I mwaka meno, dulwa otimo alokaloka mogo ma okonyo Lutino Kwan me Baibul me bedo ma gunote i worogi. Watch Tower ocako cwalo pwony ma gonyo wang Ginacoya ma onongo ginyamo cabit ki cabit i cokkegi me Lega ki Pak. Medo i kom meno, Lutino Kwan me Baibul gugoyo kalenda ma tye ki wang ginacoya pi cabit acel acel kacel ki wer ma onongo gitwero werone i kare me kwan pigi kengi nyo i woro pi jo me ot.

I cokkegi me Lega ki Pak, Lutino Kwan me Baibul onongo gimiyo “caden” ma tito gin mutimme i tic me pwony, ginyuto pwocgi pi Jehovah, giwero wer, nyo bene gilego. Laminwa Eva Barney, ma onongo batija i mwaka 1923 i kare ma tye ki mwaka 15, wiye po ni: “Ka onongo imito miyo caden, onongo ia malo ci icako ki waco ni, ‘Amito pwoyo Rwot pi jami mabeco ducu ma otimo pira.’” Omege mogo onongo gimaro miyo caden adada. Lamego Barney omedde ni: “Omego mo ma oteggi ma nyinge Godwin onongo maro miyo caden mapol adada i cokke. Ento ka onongo dakone oniang ni omego ma tye ka doro bute me cokke man par odiyo woko pien Godwin orii ka lok tutwal, en onongo telo koti pa cware ci cware juko lok dok bedo piny cutcut.”

Kicel i dwe acel, kacokke acel acel onongo gibedo ki cokke ma kite dok pat me Lega ki Pak. Watch Tower me April 1, 1923, oloko kit man i kom cokke man: “Nucu pa cawa me cokke man omyero obed me miyo caden madok i kom gin mutimme i ticwa me pwony kacel ki cuko cwiny lutit kwena. . . . Wageno ni cokke man me cuko cwiny-nyi biribo utmege kacel.”

Omego Charles Martin, ma onongo tye ki mwaka 19 dok obedo latit kwena i kacokke mo i boma me Vancouver, Canada, onongo adwogi mabeco mapol ki i cokke magi. Lacen en owaco ni: “Cokke magi okonya me pwonyo kit me lok i ot ki ot ka atye ka tito kwena. Pol kare, utmege onongo gimaro tito gin mutimme i kare ma gitye ka tito kwena i ot ki ot. Man okonya me niang gin ma omyero awac kacel ki kit ma omyero adok kwede iye ka ngat mo okwero lokwa.”

Note ma tye i kin utmege omedde pien onongo gitye ki nino mogo i dwe acel acel ma kicuko cwiny lutit kwena ducu me cito woko i tic me pwony. Watch Tower me April 1, 1923, omiyo lok angeya ma waco ni, “Wek wan ducu wabed ma wanote i tic  me pwony . . . , Ceng Aryo me Mai 1, 1923, kityeko dyerone macalo nino me tito kwena lumuku. I nge meno, Ceng Aryo mukwongo me dwe ducu bibedo nino me tito kwena lumuku . . . Lutit kwena ducu me kacokke olo omyero gunywak i yub man.”

Kadi wa Lutino Kwan me Baibul ma gitino onongo ginywako i tic man. Lamego Hazel Burford, ma onongo tye ki mwaka 16 i kare meno, wiye po ni: “Onongo kiketo kit me nyamo lok piwa i Bulletin wek wamak i wiwa. a An kacel ki Babana Madit onongo watiyo matek i yub me tito kwena magi.” Kadi bed kit meno, Lamego Burford obedo ki ur i kom kit ma omego mo onongo neno kwede ticce me tito kwena. En owaco ni: “Omego mo ma oteggi onongo tamo ni omyero pe abed ka lok ki dano. I kare meno, jo mogo onongo pe giniang ni omyero Lutino Kwan me Baibul ducu, kadi wa “awobe ki anyira,” gunywak i pako Lacwecwa.” (Jab. 148:​12, 13) Ento Lamego Burford omedde ki nywako i tic me tito kwena. I nge mwaki mogo, en obedo i kilaci me aryo me Cukul me Gilead dok otiyo macalo lamiconari i lobo Panama. I nge kare mo, omege magi guloko nenogi i kom weko lutino nywako i tic me tito kwena.

Gure madito bene okonyo utmege me bedo ma gunote. I kare me gure madito magi onongo kiketo yub me tito kwena bedo tye. Me labolle, i gure madit ma obedo i boma me Winnipeg, Canada, jo ducu ma gubedo tye i gure man kicuko cwinygi me nywako i tic me tito kwena i nino dwe 31 me Marci. Yub me tito kwena ma kit man omiyo kare ki jo mapol me winyo kwena maber dok adwogi mabeco onen ki iye. I nino dwe 5 me Agucito, dano ma romo 7,000 gubedo tye i gure mukene madit i Winnipeg. Me o i kare meno, man aye onongo obedo wel madit loyo pa jo ma gubedo i gure madito i lobo Canada.

Gure ma pire tek loyo ma Lucaden pa Jehovah gubedo kwede i mwaka 1923 otimme i nino dwe 18-26 me Agucito, i boma me Los Angeles, California. Cabit mogo ma gure meno peya otimme, kiketo lok angeya me gure man i gajeti mapatpat dok Lutino Kwan me Baibul gupoko trak makato  500,000 kulu. Utmege bene gumwono karatac ma tito pi gure man i kom gin wot pa lwak kacel ki mutoka pa omege ki lumege.

I Ceng Abicel, me nino dwe 25 me Agucito, Omego Rutherford omiyo pwony ma wiye tye ni “Romi ki Dyegi,” dok i pwonye man en otito ka maleng ni “romi” gubedo jo ma kitgi atir ma gimyero me kwo i paradic i lobo kany. En bene omiyo pwony pi lwak dok okwano trak ma nyuto tam ma Lutino Kwan me Baibul gumoko ma wiye tye ni “Ciko Dano.” Trak man onongo tye ki tam ma kwero dini pa Lukricitayo ata-ni dok owaco ni jo ma cwinygi atir omyero gua woko ki i “Babilon Madit.” (Niyabo 18:​2, 4) Lacen Lutino Kwan me Baibul ma komgi mit i but lobo-ni ducu gupoko trak milion mapol ma tye ki tam ma kimoko man.

I nino me agikki me gure meno, dano ma welgi kato 30,000 kulu guwinyo ka Omego Rutherford miyo pwony pi lwak ma wiye tye ni “Rok Ducu Gitye ka Wot kun Gikemo Armagedon, Ento Jo Milion Mapol ma Gitye Kwo i Kare-ni Dong Pe Gibito.” Pien Lutino Kwan me Baibul onongo gitye ka byeko ni dano bibino mapol adada, gupango bar tuko mo madit adada ma kilwongo ni Los Angeles Coliseum ma onongo pud kigero nyen. Omege gutiyo ki lakub dwan me bar man wek okony dano ducu me winyo pwony, dok man onongo obedo tet manyen loyo i kare meno. Jo mukene mapol bene guwinyo yub man ki i redio.

I mwaka 1923, onongo nen ka maleng ni tic me tito kwena tye ka medde matek i Afrika, Ulaya, India, ki Amerika ma Tung Kupiny. I kare ma en tye i India, Omego A. J. Joseph okonyo i tic me goyo bukke i leb Hindi, Tamil, Telugu, ki Urdu kadi bed onongo tye ki tic me gwoko dakone ki lutinogi abicel.

Ki i lobo Sierra Leone, Lutino Kwan me Baibul Alfred Joseph ki Leonard Blackman gucoyo waraga bot gang kalwa madit ma i Brooklyn, New York, kun gipenyo pi kony. I nino dwe 14 me April, 1923, gunongo lagam pi legagi. Alfred otito ni, “I dyewor mo acel i Ceng Abicel, kigona cim atura.” Alfred owinyo ka dwan mo madit adada penyo ni, “In aye ma icoyo waraga bot Watch Tower Society kun ipenyo pi lutit kwena?” En ogamo ni “Eyo.” Ci ngat ma ogoyo cim meno owaco ni, “An aye kicwala.” Dwan man onongo obedo dwan Omego William R. Brown. I nino meno, onongo pud gubino abina ki i cula nam mo ma i nam me Caribbean en ki dakone, Antonia, kacel ki anyiragi aryo, Louise ki Lucy. Onongo pe mitte ni omege magi gukur pi kare malac me rwatte ki Omego Brown kacel ki jo gange.

 Alfred omedde ni: “Orwone i odiko, Leonard ki an onongo watye ka nyamo lok ma i Baibul kit ma onongo watimo kwede cabit ki cabit. Ci waneno laco mo mabor adada otuc atura i doggola. Laco man onongo obedo Omego Brown. Kome onongo mit adada ma oweko en onongo mito miyo pwony pi lwak orwone cutcut.” I kine me kare ma pe romo dwe acel, Omego Brown opoko bukke ducu ma gubino kwede. Ma pe orii kicwalle dok bukke 5,000, dok i nge meno bukke mukene onongo pud mitte. Ento Omego Brown onongo pe kingeye macalo lacat bukke. Pi kare me kwone ducu, en otiyo pi Jehovah ki mit kom, dok kare ducu en onongo loko i kom wang Ginacoya ka tye ka miyo pwony, pi tyen lok man, dano onongo gilwonge ni Bible Brown.

Ki tungcel, jang gang kal ma tye i boma me Barmen, Germany, onongo odoko ding woko. Medo i kom meno, utmege onongo guwinyo ni lumony me lobo France gubibino ka monyo boma meno ma pe otero kare. Lutino Kwan me Baibul gunongo ot mukene malac ma rwatte ki ticgi me goyo bukke i boma me Magdeburg. I nino dwe 19 me Juni, omege gutyeko coko macin me goyo bukke kacel ki jami mukene ma i jang gang kal ci gudak gucito i Betel manyen ma i Magdeburg. I nino ma kitito ki gang kal madit ni utmege magi gutyeko dak woko, gajeti mapatpat gucwalo lok angeya ni lumony me France gutyeko mayo boma me Barmen woko. Utmege guneno dak meno macalo lanyut me gwok pa Jehovah kacel ki kony ma mege.

Ki i lobo Brazil, Omego George Young, ma onongo woto i kabedo mapatpat me tito kwena maber-ri, okonyo me cako jang gang kal manyen ci ocako goyo Watch Tower i leb Portuguese. I nge dwe mogo manok, en onongo dong opoko magajin kacel ki bukke ma romo 7,000 kulu. Dako mo ma nyinge Sarah Ferguson cwinye obedo yom adada i kare ma Omego Young olimo jo gange. Lamego Ferguson onongo obedo ka kwano Watch Tower cakke wa i mwaka 1899, ento en onongo peya onyuto dyerene ki nongo batija. Lacen i nge dwe mogo manok, Lamego Ferguson kacel ki lutinone angwen gunongo batija.

I tum pa mwaka meno, Watch Tower me Decemba 15, 1923, otito kit ma alokaloka ma kitimo i cokke, tito kwena, kacel ki gure madito ogudo kwede Lutino Kwan me Baibul. Owaco ni: “Onen ka maleng ni kacokke mapatpat gitye ki niye matek . . . Dong wamedde wunu ki tic pi Lubanga ki mit kom kacel ki yomcwiny i mwaka 1924.”

Mwaka 1924 obedo mwaka me yomcwiny adada pi Lutino Kwan me Baibul. Utmege ma i Betel gubedo ka gero odi pi dwe mapol i ngom ma tye i Staten Island, macok ki gang kalwa madit i Brooklyn. Odi magi kityeko gerogi i acakki me mwaka 1924, dok man okonyo me noto utmege kacel ki ilo rwom me tito kwena maber-ri i yo ma onongo ber loyo i kare meno.