I CENG adek odiko me nino dwe 24 Januari, 2018, Lubetel ma tye i lobo Amerika ki Canada gubedo ki yomcwiny pi lok angeya ma waco ni: Omego Kenneth Cook, Jr., kityeko cimme me bedo i kin lumemba me Lukiko Madit pa Lucaden pa Jehovah.

Omego Cook kinywale dok odongo i Pennsylvania, i lobo Amerika. En opwonyo ada ki bot latin kwan lawote i kare ma onongo en cok tyeko kwanne me cinia, ci onongo batija i nino dwe 7, me Juni 1980. En ocako tic pi Jehovah pi kare malac macalo painia marii i nino dwe 1, i Sektemba, 1982. I nge tic macalo painia pi mwaki aryo, kilwonge me tic i Betel, en ocako tic i Betel me Wallkill, New York, i nino dwe 12 Oktoba, 1984.

Pi mwaki 25 Omego Cook obedo ki mot me tic mapatpat i ka Goyo Bukke ki Opic ma Loyo Betel. En onyomo dakone, Jamie i mwaka 1996, ci dakone bene ocako tic i Betel kacel kwede i Wallkill. I  Decemba 2009, kikobo Omego ki Lamego Cook i Watchtower Educational Center ma tye i Patterson, New York, ka ma kicwalo iye Omego Cook me tic i Dipatmen ma Loyo Gamo Waraga. I April 2016, i nge dwogo cen i Wallkill pi kare mo manok, kikobo Omego ki Lamego Cook i Brooklyn, New York. I nge dwe abic kikobogi dok i gang kalwa ma tye i Warwick, New York. I Januari 2017, kicimo Omego Cook me konyo kor Komitti pa Lukiko Madit ma Loyo Yubo Cam me Cwiny.