1. Gin ango ma Yecu bitimo macok cok-ki?

 WATYE ka kwo i kare ma alokaloka madongo bitimme iye! Macok cok-ki, Yecu bingolo kop i kom jo ducu ma gikwo i lobo. Yecu oweko wangeyo jami ma bitimme i lobo ma nongo kare me ngolo koppe dong onyiko cok. En otito ki lulub kore “gin ango ma binyuto” dwogone kacel ki “agikki piny.” (Mat. 24:3) Lanyut magi kiryeyogi i Matayo cura 24 ki 25 ki dok i Marako cura 13 ki Luka cura 21.

2. Gin ango ma wabinyamo i pwony man, dok man bikonyowa nining?

² Yecu otiyo ki carolok adek me konyowa wek wabed ma wayubbe. Carolok magi tye me cikowa dok giloko i kom romi ki dyegi, anyira ma luryeko ki anyira ma luming, ki dong carolok i kom lim. Carolok acel acel konyowa me niang ni Yecu bingolo kop i wi ngat acel acel ma lubbe ki ticce. I pwony man, wabinyamo carolok magi ci waneno pwony ma watwero nongo ki iye. Carolok mukwongo ma wabinyamo loko i kom romi ki dyegi.

ROMI KI DYEGI

3. I kare mene ma Yecu bingolo iye kop i kom dano?

³ I carolok madok i kom romi ki dyegi, Yecu otito ni ebingolo kop i kom dano ma lubbe ki kit ma gujolo kwede kwena maber ki dong ka ce gumiyo cwak bot omegine ma kiwirogi nyo pe. (Mat. 25:​31-46) I kare me “twon can madit atika,” en bimokone ka maleng jo mene ma gubedo romi nyo dyegi ma peya lweny me Armagedon ocakke. (Mat. 24:21) Kit macalo lakwat poko kwede romi ki i kom dyegi, Yecu bene bipoko jo ma gumiyo cwak bot omegine  ma kiwirogi ki i kom jo ma pe gumiyogi cwak.

4. Ma lubbe ki Icaya 11:​3, 4, pingo watwero bedo ki gen ni Yecu bingolo kop atir? (Nen bene cal ma tye i )

⁴ Baibul tito ni macalo Langolkop ma Jehovah ocimo, Yecu bingolo kop atir. (Kwan Icaya 11:​3, 4.) En ngiyo tic pa dano, kitgi, lokgi, ki kit ma gitero kwede omegine ma kiwirogi. (Mat. 12:​36, 37; 25:40) Yecu bingeyo anga ma omiyo cwak ki omegine ma kiwirogi kacel ki tic ma kiminigi. a Yo acel ma pire tek adada ma ngat moni twero cwako kwede omegi Kricito aye ki nywako i tic me pwony. Jo ma gimiyo cwak i yo man Yecu bikwanogi ni “jo ma kitgi atir” dok gibibedo ki kare me nongo “kwo ma pe tum” i lobo. (Mat. 25:46; Yabo 7:​16, 17) Man pud dong obedo mot mamwonya ya pi jo ma gigwoko gennegi! Ka gumedde ki bedo lugen i kare me twon can madit atika-ni ki dok i ngeye, ci nyinggi bimedde ki bedo i “buk me kwo.”—Yabo 20:15.

5. Carolok ma loko i kom romi ki dyegi cuko cwinywa me timo gin ango, dok angagi ma myero gutim man?

⁵ Nyut ni ibedo ngat ma lagen. Carolok pa Yecu i kom romi ki dyegi tutwalle kwako jo ma gitye ki gen me kwo pi naka i lobo. Ginyuto ni gitye ki niye ki miyo cwak bot omegi Kricito i tic me pwony kacel ki lubo tira ma a ki bot lagwok ot ma lagen. (Mat. 24:45) Ento jo ma gitye ki gen me kwo i polo bene omyero gulub tira ma nonge i carolok man. Pingo? Pien Yecu ngiyo ticgi, kitgi, kacel ki lokgi. Gin bene myero gunyut ni gibedo lugen. Ki lok ada, Yecu obolo carolok aryo mukene ma miyo pwony atir pi jo ma kiwirogi. Carolok magi bene nonge i Matayo cura 25. Kong dong wanyamu carolok ma loko i kom anyira ma luryeko ki anyira ma luming.

ANYIRA MA LURYEKO KI ANYIRA MA LUMING

6. Anyira abic gunyuto nining ni giryek? (Matayo 25:​6-10)

⁶ I carolok madok i kom anyira-ni, Yecu oloko i kom anyira apar ma gucito ka jolo lanyom. (Mat. 25:​1-4) Gin ducu gubedo ki gen me lwoko lanyom wa i karama me nyomme. Yecu olwongo anyira abic ni “luryeko” ki anyira abic mukene ni “luming.” Anyira maryek-ki onongo guyubbe dok gubedo ma wanggi twolo. Onongo gitye atera me kuro lanyom, kadi bed en oo i cwiny dyewor. Pi meno, guwoto ki tara, wek okonygi me menyo piny i dyewor. Guwoto bene ki moo madwong ma onongo twero dong kadi bed lanyom ogalle. Pi meno, onongo gitye atera me bedo ma taragi lyel wang ma lanyom oo. (Kwan Matayo 25:​6-10.) I kare ma lanyom oo, anyira ma luryeko gudonyo kacel kwede i karama me nyom. I yo acel-lu, Lukricitayo ma kiwirogi ma gunyuto ni gitye atera kun gibedo lugen dok ma wanggi twolo nio wa i kare ma Kricito bibino, kibikwanogi ni gupore me donyo kacel ki Lanyom, Yecu, i Kerre me polo. b (Yabo 7:​1-3) Ento anyira abic ma gin luming-ngi kono?

7. Gin ango ma otimme i kom anyira abic ma luming-ngi, dok pingo?

⁷ Pe calo anyira ma luryeko-ni, anyira abic ma luming-ngi onongo pe guyubbe i  cawa ma lanyom oo. Mac taragi onongo dong cok to woko, dok onongo pe guwoto ki moo mukene. I kare ma guniang ni lanyom dong cok o, gukato woko ka wilo moo. Onongo peya gudwogo i cawa ma lanyom oo. I cawa meno, “jo ma nene gitye ma guyubbe gudonyo kacel kwede i ot i karama me nyom, ci giloro doggola woko.” (Mat. 25:10) Lacen ma dong anyira ma luming-ngi gudwogo dok gimito donyo i ot, lanyom owaco botgi ni: “An gira pe angeyowu.” (Mat. 25:​11, 12) Anyira magi onongo pe guyubbe me kuro lanyom nio wang ma en oo. Pwony ango ma jo ma kiwirogi gitwero nongo ki i carolok man?

8-9. Pwony ango ma jo ma kiwirogi gitwero nongone ki i carolok madok i kom anyira apar? (Nen bene cal.)

⁸ Bed ma iyubbe dok ma wangi twolo. Yecu onongo pe tye ka waco ni wabibedo ki gurup aryo pa jo ma kiwirogi—gurup acel ma tye atera me kuro nio wang ma Yecu odwogo i agikki me twon can madit atika-ni, ki gurup mukene ma pe gibibedo atera me kure. Me ka meno, en onongo tye ka tito gin ma bitimme i kom jo ma kiwirogi ka pe gubedo atera me ciro nio wa i agikki. Ka pe gubedo atera, ci pe gibinongo motgi. (Jon 14:​3, 4) Meno lok ma pire tek adada! Kadi bed genwa tye me kwo i polo nyo i lobo, wan ducu omyero waket cwinywa i kom pwony ma wanongo ki i carolok i kom anyira apar. Wan ducu ki acel acel omyero wamedde ki bedo ma wangwa twolo dok ma wayubbe nio wa i agikki.—Mat. 24:13.

⁹ I nge tito carolok i kom anyira apar me nyuto kit ma pire tek kwede me bedo ma wayubbe dok ma wangwa twolo, Yecu otito carolok madok i kom lim. Carolok meno nyuto kit ma pire tek kwede me bedo jo ma lutic matek.

CAROLOK I KOM LIM

10. Lutic aryo-ni gunyuto nining ni gibedo jo ma genne? (Matayo 25:​19-23)

¹⁰ I carolok madok i kom lim, Yecu oloko  i kom lutic aryo ma gubedo lugen bot laditgi ki latic acel ma pe obedo lagen. (Mat. 25:​14-18) Lutic aryo gunyuto ni gin lugen ki tic matek me nyayo lim pa laditgi. Ma peya laditgi owoto i lobo mukene, en opokigi talanta—ma meno lim madit adada. Lutic aryo-ni onongo komgi mit dok gucako tiyo biacara me nyayo lim meno. Adwogine obedo nining? I kare ma laditgi odwogo, gin aryo-ni ducu onongo gunyayo lim ma kimiyogi ci gubamo tyen aryo. Laditgi opwoyogi matek—dok ‘gudonyo i yomcwiny pa laditgi.’ (Kwan Matayo 25:​19-23.) Ento latic me adekke-ni kono? Gin ango ma en otiyo ki lim ma laditte omiye?

11. Gin ango ma otimme i kom latic ma “lawackom” dok pingo?

¹¹ Latic me adekke kimiye talanta acel ento en obedo “lawackom.” Laditte onongo tye ki gen ni en binyayo talanta meno. Me ka meno, en oyiko woko i ngom. I kare ma laditte odwogo, latic-ci odwoke mere talanta acel meno labongo wiye mo. Latic-ci onongo pe tye ki cwiny maber. Me ka kwayo kica pien pe onyayo cente pa laditte, latic-ci okok i kom laditte ni obedo ‘dano ma lagingi.’ Latic man pe onongo pwoc mo ki bot laditte. Medo i kom meno, kikwanyo talanta man woko ki bote dok kiryeme woko ki i ot pa laditte.—Mat. 25:​24, 26-30.

12. Lutic aryo ma gubedo lugen-ni gicung pi angagi i kare-ni?

¹² Lutic aryo ma gubedo lugen-ni gicung pi Lukricitayo ma kiwirogi ma gitye lugen. Laditgi Yecu, lwongogi me ‘donyo i yomcwiny pa laditgi.’ Ginongo motgi me kwo i polo kun wok ki i cer mukwongo. (Mat. 25:​21, 23; Yabo 20:5b) Ki tungcel, lanen marac pa latic ma lawackom-mi tye me ciko jo ma kiwirogi. I yo ma nining?

13-14. Pwony ango ma jo ma kiwirogi ginongo ki i carolok madok i kom lim? (Nen bene cal.)

¹³ Nyut ni ibedo latic ma kome mit. I carolok madok i kom lim, ki bene i carolok madok i kom anyira apar-ni, Yecu onongo  pe tye ka tito ni jo ma kiwirogi gibidoko luwackom. Ento en onongo tye ka tito gin ma twero timme ka ce mit komgi okwe woko. Onongo pe ‘gibimoko matek i lwongogi, ki yer ma Lubanga oyerogi kwede’ dok pe kibiye ki gin me donyo i Ker me polo.—2 Pet. 1:10.

¹⁴ Carolok pa Yecu madok i kom anyira apar ki carolok i kom lim nyuto ni Lukricitayo ma kiwirogi myero gubed ma guyubbe dok ma wanggi twolo, kun bene nongo komgi mit i tiyo tic pa laditgi. Ento tika tye gin mukene ma Yecu owaco me ciko jo ma kiwirogi? Ada, tye! Lok pa Yecu ma nonge i Matayo 24:​40, 41 bene kwako jo ma kiwirogi ma kinongo ni gupore me nongo lanyut me agikki.

ANGA MA “GIBIKWANYO”?

15-16. Matayo 24:​40, 41 konyo jo ma kiwirogi nining me neno ni pire tek me bedo ma wanggi twolo?

¹⁵ Ma peya Yecu obolo carolok adek magi, en kong otito pi ngolo kop i kom jo ma kiwirogi me neno angagi ma gupore me nongo lanyut me agikki. En oloko i kom co aryo ma gitye ka tic i poto ki mon aryo ma gitye ka rego. Co aryo-ni onongo ginen calo gitye ka timo tic marom, ki mon aryo-ni bene kit meno, ento Yecu owaco ni “gibikwanyo ngat acel, gibiweko ngat acel dong.” (Kwan Matayo 24:​40, 41.) I nge meno, en ocuko cwiny lulub kore ni: “Pi meno, wubed ma wangwu twolo, pien pe wungeyo nino ma Rwotwu bibino iye.” (Mat. 24:42) Yecu owaco lok macal ki man i nge tito carolok i kom anyira apar. (Mat. 25:13) Tika kubbe mo tye i kin lok magi? Nen calo tye. Lukricitayo me ada ma kiwirogi kikome dok gitye lugen keken aye Yecu ‘bikwanyogi’ ci terogi i Ker me polo.—Jon 14:3.

¹⁶ Bed ma wangi twolo. Ngat mo keken ma kiwiro ma pe medde ki bedo ma wange twolo pe kibicoke kacel ki “jone ma en [Yecu] oyero.” (Mat. 24:31) Dok jo ducu ma gitye ki gen me kwo i lobo myero bene gunen lok pa Yecu man calo lok me ciko dano me medde ki bedo lugen dok ma wanggi twolo.

17. Ka Jehovah oyero me wiro jo ma lugen mogo i kare-ni, pingo pe omyero wabed ki akalakala mo?

¹⁷ Wan dong wangeyo Jehovah maber, pi meno, wageno ni jami ducu ma en tiyo tye atir. Dong, ka Jehovah oyero me wiro jo ma lugen mogo i kare-ni, pe dok wabedo ki akalakala mo i kom tam ma en omoko. c Wiwa myero opo i kom carolok ma Yecu obolo i kom lutic ma kilwongogi cawa apar wiye acel me tic i poto olok. (Mat. 20:​1-16) Jo ma kilwongogi me tic i poto olok i wi otyeno gunongo mucara marom aroma ki jo ma gucako tic odiko. Kit meno bene, labongo paro pi kare ma kiwiro iye ngat moni, en binongo motte me kwo i polo ka omedde ki bedo lagen.

KET I TIC PWONY MA NONGE I CAROLOK MAGI

18-19. Pwony ango ma wanongo ki i carolok ma wanyamogi?

¹⁸ Gin ango ma dong wanyamo? Pi jo ma gitye ki gen me kwo i lobo, carolok madok i kom romi ki dyegi nyuto kit ma pire tek kwede botgi me bedo lugen bot Jehovah—i kare-ni ki i kare me twon can madit atika-ni. Ma peya lweny me Armagedon ocakke, Yecu bingolo kop i kom jo  ma lugen magi ni gupore me nongo “kwo ma pe tum.”—Mat. 25:46.

¹⁹ Wanyamo bene carolok aryo ma tye ki lok me ciko jo ma kiwirogi. I carolok pa Yecu madok i kom anyira apar-ri, jo abic i kingi gunyuto ni gibedo luryeko. Onongo gitye ma guyubbe dok ma wanggi twolo, kun gitye atera me kuro lanyom nio wang ma en obino. Ento anyira ma luming-ngi onongo pe guyubbe. Pi meno, lanyom pe oye ni gudony i karama me nyomme. Wan bene omyero wabed ma wayubbe me kuro Yecu nio wang ma en okelo agikki me lobo man marac-ci. Dok i carolok pa Yecu madok i kom lim, wanyamo lok i kom lutic aryo ma lugen ma onongo komgi mit. Gutiyo matek pi laditgi ci gunongo pwoc ki bote. Ento, latic ma lawackom-mi kiryeme woko ki i ot pa laditte. Pwony ango ma wanongo? Omyero wabed ma komwa mit i timo tic pa Jehovah nio wa i agikki. Me agikkine, waneno kit ma jo ma kiwirogi myero gumedde ki bedo ma wanggi twolo wek Yecu ‘okwanygi’ ci otergi i polo. Gitye ka kuro ki miti madit kare ma Yecu ‘bicokogi me rwatte kwede’ i polo. I nge lweny me Armagedon, gibibedo nyako ger pa Yecu i nyom pa Latin romo.—2 Tec. 2:1; Yabo 19:​7, 9.

20. Gin ango ma Jehovah bitimo pi jo ma giketo tirane i tic?

²⁰ Kadi bed kare ma Yecu bingolo kop iye dong onyiko cok, pe omyero wabed ki lworo mo. Ka wamedde ki bedo lugen, ci Wonwa me polo bimiyo botwa “tek madwong me twero” wek ‘wabed ki teko me cung i nyim Wod pa dano.’ (2 Kor. 4:7; Luka 21:36) Kadi bed genwa tye me kwo i polo nyo me kwo i lobo, wabiyomo cwiny Wonwa ka waketo i tic pwony ma wanongo i carolok pa Yecu. Dok pien Jehovah lakica adada, ‘wabinongo kicoyo nyingwa i buk’ me kwo.—Dan. 12:1; Yabo 3:5.