1. Lakwena Paulo onongo winyo nining i kom lukony kor tic?

 LUKONY kor tic gitiyo tic ma pigi tego i kacokke. Lakwena Paulo onongo tye ki pwoc madwong pi tic ma omege magi gitimo. Me labolle, i kare ma en ocoyo waraga bot Lukricitayo me Pilipi, en ocwalo motte bot lukony kor tic kacel ki bot luelda bene.—Pil. 1:1.

2. Omego Luis winyo nining i kom ticce macalo lakony kor tic?

² Kadi bed gitino nyo dong guteggi, omege ginongo yomcwiny madwong pi tic i kacokke macalo lukony kor tic. Me labolle, Devan onongo tye ki mwaka 18 i kare ma kicime macalo lakony kor tic. Ento omego mo ma nyinge Luis kicimo macalo lakony kor tic i kare ma tye ki mwaka 50 ki wiye. En winyo nining me tic macalo lakony kor tic? Luis owaco ni, “Cwinya yom adada me tic pi omege ki lumege ma i kacokke kit man. Gunyuta mar madwong adada dok i kare-ni an bene atwero nyutigi kit ma amarogi kwede.” Lukony kor tic mapol bene giwinyo kit meno.

3. Lapeny mene ma wabinyamogi?

³ Ka ibedo omego ma onongo batija dok i kare-ni pe itye ka tic macalo lakony kor tic, tika itwero keto tic man macalo yubbi? Gin ango ma twero tugo cwinyi me timo meno? Dok kodi kit mene ma Baibul waco ni omyero idonggi wek okonyi me doko lakony kor tic? I pwony man, wabinyamo lagam pi lapeny magi. Ento mukwongo, kong wanyamu tic ango ma lukony kor tic gitimo i kacokke.

 TIC MA LUKONY KOR TIC GITIMO

4. Tic ango ma lukony kor tic gitimo i kacokke? (Nen bene cal.)

⁴ Lakony kor tic obedo omego ma onongo batija dok ma cwiny maleng aye ocimo me konyo luelda ki timo tic mapatpat ma pigi tego i kacokke. Lukony kor tic gineno ni utmege gitye ki kad me wang tic kacel ki bukke muromo me konyogi i tic me pwony. Mukene gikonyo i tic me gwoko lengo kacel ki roco Ot me Ker. Lukony kor tic bene gitiyo macalo lujol welle dok mukene gitiyo i kom jami lakub dwan ki vidio i cawa me cokke. Tic magi ducu gubedo tic ma pigi tek adada i kacokke. Ma dong pire tek loyo, lukony kor tic gubedo co ma gimaro Jehovah dok gikwo ma lubbe ki rwomme me kit ma atir. Gimaro bene omege ki lumege matek adada. (Mat. 22:​37-39) Omege ma gunongo batija gitwero bedo ma gupore me doko lukony kor tic nining?

5. Gin ango ma omego moni myero otim me doko lakony kor tic?

⁵ Baibul ryeyo kit mapatpat ma omego moni myero kong odong wek kicime ma tic macalo lakony kor tic. (1 Tem. 3:​8-10, 12, 13) Ka imito tic pi jo mukene macalo lakony kor tic, ci tute matek me pwonyo ki dongo kit magi. Ento mukwongo, pire tek ni iniang tyen lok mumiyo imito tic macalo lakony kor tic.

TYEN LOK ANGO MUMIYO IMITO DOKO LAKONY KOR TIC?

6. Gin ango ma myero otug cwinyi me tic pi omege ki lumege? (Matayo 20:28; nen bene cal.)

⁶ Tam kong i kom Yecu, ma oweko botwa lanen maber loyo. Mar pi Jehovah ki pi dano aye otugo cwinye me timo jami ducu. Mar meno otugo cwinye me tic matek kacel ki timo tic ma rwomgi lapiny pi jo mukene. (Kwan Matayo 20:28; Jon 13:​5, 14, 15) Ka mar aye tugo cwinyi, ci Jehovah bigoyo laane i komi dok bikonyi me cobo yubbi me tic macalo lakony kor tic.—1 Kor. 16:14; 1 Pet. 5:5.

7. Pingo rac adada me bedo ki miti me doko lakony kor tic pien imito ni jo mukene guneni ni itye ki rwom ma lamal?

⁷ Dano me lobo-ni pol kare gimaro jo ma gikette ni pigi tek adada. Ento, jo pa Jehovah pe gitye kit meno. Omego ma maro utmegine kit ma Yecu otimo kwede, pe  bedo ki miti me loyo jo mukene ki tek nyo bedo ki miti ni kinene calo en pire tek kato jo mukene. Ka ni kicim dano ma kit meno me tic i kacokke, ci en twero kwero timo tic mogo ma rwomgi lapiny me konyo romi pa Jehovah. En twero nenne kekene ni rwomme lamal ma pe epore me timo tic magi. (Jon 10:12) Jehovah pe bigoyo laane i kom ngat ma wakke kit meno.—1 Kor. 10:​24, 33; 13:​4, 5.

8. Tira ango ma Yecu omiyo ki lukwenane?

⁸ I kare mogo, kadi wa lupwonnye pa Yecu onongo gimito tiyo tic mogo ento pe pi tyen lok ma atir. Tam kong i kom gin ma lakwena Yakobo ki Jon gutimo. Gin gupenyo Yecu ni ominigi kabedo me rwom madit i Kerre. Yecu pe opwoyogi pi mitigi man. Me ka meno, Yecu otito ki lupwonnyene 12 ducu ni: “Ngat ma mito bedo ladit i kinwu en aye myero obed laticwu, ki ngat ma mito bedo mukwongo i kinwu, en aye myero obed opiiwu ducu.” (Mar. 10:​35-37, 43, 44) Omege ma gitye ki miti ma atir—ma en aye, me tic pi jo mukene, gubedo mot madit bot kacokke—1 Tec. 2:8.

GIN ANGO MA TWERO KONYI ME DONGO MITI ME TIC PI UTMEGINI?

9. Gin ango ma romo konyi me dongo miti me tic pi jo mukene?

⁹ Labongo akalakala mo, imaro Jehovah dok imito tic pi jo mukene. Kadi bed kit meno, twero bedo ni ipe ki miti me timo tic ma lakony kor tic timo. Gin ango ma romo konyi me dongo miti me tic pi jo mukene? Pingo pe itam i kom yomcwiny ma ibinongo ka itiyo pi omege ki lumege? Yecu owaco ni: “Miyo mot kelo gum [yomcwiny] makato gamo agama.” (Tic 20:35) Dok Yecu kikome bene okwo kit meno. En onongo yomcwiny madwong pien otiyo pi jo mukene, dok in bene ibinongone.

10. Yecu onyuto nining ni cwinye yom me tic pi jo mukene? (Marako 6:​31-34)

¹⁰ Nen kong labol ma nyuto kit ma Yecu onongo kwede cwinye yom i tic pi jo mukene. (Kwan Marako 6:​31-34.) I nino mo acel, Yecu kacel ki lukwenane onongo guol adada. Gin onongo gitye ka wot me cito ka ma dano pe iye, wek ginong kare me yweyo. Ento lwak jo mapol guringo gungolo wigi, ki miti ni Yecu opwonygi. En onongo twero kwero woko pien en kacel ki lupwonnyene onongo peya “gubedo ki kare mo me cam.” Nyo Yecu onongo romo pwonyogi lok ada acel nyo aryo mo, ci waccigi ni gudok cen paco. Ento kit macalo mar aye onongo tugo cwinye, en ‘opwonyogi ki lok mapol.’ Dok en omedde ki pwonyo lwak man nio ka “cawa bene dong okato” woko. (Mar. 6:35) En otimo man, pe ni onongo myero en otim, ento otimo pien “kica ocako make i komgi.” Yecu onongo mito pwonyo lwak magi pien onongo marogi. Tic pi jo mukene okelo yomcwiny madwong bot Yecu.

11. Yecu okonyo lwak i yo me kom nining? (Nen bene cal.)

¹¹ Yecu okonyo dano ki pwonyogi lok i kom Lubanga, ento en bene okonyogi i yo me kom. En omiyogi cam dok otiyo ki lupwonnyene me poko cam magi bot lwak. (Mar. 6:41) I kare ma en otimo meno, en opwonyo lupwonnyene kit me tic pi jo mukene. En bene onyutigi ni kodi tic ma kit man, ma obedo tic ma pol kare lukony kor tic gitimo, obedo tic ma pire tek. Go kong yomcwiny ma lukwena gubedo kwede me nywako i poko cam man ma Yecu onyayo i yo me tango nio ka “gin ducu gucamo guyeng”! (Mar. 6:42) Man obedo labol acel  ma nyuto ni Yecu onongo paro pi miti pa jo mukene makato mitine. En otimo kit meno pi kare me kwone ducu i lobo kany. (Mat. 4:23; 8:16) Yecu onongo yomcwiny i pwonyo jo mukene kacel ki konyogi i yo me kom. Labongo akalakala mo, in bene ibinongo yomcwiny madwong ka itye atera me tic pi jo mukene macalo lakony kor tic.

12. Pingo pe pore me tam ni wape ki diro mo me konyo utmegiwa ma i kacokke?

¹² Ka iwinyo calo pe itye ki diro ma mitte me tic macalo lakony kor tic, pe iwek cwinyi otur. Labongo akalakala mo, olo itye ki diro mogo ma twero weko ibedo me kony i kacokke. Tam i kom lok ma Paulo owaco i 1 Jo Korint 12:​12-30, ci ileg Jehovah wek okonyi inen kit ma lok magi gudi kwede. Lok pa Paulo man nyuto ka maleng ni, calo lutic pa Jehovah mukene, in bene piri tek dok itye ki tic me atima i kacokke. Ka pe iromo tic macalo lakony kor tic i kare-ni pien mitte ni kong idong kit mogo wek ibed ma ipore, pe iil cingi woko. Me ka meno, tim jami ma itwero me tic pi Jehovah kacel ki me konyo utmege. Itwero bedo ki gen ni luelda gibitamo piri ci gimini tic ma itwero cobone ma nongo peya kicimmi me doko lakony kor tic.—Rom. 12:​4-8.

13. Lok mene ma tye ada ka odok i kom kit mogo ma ngat moni myero odong wek kicime me tic i kacokke?

¹³ Tam kong i kom lok ada man: Pol pa kit mogo ma Baibul nyuto ni lukony kor tic gubed kwede gubedo kit ma Lukricitayo ducu omyero gudong. Lukricitayo ducu myero gunyikke cok ki Jehovah, cwinygi obed yom me konyo jo mukene, kun bene gikwo i yo ma yomo cwiny Lubanga. Nen calo in dong ityeko dongo pol pa kit magi ma mitte ni lakony kor tic odonggi-ni. Ento kong dong wanenu jami mukene ma pigi tego ma omego moni myero otim me bedo ma opore me tic macalo lakony kor tic.

GIN ME ATIMA ME DOKO LAKONY KOR TIC

14. Tyen lokke ngo me bedo ‘ngat ma romo awora’? (1 Temceo 3:​8-10, 12)

¹⁴ Kong dong wanyamu kit mogo mapatpat ma kiryeyogi i 1 Temceo 3:​8-10, 12. (Kwan.) Lukony kor tic myero gubed “jo ma romo awora.” Meno pe tyen lokke ni dong pe itwero boko lok nyo nyero ki jo  mukene. (Latit. 3:​1, 4) Ento man tyen lokke ni omyero iti matek me cobo tic ma kimini ducu maber. Ka ingene pi bedo ngat ma genne dok cobo ticce ducu kakare, ci ibinongo woro ki bot jo me kacokke.

15. Tyen lokke ngo me bedo “jo ma pe doggi aryo” ki jo ma ‘pe gubedo luworo me nongo lim’?

¹⁵ “Jo ma pe doggi aryo.” Man tyen lokke ni iloko lok ada dok igenne. Icobo cikkeni dok pe ibwolo jo mukene. (Car. 3:32) “Pe gubed luworo me nongo lim.” Man tyen lokke ni pe ikwalo dano ka itye ka timo biacara dok itiyo ki cente i yo maber. Pe itiyo ki omege ki lumege ma i kacokke me nongo cente i wi diro.

16. (a) Tyen lokke ngo me bedo ngat ma pe mato “kongo matek tutwal”? (b) Tyen lokke ngo me bedo jo ma ‘cwinygi leng’?

¹⁶ “Pe gin lumat kongo matek tutwal.” Meno tyen lokke ni pe gimato kongo wa i labyel kweri nyo gubedo jo ma ngene macalo lumero. Gubedo jo ma “cwinygi bene leng,” ma meno tyen lokke ni, gikwo ma lubbe ki rwom me kit ma atir pa Jehovah. Kadi bed gitye ki roc, pud gibedo ki wat macok ki Jehovah dok man weko cwinygi pe pidogi.

17. I yo ma nining ma omego moni twero nyutone ni ebedo ngat ma genne ka kitye ka ‘temme’? (1 Temceo 3:10; nen bene cal.)

¹⁷ “Myero kong gikwong temogi.” Man tyen lokke ni nongo kong luelda guneno ni icobo ticci maber dok gitwero genni. Pi meno, ka luelda gumini tic mo, ci omyero inen ni ilubo tira ma luelda kacel ki dul pa Jehovah omiyo. Tute matek me niang maber gin ma mitte ni itim kacel ki awene ma mitte ni icob tic meno iye. Ka icobo ticci maber dok ki mit kom, ci omege ki lumege me kacokke gibineno ni itye ka dongo maber dok gitwero jenge i komi. Wun luelda, wunen ni wupwonyo omege ma gunongo batija. (Kwan 1 Temceo 3:10.) Tika wutye ki omege ma gunongo batija ma mwakagi peya oromo 15 i kacokkewu? Tika gitye ki yub maber me kwan pigi kengi dok giyubbe maber pi cokke? Tika gimiyo lagam i cokke kare ki kare kun bene ginywako i tic me pwony? Ka tye kit meno, wuminigi tic ma rwatte ki mwakagi kacel ki kerogi. Ka wutimo meno, ci biminiwu kare me kong “temogi.” Omege ma gitye mwaka 15 ki wiye dok gunyuto ni gitwero cobo ticgi maber, kitwero cimogi macalo lukony kor tic.

18. Tyen lokke ngo me bedo labongo ‘lok mo marac i komi’?

 ¹⁸ “Lok mo marac pe i komgi.” Man tyen lokke ni pe tye gin mo marac ma en otimo ma ngat mo twero kok kwede i kome. Kadi bed kit meno, i kare mogo kitwero kok gobagoba i kom Lakricitayo. Kimoro adot gobagoba i kom Yecu, dok en otito ni kibikok gobagoba i kom lulub kore bene. (Jon 15:20) Ento, ka imedde ki timo gin ma atir, kit ma Yecu otimo kwede, ibibedo ki nying maber i kacokke.—Mat. 11:19.

19. ‘Bedo ki dako acel’ kwako gin ango?

¹⁹ ‘Myero gubed ki dako acel.’ I kare ma Jehovah ocako te yub me nyom, en owaco ni nyom omyero obed i kin laco acel ki dako acel. Dok man aye gin ma Lakricitayo myero olubi. (Mat. 19:​3-9) Laco ma obedo Lakricitayo myero pe otim tim tarwang. (Ibru 13:4) Man bene tyen lokke ni en myero obed lagen bot dakone. Pi meno, en pe dok bibedo ki wang me miti i kom mon mukene.—Yubu 31:1.

20. I yo ma nining ma omego moni nyuto kwede ni egwoko ‘jo me ode maber’?

²⁰ “Myero gulo litinogi ki odigi bene ducu maber.” Ka ibedo lawi ot, ci omyero iter ticci calo gin ma pire tek adada. Nen ni wubedo ki woro pi jo me ot kare ki kare. Nywak i tic me pwony kacel ki dakoni ki lutinoni kare ki kare. Kony lutinoni me dongo wat macok ki Jehovah. (Ep. 6:4) Laco ma gwoko jo me pacone maber, nyuto ni etwero bene gwoko jo me kacokke.—Por ki 1 Temceo 3:5.

21. Ka pud peya itye ka tic macalo lakony kor tic, ci gin ango ma itwero timone?

²¹ Wun omege ma pud peya wutye ka tic macalo lukony kor tic, walegowu ni wukwan pwony man ki diro ci wuleg bot Jehovah pi lok man. Kwan lok i kom kit mapatpat ma myero ngat moni odong wek kicime macalo lukony kor tic dok iti matek wek ibed ma ipore. Tam matut i kom mar ma itye kwede pi Jehovah kacel ki utmegini. Dong mitini me tic pigi. (1 Pet. 4:​8, 10) Nong yomcwiny madwong makato ma bino pi tic pi omegini ki lumegini. Walego ni Jehovah ogo laane i kom tuteni me cobo yubbi me tic macalo lakony kor tic!—Pil. 2:13.