Lapeny pa Lukwan Bukkewa
Tika jo Icrael onongo gitye ki gin mukene me acama i kare ma gitye i tim mapat ki manna kacel ki winyo aluru?
Pi mwaki 40 ma jo Icrael gubedo i tim, polle gubedo ka camo manna keken. (Nia 16:35) Jehovah bene omiyo botgi winyo aluru tyen aryo. (Nia 16:12, 13; Wel 11:31) Ento bene Luicrael onongo gitye ki cam mukene manok me acama.
Me labolle, i kare mogo Jehovah onongo telo jone dok terogi i ‘kabedo me yweyo’ ka ma pii amata ki jami acama mukene nonge iye. (Wel 10:33) Kabedo acel i kin magi onongo tye i Elim, “ka ma yam tye iye wang it apar wiye aryo, ki otit pyerabiro.” Magi nen calo onongo obedo otit acama. (Nia 15:27) Buk ma wiye tye ni Plants of the Bible owaco ni otit acama onongo dongo i kabedo mapatpat, dok obedo cam ma pire tek ma dano camo i aroo. Yat otit man miyo cam ki moo, dok dano milion mapol gitiyo kwede me gedo.
Jo Icrael nen calo bene gutongo gony i wang it madit ma i kare-ni kilwongo ni Feiran, ma tye but Wadi Feiran. a Buk me Discovering the World of the Bible waco ni wadi nyo nota man, “borre romo mairo 81 [kilomita 130] dok tye i kin nota ma pud dong bor, leng, dok ngene loyo i aroo me Sinai.” Buk man bene owaco ni ka ngat mo owoto pi mairo 28 [kilomita 45] nicakke ki ka ma pii me nota man rwatte iye ki nam, ci bio i wang it madit me Feiran. Wang it man borre tye mairo 3 dok tye futi 2,000 lamal me a ki i dog nam. Opong ki yadi otit dok leng adada ma oweko kiporo ki poto me Eden. Pi mwaki alip mapol, dano gubedo ka cito i kabedo meno pi yadi otit acama ma nonge kunu.
Yat otit acama ma nonge i nota me Feiran
I kare ma Luicrael gua ki i Ejipt, guwoto ki moko, otako lanywang moko, ki dong nen calo bel kacel ki moo. Ngene kene ni jami magi pe gurii pi kare malac. Dano bene guwoto ki “lwak lim makwo mapol twatwal, romi-gu ki dyangi-gu.” (Nia 12:34-39) Ento pi kwo matek i dye aroo, nen calo oweko lee mapol guto woko. Lee mogo bene nen calo Luicrael gumodogi woko. Mukene kityerogi macalo gitum kadi wa bot lubange me goba. b (Tic 7:39-43) Ento pud Luicrael gubedo ki lee mogo. Watwero nenone ki i gin ma Jehovah owaco bot jone i kare ma pe gubedo luwiny bote: “Litinowu gibibedo lukwat i tim mwaka pyerangwen.” (Wel 14:33) Pi meno, twero bedo ni lee ma gugwoko onongo minigi cak ki ringo ento onongo pe romo gwoko dano ma romo milion adek pi mwaki 40 kulu. c
Lee magi gunongo cam ki pii amata ki kwene? d I kare meno, twero bedo ni kot onongo cwer madwong, dok jami twi mapol i dye aroo. Buk me Insight on the Scriptures, Volume 1, owaco ni mwaki 3,500 angec, “onongo pii tye madwong i kabedo ma Luicrael guwoto iye loyo i kare-ni. Wangeyo man pien tye nota mapol dok matut ma gutwo woko ma yam onongo gitye kulu.” Kadi bed kit meno, tim aroo man onongo obedo kabedo mutwo dok malik. (Nwo. 8:14-16) Labongo pii ma Jehovah omiyo i yo me tango, Luicrael kacel ki leegi onongo gibito woko.—Nia 15:22-25; 17:1-6; Wel 20:2, 11.
Moses owaco bot Luicrael ni Jehovah onongo opitogi ki manna wek guniang ni “dano pe kwo ki kwon keken, ento dano kwo ki lok ducu ma a ki i dog Rwot [Jehovah].”—Nwo. 8:3.
a Nen Watchtower me Mai 1, 1992, pot 24-25.
b Baibul loko i kom kare aryo mapatpat ma kityero lee bot Jehovah i dye tim. Tyen mukwongo obedo i kare ma kikwero Aron ki awobene me bedo lulamdog; me aryone obedo i kare me Kato. Jami aryo magi ducu otimme i mwaka 1512 K.M.P., i kine ka mwaka acel ma jo Icrael gua kwede ki i Ejipt.—Levi 8:14–9:24; Wel 9:1-5.
c Cokcok i agikki me mwaki 40 ma jo Icrael gubedo kwede i dye tim, gin guyako lee alip mapol ata i lweny. (Wel 31:32-34) Kadi bed kit meno, pud gumedde ki camo manna nio wa i kare ma gudonyo i Lobo ma Kiciko Pire.—Yoc. 5:10-12.
d Watwero moko ni lee onongo pe gicamo manna, pien Jehovah owaco ki dano ni gucok manna ma romo acama pi ngat acel acel ento pe oloko i kom lee.—Nia 16:15, 16.
