Tika inongo ni tek me kwan piri keni cabit ki cabit? Nyo i kare mogo inongo ni kwano Baibul pe mit? Wan ducu i kare mogo wawinyo kit meno. Ento tam kong i kom jami mogo ma watimogi nino ducu. Lwoko komwa pol kare tero cawa ki kero, ento wawinyo maber adada i nge tyekone! Kwano Baibul piri keni bene twero weko iwinyo maber adada i nge tyekone. (Ep. 5:26) Nen kong tam mogo ma gitwero konyi:

• Ket yub. Kwano Baibul piwa kenwa tye i kin “gin maber makato” ma Lakricitayo omyero otim kare ducu. (Pil. 1:10) Me konyi wek wi pe owil i kom nino kwanni, co i karatac nino kacel ki cawa me kwanni dok iket ka mo ma weko bedo yot me nenone nino ducu. Nyo ter olang me cimmi ma twero kok me poyo wi pi kwanni ma nongo cawa me kwanni dong cok.

• Tim alokaloka. Kwanni piri keni woto nining? Me labolle, tika inongo ni yot me keto cwinyi kadi bed iter cawa madwong ka kwan? Nyo imaro kwan pi cawa manok ento teretere? In aye ingeyo diro me kwan ma opore piri. Pi meno, ket yub ma opore ki dironi me kwan. Ka iwinyo ni miti me kwan pe i cawa ma iketo, ci pingo pe ikwan pi dakika apar keken? Kadi bed ikwano pi dakika apar keken, pud itwero pwonyo jami mapol. Dok ka dong icako kwanni, ci man bitugo cwinyi me kwan pi cawa malac.—Pil. 2:13.

• Yer gin ma ibikwanone con. Ka ikuro wa i cawa me kwanni piri keni ci icako yero gin ma ibikwano, ci pe ibitic ki ‘kare ma tye i yo maber.’ (Ep. 5:16) Pingo pe ico piny pwony mapatpat ma imito kwanogi i cawa me kwan piri keni? Ka lapeny mo keken ongolle i wi, co lapeny meno piny. Dok i nge tyeko kwanni, pud itwero medo jami mukene i kom pwony mapatpat ma itye ki miti me kwanogi.

• Lok cawa me kwanni. Gin ma pire tek aye ni omyero wabed ka kwan piwa kenwa cabit ki cabit. Me timo meno, ka mitte, tim alokaloka i kom cawa kacel ki nino me kwanni, cawa ma itero ka kwan, ki pwony mene ma ibikwanone.

Ka walubo yub me kwan piwa kenwa cabit ki cabit, wanongo adwogi mabeco. Watwa ki Jehovah dongo doko matek, wapwonnye me moko tam mabeco i kwowa, dok wabinongo cuko cwiny.—Yoc. 1:8.