Kinywala i mwaka 1934. Lunywalla gua ki i lobo Switzerland ci gukobo i kabedo ma kilwongo ni Timmins, ma obedo taun ma kigolo iye lonyo ki i te ngom i Ontario, Canada. I mwaka 1939, mamana ocako kwano magajin me Watchtower kacel ki wot i cokke pa Lucaden pa Jehovah. En onongo tero an ki omegina ki lumegina i cokke. Ma pe orii, en odoko Lacaden pa Jehovah.

Babawa cwinye pe obedo yom ni Mama odoko Lacaden, ento Mama onongo omoko tamme woko. En omoko matek i ada kadi wa i kare ma kiketo kigeng i kom tic pa Lucaden pa Jehovah i Canada i kine ka mwaka 1940 me o i 1945. Dok en onongo tero Babawa i yo me kica dok ki woro, kadi bed Baba onongo yete. Lanenne maber adada-ni okonya kacel ki omegina ki lumegina abicel-li me yero me tic pi Jehovah bene. Cwinywa obedo yom i kare ma kit Babawa olokke olo dok en ocako terowa maberber.

I mwaka 1950, acito i Gure Madit ma wiye obedo ni Theocracy’s Increase i boma me New York City. Man otugo cwinya me medo ticca pi Jehovah i nge rwatte ki omege ki lumege ma gia ki i but lobo-ni ducu ki dok winyo ka kipenyo jo ma pud gutyeko cobo kwangi i Cukul me Gilead atyeka! Amoko tamma matek me donyo i tic pi kare malac. I kare ma adok gang, cutcut acoyo waraga me penyo pi doko painia marii. Jang gang kal me Canada gudwoko waragana kun gimiya tam ni omyero kong anong batija. Anongo batija i nino dwe 1 me Oktoba, mwaka 1950. I nge dwe acel, adoko painia marii dok kicwala ka tic i kabedo ma kilwongo ni Kapuskasing. Taun meno onongo bor adada ki gangwa.

 I mwaka 1951, jang gang kal openyo Lucaden ma giloko leb French ma gibiye kobo i kabedo ma danone giloko leb meno i Quebec. Can lutit kwena onongo tye kunu matek. Adongo ma aloko leb French ki leb Muno, pi meno ajolo mot me tic man ci kicwala ka tito kwena i taun me Rouyn. Onongo pe angeyo ngat mo keken i taun man. Onongo atye ki nying ngat ma kiora bote kacel ki ka ma en bedo iye keken, kit ma atito kwede con. Ento jami ducu owoto maber. Wan ki Marcel wadoko lurem macok, dok anongo mit pa tic i Quebec macalo painia marii pi mwaki angwen dok lacen kicima macalo painia keken.

I kare ma atye i Quebec, cwinya obedo yom adada i kare ma kilwonga me cito i Cukul me Gilead, i kilaci me 26 ma obedo i South Lansing, New York. Wakwero tyeko kwanwa i nino dwe 12 me Febuari, mwaka 1956, dok kicwala ka tic i Ghana, b ma tye Tung Kupoto Ceng me Afrika. Ma peya acito, kong adok woko cen i lobo Canada ka kuro waraga me wot i lobo Ghana. Abyeko ni onongo abibedo i Canada pi cabit aryo nyo adek keken.

Ento akuro waraga magi pi dwe abiro kulu i Toronto. I kare meno, abedo i gang pa Omego Cripps, dok abedo ki kare me mako lirem ki nyargi, Sheila ci wacako winnye. Ma onongo dong acok penye ni wanyomme woko, kicwalla waragana me cito i lobo Ghana. An ki Sheila walego matek dok wamoko tamwa ni omyero acit Ghana. Ento bene wamoko tamwa ni wabibedo ka kubbe ki waraga kun wawoto ki neno ka watwero nyomme i kare me anyim. Meno onongo pe obedo tam mayot me amoka, ento waniang lacen ni meno obedo tam maber ma wamoko.

Ao i boma madit me Ghana ma kilwongo ni Accra i nge wot pi dwe acel kun atiyo ki gar, meli, kacel ki dege. I kare ma ao, kicima me tic macalo laneno me distrik. Tic man onongo kwako wot i kabedo mapatpat i lobo Ghana, Ivory Coast (ma i kare-ni kilwongo ni Côte d’Ivoire) kacel ki Togoland (ma i kare-ni kilwongo  ni Togo). Pol kare, onongo awoto kena, kun atiyo ki mutoka jeep ma jang gang kal omina. Onongo amaro tic man me limo omege ki lumege matek adada!

I Ceng Abicel ki Ceng Cabit, onongo amiyo pwony i gure me adwol. I kare meno, onongo wape ki Odi me Gure me Adwol. Dong omege ki lumege onongo gigero bolo kun gitiyo ki koo ci giumo wiye ki jang otit wek ogenggi ki i lyeto ceng. Kit macalo onongo firij pe me gwoko ginacama wek pe oballe, omege onongo gigwoko lee me aneka macok ki kabedo me gure ci kinekogi i cawa ma mitte me ateda pi lwak.

Jami ma kelo nyero onongo timme i gure me adwol magi. Nino mo ma Omego Herb Jennings, c ma onongo bene tye lamiconari tye ka miyo pwony, dyang mo acel olwi woko ki ka ma kitweyo iye lee. Oringo obino ocung i nyim lwak macok ki wi abam dok onongo wiye onywenne woko. Man oweko Omego Herb ojuko pwonnye manok. Ento omege angwen ma gungwel gubedo ki kare me mako dyang man ci gudwoko cen ka ma kitweyo iye lee kun lwak woto ki dongo cinggi ki yomcwiny.

I dye cabit, onongo anyuto filim ma wiye tye ni The New World Society in Action, i caro mogo macok ki ka gure me adwol. Me nyuto filim man, onongo angabo cuka matar i kom yadi aryo, ci anyuto filim i kome. Jo me caro magi onongo gimaro filim man! Pi jo mapol, man onongo tyengi me acel me neno filim. Onongo gidongo cinggi matek ki yomcwiny ka guneno bute ma nyuto kit ma dano gitye ka nongo kwede batija. Filim man okonyo jo ma guneno me niang ni wan macalo Lucaden pa Jehovah watye ma wanote dok watye i but lobo ducu.

I nge bedo i Afrika pi mwaki aryo, abedo ki yomcwiny madwong adada me cito i New York City i gure madit ma kwako lobe mapol ma otimme i mwaka 1958. Pud dong oyomo cwinya ya me neno Sheila, ma obino wa ki i Quebec, ka ma en onongo tye ka tic iye macalo painia keken. Onongo wabedo ka kubbe ki waraga, ento kit ma onongo dong watye kacel, apenye ka watwero nyomme, dok en oye. Acoyo waraga bot Omego Knorr d ci apenye ka en twero ye ki Sheila me cito i Cukul me Gilead wek obin ka tic kacel kweda i Afrika. Omego  Knorr oye. Lacen Sheila obino i lobo Ghana dok wanyomme i boma me Accra, i nino dwe 3 me Oktoba, 1959. Wawinyo ada ni Jehovah ogoyo laane i komwa pi keto mitine mukwongo i kwowa.

I mwaka 1961, kicwalowa ka tic i lobo Cameroon. Kimina tic me konyo yabo jang gang kalwa i lobo meno, man oweko onongo atye ki tic mapol. Kit macalo an aye onongo adoro wi tic me jang gang kal, dok man onongo obedo gin manyen bota, onongo mitte ni apwony jami mapol. Ci i mwaka 1965 waniang ni Sheila ogamo ic. Ki lok ada, pe obedo yot me ye ni wabidoko lunyodo. I kare ma cwinywa tye ka doko yom pi kwena man kun wayubbe me dok cen i lobo Canada, can opoto i komwa.

I Sheila oo woko. Daktar otitiwa ni latin meno obedo awobi. Gin meno otimme mwaki makato 50 angec, ento wiwa pe owil iye matwal. Kadi bed gin mutimme meno ocwero cwinywa, pud wamedde ki motwa me tic i lobo Cameroon.

Utmege ma i Cameroon onongo gikemme ki aunauna magwar pien onongo pe gidonyo i tim me wibye. Timo meno onongo bedo tek adada i kare me yero ladit lobo. I nino dwe 13 me Mai, mwaka 1970, gin mo ma onongo watye ki lworo ni bitimme, otimme. Kijuko tic pa Lucaden pa Jehovah woko i lobo man. Gamente omayo woko jang gang kalwa ma onongo pud kityeko gerone atyeka dok onongo pud wabedo iye pi dwe abic keken. I kine me cabit acel keken, kiryemo wan lumiconari ducu ki i lobo man. Obedo tek adada me weko utmegiwa pien onongo wamarogi matek dok onongo watye ki lworo pi gin ma twero timme i komgi.

Wacito i jang gang kal me lobo France dok wabedo kunnu pi dwe abicel. Ki kunnu, amedde ki timo jami ducu ma atwero me konyo utmege ma i lobo Cameroon. I Decemba me mwaka meno, kicwalowa ka tic i jang gang kal me lobo Nigeria, ma onongo ocako doro ticwa i lobo Cameroon. Omege ki lumege ma i Nigeria gujolowa ki yomcwiny madwong dok wanongo mit pa tic kunnu pi mwaki mapol.

I mwaka 1973, wakemme ki tam mo ma mokone pe obedo yot. Sheila onongo tye ka lweny ki two. I kare ma watye i gure madit i New York, Sheila ocako koko ci owacca ni: “Pe atwero medde ki tic man! Aol woko dok kare ducu nongo koma lit.” Onongo watiyo kacel kwede i Tung Kupoto Ceng me Afrika pi mwaki 14 kulu. Cwinya onongo yom adada i kome pi bedo latic ma lagen, ento onongo mitte ni watim alokaloka i kwowa. I nge nyamo lok i kinwa kacel ki lega matek, wamoko tamwa me dok cen i lobo Canada, ka ma onongo watwero nongo iye kony me yotkom maber. Weko tic macalo lumiconari aye dong obedo gin ma timone obedo tek dok oturo cwinywa loyo.

I kare ma wadok cen i Canada, anongo tic bot larema mo ma cato mutoka i taun mo ma tye tung kumalo me Toronto. Wapango ot, ci  wawilo kom kacel ki jami mukene ma welgi yot ki i dukan ma kicato iye jami ma kong kitiyo kwedgi. Man okonyowa pe me donyo i banya. Onongo watye ki yub me kwo kwo ma rwomme lapiny, ki gen ni nino mo wabibedo ki kare me dok cen i tic pi kare malac. Wabedo ki ur ni wanongo mot meno i nge kare manok keken.

Acako jalle i Ceng Abicel me miyo kony i tic me gero Ot me Gure me Adwol ma tye i Norval, Ontario. I nge kare mo, kimiya mot me tic macalo Lagwok Ot me Gure me Adwol. Yotkom Sheila onongo tye ka medde ki doko maber, dok onongo watwero jolo mot me tic manyen man. Pi meno, wakobo i Ot me Gure me Adwol i Juni me mwaka 1974. Cwinywa obedo yom adada me dok cen i tic pi kare malac!

Ki yomcwiny madwong, Sheila ocako winyo maberber. I nge mwaki aryo, wabedo ki kare me jolo mot me tic me limo adwol. Adwol man onongo tye i Manitoba, kabedo mo i lobo Canada ma ngene adada pi ngicone. Ento kadi bed kit meno, wanongo mit pa tic kacel ki omege ki lumege ma kunnu. Wapwonyo ni, ka ma watiyo iye pire pe tek tutwal—pien gin ma pire tek aye me medde ki tic pi Jehovah ki ka mo keken ma watye iye.

I nge tic macalo laneno me adwol pi mwaki mapol, kilwongowa i mwaka 1978 me cito ka tic i Betel me Canada. Ma pe orii, anongo pwony ki i tira mo ma oguda malit. Kiwacca ni ami pwony ma tero cawa acel ki nucu i leb French i gure mo ma kite dok pat ma otimme i Montreal. Ki cwercwiny, pwonya pe obedo mit dok pe ogudo cwiny utmege, ci omego mo ma tiyo i Dipatmen ma Neno Wi Tic omiya tira magwar labongo umo lok. Ki lok ada, me ka gengo ngeya onongo myero aye woko con ni pe abedo lami pwony mucwiny. Ento pe ajolo tira meno i yo maber. Yoko wic mo obedo tye i kin an ki omego-ni. Leyo lok i kinwa pe owoto maber, dok cwinya ocwer pien atamo ni en tye ka kok i koma nono dok pe owacca gin ma atimo maber. Atimo bal me ngolo kop i kom kit ma kimiya kwede ki tira kacel ki tam marac ma onongo atye kwede i kom omego-ni.

I nge nino mogo manok, lamemba acel me Komitti me Jang Gang Kal oloko kweda i kom gin mutimme. Aye ni pe adok i tira meno maber dok akwayo kica. I ngeye, aloko bene ki omego ma omina tira-ni. En otimma kica. Gin mutimme meno opwonya kit ma pire tek kwede me bedo ngat mamwol, dok wiya pe biwil iye matwal. (Car. 16:18) Alego bot Jehovah tyen mapol adada pi gin mutimme man, dok amoko tamma pe me kwero tira mo keken.

Dong abedo i Betel me lobo Canada pi mwaki makato 40, dok nicakke i mwaka 1985, atiyo dong macalo lamemba me Komitti me Jang Gang Kal. I dwe me Febuari 2021, dakona me amara Sheila oto woko. Medo i kom cola me tone, an bene atye ka lweny ki two mapatpat. Ento tic pi Jehovah weko abedo ki yomcwiny dok weko pe alungo wiya ka tamo pi “kare me kwona mukato angec.” (Latit. 5:20) Kadi bed akato ki i pekki mapol i kwona, anongo yomcwiny madwong makato pekki magi woko. Keto miti pa Jehovah mukwongo i kwona pi mwaki 70 kulu okella mot madwong. Alego ni omege ki lumege ma pud gitino guket tic pi Jehovah mukwongo i kwogi bene. Dong amoko ni gin bene gibinongo yomcwiny kacel ki mot mapol i kwogi ka gutiyo pi Jehovah.