1-2. I yo mapatpat ango ma kitwero terowa marac?

 YECU obolo carolok i kom dato mo ma obedo ka lego langolkop mo pi kony pien onongo kitye ka tere marac. Lulub kor Yecu onongo gitwero niang maber kit ma dato meno winyo kwede pien pol pa dano ata-ni onongo kiterogi marac i kare meno. (Luka 18:​1-5) Wan bene watwero niang kit ma dato-ni onongo winyo kwede pien wan ducu dong kiterowa marac i kare mo i kwowa.

² I kare-ni, pol pa dano gitye ki cwiny me apokapoka, pe gitye lukica, dok gubedo luworo. Pi meno, pe wabedo ki ur ka kiterowa marac. (Latit. 5:8) Ento cwinywa twero tur adada ka omego nyo lamego mo aye oterowa marac. Ki lok ada, omegiwa ki lumegiwa pe gitye calo lumonewa ma giunowa nyo gidagwa, pien pe gitye ki miti me terowa marac. Gitye mere ki roc aye. Watwero pwonyo jami mapol ki i kit ma Yecu odok kwede iye i kare ma lumonene gutere marac. Ka watwero diyo cwinywa i kom lumonewa ma giterowa marac, ci nongo myero wadi cwinywa makato i kom luye luwotwa! Jehovah winyo nining ka luye luwotwa nyo jo mukene guterowa marac? Tika en paro pi gin ma timme i komwa?

3. Tika Jehovah paro ka kitye ka terowa marac, dok pingo igamo kit meno?

³ Jehovah mito ni kiterwa maber dok en neno ka kiterowa marac. “[Jehovah] maro ngolo kop atir.” (Jab. 37:28) Yecu ocuko cwinywa ni Jehovah ‘biculo kworwa oyotoyot’ ka karene oromo. (Luka 18:​7, 8) Dok cokcok-ki, Jehovah  bijwayo pekkiwa ducu ci en pe biye ni dok kiterwa marac matwal.—Jab. 72:​1, 2.

4. Kony ango ma Jehovah miyo botwa i kare-ni?

⁴ Watye ka kuro kare ma Jehovah bicobo pekkiwa ducu. Ento kadiwa i kare-ni, Jehovah konyowa ka jo mukene giterowa marac. (2 Pet. 3:13) Me labolle, en pwonyowa kit me gwokke ki timo jami ma pe nyuto ryeko ka kiterowa marac, wek pe wamed peko i komwa. Yo acel ma en otimo kwede meno aye ki nyutiwa i Baibul kit ma Wode odok kwede iye i kare ma kitere marac. Jehovah bene ominiwa tam i Baibul i kom gin ma watwero timo ka kiterowa marac.

GWOKKE KI KIT MA IDOK KWEDE IYE KA KITERI MARAC

5. Pingo omyero wagwokke adada i kom kit ma wadok kwede iye ka kiterowa marac?

⁵ Cwinywa twero tur dok watwero bedo ki par madwong ka kiterowa marac. (Latit. 7:7) Lutic pa Jehovah mogo ma lugen, calo Yubu ki Kabakuk, bene guwinyo kit meno. (Yubu 6:​2, 3; Kab. 1:​1-3) Kadi bed ni pe rac me winyo kit meno, omyero wagwokke adada wek pe watim gin mo me mingo ka kiterowa marac.

6. Pwony ango ma wanongo ki i labol pa Abcalom? (Nen bene cal.)

⁶ Ka ngat mo oterowa nyo ngat ma wamaro i yo marac, watwero bedo ki miti me culo kwor. Ento man twero medo peko ameda. Nen kong labol pa Abcalom, wod pa Kabaka Daudi. En obedo ki akemo madwong i kare ma Amnon, ma wod pa nyek mamagi, obuto ki laminne Tamar tektek. Ma lubbe ki Cik pa Moses, bal ma Amnon otimo onongo romme to. (Levi 20:17) Onongo pe rac ki Abcalom me bedo ki kiniga. Ento en otimo bal me neko Amnon.—2 Cam. 13:​20-23, 28, 29.

7. Laco Jabuli 73 owinyo nining i kare ma oneno tim maraco?

⁷ Ka jo ma guterowa marac pe gunongo pwod mo, watwero cako tamo ni konnye pe me timo jami ma atir. Tam kong i kom laco Jabuli 73 ma oneno ni lutim maraco gibedo ka lony alonya kun jo ma kitgi atir gilimo can i cing jo maraco. En owaco ni, “Meno aye kit pa jo maraco; kare ducu gilimo lwak jami mapol.” (Jab. 73:12) Cwinye otur adada pi tim maraco ma obedo ka neno dok ocako tamo ni konnye pe me tic pi Jehovah. En owaco ni: “Atemo ki tekka ducu me niang lok  man, kadi bed oolo koma twatwal.” (Jab. 73:​14, 16) Ki lok ada, en otito ni: “Ento an, tyena ogwangnge onongo dong acok poto, tyena onongo dong cok cer mada.” (Jab. 73:2) Gin ma kit meno bene otimme i kom omego mo ma nyinge Alberto. a

8. Tim me ngolo kop alenga ogudo omego mo acel nining?

⁸ Omege mogo gukok i kom Alberto ni okwalo cente me kacokke, kun onongo pe okwalo. Macalo adwogine, Alberto orwenyo motte me tic macalo laelda dok jo mapol me kacokke ma guwinyo ni kikok i kome pi kwalo cente, gurwenyo woro ma gitye kwede i kome woko. En owaco ni: “Abedo ki kiniga dok cwinya otur matek.” Cwinye ocwer matek adada ma oweko en ojuko cito i cokke woko, dok ticce okwe woko pi mwaki abic. Gin mutimme-ni nyuto gin ma twero timme i komwa bene ka kiterowa marac ci pe wajuko kinigawa.

LUB KIT MA YECU ODOK KWEDE IYE I KARE MA KITERE MARAC

9. Tim maraco mene ma Yecu ociro? (Nen bene cal.)

⁹ Yecu owekiwa lanen ma pud dong ber loyo i kom kit ma watwero dok kwede iye  ka kiterowa marac. Tam kong i kom tim maraco ma jo mukene gutimo i kome, kadi wa jo ganggi. Wadine guwaco ni en lapoya, lupwonye dini guwaco ni en nongo tekone me timo tango ki bot jogi, dok lumony me Roma gucaye, guketo aunauna malit i kome, dok i agikkine guneke woko. (Mar. 3:​21, 22; 14:55; 15:​16-20, 35-37) Kadi bed kit meno, Yecu ociro jami maraco magi ducu labongo culo kwor. Pwony ango ma wanongo ki bote?

10. Yecu ociro tim maraco ma kitimo i kome nining? (1 Petero 2:​21-23)

¹⁰ Kwan 1 Petero 2:​21-23. b Yecu owekiwa lanen maber loyo i kom kit ma watwero dok kwede iye ka kiterowa marac. En onongo ngeyo awene ma myero eling alinga ki cawa mene ma myero elok iye. (Mat. 26:​62-64) I kare mukene ma kiloko lok goba i kome, en oling alinga. (Mat. 11:19) I kare ma en oloko, en pe oyeto jo ma gubedo ka une nyo obwurogi. Yecu obedo ka jukke kene pien en “omine kene bot Ngat ma ngolo kop atir.” Yecu onongo ngeyo ni Jehovah oneno ni kitye ka tere marac. En onongo tye ki gen ni Jehovah bicobo pekki ducu i karene kikome.

11. I yo mapatpat ango ma watwero gwokke ki gin ma waloko? (Nen bene cal.)

¹¹ Ka ngat mo oterowa marac, watwero lubo lanen pa Yecu ka wagwokke ki gin ma waloko. I kare mogo, pe mitte ni watim nyo wawac gin mo pien nongo bal meno tidi. Nyo watwero yero me ling alinga pien ka wawaco gin mo, nongo wabimedo peko ameda. (Latit. 3:7; Yak. 1:​19, 20) I kare mukene, twero mitte ni waloki wek wakony  ngat ma kitye ka tero marac nyo ka mitte ni wacung matek pi niyewa. (Tic 6:​1, 2) Ka watye ka lok, myero walok i yo me woro dok ma komwa opye mot.—1 Pet. 3:15. c

12. I yo ma nining ma wamine kenwa “bot Ngat ma ngolo kop atir”?

¹² Watwero bene lubo lanen pa Yecu ka wamine kenwa “bot Ngat ma ngolo kop atir.” Ka jo mukene gungolo kop alenga i komwa nyo ka guterowa marac, wageno ni Jehovah ngeyo gin mutimme. Ngeyo ni Jehovah bijwayo tim maraco ducu i anyim, bikonyowa me ciro tim maraco. Ka wageno Jehovah dok wakuro ni en ocob peko ducu, pe wabimedde ki bedo ki akemo nyo adegadega i cwinywa. Ka wamedde ki bedo ki akemo i cwinywa, twero weko watimo gin mo marac, rwenyo yomcwiny ma watye kwede, dok balo watwa ki Jehovah woko.—Jab. 37:8.

13. Ka inongo ni kanyo tim maraco tek, gen ango ma itwero bedo kwede?

¹³ Ki lok ada, pe watwero lubo lanen pa Yecu kore ki kore. I kare mukene, watwero timo nyo waco gin mo ma lacen wakoko iye ange. (Yak. 3:2) Dok i kine mukene, tim marac ma kitimo i komwa twero weko wabedo ki arem kacel ki cwercwiny pi kare me kwowa kulu. Ka gin ma kit meno otimme i komi, bed ki gen ni Jehovah ngeyo kwo ma itye ka wok ki iye. Dok Yecu bene ngeyo kit ma iwinyo kwede, pien en bene kitimo jami maraco i kome. (Ibru 4:​15, 16) Medo i kom miyo botwa lanen pa Yecu, Jehovah bene miniwa tam mabeco i Baibul, ma twero konyowa ka kiterowa marac. Kong dong wanenu tyeng aryo ki i buk pa Jo Roma ma twero konyowa.

“WUWEK KARE KI KINIGA PA LUBANGA”

14. Tyen lokke ngo me ‘weko kare ki kiniga pa Lubanga?’ (Jo Roma 12:19)

¹⁴ Kwan Jo Roma 12:19. Lakwena Paulo ocuko cwiny Lukricitayo ni: “Wuwek kare ki kiniga pa Lubanga.” Waweko kare ki kiniga pa Jehovah ka waye ni en aye omok awene ki dong i yo ma nining ma en bicobo kwede pekkiwa. I kare ma kitero omego mo ma nyinge John i yo marac, en owaco ni: “Onongo mitte ni ajuk kinigana wek pe atim gin mo marac, ento timone onongo pe yot. Jo Roma 12:19 okonya me diyo cwinya ki dong me keto genna i kom Jehovah.”

15. Pingo bedo ber loyo ka wakuro ni Jehovah aye ocob peko moni?

¹⁵ Wanongo adwogi maber ka wakuro Jehovah me cobo peko moni. Ka watimo kit meno, ci wabigwokke ki abarwic kacel ki turcwiny ma bino ka watye ka tute me cobo pekowa wan kikomwa. Jehovah omine me konyowa. En owaco ni wakure dok ocikke ni ebicobo peko ma watye ka kato ki iye-ni. Ka waye cikke pa Jehovah ni, “abiculo wange lacen,” ci pe mitte ni wamedde ki bedo ki akemo pien nongo wangeyo ni en bicobo lok meno i yo maber loyo. Meno aye gin ma okonyo John, ma kiloko i kome con-ni. En owaco ni, “Ka akuro ni Jehovah ocob pekkina, adwogine bibedo ber loyo ka an aye onongo atemme me cobo pekona an kikoma.”

“WULO GIN MARAC KI TIMO GIN MABER”

16-17. Lega twero konyowa nining me ‘medde ki loyo gin marac ki timo gin maber?’ (Jo Roma 12:21)

¹⁶ Kwan Jo Roma 12:21. Paulo ocuko cwiny Lukricitayo ni omyero ‘gulo gin marac ki timo gin maber.’ I Pwony ma Yecu omiyo i Wi Got, en owaco ni: ‘Wumar lukworwu,  dok bene wuleg Lubanga pi jo ma keto ayelayela i komwu.’ (Mat. 5:44) Dok meno aye gin ma Yecu otimo kikome. Twero bedo ni watamo i kom kit ma kiuno kwede Yecu i kare ma lumony me Roma gugure i kom yat. Kiketo can malit i kom Yecu dok en ociro arem malit. Pe watwero niang maber can ducu ma en okato ki iye.

¹⁷ Yecu omedde ki bedo lamar kacel ki lagen kadi bed en okato ki i can malit. Me ka penyo ni Lubanga omi pwod i kom lumony magi, en olego ni: “Aba, wayi tim kica botgi, pien pe gingeyo gin ma gitye ka tiyone.” (Luka 23:34) Ka walego bot Jehovah ni okony jo ma giunowa, man bikonyowa me bedo ma wiwa opye mot dok bikweyo akemowa. Twero bene konyowa me loko kit ma wawinyo kwede i komgi.

18. Lega okonyo Alberto ki John nining me kanyo tim maraco?

¹⁸ Lega okonyo omege aryo ma kiloko i komgi i pwony man me kanyo tim maraco ma kitimo i komgi. Alberto owaco ni: “Alego pi omege ma gutera marac-ci. Alego Jehovah tyen mapol ni okonya wek ajuk bedo ki kiniga pi gin mutimme-ni.” Ki yomcwiny madit, i kare-ni Alberto dok tye ka tic pi Jehovah ki gen. John owaco ni: “Tyen mapol, alego Jehovah ni okony omego ma otera marac-ci dok okonya me timme kica. Jehovah okonya pe me mako akemo i kom omego-ni ki me juko ngolo kop i kome. Dok lega magi bene okonya me bedo ma wiya opye mot.”

19. Gin ango ma omyero wamedde ki timone ka pud wakwo i lobo man marac-ci? (1 Petero 3:​8, 9)

¹⁹ Ka pud watye ka kwo i lobo man marac-ci, pud kitwero terowa marac. Ento, labongo paro pi peko ma wabikato ki iye, omyero wamedde wunu ki lega bot Jehovah pi kony. Omyero bene walub kit ma Yecu odok kwede iye i kare ma kitere marac. Dok mitte ni wamedde ki lubo tam ma nonge i Lok pa Lubanga. Ka watimo meno, watwero bedo ki gen ni Jehovah bigoyo laane i komwa.—Kwan 1 Petero 3:​8, 9.