Tika wi po i kom nino mo ma ipoto iye piny ma pud itidi? Twero bedo ni iwano cingi nyo congi. Tika wi twero po kit ma mamani okweyo kwede ki cwinyi? Twero bedo ni en omado wang ret ci oboyo woko maber. I kok ento lokke ma en oloko ki mwolo okweyo cwinyi dok oweko iwinyo maber. I kare meno, onongo itye ki ngat ma kweyo cwinyi cok kwedi.

Ento kwo cako doko tek ka iwoto ki dongo. Peko cako medde, nongo kwe cwiny bene bedo tek. Peko pa ngat madit pe kitwero jukone ki boyone calo kit ma kiboyo wang ret nyo kwako kor mego. Nen kong labol magi.

• Tika dong cwinyi ocwer pien irwenyo ticci? Julian owaco ni, i kare ma kiryeme ki i tic, wiye kong ocung ma pe ngeyo ngo ma myero etim. En openye kekene ni: ‘Abigwoko jo me pacona nining? I nge tiyo tic matek pi mwaki mapol, pingo dok kampuni man tera calo ngat ma konye pe?’

• Twero bedo ni cwinyi otur pi kit ma nyomwu oket kwede. Raquel otito ni: “I kare ma cwara oweka woko dwe 18 mukato angec, abedo ki cwercwiny madit adada. Onongo bedo calo cwinya opokke woko iye aryo, onongo awinyo arem i cwinya wa i koma bene. Omiya lworo matek adada.”

• Twero bedo ni itye ki two ma nen calo pe twero cang. Gwok nyo iwinyo kit ma Yubu owinyo kwede i kare ma owaco ni: “Adag bedo kit man; pe amito [medde ki] kwo nakanaka.” (Yubu 7:16) Romo bedo ni iwinyo calo Luis, laco ma onongo tye ki mwaka 80. En owaco ni: “I kare mukene awinyo calo dong atye ka kuro nino me to keken.”

• Nyo bene imito ni kikwe cwinyi pien ngat mo ma imaro oto. Robert owaco ni: “I kare ma latinna oto i can me dege, onongo pe atwero ye lokke matwal.” En omedde ni. “Arem ma abedo kwede, obedo calo kit ma Baibul oporo ki pala lucwan ma cobo cwiny dano pil.”​—Luka 2:35.

Robert, Luis, Raquel, ki Julian gunongo kwe cwiny i kare ma cwinygi otur. Gunongo Lakwe cwiny ma pud dong ber loyo​—man pe obedo ngat mo mapat ki Lubanga Won Twer ducu. En kweyo cwinywa nining? Tika en bene twero mini kwe cwiny ma mitte?