I ACAKKI cura 22, Baibul tito ni Lubanga owaco bot Abraim ni ocit i kabedo mo mabor ki pacone ka tyero gitum. Baibul waco ni: “Abraim otingo yen me lawang gitum, ocibo i wi wode Icaka; en omako mac ki pala i cinge, ka gucako wot kacel.”—Acakki 22:6.

Baibul pe otito kit ma dano me kare macon onongo gimoko kwede mac. Mono Abraim gin ki Icaka kong gucwinyo mac ka dong gucito kwede ma tye ka lyel? Lakwed lok mo acel me Baibul owacci ka onongo obed mac ma tye ka lyel onongo pe twero “medde ki lyel i wot me twon bor piny-nyi.” Ma ka meno, oromo bedo ni Abraim gin ki wode guwoto ki jami ducu ma mitte me moko mac.

Ento jo mukene giwaco ni moko mac onongo pe yot i kare meno. Pi meno, ka twere, dano onongo gimoko mac kun gitiyo ki lodi mac ma dong kimoko con, gwok nyo ma kigamo ki bot jirani. Lukwed lok mapol giwaco ni Abraim ocito ki lodi mac ma onongo dong omoko ki gang. Oromo bedo ni gwok oketo i agulu mo ma ongabo ki nyor, ci otingo agulu ocito kwede. (Icaya 30:14) Ci onongo en twero tic ki lodi mac meno kacel ki yen mutwo ka mito moko mac.