1. Wangeyo nining ni tic me loko dano wek gudok lulub kor Yecu obedo tic me laro kwo?

TIC me loko dano wek gudok lulub kor Yecu obedo tic me laro kwo! Wangeyo man nining? I kare ma Yecu omiyo cik ma kicoyo i Matayo 28:19, 20, en owaco ni: “Wuciti wucilok jo me rok ducu gudok jo ma luba, kun wubatijagi.” Batija pire tek lakwene? Obedo gin ma myero itim wek inong larre. Ngat ma mito nongo batija myero obed ki niye ni etwero nongo kwo ma pe tum pien Yecu oto pi larowa ci kicere. Meno aye tyen lok mumiyo lakwena Petero owaco bot Lukricitayo luwote ni: “Gin ma rom ki man ma koni larowu en aye batija; . . . pi cer pa Yecu Kricito.” (1 Pet. 3:21) Pi meno, ka latin kwan onongo batija, nongo en dong tye ki gen me larre.

2. Kodi lupwonye ango ma 2 Temceo 2:24, 25 waco ni omyero wabed?

² Me loko dano, myero wadok ‘lupwonye ma ludiro.’ (Kwan 2 Temceo 2:24, 25.) Pingo? Pien Yecu ominiwa cik ni: “Wuciti wucilok jo me rok ducu gudok jo ma luba, . . . wupwonygi.” Lakwena Paulo owaco ni omyero ‘imak’ tic man matek, “pien ka itimo kumeno, in kikomi ibilarre ki jo ma winyi bene.” Dong pi tyen lok matir, Paulo owaco ni: ‘Gwok pwonnyi.’ (1 Tem. 4:16) Kit macalo omyero kong wapwony dano ka wek gudok lulub kor Kricito, wamito ni pwonywa obed maber loyo.

3. I pwony man, ngo ma wabinyamo madok i kom kwano Baibul ki dano?

³ Watye ka kwano Baibul ki lutino kwan milion mapol i wi lobo-ni ducu. Ento kit ma pwony ma okato-ni otito kwede, wamito ni wange kit ma watwero konyo kwede lutino kwan magi wek gunong batija macalo lupwonnye pa Yecu Kricito.  I pwony man, wabinyamo jami abic mukene ma lupwonye ducu myero gutim me konyo lutino kwangi me dongo nio wa i batija.

4. Pingo omyero lapwony ojukke kene ka tye ka kwan ki latin kwanne? (Nen bene lok ma i tere piny.)

⁴ Wamaro Lok pa Lubanga ma wapwonyo ki dano. Pi meno, watwero bedo ki miti me lok tutwal i kom gin ma wamaro. Ento, kadi bed itye ka doro Kwano Wi Lubele, Kwano Baibul Kacel Macalo Kacokke, nyo kwano Baibul ki dano i gange, lador kwan man myero pe olok tutwal. Ka wek Baibul aye olok pire, lapwony myero ojukke kene dok pe otem tito jami ducu ma en ngeyo i kom wang Baibul moni nyo i kom lok moni. * (Jon 16:12) Kong ipor ngec me Baibul ma onongo itye kwede i kare ma inongo batija ki ma dong itye kwede i kare-ni. I kare ma inongo batija, twero bedo ni onongo iniang pwony ma pigi tego me Baibul keken. (Ibru 6:1) Oteri mwaki mapol me pwonyo gin ma dong ingeyo i kare-ni, pi meno pe itemme me pwonyo latin kwan manyen ki jami ducu ma ingeyo lawang acel.

5. (a) Ma lubbe ki 1 Jo Tecalonika 2:13, ngo ma wamito ni latin kwanwa oniang ki i kwanne? (b) Watwero cuko cwiny latin kwanwa nining wek olok i kom gin ma en tye ka pwonyone?

⁵ Wamito ni latin kwanwa oniang ni gin ma en tye ka pwonyo a ki i Lok pa Lubanga. (Kwan 1 Jo Tecalonika 2:13.) Watwero timo meno nining? Cuk cwiny latin kwanni me lok i kom jami ma en tye ka pwonyone. Me kaka bedo ka tito te ginacoya ducu bot latin kwanni, penye wek en aye otitgi boti. Kony latin kwan me neno kit ma Lok pa Lubanga gudo kwede kwone. Penye lapeny ma twero weko en tito tamme ki kit ma en winyo kwede i kom ginacoya ma okwano. (Luka 10:25-28) Me labolle, penye ni: “Ginacoya man okonyi nining me neno kit pa Jehovah mogo?” “Lok ada man ma ipwonyo ki i Baibul twero konyi nining?” “Iwinyo nining pi gin ma ipwonyo kombeddi?” (Car. 20:5) Gin ma pire tek loyo pe obedo ngec pa latin kwan, ento kit ma en maro kwede ngec meno ki ketone i tic.

6. Pingo twero bedo ber me cito kacel ki latit kwena mucwiny pi kwan ki latin kwanwa?

⁶ Ka itye ka kwano Baibul ki ngat mo, tika dong icito kacel ki latit kwena ma obedo lapwony ma ladiro pi kwanwu? Ka itimo meno, itwero penye me titi tamme i kom kit ma idoro kwede kwan  meno ki dok ka ce itye ka tic maber ki Baibul. Omyero ibed ngat mamwol ka imito dongo dironi me pwony. (Por ki Tic 18:24-26.) I ngeye, peny latit kwena mucwiny-nyi ka en tamo ni latin kwan-ni oniang gin ma en opwonyo. Iromo bene penyo latit kwena acel-li me kwan ki latin kwanni ka in ibibedo pe pi cabit acel nyo makato. Meno biweko kin kwanwu pe bedo ka cot atata dok binyuto ki latin kwanni ni kwanne pire tek. Pe itam ni man obedo “latin kwanni” keni kun pe iye ni ngat mukene okwan kwede. Ngene kene ni, imito gin maber loyo pi latin kwanni, wek en omedde ki pwonyo lok ada.

7. Ngo ma bikonyo latin kwan me maro gin ma en tye ka pwonyo?

⁷ Latin kwan myero onen mit komi dok owiny tekcwiny ma itye kwede i kom lok ada ma nonge i Baibul. (1 Tec. 1:5) Meno bikonye me maro gin ma en tye ka pwonyone. Ka opore, itwero tite kit ma kwo ma lubbe ki cik me Baibul okonyi kwede. Man biweko en niang ni Baibul tye ki tam ma tiyo ma twero konye bene i kwone.

8. Gin ango mukene ma itwero timo me konyo latin kwanni, dok pingo omyero itim meno?

⁸ I kare me kwanwu, tit ki latin kwanni gin mutimme i kwo pa omege ki lumege mukene ma gubedo ki peko macal ki mege ci guloyo. Itwero cito kacel ki ngat mo me kacokkewu ma labolle romo konyo latin kwanni. Nyo itwero nongo gin mutimme i kwo pa jo mukene ki i pwony ma wi lokke tye ni “Baibul Loko Kwo pa Dano” * ma kati kare ki kare i jw.org nyo ki i Wi Lubele macon. Pwony kacel ki vidio ma kit magi bikonyo latin kwanni me niang ni Baibul twero konye me loko kwone.

9. Itwero cuko cwiny latin kwan nining me nywako gin ma en tye ka pwonyone ki lupacone kacel ki lureme?

⁹ Ka latin kwanni obedo ngat munyomme, tika luote bene tye ka kwano Baibul? Ka pe, ci itwero lwonge me nywako i kwanwu. Cuk cwiny latin kwanni me nywako jami ma en pwonyo ki jo gange kacel ki lureme. (Jon 1:40-45) Itwero timo man nining? Iromo penye ni: “Itwero tito lok ada man bot lupaconi nining?” nyo “Ginacoya mene ma itwero tic kwede me tito lok man bot laremi mo?” I yo ma kit  meno, nongo itye ka pwonyo latin kwan me doko lapwony. Ci ka en dong opore, twero cako tito kwena macalo latit kwena ma peya onongo batija. Iromo penyo latin kwanni ka en ngeyo ngat mukene ma bene mito kwano Baibul. Ka en otitti, ci omyero ikubbe ki ngat meno cutcut dok imine me cako kwano Baibul kwede. Nyutte vidio ma wi lokke tye ni Ngo ma Timme ka Kitye ka Kwano Baibul? *

10. Kit ma kitito kwede i 1 Jo Tecalonika 2:7, 8, lapwony twero lubo lanen pa lakwena Paulo nining?

¹⁰ Lupwonye myero gunyut ni giparo pi lutino kwangi. Myero gunengi calo jo ma gitwero doko omege ki lumege i kare me anyim. (Kwan 1 Jo Tecalonika 2:7, 8.) Pe yot ki tung botgi me weko lurem ma i lobo ki me timo alokaloka ducu ma mitte me tic pi Jehovah. Myero wakonygi me nongo lurem me ada i kacokke. Bed larem latin kwanni ki cwalo cawa kwede pe i kare me kwanwu keken, ento wa i kare mukene bene. Goyo cim, cwalo mecej, nyo limme pi kare mo manok ma nongo pe nino me kwanwu nyuto ni iparo pire ada.

11. Ngo ma wamito ni lutino kwanwa gunong i kacokke, dok pingo?

¹¹ Tye carolok mo ma waco ni: “Kulu pong ki jange.” Wan bene watwero waco ni: “Latin kwan dongo pi kony pa jo me kacokke ducu.” Meno aye tyen lok mumiyo lapwony ma ladiro konyo latin kwanne me ngeyo jo mukene me kacokke ma gitwero konye me dongo. Man weko latin kwan nongo mit pa ribbe ki jo pa Lubanga, ma gitwero konye me doko larem Lubanga dok gicuko cwinye ka en tye ki peko. Wamito ni latin kwan acel acel owiny ni etye ngat ma pire tek i kacokke. Wamito bene ni mar ma watye kwede macalo omege ki lumege oywa en i dul pa Jehovah. Man biweko bedo yot bote me juko ribbe ki jo ma pe gikonye me maro Jehovah. (Car. 13:20) Ka lureme macon gukwere, en bingeyo ni etwero nongo lurem me ada i dul pa Jehovah.​—Mar. 10:29, 30; 1 Pet. 4:4.

12. Pingo omyero walok i kom dyere ki nongo batija bot latin kwanwa?

¹² Myero pol kare ibed ka lok i kom kit ma pire tek kwede pi ngat moni me dyero kwone bot Jehovah ki dok nongo batija. Man mitte pien tyen lok mumiyo  wakwano Baibul ki dano aye me konye wek oti pi Jehovah dok onong batija. Ka latin kwan dong okwano pi dwe mogo manok, tutwalle ka ocako bino i cokke, en myero oniang ni wamito konye wek odok Lacaden pa Jehovah.

13. Ngo ma myero latin kwan otim wek en onong batija?

¹³ Latin kwan ma cwinye atir twero lubo yo ma tere i nongo batija kore ki kore! Me acel, latin kwan cako maro ki ngeyo Jehovah dok keto niyene i Kome. (Jon 3:16; 17:3) I nge meno, latin kwan doko larem Jehovah dok mako lirem ki omege ki lumege me kacokke. (Ibru 10:24, 25; Yak. 4:8) Lacen, latin kwan cako kwero timo jami maraco dok ngut i kom balle. (Tic 3:19) Medo i kom meno, niyene tugo cwinye me cako tito bot jo mukene jami ma en tye ka pwonyo. (2 Kor. 4:13) I nge meno, en dyere bot Jehovah dok nyuto dyerene ki nongo batija. (1 Pet. 3:21; 4:2) Meno pud dong bedo nino me yomcwiny bot jo ducu ya! Ka latin kwan tye ka kwanyo yo ma tere i batija, bed ka pwoye teretere, dok icuk cwinye me medde ki dongo i yo matir man.

14. Lapwony twero niang nining ni latin kwanne tye ka dongo?

¹⁴ Mitte ni wadi cwinywa ka watye ka konyo latin kwanwa me dongo wek odyer kwone dok onong batija. Ento i nge kwan pi kare mo, myero watem niang ka ada en tye ki miti me tic pi Jehovah. Tika itwero neno jami ma nyuto ni latin kwanni tye ka tute me lubo cik pa Yecu? Nyo mono en mito mere pwonyo lok me Baibul keken ci otum?

15. Ngo ma lapwony twero ngiyo ki i kom latin kwanne wek oniang ka en tye ka dongo?

¹⁵ Kare ki kare bed ka ngiyo dongo pa latin kwanni. Me labolle, tika en tito kit ma ewinyo kwede i kom Jehovah? En mono lego bot Jehovah? (Jab. 116:1, 2) Tika en maro kwano Baibul? (Jab. 119:97) En tika cito i cokke kare ki kare? (Jab. 22:22) En mono tye ka timo alokaloka ma mitte i kwone? (Jab. 119:112) Tika en dong ocako nywako gin ma en tye ka pwonyo ki lupacone kacel ki lureme? (Jab. 9:1) Ma dong pire tek loyo, tika en mito doko Lacaden pa Jehovah? (Jab. 40:8) Ka latin kwanni pe tye ka timo jami magi ducu, ti  ki diro me temo niang pingo ci inyam lok meno kwede i yo me kica ento labongo mungu lok mo. *

16. Ngo ma romo nyuto ni omyero ijuk kwan ki latin kwan moni woko?

¹⁶ Kare ki kare bed ka ngiyo ka mitte ni omyero imedde ki kwan ki latin kwan moni. Pennye kekeni ni: ‘Latin kwanna man mono pe yubbe pi kwanne? En mono pe nyuto miti mo keken me cito i cokke? En mono pud tye ki tim maraco ma omoko i kwone? Tika en pud tye lamemba me dini goba?’ Ka lagammi pi lapeny magi tye ni eyo, ci medde ki kwan kwede bedo calo tute me pwonyo ngat ma pe mito ni kome odyak ki kwang! Ka latin kwanni pe maro gin ma en tye ka pwonyone dok pe tye atera me loko kwone, ci pingo pud imedde ki kwan kwede?

17. Wek wagwok pwonywa kit ma kitito kwede i 1 Temceo 4:16, ngo ma myero watim macalo lupwonye me Baibul?

¹⁷ Watero ticwa me loko dano wek gudok lulub kor Yecu calo gin ma pire tek, dok wamito ni wakony lutino kwanwa me Baibul me dongo nio wa i batija. Meno aye tyen lok mumiyo watiyo ki Baibul ka watye ka pwony dok wapwonyo ki mit kom kacel ki tekcwiny. Wacuko cwiny latin kwanwa me mako lirem i kacokke. Dok wabedo ka lok i kom yub me dyere ki nongo batija teretere, kun kare ki kare wangiyo dongo pa latin kwanwa. (Nen bok ma wiye tye ni “ Gin ma Lupwonye Myero Gutim Wek Gukony Lutino Kwangi me Dongo Nio wa i Batija.”) Cwinywa yom ni watwero nywako i tic man me laro kwo pa dano! Dong myero wamoku tamwa me tute ki kerowa ducu me kwano Baibul ki dano i yo ma weko gidongo nio wa i batija.