1-2. Gin ango ma oweko lutic pa Lubanga cwinygi yom? (Yakobo 1:​22-25)

 JEHOVAH kacel ki Wode me amara gimito ni wabed ki yomcwiny. Laco Jabuli 119:2 owaco ni: “Gitye ki gum [yomcwiny] jo ma gwoko lok me cadenne, ma giyenyo en ki cwinygi ducu.” Yecu bene owaco ni: ‘Gitye ki yomcwiny jo ma giwinyo lok pa Lubanga, dok gigwoko!’—Luka 11:28.

² Lutic pa Jehovah gubedo jo ma cwinygi yom adada. Pingo? Watye ki tyen lok mapol, ento acel ma pire tek aye ni, wakwano Lok pa Lubanga nino ducu dok watute matek me keto i tic gin ma wapwonyo.—Kwan Yakobo 1:​22-25.

3. Adwogi maber ango ma wanongo ka waketo i tic pwony ma wanongo ki i Lok pa Lubanga?

³ Tye adwogi mabeco mapol ma wanongo ka wabedo ‘jo ma keto gin ma gupwonyo i tic.’ Me labolle, wayomo cwiny Jehovah dok meno miyo cwinywa bene bedo yom. (Latit. 12:13) Ka wawoto ki keto i tic gin ma wapwonyo ki i Lok pa Lubanga, wadongo wat ma tye i kinwa ki jo me pacowa kacel ki utmegiwa ma i kacokke. Meno romo bedo ni otimme i kwoni. Medo i kom meno, wagwokke ki i pekki ma jo ma pe gilubo cik pa Jehovah ginongo. Ki lok ada, waye lok pa Kabaka Daudi. I nge lok i kom cik, pwony, ki ngolo kop pa Jehovah, en omoko ni: “Ngat ma ogwoko cikki limo mot madit.”—Jab. 19:​7-11.

4. Pingo tek adada me bedo jo ma giketo gin ma gupwonyo i tic?

⁴ Me doko jo ma giketo i tic gin ma gupwonyo, mitte ni wakwan Baibul i yo matut wek waniang gin ma Jehovah mito ni watim. Ento timo meno pe yot, pien watye ki tic mapol adada. Dong, mitte ni waket cawa me timo meno.  Kong dong wanenu tam mogo ma twero konyowa me kwano Baibul nino ducu labongo keng. Wabinyamo bene gin ma bikonyowa me lwodo gin ma wakwano ki me neno kit ma watwero ketone i tic i kwowa.

KET CAWA ME KWANO LOK PA LUBANGA

5. Tic ma pigi tego ango ma gitero cawawa?

⁵ Pol pa lutic pa Jehovah gitye ki tic mapol adada. Watero kare malac ka cobo tic ma Baibul nyuto ni pigi tek. Me labolle, pol pa wan watye ki tic ma watiyo me nongo cente me gwoko jo me odiwa. (1 Tem. 5:8) Lukricitayo mogo gigwoko wadigi ma komgi lit nyo ma guti woko. Mitte bene ni wan ducu wagwok yotkomwa, dok meno tero cawa. Medo i kom jami magi, watye ki tic mapol i kacokke. Tic acel ma pire tek aye me tito kwena me Ker-ri. Kit macalo watye ki tic magi ducu, watwero nongo cawa nining me kwano Baibul nino ducu ki lwodone kacel ki ketone i tic?

6. Ngo ma itwero timo wek inen ni ikwano Baibul nino ducu? (Nen bene cal.)

⁶ Kwano Baibul tye i kin “jami ma pigi tego” loyo piwa macalo Lukricitayo, dong omyero wanen ni watimo meno. (Pil. 1:​10, NWT) Jabuli mukwongo loko kit man i kom dano ma cwinye yom: “En maro kwano cik pa Rwot [Jehovah], en bedo ka lwodo lok i kom cikke dyeceng ki dyewor.” (Jab. 1:​1, 2) Dong, nen ka maleng ni omyero waket cawa me kwano Baibul kit ma laco jabuli otito kwede. Cawa mene ma opore piri me kwano Baibul? Ngat acel acel twero yero cawa maber pire. Ento pire tek ni wayer cawa ma nongo watwero lubone nino ducu. Omego mo ma nyinge Victor owaco ni: “Amaro kwano Baibulla i odiko ducu. Kadi bed anongo ni tek me co con, ento meno aye cawa ma jami ma wiro tamma pe pol. Nongo wiya tye ma opye mot dok bedo yot bota me keto tamma i kom gin ma atye ka kwano.” Twero bedo ni in bene imaro kwan odiko. Ka pe, ci pennye kekeni ni,  ‘Cawa mene maber loyo pira me kwano Baibul?’

LWOD GIN MA IKWANO

7-8. Gin ango ma twero gengowa ki nongo adwogi maber ki i kwano Baibul? Mi labol.

⁷ I nge keto cawa me kwano Baibul, tye gin mukene ma pire tek ma mitte ni itim. Tika dong ikwano gin mo ci ma pe otero kare, inongo ni wi owil woko dok pe itwero po iye? Wan ducu gin ma kit man otimme i komwa. Gin ma kit man bene twero timme i komwa ka watye ka kwano Baibul. Me labolle, watwero moko tamwa me kwano cura mapol me Baibul nino ducu. Meno maber adada. Wan ducu omyero waket yub dok watute matek me lubone. (1 Kor. 9:26) Ento, omyero watim makato mere kwano Baibul keken ka wamito nongo adwogi maber ki iye.

⁸ Tam kong i kom lapor man: Ginapita ducu gimito pii kot wek gubed kwo. Ento ka kot ocwe madwong tutwal, ngom pong ki lalele ci mol woko. Pi meno, ginapita pe nongo adwogi maber ki iye. Bedo ber ka kot cwer mot, pien man weko pii modo i ngom dok konyo ginapita me dongo. I yo acel-lu, omyero pe wakwan Baibul i wi aruya ma weko pe wabedo ki kare me lwodone, po iye, kacel ki keto i tic gin ma wakwano-ni.—Yak. 1:24.

9. Gin ango ma omyero watim ka waniang ni wakwano Baibul i wi aruya?

⁹ Tika i kare mogo inongo ni ikwano Baibul aruya mere me tyekone? Ka tye kit meno, gin ango ma omyero itim? Kwan mot wek omini kare me lwodo gin ma itye ka kwano nyo kwany kare i nge kwanni me lwodo gin ma ikwano. Timo man pe myero obed gin matek tutwal. Itwero bene medo cawa me kwanni wek omi kare me lwodo lok ka iwoto ki kwan. Ki tungcel, itwero yero me kwano tyeng mogo manok ci itiyo ki kare mudong me lwodo gin ma ikwano. Omego Victor ma kiloko i kome con-ni, owaco ni, “Ka atye ka kwano Baibul, pe akwano jami madwong  tutwal, i kare mogo akwano cura acel keken. Pien akwano odiko con, man weko abedo ki kare me lwodo jami ma akwano i nino meno ducu.” Ngat acel acel twero yero kit ma en mito ni kwanne myero obed kwede, ento gin ma pire tek aye me kwan mot wek omini kare muromo me lwodo gin ma itye ka kwanone-ni.—Jab. 119:97; nen bok ma wiye tye ni “ Lapeny me Alwoda.”

10. Mi kong labol ma nyuto kit ma itwero keto kwede i tic gin ma ikwano. (1 Jo Tecalonika 5:​17, 18)

¹⁰ Labongo paro pi cawa ma ikwano iye Baibul, omyero itam matut i kom kit ma itwero keto kwede pwony ma inongo i tic. Ka itye ka kwano Baibul, pennye kekeni ni, ‘Atwero keto i tic ngec man nining i nino ma tin nyo i kare me anyim?’ Me labolle, go kong ni ikwano 1 Jo Tecalonika 5:​17, 18. (Kwan.) I nge kwano tyeng aryo magi, itwero cung kong manok ci ilwodo tyen adi ma ilego nino ducu kacel ki ka legani a ki i cwinyi. Itwero bene tam i kom jami mogo ma itye ki pwoc pigi. Iromo moko tammi me pwoyo Jehovah pi jami adek nino ki nino. Kadi bed itiyo ki dakika manok keken me lwodo pwony ma inongo ki i Baibul, man bikonyi me keto i tic gin ma ipwonyo. Dok ka nino ducu iketo i tic gin ma ipwonyo ki i kwanni me Baibul, ci motmot ibicako nongo adwogi maber ki i kwanni. Ento gin ango ma omyero itim ka ce itye ki jami mapol ma mitte ni itim alokaloka iye?

KET YUB MA ITWERO COBONE

11. Pingo i kare mogo iromo bedo ki par ka itye ka kwano Baibul? Mi labol.

¹¹ I kare mogo, cwinyi twero tur ka itye ka kwano Baibul, pien nongo iniang ni tye jami mapol ma mitte ni itim alokaloka iye. Me labolle, go kong ni i nino mo ibedo ka kwano tira ma loko i kom cwiny me apokapoka. (Yak. 2:​1-8) Ci inongo ni omyero itim alokaloka i kom kit ma itero kwede ki jo mukene, pi meno imoko tammi me jwayo cwiny me apokapoka woko. Meno obedo yub maber adada! Dok orwone ikwano tyeng mogo ma nyuto kit ma pire tek kwede me gwokke ki kit ma iloko kwede. (Yak. 3:​1-12) Ci iniang ni i kare mogo iloko lok ma pe nyuto kica nyo lok ma turo cwiny dano. Pi meno, imoko tammi ni ibiloko lok mabeco dok ma dongo dano. Ci i nino me adek-ke, i kwanni me Baibul, inongo tira ni omyero pe wamak lirem ki lobo. (Yak. 4:​4-12) Dok man oweko iniang ni omyero itim alokaloka i kom jami ma ikwano, ineno, dok iwinyo me yweyo wii. Dong i nino me angwenne, itwero winyo ni jami ma omyero itim  alokaloka iye odoko dwong adada dok man twero turo cwinyi.

12. Pingo myero cwinyi pe otur ka iniang ni kwanni me Baibul onyuto ni omyero itim alokaloka mapol? (Nen bene lok ma tye i tere piny.)

¹² Ka mitte ni itim alokaloka mapol i kwoni, pe iwek cwinyi otur. Kit ma dong iniang woko ni omyero itim alokaloka, meno nyuto ni ibedo ngat ma mwol. Ka wabedo jo mamwol, ci wabikwano Ginacoya kun wayenyo yo ma watwero ketone kwede i tic i kwowa. a Wi opo ni kare ducu omyero watute me ruko ‘kit pa dano manyen.’ (Kol. 3:10; por ki jami me akwana me nwtsty-E ma wiye tye ni “tye ka rocone i ngec manyen.”) Gin ango ma bikonyi me bedo ngat ma keto gin ma en opwonyo i tic?

13. Yo maber ango ma itwero tic kwede me keto i tic gin ma ipwonyo? (Nen bene cal.)

¹³ Me ka tute me keto i tic jami ma ikwano weng lawang acel, iromo cako ki timo alokaloka acel nyo aryo. (Car. 11:2) Itwero tic ki diro man: Co piny jami ducu ma imito timo alokaloka iye, ci iyer acel nyo aryo ma imito cako timo alokaloka iye, kun iweko mukene-ni gidong pi kare mukene. Alokaloka mene ma omyero icak kwede?

14. Yub mene ma itwero cako ki cobone?

¹⁴ Itwero cako ki alokaloka ma timone yot dok ma itwero cobone. Nyo itwero yero me cako ki alokaloka ma inongo ni mitte oyotoyot ni itim. Ka imoko alokaloka mene ma omyero itim, ci tim kwed i bukkewa. Itwero tic ki Watchtower Online Library nyo Buk ma Konyo Lucaden pa Jehovah me Kwedo Lok. Leg Jehovah  dok ipenye wek omini “miti ki teko me tic.” (Pil. 2:13) I nge meno, tute matek me keto i tic gin ma ipwonyo. Ka ityeko cobo yubbi mukwongo, man biweko ibedo ki miti me tic i kom yubbi mukene ma odong-ngi. Ki lok ada, ka itute me dongo kit pa Lukricitayo, ci bicuko cwinyi me medde ki timo alokaloka. Dok man biweko inongo ni yot me timo alokaloka mukene.

WUWEK LOK PA LUBANGA OBED “KA TIC I IWU”

15. Jo pa Jehovah gipat ki dano mukene-ni nining ka odok i kom kwano Baibul? (1 Jo Tecalonika 2:13)

¹⁵ Jo mogo giwaco ni dong gukwano Baibul tyen mapol adada. Ento tika giye gin ma Baibul waco? Tika gitute me keto i tic gin ma Baibul pwonyo nyo me timo alokaloka i kwogi? Pe. Pol pa dano pe gilubo tira me Baibul. Ento jo pa Jehovah dok gineno Baibul i yo mapat! Calo Lukricitayo me cencwari me acel, waneno Baibul “macalo lok pa Lubanga.” Medo i kom meno, watimo jami ducu ma watwero me keto tira me Baibul i tic i kwowa.—Kwan 1 Jo Tecalonika 2:13.

16. Gin ango ma bikonyowa me bedo jo ma giketo i tic gin ma gupwonyo?

¹⁶ Pol kare pe yot me kwano kacel ki keto i tic tira ma wanongo ki i Lok pa Lubanga. Twero bedo tek me nongo cawa me kwanone. Nyo watwero kwanone i wi aruya tutwal labongo lwodo gin ma wakwano. Nyo cwinywa twero tur pi alokaloka mapol ma mitte ni watim. Kadi bed itye ka kato ki i ariya mene i kin magi, pud itwero loyone. Ki kony pa Jehovah, itwero loyo ariya meno. Walego ni wan ducu wamoku tamwa me jolo kony pa Jehovah wek wabedu jo ma winyo dok giketo i tic gin ma gupwonyo ki i Baibul. Labongo akalakala mo, ka wawoto ki kwano Lok pa Lubanga dok waketo i tic i kwowa, ci cwinywa bibedo yom adada.—Yak. 1:25.