1, 2. (a) Gin ango ma jo mukene giwaco ka guwinyo ni Lubanga tye ki dulle? (b) Gin ango ma wabinyamo i pwony man?

LUBANGA tika tye ki dul ma mege? Jo mukene giromo wacone ni, “Pe mitte ni dul mo otelwa. Gin ma mitte aye bedo ki wat maber ki Lubanga.” Tika tam meno obedo tam me ryeko? Lok ada kono tye ningo?

² I pwony man, wabinyamo jami ma nyuto ni Jehovah, Lubanga ma pe obedo Lubanga me anyobanyoba-ni timo jamine ducu Kore ki Kore. Wabineno bene kit ma myero wadok kwede i tira ma dul pa Jehovah miniwa. (1 Kor. 14:33, 40) Ginacoya okonyo dul pa Jehovah ma i lobo kany me timo tic me tito kwena maber i cencwari me acel K.M. ki bene i karewa-ni. Watute me gwoko kacokkewa wek obed ki kuc, ki note dok maleng i yo me cwiny, pien watemme matek me lubo tira ma i Baibul kacel ki ma dul pa Jehovah miniwa.

3. Gin ango ma weko imoko ni Jehovah timo jamine ducu kore ki kore?

³ Ginacweya nyuto ni Lubanga timo jamine ducu kore ki kore. Baibul waco ni: “Rwot [Jehovah] oketo lobo ki ryekone;  dok pi ngecce omiyo en oketo polo i kabedone.” (Car. 3:19) Jami ma wangeyo i kom cwec pa Jehovah “pud doge [keken], pe kom ticce kikome” dok tye “macalo lok ma gikwilo akwila.” (Yubu 26:14) Ento lok manok ma wangeyo ma lubbe ki cwec ma i dan polo calo lakalatwe ki yogo miyo waniang ni jami magi ducu kiyubogi maber adada dok pe gunywene atata. (Jab. 8:3, 4) Yogo acel acel tye ki lakalatwe milion mapol, dok gin ducu giwire i dan polo ma pe giyokke i kingi. Lakalatwe magi ducu gilworo ceng calo gitye ka lubo cik me gudo! Kit ma jami magi gitye kwede konyowa me niang ni Jehovah, Lacwec ma “oketo polo [ki lobo] ki ryekone” opore me nongo pak ki worowa dok bene myero wabed luwiny bote.​—Jab. 136:1, 5-9.

4. Pingo lucayan pe gugamo lapeny ma pol kare dano gipenyo?

⁴ Cayan onyutiwa jami mapol madok i kom cwec ma gitye i dan polo ki i lobowa-ni, dok man okelo adwogi mabeco mapol i kwowa. Ento, tye lapeny mapol ma gamone oloyo lucayan woko. Me labolle, jo ma gineno jami ma tye i dan polo pe gitwero tito kit ma polo ki lobo ocakke kwede nyo pingo kiketo gin makwo i lobo. Medo i kom meno, dano pe twero tito pingo watye ki miti me kwo pi naka. (Latit 3:11) Pingo tye lapeny mapol ma pigi tek ma peya kigamogi? Tyen lok me acel tye ni lucayan kacel ki jo mukene giweko dano tamo ni Lubanga pe kun giwaco ni kwo ocakke pire kene. Ento Jehovah otiyo ki Baibul me gamo lapeny ma ocungo wi dano i twok lobo-ni ducu.

5. I yo ango ma kwowa jenge i kom cik ma doro ginacweya?

⁵ Kwowa ducu cung i kom cik ma Jehovah oketo ma doro ginacweya ducu. Jo ma gitiyo i kom mac, nyo i kom pii, lugedo, ludwo dege, ludaktari ma yango dano​—gin ducu ticgi jenge i kom cik man ma Jehovah oketo ma doro ginacweya ducu-ni. Me labolle, ludaktari ma yango dano gingeyo ni dul kom dano ducu calo adunugi-ni bedo i kabedo moni kikome. Pi meno, daktar pe dok yenyo adunu pa latwo moni ayenya. Dok wan ducu waworo cik ma doro ginacweya. Kwero lubone twero kelo to!

6. Pingo watwero mokone ni luwor Jehovah myero gutim jami ducu kore ki kore?

⁶ Kiyubo polo ki lobo maber dok pe gunywene atata. Pi meno, myero wange ni Jehovah bene mito ni jo ma giwore gutim jami ducu kore ki kore. Ki lok ada, meno aye tyen lok ma oweko Lubanga ominiwa Baibul me telowa. Kwo labongo kony ma dul pa Lubanga miyo kacel ki tirane twero kelo cwercwiny ki kwo matek.

7. Gin ango ma nyuto ni Baibul obedo buk ma kicoyo kore ki kore?

⁷ Baibul pe obedo mere buke pa Lujudaya ki pa Lukricitayo ma kicokogi kacel. Ma ka meno, obedo buk mo ma kiyubo maber dok kicoyo kore ki kore​—pi teko pa cwiny maleng. Lok ma i buk acel acel ma i Baibul rwatte ki wadgi. Lok ma iye nicakke i Acakki me o i Niyabo loko i kom gin acel ma pire tek​—lonyo nying Jehovah kacel ki ilo twero me locce malo ki cobbe pa yubbe me loko lobo doko paradic kun tiyo ki Kerre i te loc pa Kricito, ma en aye ‘lakwaro’ ma kiciko pire-ni.​—Kwan Acakki 3:15; Matayo 6:10; Niyabo 11:15.

8. Pingo watwero wacone ni Luicrael onongo gitye ma guyubbe maber?

 ⁸ Kit ma Luicrael onongo gitye kwede i kare macon nyuto kit ma dul pa Jehovah i kare-ni timo kwede jamine ducu kore ki kore. Me labolle, i te cik ma kimiyo bot Moses, onongo tye “mon ma lutic ma gitiyo i doggola kema me rwatte.” (Nia 38:8) Wot pa Luicrael kacel ki tingo kema me woro onongo timme i yo maber labongo anyobanyoba mo keken. Lacen, Kabaka Daudi oketo Lulevi ki lulamdog i dul ki dul ma pe gunyobe atata. (1 Tekwaro 23:1-6; 24:1-3) Dok ka Luicrael gulubo cik pa Jehovah, onongo gibedo ki kuc dok ma gunote labongo anyobanyoba mo.​—Nwo. 11:26, 27; 28:1-14.

9. Gin ango ma nyuto ni kacokke pa Lukricitayo me cencwari me acel onongo guyubbe maber dok gitimo jami ducu kore ki kore?

⁹ Kacokke pa Lukricitayo me cencwari me acel onongo guyubbe maber, dok gunongo adwogi maber ki i bedo i te tela pa lukiko madit, ma i acakkine jo mogo i kingi onongo gubedo lukwena. (Tic 6:1-6) Lacen, kimedo omege mukene me doko lumemba me lukiko madit. (Tic 15:6) Tira kacel ki cik onongo bene kimiyo kun kitiyo ki waraga ma lukiko madit nyo omege ma gitiyo kacel kwedgi aye gicoyo. (1 Tem. 3:1-13; Tito 1:5-9) Adwogi ango ma kacokke gunongo pi lubo tira ma a ki bot lukiko madit?

10. Adwogi maber ango ma kacokke i kare macon gunongo pi lubo cik ma lukiko madit omoko? (Nen cal ma tye i pot karatac 12.)

¹⁰ Kwan Tic pa Lukwena 16:4, 5. Omege ma giwoto ka limo kacokke macalo luwang lukiko madit gubedo ka nywako ki jo me kacokke “cik me aluba ma yam lukwena ki ludongo gumoko i Jerucalem.” Ka jo me kacokke gulubo cik meno, ci onongo gicung ‘matek i niye, dok gibedo ka medde mapol nino ducu.’ Tika lok man ma kicoyo i Baibul-li tye ki pwony ma dul pa Lubanga myero olub i kare-ni?

11. Jo ma kicimogi me telo kacokke myero gudok nining i kom tira ma dul pa Jehovah miyo?

¹¹ Lumemba me Jang Gang Kal nyo Komitti me Lobo moni, luneno me adwol, ki luelda me kacokke myero gutim ngo ka gunongo tira ma a ki i dul pa Jehovah i kare-ni? Baibul miniwa tira ni myero walub cik dok wamine i te tela. (Nwo. 30:16; Ibru 13:7, 17) Gingi nyo cwiny me jemo myero obed pe i dul pa Jehovah, pien twero balo mar, kuc ki dong note ma i kacokke. Ngene kene ni pe tye Lakricitayo mo ma lagen ma mito bedo lajemo calo Diotrepe. (Kwan 3 Jon 9, 10.) Dong watwero penye kekenwa ni: ‘Tika akonyo jo ma i kacokkewa me dongo i yo me cwiny? Tika atye atera me ye ki dok cwako tira ma omege ma gitelowa gimiyo?’

12. Alokaloka ango ma kitimo i kit me cimo luelda kacel ki lukony kor tic?

¹² Tam kong i kom lok ma Lukiko Madit omoko cokcok-ki. “Lapeny pa Lukwan Bukkewa” i Wi Lubele me Novemba 15, 2014, onyuto alokaloka i kit ma myero kicim kwede lukony kor tic kacel ki luelda. Wi Lubele meno onyuto ni i cencwari me acel, lukiko madit omiyo twero bot luneno ma woto awota me cimo jo ma gupore me tic i kacokke. Ma lubbe ki lok meno, nicakke i Sektemba 1, 2014, luneno me adwol gubedo ka cimo luelda kacel ki lukony kor tic. Laneno me adwol tute me ngeyo omego ma luelda gineno ni opore me tic i kacokke kun tiyo kacel kwede i ticwa me  pwony ka twere. En bene neno kit ma jo me ot pa omego meno tye kwede. (1 Tem. 3:4, 5) Komitti pa luelda kacel ki laneno gingiyo ki diro Ginacoya me neno ka omego ma kimito cimone-ni opore me tic macalo lakony kor tic nyo laelda.—1 Tem. 3:1-10, 12, 13; 1 Pet. 5:1-3.

13. Watwero miyo cwakwa i kom tira ma luelda gimiyo nining?

¹³ Myero walub tira ma jenge i Baibul ma luelda giminiwa. Lukwat ma lugen magi ma gitye i dul pa Lubanga-ni ‘gilubo lok ada’ ma tye i Baibul. (1 Tem. 6:3) Tam kong i kom tira ma Paulo omiyo madok i kom jo ma gikelo anyobanyoba i kacokke. Jo mogo i kingi ‘gubedo ka wirre kun gibalo kare nono ma pe gitiyo tic mo, ento gubedo ka rwako wigi i lok pa jo mukene.’ Luelda guminigi tira ento gukwero winyo lok pa luelda woko. Jo me kacokke onongo myero guter jo magi nining? Paulo omiyo tira ni: “Myero wuniang maber i kom dano meno, pe wuribbe kwede.” Tira meno bene onongo nyuto ka maleng ni pe myero water jo meno calo lumonewa. (2 Tec. 3:11-15) I kare-ni, luelda gitwero miyo pwony me cikowa i kom ngat mo ma tye ka timo gin marac, calo winye ki ngat ma pe laye. (1 Kor. 7:39) Iwinyo nining ka luelda gunongo ni pore me miyo pwony meno? Ka ingeyo gin ma tye ka timme-ni, tika ibigwokke kun pe ibedo ki ngat meno me tye ka timo gin marac-ci? Ka inyuto mar kun icung matek me timo gin matir ci twero konyo ngat meno me weko timme marac-ci. ^[1]

14. Gin ango ma watwero timone wek kacokke obed maleng?

¹⁴ Ka walubo tira ma tye i Lok pa Lubanga, ci man weko kacokke bedo maleng i yo me cwiny. Tam kong i kom gin ma onongo tye ka timme i boma me Korint i kare macon. Paulo onongo omine kwicikwici me tito kwena i boma meno, dok bene onongo maro jo “maleng” ma gitye kunu. (1 Kor. 1:1, 2) Ento pud dong obedo tek ya bote me miyo tira madok i kom tim me carocaro ma onongo gitye ka nenone anena i kacokke meno! Paulo omiyo tira bot luelda ni omyero gumi lutim bal meno bot Catan​—i yo macek, ni kiryemgi woko ki i kacokke. Wek kacokke obed maleng, onongo mitte ni luelda gukwany “tobi” woko. (1 Kor. 5:1, 5-7, 12) Ka wacwako tam ma luelda gumoko me ryemo latim bal ma pe ongut, wakonyo me gwoko kacokke wek obed maleng ki dok miyo kare ki latim bal me ngut ki me kwayo Jehovah wek otimme kica.

15. Watwero gwoko kuc i kacokke nining?

¹⁵ Onongo dok mitte ni kimi tira i kom gin mo ma tye ka timme i kacokke ma i Korint. Omege mogo onongo gitye ka tero luye luwotgi i kot. Paulo openyogi ni: “Pingo pe ber botwu me ciro gin marac?” (1 Kor. 6:1-8) Gin ma kit meno pud timme wa i kare-ni. I kare mukene kuc ma i kin utmege balle woko pien nongo winye mo me biacara pe owoto maber dok gurwenyo cente nyo gwok bene oo wa i tim me kwo i wi diro. Jo mogo gutero omege i kot, ento Baibul tito ni ber me ciro gin marac ma ka balo nying Lubanga kacel ki kuc ma tye i kacokke. ^[2] Me cobo peko ki anywena nywena ma tye i kinwa, myero walub tira ma Yecu omiyo. (Kwan Matayo 5:23, 24; 18:15-17.) Ka watimo meno, ci wakelo note i kin jo pa Jehovah.

16. Pingo twere bot jo pa Lubanga me note i kingi?

 ¹⁶ Lok pa Jehovah nyuto pingo myero jone gubed ma gunote. Laco Jabuli ocoyo ni: “Nen kit macalo bedo ber ki me yomcwiny ka omego gibedo kacel ki mer i kingi!” (Jab. 133:1) Ka Luicrael onongo gitye luwiny bot Jehovah ci gibedo ma gunote dok labongo anyobanyoba. Lubanga otito kit ma jone bibedo kwede i anyim kun waco ni: ‘Abiweko gibedo ki kuc macalo romi ma tye i dwolgi.’ (Mika 2:12) Medo i kom meno, Jehovah otiyo ki lanebi Jepania me titone ni: “Abiloko leb pa dano wek gulok leb matir, wek gin ducu gulwong nying Rwot [Jehovah], dok guti bote ki cwiny acel.” (Jep. 3:9) Pud dong watye ki mot madit ya me woro Jehovah ma nongo wanote kacel!

17. Luelda myero guter ngat ma tye ka timo gin marac nining, wek kacokke obed maleng i yo me cwiny dok ma gunote?

¹⁷ Luelda myero gucob lok mo keken ma tye i kacokke cutcut dok ki cwiny me mar wek kacokke obed maleng i yo me cwiny dok ma jone gunote i kingi. Paulo onongo ngeyo ni mar pa Lubanga pe cung i kom kit ma Jehovah winyo kwede keken, dok ni En pe umo wange i kom bal ma dano timo. (Car. 15:3) Pi meno, Paulo pe oling alinga ento ki mar, en ocoyo waragane me acel bot jo Korint, waraga magwar ento i yo me mar. I nge dwe mogo, en ocoyo waragane me aryo bot jo Korint, dok man onyuto ni alokaloka onongo tye pien luelda gulubo tirane. Ka ce Lakricitayo mo tye ka lubo yo marac, luelda myero gukonye ki cwiny me mwolo.​—Gal. 6:1.

18. (a) I yo ango ma tira ma kimiyo i Lok pa Lubanga okonyo kacokke me cencwari me acel? (b) Gin ango ma wabinyamo i pwony ma lubo man?

¹⁸ Dong nen ka maleng ni Lok pa Lubanga okonyo Lukricitayo me cencwari me acel ma i Korint ki ma i kabedo mukene me gwoko kacokke wek obed maleng, ki kuc dok ma gunote. (1 Kor. 1:10; Ep. 4:11-13; 1 Pet. 3:8) Macalo adwogine, utmegiwa ma gukwo i kare meno gunongo adwogi maber i ticgi me pwony. Ki lok ada, Paulo onongo twero wacone ni lok me kwena maber dong “gitito bot ginaketa ducu ma tye i te polo.” (Kol. 1:23) I kare-ni, dul pa Jehovah ma gunote i kingi gitye ka tito lok madok i kom yub pa Lubanga i twok lobo ducu. Pwony ma lubo man binyuto kit ma jo magi gitero Baibul calo buk ma pire tek adada ki dok kit ma dong gumoko tamgi me keto deyo i kom Jehovah Won Twer Ducu.​—Jab. 71:15, 16.