1-2. (a) Pingo wape ki akalakala ni Yecu onyutiwa yo mayot me kwero tone? (b) Kit pa Yecu mene ma wabinyamogi i pwony man?

TIKA itwero tito gin ma timme i nino me Nipo me to pa Kricito ma bedo mwaka ki mwaka? Labongo akalakala, pol pa wan wiwa po i kom jami mogo ma pigi tego ma timme i nino me Nipo. Pingo? Pien cam meno pe obedo gin mo ma yubone tek tutwal. Kadi bed kumeno, obedo yub ma pire tek adada. Pi meno, watwero penye ni, ‘Pingo cam meno yubone yot adada?’

² I kare ma Yecu tye i ticce me pwony i lobo, onongo kingeye pi pwonyo lok ada ma pigi tego i yo macek, dok ma niang iye yot. (Mat. 7:28, 29) I yo acel-li, en onyutiwa yo mayot ento ma pire tek adada me kwero Nipo * me tone. Kong dong wanen lok i kom cam me Nipo ki jami mukene ma Yecu oloko ki dok otimo. Wabidongo pwocwa i kom mwolo, tekcwiny, ki dong mar pa Yecu, dok wabipwonyo kit ma waromo lubo kwede lanenne macok.

3. Kit ma kicoyo kwede i Matayo 26:26-28, yub me Nipo ma Yecu ocako-ni obedo yot lakwene, dok jami aryo ma en otiyo kwedgi-ni onongo gicung pi gin ango?

³ Yecu ocako kwer me Nipo pi tone i kare ma onongo tye kacel ki lukwenane 11 ma lugen. En otiyo ki gin ma onongo odong ki i nge cam me Kato me cako kwer man  mayot-ti. (Kwan Matayo 26:26-28.) En otiyo ki mugati ma tobi pe iye, ki dong kongo vino ma onongo dong tye kenyo. Yecu owaco ki lukwenane ni jami aryo meno cung pi kome ma roc pe iye, kacel ki remone ma onongo en bimiyone pigi. Nen calo lukwena pe gubedo ki ur i kom kit ma yub meno ma pire tek-ki obedo yot kwede. Pingo?

4. Tam ma Yecu omiyo bot Marita-ni konyowa nining me niang tyen lok mumiyo Yecu oweko kwer me Nipo obedo mayot adada?

⁴ Nen kong gin mutimme i kare ma en olimo gang pa lureme macok​—Lajaro, Marita, ki Maliam. I cawa ma dano ducu gubedo mot, Yecu ocako pwony. Marita bene onongo tye, ento en olungo wiye i yubo cam mapol pi welone me awora. Yecu oneno ngo ma onongo Marita tye ka timone ci omiye tira i yo me kica kun konye me niang ni cam mapol tutwal pol kare pe mitte. (Luka 10:40-42) Lacen, ma dong odong cawa manok keken me tone, Yecu bene oketo tira ma en omiyo-ni i tic. En oweko kwer me Nipo obedo mayot. Man pwonywa gin ango i kom Yecu?

5. Yub me Nipo nyuto gin ango i kom Yecu, dok man rwatte ki gin ma kicoyo i Jo Pilipi 2:5, 7, 8 nining?

⁵ Yecu onongo mwol i lokke kacel ki ticce. Pi meno, pe watye ki ur ni en onyuto mwolo i nino me agikki me kwone i lobo kany. (Mat. 11:29) En onongo ngeyo ni dong ecok miyo gityer ma pire tek loyo ducu i tekwaro pa dano, dok ni Jehovah bicere me bedo Kabaka i polo. Kadi bed en onongo ngeyo meno, en pe oyenyo yweka pire kun weko yub me Nipo bedo ma rwomme lamal dok ma yubone tek adada. Ma ka meno, en owaco ki lupwonnyene ni omyero gupo pire kicel i mwaka acel kun gicamo cam man ma yubone yot-ti. (Jon 13:15; 1 Kor. 11:23-25) Yub man mayot dok mupore-ni onyuto ni en pe lawaka. Watye ki yomcwiny ni mwolo obedo kit ma pire tek adada pa Kabakawa me polo.​—Kwan Jo Pilipi 2:5, 7, 8.

6. Watwero nyuto cwiny me mwolo calo Yecu nining ka watye ka kato ki i peko?

⁶ Watwero lubo lanen me mwolo pa Yecu nining? Watimo man ka waketo miti pa jo mukene bedo mukwongo me ka mitiwa. (Pil. 2:3, 4) Tam kong dok i kom gin mutimme i dyerwor me agikki me kwo pa Yecu i lobo kany. Yecu onongo ngeyo ni dong ecok to i yo malit adada; kadi bed kit meno, en obedo ka paro pi lukwenane ma lugen,  ma onongo gibibedo ka kumo pire. Pi meno, i dyerwor me agikki-ni, en ominigi tira, ocuko cwinygi, dok okweyo cwinygi bene. (Jon 14:25-31) Ki cwiny me mwolo, Yecu oparo pi ber bedo pa jo mukene me ka paro pi pekone. En pud dong owekkiwa lanen maber ya!

7. Yecu onyuto tekcwiny nining, cutcut i nge keto yub me Cam me Otyeno pa Rwotwa?

⁷ Cutcut ma Yecu ocako kwer me Cam me Otyeno pa Rwot, en onyuto tekcwiny me aura. En onyuto man nining? Yecu oye ni miti pa Wonne ocobbe i kome, kadi bed en ongeyo ni timo meno biweko kineke pi bal me lewic ni eyeto Lubanga. (Mat. 26:65, 66; Luka 22:41, 42) Yecu ogwoko gennene labongo roc mo keken, wek emi deyo i nying Lubanga, ecwak twero me loc pa Jehovah, ki dok eyab yo pi jo ma gungut me kwo pi naka. Yecu bene oyubo lulub kore pi gin ma onongo gibikemme kwede i anyim.

8. (a) Gin ango ma Yecu owaco ki lukwenane ma lugen? (b) Lupwonnye pa Yecu gunyuto lanen pa Yecu me tekcwiny nining i nge tone?

⁸ Yecu bene onyuto tekcwiny i kare ma oweko par ma onongo en tye kwede ci oketo cwinye i cobo miti pa lupwonnyene ma lugen. Kwer man ma Yecu ocako i nge ryemo Juda-ni, onongo bibedo macalo lapo wic pi jo ma kibiwirogi i kom adwogi maber ma bino pi remo ma en oonyo, ki dok ni gibinywako i gicikke manyen. (1 Kor. 10:16, 17) Me konyo lulub kore wek gugwok gennegi dok gunong mot me kwo i polo, Yecu otito botgi gin ma en kacel ki Wonne gimito ni gutim. (Jon 15:12-15) Yecu bene otito ki lukwenane pi atematema ma onongo gibikemme  kwede i anyim. Dong, en otiyo ki lanenne me cuko cwinygi, kun waccigi ni “wudi cwinywu!” (Jon 16:1-4a, 33) I nge mwaki mapol, lupwonnye pa Yecu onongo pud gitye ka lubo lanenne me jalle ki tekcwiny. Kadi bedo ni guwok ki pekki mapol, pud gukonye i kingi kekengi i kare me atematema.​—Ibru 10:33, 34.

9. Watwero nyuto tekcwiny calo Yecu nining?

⁹ Wan bene walubo lanen me tekcwiny ma Yecu onyuto. Me labolle, mito tekcwiny wek wakony utmegiwa ma gitye ka kato ki i aunauna pi niyegi. I kare mukene, kitweyo utmegiwa i buc labongo bal mo. Ka meno otimme, myero watim jami ducu ma watwero pigi, kadi wa cung pigi ka mitte. (Pil. 1:14; Ibru 13:19) Yo mukene ma wanyuto tekcwiny aye ka wamedde ki tito kwena ki “tekcwiny labongo lworo.” (Tic 14:3) Calo Yecu, wan bene wamoko tamwa me tito kwena me Ker kadi bed dano giketo ayelayela i komwa nyo giunowa. I kine mukene, wawinyo calo wape ki tekcwiny. Gin ango ma watwero timone?

10. Gin ango ma myero watim ka wadong ki cabit mogo manok ma peya nino me Nipo oromo, dok pingo?

¹⁰ Watwero medo tekcwinywa ka watamo i kom mot ma watwero nongone pi ginkok pa Kricito. (Jon 3:16; Ep. 1:7) I cabit mogo manok ma peya kikwero Nipo, watye ki kare ma pire tek adada me dongo pwocwa pi ginkok. I kare meno, myero ibed ka kwano Baibul pi Nipo dok ileg kun ilwodo gin mutimme i kom Yecu i kare ma dong cok ki to. Ci dong ka wacokke kacel i nino me Nipo, wabiniang maber lok i kom mugati ki vino ki dong gityer ma gicung pire. Ka waniang gin ma Yecu gin ki Jehovah gutimo piwa ki dok adwogi maber ma wan kacel ki jowa me amara watwero nongone, genwa pi anyim jing matek, dok bene weko wadiyo cwinywa wa i agikki.​—Ibru 12:3.

11-12. Gin ango ma dong wapwonyo?

 ¹¹ Dong wapwonyo ni Cam me Otyeno pa Rwot poyo wiwa pe i kom ber pa ginkok pa Yecu keken ento bene pwonyowa ki mwolo kacel ki tekcwiny pa Yecu. Watwero bedo ki yom cwiny adada pien Yecu pud tye ka medde ki nyuto kit magi macalo Lalamdogwa Madit me polo, ma bako doge piwa! (Ibru 7:24, 25) Me nyuto pwocwa, myero waket cwinywa ducu me po pi to pa Yecu, kit ma en ocikowa kwede. (Luka 22:19, 20) Watimo meno i nino dwe 14 me Nican, ma en aye nino ma pire tek loyo ducu i mwaka.

¹² Watwero niang kit mukene pa Yecu ma otugo cwinye me to piwa ki i kit ma yubo Cam me Otyeno pa Rwotwa obedo yot kwede. I kare ma Yecu tye i lobo kany, onongo kingeye pi kit man. Man obedo kite mene?

13. Ngo ma Jon 15:9 ki 1 Jon 4:8-10 tito madok i kom mar ma Jehovah gin ki Yecu gunyuto, dok angagi ma gitwero nongo adwogi maber ki i margi?

¹³ Yecu onyuto mar madit pa Jehovah piwa i jami ducu ma en otimo. (Kwan Jon 15:9; 1 Jon 4:8-10.) Ma dong pire tek loyo, mar aye oweko Yecu oye pire kene me miyo kwone piwa. Kadi bed watye i kin jo ma kiwirogi, nyo i kin ‘romi mukene-ni’ pud watwero nongo adwogi maber ki mar ma Jehovah gin ki Wode gunyuto piwa kun wok ki i gityer pa Yecu. (Jon 10:16; 1 Jon 2:2) Tam kong dok i kom jami ma kitiyo kwede pi kwero Nipo, jami magi ginyuto mar pa Yecu ki kit ma onongo en paro kwede pi lulub kore. I yo ma nining?

14. Yecu onyuto mar pi lulub kore nining?

¹⁴ Yecu onyuto mar pi lulub kore ma kiwirogi ki cwiny maleng, kun cako kwer ma yubone yot wek gubed ka po pire ento en pe ocako kwer me rwom ma lamal ma yubone tek. Ka kare woto ki kato, onongo mitte ni Lukricitayo ma kiwirogi gubed ka kwero Nipo mwaka ki mwaka, kun gitimo man i kit kwo mapat-pat, kadi wa ki i buc. (Yabo 2:10) Tika gin gulubo cik pa Yecu? Ada, gulubo!

15-16. Jo mukene gukwero Cam me Otyeno pa Rwotwa nining kadi bed ni onongo gitye ka kato ki i kwo matek?

¹⁵ Nicakke i cencwari me acel nio wa i karewa-ni, Lukricitayo me ada, gubedo ka tutte matek me kwero Nipo me to pa Yecu. Gin gutute matek me lubo kit ma Cam me Otyeno pa Rwotwa myero obed kwede. Nen kong labol man. I kare ma kitweyo Omego Harold King i ot buc mo ka kene i lobo China, onongo mitte ni en oyeny yo me kwero Nipo. I wi mung, en oyubo jami ma kitiyo kwedgi i Nipo kun tiyo ki gin ma onongo tye bote. En bene otute matek me kwano nino ma Nipo onongo bipoto iye. I kare ma nino me Nipo oromo​—ma en tye kene i ot bucce​—en owero, olego, ci omiyo pwony ma jenge i Ginacoya.

¹⁶ Labol mukene dok en. Lumege mogo ma kitweyogi i kam ka ma kigwoko iye mabuc i kare me Lweny me II me Wi Lobo, guketo kwogi ka mading wek gikwer Nipo. Kadi bed kumeno, gin gukwero Nipo pien ni yub me Nipo obedo gin ma yubone yot. Gin guwaco ni: “Wagure kacel, kun warumu meja mo matidi ma kiumo ki latam matar ma kiketo jami me kwero Nipo i wiye. Wacwinyo kandol me menyo ot ka ma onongo watye iye,  kit macalo mac elektwic onongo bidotowa woko. . . . Wanwoyo kwongewa bot Wonwa me tic ki kerowa me ilo Nyinge maleng-ngi malo.” Pud dong gunyuto niye matek ya! Dok Yecu bene oyuto mar madit adada piwa i kare ma oweko yub me Nipo obedo gin mayot ma weko twere kadi bed watye ka wok ki i kwo matek!

17. Lapeny mene ma myero wapenye kwede?

¹⁷ Ka nino me Nipo woto ki nyiko cok, pore ki wan me penye ki lapeny magi: ‘I yo ma nining ma atwero lubo kwede lanen me mar pa Yecu macok? Tika pol kare atamo pi miti pa Lukricitayo luwota makato mitina? Tika amito jami mapol ki bot omege ki lumegina makato kerogi woko, nyo kece atamo pi ka ma kerogi gik i iye?’ Myero walub lanen pa Yecu kun ‘wanyuto kica’ kare ducu.​—1 Pet. 3:8.

18-19. (a) Gen ango ma watwero bedo kwede? (b) Gin ango ma imoko tammi me timone?

¹⁸ Yub me kwer me Nipo pe bibedo tye matwal. Ka Yecu ‘odwogo’ i kare me twon can madit atika-ni, en bicoko jo ma ‘kiyerogi’ ma gudong me cito i polo, dok i kare meno aye kwer me Nipo bigik i iye.​—1 Kor. 11:26; Mat. 24:31.

¹⁹ Kadi wa i kare ma pe dong gibibedo ka kwero Nipo, pud watwero bedo ki gen ni wi jo pa Jehovah bibedo ka po i kom cam man macalo lanyut me mwolo, tekcwiny, ki dong mar madit loyo ma kinyuto bot dano. Ngene kene ni i kare meno, jo ducu ma gubedo ka kwero Nipo gibitito pire bot jo me kare meno, wek gin bene gunong adwogi maber. Ento wek wanong adwogi maber ki i cam meno i kare-ni, myero wamok tamwa me lubo lanen me mwolo, tekcwiny ki dong mar pa Yecu. Ka watimo meno, ci watwero bedo ki gen ni wabinongo mot ki bot Jehovah.​—2 Pet. 1:10, 11.