1, 2. Pingo Lubanga okwero Caulo? (Nen cal ma i pot karatac man.)

I KARE ma Jehovah oyero Caulo me bedo kabaka, en onongo mwol adada. (1 Camuel 9:1, 2, 21; 10:20-24) Ento i kare ma Caulo odoko kabaka, en ocako dongo cwiny me awaka ci ongwette me timo gin ma myero pe otim. I nino mo acel, jo Piliciti alip mapol gubino ka lweny i kom jo Icrael. Lanebi Camuel onongo owaco ki Caulo ni ebibino ka tyero gitum bot Jehovah. Ento, ma pud peya Camuel oo, Luicrael gucako bedo ki lworo ci polgi gua guweko Caulo woko. En onongo dong pe twero medde ki diyo cwinye, ci man oweko en otyero gitum en kikome ma ka kuro Camuel. Caulo onongo pe ki twero me timo meno, dok man pe oyomo cwiny Jehovah.—1 Camuel 13:5-9.

² I cawa ma Camuel oo, en omiyo tira magwar bot Caulo pien pe obedo lawiny bot Jehovah. Ento Caulo onongo neno calo pe tye gin mo marac ma etimo. En otemme me gengo ngeye, dok bene okok i kom jo mukene pi balle. (1 Camuel 13:10-14) Cakke i kare meno, Caulo obedo ka ngwette me timo jami mapol. Pi meno, Jehovah okwere  woko me medde ki bedo kabaka. (1 Camuel 15:22, 23) Kwo pa Caulo ocakke maber, ento ogik marac adada.—1 Camuel 31:1-6.

3. (a) Jo mukene gineno cwiny me mwolo nining? (b) Lapeny mene ma wabigamogi?

³ I kare-ni, dano mapol gitamo ni pe gitwero bedo ki cwiny me mwolo kun bene kitungcel nongo gitye ki kwo mayot nyo ki dog tic maber. Giwakke wek ginen calo giber giloyo jo mukene. Me labolle, latuku filim mo ma bene tye lawibye owaco ni: “Mwolo pe tiyo bota wa ki acel—dok ageno ni pe bitic bota pi naka.” Ento pingo pire tek ni Lakricitayo obed ngat ma mwol? Mwolo kono obedo ngo, dok pe obedo gin ango? Lapeny magi wabinyamo i pwony man. Dok i pwony ma lubu man, wabineno kit ma watwero bedo ki cwiny me mwolo kadi bed ni pe yot.

4. Cwiny me ngwette obedo gin ngo?

⁴ Baibul nyuto ni ngwette obedo olungtuke pa mwolo. (Kwan Carolok 11:2.) Daudi okwayo Jehovah ni: “Juka bene pe apot i bal mo ma obino pi cwiny me wakke [ngwette].” (Jabuli 19:13) Cwiny me ngwette kono obedo ngo? Obedo timo gin ma wape ki twero me timone, gwok pien pe watwero diyo cwinywa nyo pi cwiny me awaka. Pi goro ma watye kwede, wan ducu olo to i kare mo wangwette ka timo gin mo ma onongo myero pe watim. Ento kit ma wapwonyo kwede ki i labol pa Kabaka Caulo, ka waloko odoko kitwa me ngwette, ci cwiny Jehovah pe bibedo yom i komwa matwal. Jabuli 119:21 waco ni Jehovah ‘bijuko jo ma lunywar [nyo ma gingwette].’ Pingo en timo meno?

5. Pingo ngwette ka timo gin ma ipe ki twero me timone obedo bal marac adada?

⁵ Me acel, ka wangwette ka timo gin mo ki wiwa, nongo watye ka nyuto dit wic i kom Jehovah, Lubangawa ki Lalocwa. Me aryo, ka watimo gin ma wape ki twero me timone, ci man twero kelo daa nyo lanywen i kinwa ki jo mukene. (Carolok 13:10) Ki me adek, watwero nen calo jo ma luming adada ka jo mukene guniang ni wangwette ka timo gin mo ki wiwa. (Luka 14:8, 9) Dong nen ka maleng tyen lok mumiyo Jehovah mito ni wabed ki cwiny me mwolo.

6, 7. Ngat ma mwol nyuto cwiny me woro nining?

⁶ Ngat ma mwol nongo bene wor. Lakricitayo ma wor pe wakke dok pe kete malo i wi jo mukene. (Jo Pilipi 2:3) Ngat ma mwol pol kare nongo wor. Nongo ngeyo ni etye ki ka ma kerone gik iye, dok bene ye gorone. En tye atera me winyo tam pa jo mukene dok bene nongo pwony ki botgi. Ngat ma mwol yomo cwiny Jehovah adada.

⁷ Baibul nyuto ni ngat mamwol ngeyo anga ma ebedo dok niang ni tye jami  mogo ma pe etwero timone nyo ma epe ki twero me timone. Man konye me woro jo mukene ki dok me terogi i yo me kica.

8. Kit tam ango ma myero wagwokke kwede wek wamedde ki bedo jo ma mwol?

⁸ Ento, watwero cako dongo cwiny me ngwette labongo ngeyone. Man twero cakke nining? Watwero cako winyo calo piwa tek loyo jo mukene pien nongo watye ki tic mogo i kacokke. (Jo Roma 12:16) Nyo watwero cako dwoyo tam pa dano i komwa. (1 Temceo 2:9, 10) Watwero bene cako waco ki dano gin ma myero gutim ki ma pe myero gutim.—1 Jo Korint 4:6.

9. Pingo jo mukene gucako ngwette ka timo gin ma myero pe gutim? Mi labol

⁹ Watwero cako ngwette ka pe wajuko miti maraco ma watye kwede. Jo mapol gucako ngwette ka timo gin ma pe myero gutim pien onongo gimito nongo deyo pigi kengi, gudoko lunyeko i kom jo mukene, nyo pe gujuko kinigagi. Man otimme i kom jo mogo ma kicoyo lok komgi i Baibul, me labolle Abcalom, Ujia, ki Nebukadnejar. Jehovah otittigi ka maleng ni myero gubed jo ma mwol.—2 Camuel 15:1-6; 18:9-17; 2 Tekwaro 26:16-21; Daniel 5:18-21.

10. Pingo pe myero wangol kop i kom jo mukene? Mi labol ma tye i Baibul.

¹⁰ Tye tyen lok mukene ma weko dano i kare mogo pe gibedo ki cwiny me mwolo. Tam kong i kom labol pa Abimelek ki Petero. (Acakki 20:2-7; Matayo 26:31-35) Co magi tika gungwette ka timo gin ma myero pe gutim? Gwok pe guniang jami ducu maber nyo gutimo labongo tam iye? Kit macalo pe watwero neno cwiny dano, omyero pe wangol kop i komgi.—Kwan Yakobo 4:12.

11. Gin ango ma myero waniang iye?

¹¹ Ngat ma mwol niang ticce i yub pa Lubanga. Jehovah obedo Lubanga ma timone jami ducu kore ki kore. En omiyo bot ngat acel acel tic ma myero otim i kacokke. Wan ducu piwa tek. Jehovah omiyo bot wan ducu ki acel acel mot, ngec, diro, ki dok kero mapatpat, dok en oye ki wan me yero kit ma wabitic kwedgi. Ka wamwol, ci wabitic ki motwa i yo ma Jehovah mito. (Jo Roma 12:4-8) Wangeyo ni Jehovah mito ni wati ki motwa me miyo deyo bote ki me konyo jo mukene.—Kwan 1 Petero 4:10.

12, 13. Gin ango ma myero wiwa opo iye ka alokaloka mo otimme i ticwa pi Jehovah?

¹² Tic ma watye kwede i dul pa Jehovah twero lokke i nge kare mogo. Me labolle, tam kong i kom alokaloka mapol ma otimme i kom Yecu. Me acel, en onongo tye gin ki wonne keken. (Carolok 8:22) I ngeye, en okonyo Jehovah me cweyo lumalaika, lobo ki dong dano. (Jo Kolocai 1:16) Lacen, kicwale i lobo. Kinywale ci odongo odoko dano madit. (Jo Pilipi 2:7) I nge tone, Yecu odok cen i polo, dok i 1914 en odoko Kabaka me Ker pa Lubanga. (Jo Ibru 2:9) I anyim, ka en otyeko locce macalo Kabaka pi mwaki alip acel, Yecu bidwoko Ker meno i cing Jehovah “wek Lubanga dong ocok jami ducu i te locce.”—1 Jo Korint 15:28.

¹³ Wan bene alokaloka mapol twero  timme i kwowa. I kare mogo tic ma watye kwede twero lokke pi tam ma nongo wan aye wamoko. Me labolle, twero bedo ni wiwa onongo pud nono ento lacen waromo moko tam me nyomme. Nyo bene me nywalo lutino. Lacen watwero dok moko tamwa me loko kit me kwowa wek wati pi Jehovah pi kare malac. I kare mukene, ticwa twero lokke pi kwo ma watye ka wok ki iye. Watwero bedo ki kero me timo tic mapol nyo manok. Ento kadi bed watino nyo dong wateggi, komwa yot nyo pe, Jehovah ngeyo gin ma ngat acel acel twero timone pire. En pe mito ni watim gin ma kato kerowa woko. Dok cwinye bedo yom pi jami ma watimo pire ki cwinywa ducu.—Jo Ibru 6:10.

14. Mwolo twero konyowa nining me bedo ki yengo kacel ki yomcwiny?

¹⁴ Yecu cwinye obedo yom pi tic mo keken ma Jehovah omiye, wan bene watwero bedo ki yomcwiny i ticwa. (Carolok 8:30, 31) Ngat ma mwol yeng ki tic ma en tye kwede i kacokke. En pe keto cwinye i kom tic ma jo mukene gitye ka timone. Ento yeng ki tic ma en tye kwede i dul pa Lubanga. En neno ni Jehovah aye ma omiye tic meno. Dano ma mwol woro jo mukene dok cwinye bedo yom me konyogi. En niang ni Jehovah bene omiyo botgi tic me atima.—Jo Roma 12:10.

15. Pwony ango ma wanongo ki i labol pa Gideon?

¹⁵ Gideon obedo ngat ma mwol adada. I kare ma Jehovah omiye tic me  laro Luicrael ki i cing jo Midian, Gideon owaco ni “Nen, kakawa tye matidi mo i kin jo Manace, dok an aye latin matidine ki i doggolawa.” (Lungolkop 6:15) Ento Gideon ogeno Jehovah dok oye tic ma kimine. Gideon bene oketo cwinye me niang gin ma Jehovah mito ni etim dok olego pi telane. (Lungolkop 6:36-40) Gideon onongo oteka lweny ma cwinye nwang, ento en bene onongo ryek dok tamo matut i kom gin moni. (Lungolkop 6:11, 27) Lacen, i kare ma dano onongo gimito ni en obed lalocgi, en okwero woko. I nge timo jami ducu kit ma Jehovah ocike kwede, en odok cen gang.—Lungolkop 8:22, 23, 29.

16, 17. Ngat ma mwol twero dongo i yo me cwiny nining?

¹⁶ Ka ngat mo oye tic manyen nyo mito tic madwong i kacokke, ci man pe nyuto ni nongo en pe dano ma mwol. Baibul waco ni obedo gin maber ka latic pa Jehovah mito tic pi omegine dok mito dongo i yo me cwiny. (1 Temceo 4:13-15) Ento tika mitte ni wabed ki mot me tic manyen ka wek dong wadong i yo me cwiny? Pe. Wan ducu watwero dongo kit mabeco kacel ki diro ma Jehovah ominiwa wek wati pire ki pi jo mukene.

¹⁷ Ngat ma mwol kong niang gin ango ma mitte ki bote ma pud pe oye tic moni. En keto lok meno i lega dok tamo matut ka etwero timo tic meno. Tika en pud bibedo ki cawa kacel ki kero me timo jami mogo ma pigi tego? Ka pe, ci tika jo mukene gitwero timo tic ma en tye ka timone i kare-ni? I nge tam matut i kom lok man, ngat ma mwol twero moko tamme ni en pe etwero timo tic meno manyen-ni i yo maber. Ka wamwol, ci pe wabiye tic meno.

18. (a) Ngat ma mwol bitimo gin ango ka kimine tic manyen? (b) Jo Roma 12:3 twero konyowa me bedo jo ma mwol nining?

¹⁸ Jehovah mito ni ‘wawot kacel kwede ki mwolo.’ (Mika 6:8) Pi meno, ka kiminiwa tic manyen, omyero wapeny pi tela kacel ki kony ki bote kit ma Gideon otimo-ni. Omyero watam matut i kom ngo ma Jehovah wacciwa kun tiyo ki Baibul kacel ki dulle. Myero wiwa opo ni gin mo keken ma watimo i tic pi Jehovah pe obedo pi kero ma watye kwede ento pien Jehovah mwol dok tye atera me konyowa. (Jabuli 18:35) Ngat ma mwol “myero pe opar pi ditte mukato kare.”—Kwan Jo Roma 12:3.

19. Pingo myero wabed jo ma mwol?

¹⁹ Ngat ma mwol ngeyo ni Jehovah kene aye ma opore me nongo deyo, pien en aye Lacwec dok Ngat Mamalo ma loyo polo ki lobo ducu. (Niyabo 4:11) Ka wamwol, wabibedo ki yomcwiny pi tic mo keken ma watwero timone pi Jehovah. Wabiworo tam pa omege ki lumegiwa kacel ki kit ma giwinyo kwede, macalo adwogine wabinote i kinwa. Ngat ma mwol tamo matut ma pud pe otimo gin moni, dong man bikonye me gwokke ki i timo gin marac. Jehovah cwinye bedo yom adada i kom jo gimwol. Pi meno, cwiny me mwolo pire tek adada bot jo pa Lubanga. I pwony ma lubo man, wabineno kit ma watwero bedo kwede jo ma mwol kadi bed ni pe yot.