1. Tam mene ma pud dong ber loyo ma ngat moni twero mokone?

POL kare, tam ma lunyodo gimoko gudo litinogi pi kare malac. Ka lunyodo gumoko tam marac, gitwero kelo peko pi lutinogi. Ento ka gumoko tam mabeco, ci gimiyo ki lutinogi kare me bedo ki kwo me yomcwiny. Ngene kene ni, lutino bene omyero gumok tam mabeco. Tam ma pud dong ber loyo ma ngat mo twero moko aye me tic pi Wonwa me polo Jehovah.​—Jab. 73:28.

2. Tam mabeco ango ma Yecu ki lunyodone gumoko?

² Lunywal pa Yecu onongo gumoko tamgi me konyo lutinogi me tic pi Jehovah, dok jami ma guyero onyuto ni man aye onongo yub ma pire tek loyo i kwogi. (Luka 2:40, 41, 52) Yecu bene omoko tam mabeco ma okonye cobo ticce i yub pa Jehovah. (Mat. 4:1-10) Yecu odoko laco ma lakica, lagen, dok cwinye tek. Lunyodo ducu ma gimaro Jehovah gitwero bedo ki awaka kacel ki yomcwiny me bedo ki latin ma kit meno.

3. Lapeny mene ma wabigamogi i pwony man?

³ I pwony man, wabinyamo lapeny magi: Tam me ryeko ango ma Jehovah omoko madok i kom Yecu? Gin ango ma lunyodo ma Lukricitayo gitwero pwonyo ki bot Yucepu ki Maliam? Dok gin ango ma bulu ma Lukricitayo gitwero pwonyo ki i tam ma Yecu omoko?

4. Tam ma pire tek ango ma Jehovah omoko madok i kom Wode?

⁴ Jehovah oyero lunywal maber loyo pi Yecu. (Mat. 1:18-23; Luka 1:26-38) Lok pa Maliam ma kicoyo i Baibul nyutu mar matut ma en onongo tye kwede pi Jehovah ki  Lokke. (Luka 1:46-55) Dok kit ma Yucepu olubo kwede tira ma Jehovah omine onyuto ni en onongo lworo Lubanga dok mito yomo cwinye.​—Mat. 1:24.

5-6. Pekki ango ma Jehovah oye ni Wode okat ki iye?

⁵ Nge ni Jehovah pe oyero jo ma gulony me bedo lunywal pa Yecu. Gityer ma Yucepu ki Maliam gumiyo i nge nywalo Yecu nyuto ni onongo gubedo lucan. (Luka 2:24) Yucepu nen calo onongo tiyo ticce macalo lapac i nget otte i Najaret. Nen calo onongo pe gitye ki cente nyo jami mapol, tutwalle kit ma gubedo ki lutino abiro nyo makato.​—Mat. 13:55, 56.

⁶ Jehovah ogwoko Yecu ki i kom pekki mogo, ento pe dong ki i pekki ducu ma en onongo twero kato ki iye. (Mat. 2:13-15) Me labolle, Yecu onongo tye ki wadine ma pe guye lokke. Go kong kit ma Yecu cwinye otur kwede i kare ma omegine kikome kong pe guye ni en Meciya. (Mar. 3:21; Jon 7:5) Nen calo Yecu okanyo arem me rwenyo wonne Yucepu i to. To pa Yucepu okelo tic madit i wi Yecu pien macalo awobi ma latin kayo, onongo mitte ni en oti tic ma onongo yam wonne tiyo me gwoko jo ganggi. (Mar. 6:3) Ma en woto ki dongo, Yecu opwonyo kit me gwoko lupacogi. Pi meno, en onongo ngeyo kit ma dano ol kwede i nge tic matek i nino moni.

7. (a) Lapeny mene ma bikonyo jo munyomme me gwoko lutinogi maber? (b) Carolok 2:1-6 twero konyo lunyodo nining me pwonyo lutinogi?

⁷ Ka wutye jo munyomme ma wumito nywalo lutino, kong wupennye kekenwu ni: ‘Wan tika wabedo jo mamwol ma wamaro Jehovah ki Lokke? Jehovah tika twero yerowa me gwoko latin lakere ma pire tek bote?’ (Jab. 127:3, 4) Ka dong itye lanyodo, pennye kekeni ni: ‘Tika atye ka pwonyo lutinona me bedo lutic matek?’ (Latit. 3:12, 13) ‘Tika atute ki tekka ducu me gwoko lutinona ki i kom jami ki tim maraco ma gitwero rwatte kwede i lobo pa Catan-ni?’ (Car. 22:3) Tye lok ada ni pe itwero gwoko lutinoni ki i kom pekki ducu ma gitwero rwatte kwede. Man obedo gin ma pe twerre. Ento motmot itwero yubogi pi ariya mogo ma gibikato ki iye i kwo  kun ipwonyogi me jenge i kom Lok pa Lubanga. (Kwan Carolok 2:1-6.) Me labolle, ka watti mo ojuko tic pi Jehovah woko, kony lutinoni me neno ki i Baibul pingo pire tek adada ni omyero gumedde ki bedo lugen bot Jehovah. (Jab. 31:23) Nyo ka ngat mo me amarawu oto, nyut ki lutinoni tyeng mogo me Baibul ma twero konyogi kanyo arem cola ki me nongo kuc.​—2 Kor. 1:3, 4; 2 Tem. 3:16.

8. Tira ango ma kimiyo i Nwoyo Cik 6:6, 7, ma Yucepu ki Maliam gulubo?

⁸ Lunyodo pa Yecu gukonye me doko dano madit ma tye ki cwak pa Lubanga pien onongo gilubo tira pa Jehovah bot lunyodo. (Kwan Nwoyo Cik 6:6, 7.) Yucepu ki Maliam onongo gitye ki mar madwong pi Jehovah, dok gin ma pire tek loyo i kwogi obedo me konyo lutinogi me dongo mar meno bene.

9. Tam ma pigi tego ango ma Yucepu ki Maliam gumoko?

⁹ Yucepu ki Maliam guyero me woro Jehovah kare ducu kacel ki lutinogi. Labongo akalakala mo, gin onongo gicito i kacokke pa Lujudaya ma tye i Najaret cabit ducu, dok mwaka ki mwaka onongo gicito pi kwer me Kato i Jerucalem. (Luka 2:41; 4:16) Nen calo onongo gitiyo ki kare ma gitye ka wot i Jerucalem me pwonyo Yecu kacel ki omegine ki lumegine gin mutimme i kom jo pa Jehovah i kare mukato angec. Twero bedo ni i wotgi meno, onongo gilimo kabedo mogo ma kiloko iye i Ginacoya. I kare ma wel lutinogi omedde, nen calo pe obedo yot pi Yucepu ki Maliam me medde ki woro Jehovah kare ki kare. Ento gunongo mot mapol pi timo meno! Pien guketo pi woro pa Jehovah obedo mukwongo i kwogi, jo me otgi gubedo ki wat macok ki Jehovah.

10. Pwony ango ma lunyodo ma Lukricitayo gitwero nongo ki bot Yucepu ki Maliam?

¹⁰ Gin ango ma lunyodo ma gilworo Lubanga gitwero pwonyone ki bot Yucepu ki Maliam? Gin ma pire tek loyo ducu aye ni iwek lutinoni gunen ki i lokki ki ticci ni imaro Jehovah matek. Myero iniang ni mot ma pire tek loyo ma itwero miyo ki lutinoni aye konyogi me  maro Jehovah. Dok pwony ma pire tek ma itwero pwonyogi kwede aye kit me kwano Baibul, lega, cito i cokke ki nywako i tic me pwony kare ducu. (1 Tem. 6:6) Ngene kene ni omyero imi ki lutinoni jami me kom ma gimito. (1 Tem. 5:8) Ento wi myero opo ni, wat maber ma lutinoni gitye kwede ki Jehovah, ento pe centegi, aye bikonyogi me bwot ki i agikki me lobo-ni ki me donyo i lobo manyen. *​—Ejek. 7:19; 1 Tem. 4:8.

11. (a) Tira ma kimiyo i 1 Temceo 6:17-19 twero konyo lunyodo nining me moko tam mabeco madok i kom gwoko lutinogi? (b) Yub ango ma wutwero keto macalo jo me ot dok adwogi maber ango ma wubinongo? (Nen bok ma wiye tye ni “ Yub Mene ma Wubitute me Cobone?”)

¹¹ Pud dong yomo cwinywa ya, me neno lunyodo mapol ma gitye ka moko tam mabeco pi jo me odigi! Kare ducu giworo Jehovah kacel. Gicito i cokke kacel ki gure madito. Dok ginywako i tic me pwony. Jo me odi mogo gicito wa i wang tic ma can lutit kwena tye iye. Mukene gicito ka limo Betel nyo gimiyo kony me gero odi ma dul pa Jehovah tiyo kwede. Jo me odi ma giyero me timo jami magi omyero gujal cente mo, dok gitwero kato ki i ariya mogo bene. Ento adwogi maber ma ginongo weko gibedo lulonyo i yo me cwiny. (Kwan 1 Temceo 6:17-19.) Lutino ma gidongo i paci ma kit meno pol kare gimedde ki kit mabeco ma gupwonyo-ni dok gibedo ki pwoc ni lunyodogi opwonyogi kit meno!​—Car. 10:22.

12. Ngo ma onongo mitte ni Yecu otim i kare ma en tye ka dongo?

¹² Jehovah kare ducu moko tam mabeco, dok lunywal pa Yecu bene gumoko tam ma atir. Ento, i kare ma Yecu odongo, onongo mitte ni en omok tamme pire kene. (Gal. 6:5) Calo wan ducu, en bene onongo tye agonya me moko tamme pire kene. En onongo twero yero me keto pi mitine mukwongo kun pe timo miti pa Lubanga. Me ka meno, en oyero me bedo ki wat maber ki Jehovah. (Jon 8:29) I yo ma nining ma labol pa Yecu twero konyo jo matino i kare-ni?

13. Tam ma pire tek ango ma Yecu omoko i kare ma en pud awobi matidi?

¹³ I kare ma Yecu onongo pud awobi matidi, en omoko tamme me bedo lawiny bot lunyodone. En pe okwero tira pa lunywalle kun tamo ni eryek eloyogi. Me ka meno, en “obedo kun winyogi.” (Luka 2:51) Yecu onongo obedo latin kayo, ma te lokke ni en onongo tye ki tic madit i wiye. Labongo akalakala mo, en otiyo matek me cobo ticce meno. En  otiyo matek me pwonyo tic me pac ki bot wonne wek ekony me nongo cente ma lupacogi mito.

14. Wangeyo nining ni Yecu onongo obedo ngat ma maro kwano Lok pa Lubanga?

¹⁴ Lunywal pa Yecu nen calo gutitte kit ma nywale obedo i yo me tango ki gin ma lukwena pa Lubanga guwaco i kome. (Luka 2:8-19, 25-38) Yecu pe oyeng ki jami ma kitite keken, en bene okwanyo kare me kwano Ginacoya pire kene. Wangeyo nining ni Yecu onongo obedo ngat ma maro kwano Lok pa Lubanga? Wangeyo man pien, i kare ma en pud awobi matidi, lupwonye ma i Jerucalem “guuro niangnge, ki kit ma en dok kwede i peny.” (Luka 2:46, 47) Dok i kare ma Yecu pud tye ki mwaka 12 keken, en onongo dong omoko pire kene ni Jehovah obedo Wonne.​—Luka 2:42, 43, 49.

15. Yecu onyuto nining ni emoko tamme me timo miti pa Jehovah?

¹⁵ I kare ma Yecu oniang ticce i yub pa Jehovah, en omoko tamme me jolo tic man. (Jon 6:38) En ongeyo ni dano mapol gibikwere. Kadi bed en onongo pe mito ni meno otimme i kome, en pud obedo lawiny bot Jehovah. I kare ma Yecu onongo batija i mwaka 29 K.M., gin ma pire tek loyo i kwone obedo me timo gin ma Jehovah mito. (Ibru 10:5-7) Kadi wa i kare ma en onongo dog cok to i kom yat, onongo pud omoko matek i timo miti pa Wonne.​—Jon 19:30.

16. Pwony ango ma lutino gitwero nongo ki bot Yecu?

¹⁶ Bed lawiny bot lunyodoni. Calo Yucepu ki Maliam, lunyodoni bene gitye ki roc. Ento, Jehovah omiyo botgi tic me gwoki, pwonyi, ki mini tira. Ka iwinyo tamgi dok iworo twerogi, ci man biweko ‘anyimmi bedo leng.’​—Ep. 6:1-4.

17. Ma lubbe ki Yocwa 24:15, tam ango ma myero jo matino gumok pigi kengi?

¹⁷ Yer ngat ma ibitiyo pire. Mitte ni imok piri keni nga ma Jehovah obedo, gin ma yubbe kwako, ki kit ma yubbe gudo kwede kwoni. (Rom. 12:2) Ka itimo meno, ibibedo ki kero me moko tam ma pire tek loyo i kwoni, tam me tic pi Jehovah. (Kwan Yocwa 24:15; Latit. 12:1) Ka itye ki yub maber me kwano Baibul kare ki  kare, mari pi Jehovah bidongo dok niyeni i kome bijing bedo matek.

18. Tam ango ma myero jo matino gumoki, dok adwogine bibedo ningo?

¹⁸ Yer me keto pi miti pa Jehovah mukwongo i kwoni. Jo me lobo pa Catan gicikke ni ka itiyo ki dironi me cobo mitini, ci ibibedo ma cwinyi yom. Ento ki lok ada, jo ma giketo cwinygi i kom yenyo lonyo ki jami me kom girwatte “ki lwak can mapol ata mucorre i komgi.” (1 Tem. 6:9, 10) Ki tungcel, ka in iwinyo Jehovah dok iyero me keto pi mitine mukwongo, kwoni bibedo maber dok “ticci ducu bicobbe kakare.”​—Yoc. 1:8.

19. Gin ango ma myero lunyodo wigi opo iye?

¹⁹ Lunyodo, wutute matek me konyo jo me odiwu me tic pi Jehovah. Jenge i kome ci en bikonyi me moko tam me ryeko. (Car. 3:5, 6) Wi opo ni, gin ma itimo, ento pe gin ma iwaco, aye bigudo lutinoni loyo. Pi meno, mok tam ma bikonyo lutinoni me nongo cwak pa Jehovah.

20. Mot ango ma jo matino gibinongo ka guyero me tic pi Jehovah?

²⁰ Wun jo matino, lunyodowu gitwero konyowu me moko tam me ryeko i kwowu. Ento mitte ni, in aye imok tam mabeco ma twero weko inongo cwak pa Lubanga. Pi meno, lub lanen pa Yecu dok iyer me tic pi Wonwa me polo ma lamar-ri. Ka itimo kit meno, ibibedo ki kwo mamit ma tyen lokke tye i kare-ni. (1 Tem. 4:16) Dok i kare me anyim, ibibedo ki kwo ma pud dong ber loyo ducu!