Pe omyero watam ni Yecu onongo okwerogi woko nyo ni gin aye gukwero Yecu i kare ma Yecu ocako kwer me Cam me Otyeno pa Rwotwa. Lok ada tye ni, Yecu onongo mito bedo ki lukwenane keken i yub meno.

Lukwena 12 kacel ki lupwonnye 70 onongo gin ducu gubedo lulub kor Yecu. Yecu oyero co 12 ki i kin lupwonnyene mapol ci olwongogi ni lukwena. (Luka 6:​12-16) Yecu onongo tye i Galilaya i kare ma en “olwongo jone apar wiye aryo” dok “oorogi ka tito lok i kom ker pa Lubanga ki ka cango lutwo.” (Luka 9:​1-6) Lacen i kare ma en odwogo i Judaya, Yecu “oyero jo mukene pyerabiro, oorogi ki aryo aryo.” (Luka 9:51; 10:1) Man nyuto ka maleng ni Yecu onongo tye ki lupwonnyene mapol i kabedo mapatpat ma gitito lok i kome.

Lujudaya ma gudoko lulub kor Yecu onongo pud gibimedde ki kwero kwer me Kato mwaka ki mwaka kacel ki jo me pacogi. (Nia 12:​6-11, 17-20) Ma Yecu dong cok to, en kacel ki lukwenane gucito i Jerucalem. Ento en pe olwongo lupwonnyene ducu ma gibedo i Judaya, Galilaya, ki Perea me bino ka nywako i kwer me Kato kacel kwede. Man nen ka maleng ni Yecu onongo mito ni lukwenane keken aye gubed kwede i kwer man. En owaccigi ni: “Abedo ka paro mada me camo cam me Kato man kwedwu, ma kun pud peya aneno can.”—Luka 22:15.

En onongo tye ki tyen lok ma atir me timo meno. Yecu onongo cok to macalo “Latin romo pa Lubanga ma kwanyo bal me lobo!” (Jon 1:29) Man onongo myero otimme i Jerucalem, ka ma onongo con kityero iye gityer bot Lubanga. Latin romo ma kityero i kwer me Kato onongo poyo wi Luicrael ni Jehovah aye ma olarogi ki i Ejipt. Ento gityer pa Yecu onongo bitimo jami mapol makato. Tone onongo bigonyo dano ki i opii me bal ki to. (1 Kor. 5:​7, 8) Gityer pa Yecu onongo biweko twere pi lukwena 12 magi me doko guti me kacokke pa Lukricitayo. (Ep. 2:​20-22) Ki lok ada, Jerucalem gang maleng bene “tye ki te gutine apar wiye aryo” ma kicoyo i iye “nying lukwena apar wiye aryo pa Latin romo.” (Yabo 21:​10-14) Pi meno, lukwena ma lugen onongo gibibedo ki tic ma pire tek adada me cobo yub pa Lubanga. Dong waromo niang pingo Yecu onongo mito bedo kacel kwedgi i kwer me Kato kacel ki kwer mukene ma en ocako i nino meno—ma en aye Cam me Otyeno pa Rwotwa.

Lupwonnye 70 kacel ki lupwonnyene mukene onongo pe gitye kacel ki Yecu i kwer meno. Kadi bed kit meno, lulub kore ducu ma gugwoko gennegi gunongo adwogi maber ki i kwer me Cam me Otyeno pa Rwotwa ma Yecu ocako. Lulub kore magi ducu ma lacen kiwirogi onongo gibidonyo i gicikke me ker, ma Yecu otito pire bot lukwenane i dyewor meno.—Luka 22:​29, 30.