kwede me pwonyowa i kare-ni?’

10. Kiloko i kom dul pa Jehovah ma i polo-ni nining i buk pa Ejekiel?

¹⁰ Lok pa Lubanga weko waniang i kom but dulle ma tye i polo. Me labolle, lanebi Ejekiel oneno ginanyuta mo ma kiporo dul pa Jehovah ma i polo ki gadigadi. (Ejek. 1:4-28) Jehovah aye onongo tye ka ngwec ki gadigadi man, dok gadigadi-ni onong cito ka mo keken ma cwiny maleng mito ni ocit iye. Macalo adwogine, gin ma timme i dulle ma i polo bene gudo wa dulle ma i lobo. Gadigadi meno obedo ka ngwec dok bene pud tye ka ngwec! Tam kong i kom alokaloka ma otimme i mwaka mukato cokcok-ki​—dok ket i wii ni Jehovah aye ma tye ka weko alokaloka magi timme. Kit ma calo Kricito kacel ki lumalaikane dong gicok jwero lobo man marac-ci, gadigadi pa Jehovah bene dong tye ka ngwec i cipid ma lamal adada me ilo malo twero me locce kacel ki lonyo nyinge maleng-ngi!

11, 12. Jami mabeco ango ma dul pa Jehovah otimogi?

¹¹ Tam kong i kom jami mabeco ma dul pa Jehovah ma i lobo otimogi i kare me agikki-ni. Gedo. Lutic miya mapol gumine me gedo gang kalwa manyen i Warwick, New York, U.S.A. I te tela pa dipatmenwa ma neno goyo pulan ki gedo i twok lobo ducu, dano alip mapol gujalle me gedo Ot me Ker manyen ki me medo but jang gang kalwa i twok lobo ducu. Pud dong watye ki pwoc madit ya pi jo magi ma gujalle me timo tic me gedo man! Wi myero opo ni i wi lobo lung, Jehovah tye ka goyo laane i kom lutit kwena me Ker ma gimiyo centegi ma lubbe ki kerogi me tyelo kor tic man.​—Luka 21:1-4.

 ¹² Pwonye. Tam kong i kom cukul mapatpat ma tye ka pwonyo dano me woro Lubanga. (Ic. 2:2, 3) Watye ki Cukul me Pwonyo Lupainia, Cukul pi Lutit Kwena me Ker-ri, Cukul me Gilead, Cukul pi Jo ma Gudonyo Nyen i Betel, Cukul pi Luneno me Adwol ki Mongi, Cukul pi Luelda, Cukul me Ticwa me Ker, ki dong Cukul pi Lumemba me Komitti me Jang Gang Kal ki Mongi. Jehovah pud dong maro pwonyo jone ya! Pwonye me Baibul bene tye i kabedowa me intanet me jw.org, ka ma wanongo iye buke i leb miya mapol mapatpat. Kabedowa me intanet bene tye ki pwony pi lutino ki jo me ot kacel ki ka ma wanongo iye lok angeya. In tika itiyo ki jw.org i ticwa me pwony ki i worowu pi jo me ot?

13. Tic ango ma watye kwede macalo luwor Jehovah dok ma gigenne?

¹³ Pud dong tye mot madit ya me bedo i dul pa Jehovah! Kit ma dong watye ki ngec i kom cik pa Jehovah kacel ki gin ma en mito ki botwa-ni, omyero dong watim gin matir kun wailo malo twero me locce. Ka jo me lobo gimedde ki rwako wigi matut i tim maraco, wan myero ‘wadag gin marac’ kit ma Jehovah bene pe mito jami maraco-ni. (Jab. 97:10) Pe wabedo calo “jo ma lwongo gin marac ni ber, kun dok gilokke gilwongo gin maber ni rac.” (Ic. 5:20) Watute ki kerowa ducu me bedo jo maleng i komwa, kitwa, ki dong i yo me cwiny pien wamito yomo cwiny Lubanga. (1 Kor. 6:9-11) Wamaro dok wageno Jehovah; wanyuto gennewa bote ka wakwo i yo ma rwatte ki kit ma kinyuto kwede i Baibul. Dok watute me lube cikke i gangiwa, i kacokke, i dog tic, i gang kwan​—ka mo keken ma watye iye. (Car. 15:3) Nen kong dok yo mukene ma watwero nyuto kwede gennewa bot Lubanga.

14. Lunyodo ma Lukricitayo gitwero nyuto gennegi bot Lubanga nining?

¹⁴ Gwoko lutino. Lunyodo ma Lukricitayo ginyuto gennegi bot Jehovah ka gipwonyo lutinogi kun gitiyo ki Lokke. Lunyodo ma giworo Lubanga pe gibiye ni tekwarogi odor kit ma myero gigwok kwede ki lutinogi. Cwiny me lobo-ni myero obed pe i gangi pa Lukricitayo. (Ep. 2:2) Wego ma Lakricitayo pe bibedo ki tam ni, ‘Mon aye myero gupwony lutino.’ Baibul loko atir ka maleng ma lubbe ki lok man ni: “Wego, . . . wupitgi [lutino] gudong maber kun wupwonyogi dok wunyebogi ki kit mabeco ma Rwot [Jehovah] pwoyo.” (Ep. 6:4) Wege ki mege ma giworo Lubanga gimito ni lutinogi gubed calo Camuel, pien Jehovah onongo tye kwede i kare ma tye ka dongo.​—1 Cam. 3:19.

15. Watwero nyuto gennewa bot Jehovah nining ka watye ka moko tam ma pigi tego?

¹⁵ Moko tam. Yo acel ma watwero nyuto ni watye lugen bot Lubanga ka watye ka moko tam aye me yenyo kony ma a ki i Lokke kacel ki dulle. Me nyuto kit ma man pire tek kwede, tam kong i kom lok man ma tye ka gudo lunyodo mapol. Jo ma gudak i lobo mukene dong guloko odoko kitgi me cwalo lutinogi matino bot wadigi wek ominigi kare me medde ki tic kacel ki me nongo cente i lobo ma gudak iye-ni. Ki lok ada, man obedo tam ma ngat acel acel myero omoki, ento myero wange ni Lubanga bingolo kop i wiwa pi tam ma wamoko. (Kwan Jo Roma 14:12.) Tika bedo me  ryeko me moko tam ma kwako jo me odiwa nyo kit me kwowa labongo yenyo tira ki i Baibul? Pe wacel! Wamito kony pa Wonwa me polo pien pe watwero wot i yo matir piwa kenwa.​—Jer. 10:23.

16. Onongo mitte ni lamego mo omok tam ango i kare ma onywal, dok gin ango ma okonye me moko tam matir?

¹⁶ Mego mo acel ma onywalo latin awobi i kare ma tye i lobo mukene onongo mito cwalo latin meno i lobogi bot lunyodone wek gugwoki. I kare ma lamego-ni pud onywal anywala, Lacaden mo pa Jehovah ocako kwano kwede Baibul. En odongo i yo me cwiny dok opwonyo ni obedo ticce ma Lubanga omine me gwoko latinne en kikome wek odok lawor Jehovah. (Jab. 127:3; Car. 22:6) Lamego-ni olego matek bot Jehovah, kit ma Ginacoya cuko kwede ki cwinywa me timone-ni. (Jab. 62:7, 8) En bene otito lok ma i cwinye bot lapwonye me Baibul ki bene bot jo mukene ma i kacokke. Kadi bed ni onongo tye i lyeto ma a ki bot wadine ki lureme me cwalo latinne bot lunyodone, en omoko tamme ni meno pe obedo gin matir. Cwiny cware obedo yom adada me neno kit ma kacokke okonyo kwede ki dakone kacel ki latingi. Tika itamo ni mego-ni oniang ni Jehovah agamo legane? Ngene kene ni en oniang.

17. Tira ango ma wanongo ma lubbe ki lutino kwanwa me Baibul?

¹⁷ Lubu tira. Yo acel ma watwero nyuto kwede gennewa bot Lubanga aye me lubu tira ma dulle miniwa. Me labolle, tam kong i kom tam ma kiminiwa ma lubbe ki lutino kwanwa me Baibul. Kiminiwa tam ni ka watye ka kwano buk me Baibul Mono Ada Pwonyo Gin Ango? ki lutino kwanwa me Baibul, myero wakwany dakika manok i nge kwanwa me loko tamme i kom dul pa Jehovah. Watwero timo meno kun watiyo ki vidio me Ngo ma Timme i Ot me Ker? Ki brocuwa me Jo Mene ma Gitye ka Timo Miti pa Jehovah i Kare-ni? Kiminiwa tam ni ka watyeko kwano buk me Baibul Pwonyo ki latin kwan ma tye ka dongo, myero wakwan dok buk me “Wubed i Mar pa Lubanga”, kadi bed ni dong onongo Batija. Dul pa Jehovah ominiwa tira man wek lupwonnye manyen ‘gucung matek i niye.’ (Kol. 2:7) In tika itye ka lubu tira ma kit meno ma dul pa Jehovah miyo?

18, 19. Watye ki tyen lok ango me bedo ki pwoc bot Jehovah?

¹⁸ Watye ki tyen lok mapol me bedo ki pwoc madit bot Jehovah! Bedo calo watye ki banya pa Jehovah, pien labongo en onongo pe watwero kwo. (Tic 17:27, 28) En ominiwa mic mo ma pire tek adada​—bukke, Baibul. Ki pwoc madit wajolo calo kwena pa Lubanga, kit macalo Lukricitayo ma i Tecalonika gujolo kwede dok guye Lok pa Lubanga.​—1 Tec. 2:13.

¹⁹ Baibul okonyowa me nyikke cok bot Lubanga dok en bene onyikke cok botwa. (Yak. 4:8) Wonwa me polo ominiwa mot mamwonya adada me bedo i dulle. Pud dong watye ki pwoc madit ya pi mot meno! Laco jabuli oketo lokke i yo mamit adada i kare ma owaco ni: “Wumi pwoc bot Rwot [Jehovah], pien en ber; mar mere ma pe lokke bedo nakanaka.” (Jab. 136:1) Kinwoyo lok man ni “mar mere ma pe lokke bedo nakanaka” tyen pyeraryo wiye abicel kulu i Jabuli 136. Ka wabedo lugen bot Jehovah kacel ki dulle, ci wabineno ada pa lok man pien wabikwo pi naka!