1. Gin ango ma weko ibedo labongo akalakala ni Lok pa Lubanga tye ki teko? (Nen cal ma i pot karatac man.)

JO PA JEHOVAH giye ni lokke, ma en aye kwenane bot dano “obedo gin makwo, dok tiyo matek.” (Jo Ibru 4:12) Waneno kit ma Baibul tiyo kwede i kwowa kacel ki pa jo mukene. Ma peya jo mogo gudoko Lucaden, onongo gubedo lukwo, opii pa yadi calo jayigi-ni, nyo lutim tarwang. Jo mukene onongo guywek nyo gitye ki cente mabup, ento pud giwinyo calo gin mo orem i kwogi. (Latitlok 2:3-11) Ki yomcwiny madit, jo mapol ma onongo gipe ki gen mo dong i kare-ni gitye ki gen. Ki i Wi Lubele, wakwano lok i kom jo ma kit magi i pwonywa ma kati kare ki kare ma wiye tye ni “Baibul Loko Kwo pa Dano.” Dok kadi bed dong wadoko Lukricitayo, myero wamedde ki jingo watwa ki Jehovah kun nongo watiyo ki Baibul.

2. Lok pa Lubanga ogudo jo mukene i cencwari me acel nining?

² Pe tye me ur ni jo mapol guloko kwogi i kare ma gupwonyo lok ada. Omege ki lumege me cencwari me acel ma onongo gitye ki gen me kwo i polo bene gutimo alokaloka i kwogi. (Kwan 1 Jo Korint 6:9-11.) I kare ma  Paulo oloko i kom jo ma pe gibileyo Ker pa Lubanga, en omedde ni: “Jo mogo i kinwu bene yam gubedo macalo jo meno.” Lok pa Lubanga kacel ki cwiny maleng okonyo jo magi me loko kwogi. Ento jo mogo pud gutimo bal madongo i kare ma gudoko Lukricitayo ma ogudo watgi ki Jehovah. Me labolle, Baibul loko i kom omego mo ma kiwiro ma kiryemo woko ki i kacokke. Lacen, en oweko timme-ni ci kidwoko cen i kacokke. (1 Jo Korint 5:1-5; 2 Jo Korint 2:5-8) Cuko cwinywa adada ni utmegiwa mapol guloko kwogi pi teko ma a ki i Lok pa Lubanga.

3. Gin ango ma wabinyamo i pwony man?

³ Lok pa Lubanga tye ki teko madit adada. Dong kit ma Jehovah ominiwa-ni, myero wanen ni watiyo kwede maber. (2 Temceo 2: 15) Pwony man binyamo gin ma watwero timone wek wati ki teko ma tye i Baibul (1) i kwowa, (2) i ticwa me pwony, ki dong(3) ka watye ka pwony i wi abam. Gin ma wabipwonyo-ni bikonyowa me nyuto mar ki pwocwa bot Wonwa me polo, ma pwonyowa wek wabed maber.​—Icaya 48:17.

4. (a) Gin ango ma myero watim wek Lok pa Lubanga ogud kwowa? (b) Itye ki yub ango me kwano Baibul piri keni?

⁴ Wek Lok pa Lubanga ogud kwowa, myero wakwan kare ducu. Mitte ni watute matek me kwanone nino ducu. (Yocwa 1:8) Pol pa wan watye ki tic me atima mapol, ento pe myero wawek gin mo keken kadi wa tic ma watye kwede ogengwa ki kwano Baibul. (Kwan Jo Epeco 5:15, 16.) Watwero kwanyo cawa i odiko con, i dyeceng nyo i dyewor. Wan bene waye lok pa laco jabuli ma ocoyo ni: “Amaro cikki twatwal! Abedo ka lwodo lok i kom cikki dyeceng jwi.”​—Jabuli 119:97.

5, 6. (a) Pingo mitte ni walwod lok i kom gin ma wakwano? (b) Watwero lwodo lok i yo ma konyowa nining? (c) Kwano Baibul ki dok lwodo lok iye okonyi nining?

⁵ Kadi bed kumeno, kwano Baibul keken pe romo. Myero bene walwod lok nyo watam matut i kom gin ma wakwano. (Jabuli 1:1-3) Ka watimo meno, ci bikonyowa me keto i tic tam me ryeko ma nonge i Baibul. Pi meno, kadi ka wakwano Baibul ma kigoyo i pot karatac nyo watiyo ki tabulet nyo cim cing, myero wawek Lok pa Lubanga olok kwowa dok ogud cwinywa.

⁶ Watwero lwodo lok i yo ma konyowa nining? Ka watye ka kwano Baibul, myero wacung manok ci wapenye ni: ‘Lok man pwonya ki gin ango i kom Jehovah? An mono dong atye ka keto pwony man i tic i kwona nining? Kabedo mene i kwona ma mitte ni aloki?’ Ka walwodo Lok pa Lubanga dok walego  pi gin ma wakwano, ci wabibedo ki miti me ketone i tic. Dok wabineno teko ma Baibul tye kwede me loko kwowa.​—2 Jo Korint 10:4, 5.

7. Watwero tic ki Lok pa Lubanga i yo maber i ticwa me pwony nining?

⁷ Pire tek ni wati ki lok pa Lubanga kare ducu ka watye ka tito kwena ki ka pwonyo dano. Omego mo acel owaco ni, “Ket kong ni onongo itye ka tito kwena kacel ki Jehovah i ot ki ot, onongo in keken aye ibiloko, nyo ibiweko Jehovah aye ma loko?” Ka watye ka kwano lok ma i Baibul bot ngat mo, nongo watye ka miyo kare ki Jehovah me lok kwede. Wang Ginacoya ma kiyero maber tiyo matek loyo lok mo keken ma waloko. (1 Jo Tecalonika 2:13) Ka itye i ticwa me pwony, tika itemme me kwano wang Ginacoya kare ducu?

8. Pingo pe mitte ni wakwan mere wang ginacoya keken?

⁸ Ento, kwano tyeng acel keken ki i Baibul bot jo ma watito kwena botgi pe romo. Jo mapol pe giniang lok ma tye i Baibul. Meno otimme i cencwari me acel, dok bene timme wa i kare-ni. (Jo Roma 10:2) Pe myero wabyek abyeka ni rwod ot oniang ginacoya ma wakwano. Watwero konyogi ka wanwoyo wi lok ma pire tek ki i tyeng ma wakwano kun wagonyo te lokke botgi.​—Kwan Luka 24:32.

9. Watwero konyo dano wek guwor Baibul ki i lok ma waloko ma peya wakwano botgi wang ginacoya nining? Mi labol.

⁹ Gin ma wawaco ma pud peya wakwano wang ginacoya mo twero konyo rwod ot me woro Baibul. Me labolle, watwero wacone ni, “Kong wanen ngo ma Lacwec waco i kom lok man.” Nyo ka watye ka lok ki ngat mo ma pe obedo Lakricitayo, watwero wacone ni, “Kong wanen ngo ma Buk Maleng waco botwa.” Ka warwatte ki ngat mo ma pe maro lok me dini, watwero wapenye ni, “Tika dong iwinyo lok mo macon ma waco ni?” Ka wiwa po ni ngat acel acel tye ki niyene, ci wabitemme ki tekwa ducu wek lokwa ogud cwinygi.​—1 Jo Korint 9:22, 23.

10. (a) Gin ango ma otimme i kom omego mo? (b) In dong ineno teko me Lok pa Lubanga i ticci me pwony nining?

¹⁰ Jo mapol gunongo ni tic ki Lok pa Lubanga twero gudo cwiny jo ma wapwonyogi adada. Me labolle, omego mo olimo laco mo mutii ma onongo dong okwano magajinwa pi mwaki mapol. I nino mo acel, ma ka mine Magajin me Wi Lubele manyen-ne, omego-ni omoko tamme me kwane ginacoya mo. En okwano 2 Jo Korint 1:3, 4, ma waco ni: “Won ma lakica, Lubanga ma kweyo cwiny dano ducu. En kweyo cwinywa i can ducu ma walimo.”  Lok man ogudo cwiny laco-ni adada ma oweko en openyo omego-ni ni, kong onwo kwano tyeng meno. Ci laco meno owaco ki omego-ni ni en kacel ki dakone gimito ni kikwe cwinygi. Ginacoya man otugo miti pa laco-ni me nongo ngec mukene mapol ki i Baibul. Ti ki Lok pa Lubanga i ticwa me pwony pien tiyo matek adada!​—Tic pa Lukwena 19:20.

11. Tic ango ma pire tek ma omege ma gimiyo pwony i wi abam gitye kwede?

¹¹ Wamaro cito i cokkewa, i gurewa me nino acel ki gure madito. Tyen lok ma pire tek ma weko wacito aye me woro Jehovah. Wan bene wanongo adwogi maber ki i gin ma wapwonyo. Pi tyen lok man, omege ma gipwonyo i wi abam gitye ki mot madit dok ki tic ma pire tek adada. (Yakobo 3:1) Myero gunen ni pwonygi ojenge i Lok pa Lubanga. Ka itye ki mot man, itwero tic ki Baibul wek ogud cwiny dano nining?

12. Gin ango ma lami pwony myero otim wek pwonye ojenge i Ginacoya?

¹² Ginacoya myero obed gin ma pire tek loyo ka watye ka miyo pwony mo keken. (Jon 7:16) Pi meno, myero igwokke mada wek dano pe guket tamgi i kom kit ma itye ka miyo ki pwonyi,  gin mutimme i kwo kacel ki lapor ma itiyo kwede ma ka keto tamgi i Baibul. Dok bene wi myero opo ni kwano lok ki i Baibul pe rom ki pwonyo dano ki ngo ma tye i Baibul. Ki lok ada, ka ikwano wang ginacoya mapol adada, wi dano pe bipo iye. Pi meno, kwany kare me kwano tyeng moni, gonyone maber, tic ki lapor ma rwatte, ki dok tito kit ma watwero ketone kwede i tic. (Nekemia 8:8) Ka itye ka miyo pwony kun ilubo kit ma kicoyo kwede i karatac, myero inen ni ikwano pwony meno kacel ki ginacoya ma kiketogi maber adada. Temme me niang kit ma pwony meno rwatte kwede ki ginacoya ma kiketogi. Ci ti ki wang ginacoya mogo me pwonyo ngo ma tye i karatac me pwony meno. (Itwero nongo tam mabeco ki i pwony 21 me o i 23 i buk me Benefit From Theocratic Ministry School Education.) Ma dong pire tek loyo, leg Jehovah wek okonyi me nywako tamme ma tye i Baibul.​—Kwan Ejira 7:10; Carolok 3:13, 14.

13. (a) Ginacoya mo ma kikwano i cokke ogudo lamego mo nining? (b) Kit ma kitiyo kwede ki Baibul i cokkewa ogudi nining?

¹³ Jami maraco otimme i kom lamego mo ma a ki i Australia i kare ma en pud tidi, dok kadi bed ni lacen en odoko Lacaden, onongo en pud cwinye  gung ka ada Jehovah marre. I nino mo ma en tye i cokke, kikwano wang ginacoya mo ma ogudo cwinye adada. En olwodo dok okwedo lok mapol i kom ginacoya meno, dok man oweko en okwano wang tyeng mogo mapol. Man oweko en oye ni Jehovah marre. * (Nen lok ma tye i tere piny.) Tika in bene i nino mo iwinyo kikwano wang ginacoya mo i cokke, i gurre me nino acel nyo i gurre madit ma ogudi kit meno?​—Nekemia 8:12.

14. Watwero nyutone nining ni wamaro dok watero Lok pa Jehovah calo gin ma pire?

¹⁴ Watye ki pwoc madit adada bot Jehovah pi Lokke, ma obedo Baibul-li. En ocikke ni lokke bibedo matwal, dok ogwoko cikke meno. (1 Petero 1:24, 25) Pi meno, myero wakwan Baibul kare ducu, waket gin ma wakwano i tic, dok wati kwede me konyo jo mukene. Ka watimo meno, ci wanyuto ni wamaro dok watye ki pwoc madit pi lonyo man, ki ma pire tek loyo bot Ngat ma oweko kicoyo Lok man, Lubanga Jehovah.