1-2. Pingo Jehovah ocweyowa i yo ma weko wanongo yomcwiny makato ka wakonyo jo mukene?

 CWINYWA bedo yom makato ka wamiyo mic bot jo mukene loyo ka wagamo agama. Meno aye kit ma Jehovah ocweyowa kwede. (Tic 20:35) Tika man tyen lokke ni cwinywa pe bedo yom ka ngat mo ominiwa mic? Pe tye kit meno. Wan ducu cwinywa bedo yom ka ngat mo ominiwa mic. Ento, wanongo yomcwiny makato ka wan aye wamiyo bot jo mukene. Ki lok ada, ber adada ni Jehovah ocweyowa kit meno. Pingo?

² Pien Jehovah ocweyowa kit man, twerre botwa me medo yomcwinywa. Watwero medo yomcwinywa ka wayenyo yo mapatpat me konyo jo mukene. Pud dong ber ya ni Jehovah ocweyowa kit man!—Jab. 139:14.

3. Pingo Baibul lwongo Jehovah ni “Lubanga ma layomcwiny”?

³ Ginacoya tittiwa ni jo ma gimiyo mic gibedo ki yomcwiny, dong watwero niang pingo kilwongo Jehovah ni “Lubanga ma layomcwiny.” (1 Tem. 1:​11, NWT) En aye okwongo miyo mic ki jo mukene dok pe tye ngat mo keken ma cinge yot loyo Jehovah. Lakwena Paulo ocoyo ni, “Wakwo i en, wawoto i en, wabedo i en.” (Tic 17:28) Ki lok ada, “kit gin mo ducu maber, ki mot ducu mabeco twatwal” bino ki bot Jehovah.—Yak. 1:17.

4. Gin ango ma bikonyowa me nongo yomcwiny madwong makato?

⁴ Wan ducu wamito nongo yomcwiny madwong makato ma bino pi miyo mic. Watwero timo meno ka walubo lanen me yot cing pa Jehovah. (Ep. 5:1) I pwony man, wabinyamo labol me yot cing pa Jehovah ki dok gin ma watwero timo  ka wawinyo calo jo mukene pe gitye ki pwoc pi jami mabeco ma watimo pigi. Lapo wic magi bikonyowa me medde ki miyo mic bot jo mukene wek wamed yomcwinywa ameda.

LUB LANEN ME YOT CING PA JEHOVAH

5. Jami me kom macalo mene ma Jehovah miyo botwa?

⁵ I yo mapatpat ango ma Jehovah nyuto kwede ki yot cinge? Nen kong labol mogo. Jehovah miyo botwa jami me kom ma mitte. Oromo bedo ni pe wabibedo ki lonyo madwong, ento Jehovah kare ducu neno ni wabedo ki jami ma mitte pi kwo. Me labolle, en weko twerre botwa me nongo cam, ginaruka, kacel ki kabuto. (Jab. 4:8; Mat. 6:​31-33; 1 Tem. 6:​6-8) Jehovah pe miniwa jami magi pien ni obedo ticce. Dong pingo Jehovah timo jami magi piwa?

6. Pwony ango ma wanongo ki i Matayo 6:​25, 26?

⁶ Jehovah miyo botwa jami ma mitte pi kwo pien en marowa. Nen kong lok pa Yecu ma nonge i Matayo 6:​25, 26. (Kwan.) Yecu otiyo ki labol ma nonge i cwec. En otiyo ki labol pa winyi ci owaco ni: “Pe gicoyo kodi dok bene pe gikayo.” Ento nen kong gin ma en owaco i nge meno: “Wonwu ma tye i polo pud pitogi.” I nge meno, Yecu openyo ni: “Wun pe piwu tek kato pigi woko?” Pwony ango ma wanongo? Lutic pa Jehovah ma lugen pigi tek bote loyo lee ki winyi woko. Dong ka Jehovah paro pi lee ki winyi, watwero bedo ki gen ni en bigwokowa! Calo wego ma lamar, en gwoko jo me ode pien marogi.—Jab. 145:16; Mat. 6:32.

7. I yo mene ma watwero lubo kwede lanen me yot cing pa Jehovah? (Nen bene cal.)

⁷ Calo Jehovah, wan bene watwero miyo mic bot jo mukene pien wamarogi. Me labolle, tika ingeyo omego nyo lamego mo ma mito cam nyo ginaruka? Jehovah twero tic kwedi me konye. Jo pa Jehovah gingene adada ka odok i lok me nyuto yot cing i kare me can ma poto atura. Me labolle, i kare me two Korona, omege ki lumege gumiyo cam, bongi, ki jami mukene ma mitte bot jo ma onongo gitye i peko. Jo mapol i kingi bene gumiyo cente madwong me cwako kor Ticwa ma Kwako Wi Lobo Ducu-ni. Meno okonyo utmege ma i wi lobo ducu ma onongo gimito kony pien can opoto atura i komgi. Utmege magi ma gunyuto yot cinggi-ni guketo i tic lok ma nonge i Jo Ibru 13:16 ma waco ni: “Pe myero  wiwu owil ka timo gin maber, ki poko jami ma wutye kwede bene bot jo mukene; pien gitum macalo meno yomo cwiny Lubanga.”

8. Jehovah miyowa teko me timo gin ango? (Jo Pilipi 2:13)

⁸ Jehovah miyowa teko. Jehovah tye ki teko ma lapore pe dok cwinye yom me miyo teko bot luticce ma lugen. (Kwan Jo Pilipi 2:13.) Tika dong nino mo ilego pi teko me loyo atematema me timo bal? Nyo mono ilego pi teko me ciro peko mo madit? Nyo oromo bedo ni ilego pi teko me timo jami ma myero icobgi nino ki nino. I kare ma kigamo legani, twero bedo ni imoko ada pa lok pa lanebi Icaya ma ocoyo ni: “En miyo tek bot jo magoro, dok bene medo tek bot ngat ma tekone odok woko piny.”—Ic. 40:29.

9. I yo mapatpat ango ma watwero lubo kwede lanen pa Jehovah i tic ki kerowa? (Nen bene cal.)

⁹ Wan pe watye ki teko ma pe gik calo pa Jehovah dok pe waromo miyo teko bot jo mukene kit ma en timo kwede. Ento waromo lubo lanene ka watiyo ki tekowa kacel ki kerowa me konyo jo mukene. Me labolle, waromo konyo omege ki lumege ma gutii woko nyo ma komgi lit ki tiyo tic mogo ma gang nyo cito i cuk ka wil. Ka kerowa romo, watwero jalle me konyo tic me gwoko lengo kacel ki roco Ot me Ker. Ka watiyo ki tekowa i yo magi, ci wabitimo jami mabeco mapol pi omegiwa ki lumegiwa.

10. Watwero jingo jo mukene nining ki lokwa?

¹⁰ Wi pe myero owil ni, lok ma iloko twero cuko cwiny dano. Tika itwero tamo pi ngat mo ma romo nongo cuko cwiny ka ipwoye pi gin ma en otimo? Tika ingeyo ngat mo ma mito kwe cwiny? Ka tye kit meno, ci wek ngat meno onge ni iparo pire. Itwero cito ka limme, gone cim, nyo itwero cwalo bote kad, email, nyo mecej i cim. Pe ipar tutwal pi lok ma ibiwacce. Lok mo manok ma oa ki i cwinyi twero bedo gin ma laye lawoti mito kikome i kare meno wek omedde ki gwoko gennene nyo obed ki neno matir.—Car. 12:25; Ep. 4:29.

11. I yo ma nining ma Jehovah miyo kwede ki ryekone?

¹¹ Jehovah miyowa ryeko. Lapwonnye Yakobo ocoyo ni: “Ka ce tye ngat mo i kinwu ma ryekone nok, myero en oleg Lubanga ma miyo bot jo ducu ki yomcwiny, kun pe twono ngat mo.” (Yak. 1:5) Kit ma ginacoya man nyuto kwede, Jehovah pe ladur i kom ryekone. En miyo ryeko bot jo mukene labongo gingi mo. Yakobo bene owaco ni Jehovah miyo ryekone “ki yomcwiny.” En pe mito ni wawiny calo konywa pe ka watye ka penye pi tira. Me ka meno, en mito ni wayeny tira ki bote.—Car. 2:​1-6.

12. Kare mene ma watye kwede me nywako ki jo mukene ngec ma watye kwede?

 ¹² Wan kono? Tika watwero lubo lanen pa Jehovah ki nywako ngecwa ki jo mukene? (Jab. 32:8) Jo pa Jehovah gitye ki kare me nywako gin ma gupwonyo ki jo mukene. Me labolle, pol kare wapwonyo lutit kwena manyen i tic me pwony. Luelda gipwonyo lukony kor tic kacel ki omege manyen kit me cobo ticgi i kacokke. Dok omege ki lumege ma gitye ki ngec me gero kacel ki roco odiwa me woro gipwonyo jo mukene ma nongo ngecgi nok.

13. Watwero lubo lanen pa Jehovah nining ka watye ka pwonyo jo mukene?

¹³ Tute me lubo lanen pa Jehovah ka itye ka miyo pwonnye ki jo mukene. Wi opo ni Jehovah miyo ryekone labongo guno nyo kano mukene woko. Kit meno bene, wamito ni wanywak ngec ki ryeko ma watye kwede ki jo mukene labongo guno ngec mukene. Pe wakano ngecwa mukene ki lworo ni ngat ma watye ka pwonyo-ni bileyo kakarwa woko. Pe bene wabedo ki tam ma kit man ni: ‘An ngat mo pe opwonya! Wek en bene oyelle kwede kekene.’ Pe myero latic pa Jehovah mo keken obed ki cwiny ma kit meno. Me ka meno, pe wamiyo ngecwa keken, “ento kadi wan kikomwa” wamine bot jo ma wapwonyogi. (1 Tec. 2:8) Wabedo ki gen ni gin bene gibidoko “jo ma genne ma giromo pwonyo . . . jo mukene.” (2 Tem. 2:​1, 2) Ka wan ducu wanywako ryekowa labongo kano ngecwa mukene woko, ci wan kacel ki jo mukene wabimedo ryekowa kacel ki yomcwinywa.

KA NEN CALO DANO PE GITYE KI PWOC

14. Pol pa dano gidok iye nining ka watimo gin mo pigi?

¹⁴ Ka wamiyo nyo watimo gin mo pi jo mukene, tutwalle omegiwa ki lumegiwa, pol kare gipwoyowa. Giromo cwalo botwa kad me nyuto pwocgi nyo gitwero pwoyowa i yo mapat. (Kol. 3:15) Ka kipwoyowa, wabedo ki yomcwiny madwong ni watimo gin mo pigi.

15. Gin ango ma myero wiwa opo iye ka jo mukene pe ginyuto pwoc pi gin ma watimo?

¹⁵ Ento ki lok ada, i kare mukene dano pe ginyuto pwoc pi gin ma watimo pigi. I kine mukene, watwero miyo cawa, kerowa ki jami ma watye kwede ento i ngeye wapennye ka ce ngat ma wakonyo-ni oneno gin ma watimo-ni calo gin ma pire tek. Ka gin ma kit meno otimme, watwero gwokke nining wek pe warweny yomcwinywa woko nyo wabed ki turcwiny? Wi opo i kom ginacoya ma pwony man jenge iye, Tic pa Lukwena 20:35. Yomcwiny ma wanongo ki i miyo pe jenge i kom kit ma dano gidok kwede iye. Pud watwero bedo ki yomcwiny kadi bed jo mukene ginen calo pe gitye ki pwoc pi gin ma watimo. Gin ango ma twero konyowa? Kong wanenu jami mogo.

16. Gin ango ma romo konyowa me medde ki miyo jamiwa ki yomcwiny?

¹⁶ Lub lanen pa Jehovah. En miyo jami mabeco bot dano kadi bed ginyuto pwoc nyo pe. (Mat. 5:​43-48) Jehovah ocikke ni ka wan bene wamiyo ‘kun pe wageno ni kibiculowa, ci mot me pwoyowa bibedo madwong.’ (Luka 6:35) ‘Cul ma wageno’ twero bedo pwoc ma dano miyowa. Ento kadi bed wanong pwoc meno nyo pe, wiwa myero opo ni Jehovah kare ducu culowa pi jami mabeco ma watimo pi jo mukene ki dok pi bedo ‘jo ma miyo jamigi ki yomcwiny.’—Car. 19:17; 2 Kor. 9:7.

17. I yo mukene ango ma watwero lubo kwede lanen pa Jehovah ka wamiyo mic? (Luka 14:​12-14)

¹⁷ Gin mukene ma watwero timo me lubo lanen pa Jehovah ka watye ka miyo mic aye me keto i tic lok pa Yecu ma nonge i  Luka 14:​12-14. (Kwan.) Ngene kene ni, pe rac me nyuto kica nyo cwiny me jolo welo bot jo ma gitye ki kero me timo gin acel-lu botwa. Ento, ka waniang ni pol kare wakonyo jo mukene kun wageno ni gin bene gibikonyowa marom aroma kono? Ka tye kit meno, ci omyero watute me keto i tic tam ma Yecu omiyo. Itwero miyo mic nyo nyuto cwiny me kica bot ngat ma ingeyo ni pe tye ki kero me timo gin acel-lu piri. Ci wabibedo ma cwinywa yom pien nongo watye ka lubo lanen pa Jehovah. Bedo ki neno ma kit meno bikonyowa me gwoko yomcwinywa kadi bed jo mukene pe gunyuto pwoc.

18. Gin ango ma omyero pe watim, dok pingo?

¹⁸ Pe ibed ki gung cwiny i kom jo mukene. (1 Kor. 13:7) Ka jo mukene pe gunyutiwa pwoc, watwero pennye kekenwa ni: ‘Tika ada pe gitye ki pwoc, nyo mono wigi owil awila ki wacone?’ Twero bedo ni gitye ki tyen lok mukene ma oweko pe gupwoyowa kit ma onongo wageno kwede. Jo mogo gitwero bedo ki pwoc madit i cwinygi ento ginongo ni titone tek. Twero bedo ni lewic makogi me jolo kony, tutwalle ka con onongo gitye ki kero me konyo jo mukene, ento kombeddi dong kerogi pe. Ento ka ada wamaro omegiwa ki lumegiwa, pe wabibedo ki gung cwiny i komgi dok wabimedde ki miyogi mot ki yomcwiny.—Ep. 4:2.

19-20. Gin ango mukene ma twero konyowa me bedo ma cwinywa yom ka watye ka konyo jo mukene? (Nen bene cal.)

¹⁹ Di cwinyi. Ma lubbe ki bedo ma cingwa yot, Kabaka Solomon ocoyo ni: “Cwal cammi bot jo ma tye loka nam tungcel, ibinongo iye magoba i nge mwaka mapol ma pud tye anyim.” (Latit. 11:1) Lok magi pwonyowa ni i kare mogo, dano ginyuto pwocgi pi gin ma watimo pigi “i nge mwaki mapol.” Man aye gin mutimme i kom laminwa mo acel.

²⁰ Mwaki mapol angec, dako pa laneno me adwol mo ocwalo kad me cuko cwiny laminwa mo ma nyinge Sandra, ma pud  onongo batija nyen. I kad meno, en otito kit ma pire tek kwede me medde ki bedo lagen bot Jehovah. I nge mwaki ma romo aboro, Sandra odwoko waraga bot dako pa laneno-ni kun waco ni: “Anongo ni omyero aco boti waraga wek atitti kit ma ikonya kwede i mwaki magi ducu kadi bed in kikomi pe ingeyo.” En omedde ni: “Icoyo bota lok mamit ma nyuto kica, ento wang ginacoya ma iketo aye dong ogudo cwinya loyo, dok wiya pe owil iye matwal.” a I nge tito pekki mogo ma en okato ki iye, Sandra otito ni: “I kare mogo, onongo awinyo calo myero ail cinga woko dok ajuk tic pi Jehovah woko. Ento wiya onongo bedo ka po i kom wang ginacoya ma icoyo ca dok meno omina kero me medde ki bedo lagen.” En omedde ni: “Pe tye gin mo mukene i mwaki aboro magi ducu ma ocuko cwinya loyo wang ginacoya ma inywako kweda-ni.” Go kong kit ma dako pa laneno-ni cwinye obedo yom kwede i kare ma onongo waraga man “i nge mwaki mapol”! Wan bene waromo nongo pwoc i nge kare malac ma nongo watimo gin mo maber pi ngat mo.

21. Pingo imoko tammi me medde ki lubo lanen me yot cing pa Jehovah?

²¹ Kit ma kitito kwede, Jehovah ocweyowa me nongo yomcwiny madwong makato ka wamiyo jamiwa loyo ka wagamo agama. Wawinyo maber ka watwero konyo utmegiwa. Dok cwinywa bedo yom ka ginyuto pwocgi pi kony magi. Ento, kadi bed gunyuto pwoc nyo pe, pud watwero bedo ki yomcwiny ni watimo gin ma atir. Wi pe owil ni kadi bed imi gin madwong nining, ‘Jehovah twero miyi madwong makato.’ (2 Tekwaro 25:9) Dong Jehovah bimiyo boti madwong makato ma imiyo ki jo mukene! Dok ka Jehovah oculowa, meno aye mot ma pud dong ber loyo ma watwero nongone. Dong omyero wamoku tamwa me medde ki lubo lanen pa Wonwa me polo ma cinge yot-ti.