PWONY ME ANYAMA ME 4
Gin Mumiyo Wabedo Tye i Kwer me Nipo
“Wutim kuman me po pira.”—LUKA 22:19.
WER 20 Imiyo Wodi me Amara
GIN MA WABINYAMO *
1-2. (a) Awene tutwalle ma wiwa po i kom danowa me amara ma oto? (b) Gin ango ma Yecu otimo i dyewor ma en peya oto?
KADI bed ni jowa me amara guto mwaki mapol angec, pud wiwa po i komgi. Tutwalle wiwa bedo ka po i komgi i nino dwe ma nongo guto iye.
2 Mwaka ki mwaka, wabedo i kin jo milion mapol i twok lobo-ni ducu ma gigure kacel i nino me to pa ngat mo ma wamaro adada—Yecu Kricito. (1 Pet. 1:8) Wagure kacel me po pi ngat ma omiyo kwone macalo ginkok me larowa ki i bal ki to. (Mat. 20:28) Ki lok ada, Yecu onongo mito ni lulub kore wigi opo i kom tone. I dyewor ma en peya oto, en ocako kwer mo ma kite dok pat dok ociko ni: “Wutim kuman me po pira.”—Luka 22:19.
3. Gin ango ma wabinyamo i pwony man?
3 Dano manok adada i kin jo ma gibedo tye i Nipo me to pa Kricito aye gitye ki gen me kwo i polo. Ento dano milion mapol ma gitye ki gen me kwo i lobo bene gibedo tye. I pwony man, wabinyamo tyen lok mumiyo dano ma i gurup aryo magi ducu gitye ki miti me bedo tye i Nipo mwaka ki mwaka. Wabineno bene adwogi maber ma wanongo pi bedo tye. Kong dong wacaku ki nyamo tyen lok mogo mumiyo jo ma kiwirogi gibedo tye i kwer man.
GIN MUMIYO JO MA KIWIROGI GIBEDO TYE I NIPO
4. Pingo jo ma kiwirogi gicamo mugati dok gimato vino i kwer me Nipo?
4 Mwaka ki mwaka, jo ma kiwirogi ma gibedo tye i Nipo gicamo mugati dok gimato vino. Pingo pore ni gin gucam mugati dok gumat vino? Me gamo meno, nen kong gin mutimme i dyewor me agikki me kwo pa Yecu i lobo. I nge camo kwer me Kato, Yecu ocako kwer manyen ma dong ngene ni Cam me Otyeno pa Rwotwa. En ocwalo mugati ki kongo vino i kin lukwenane 11 ma lugen dok owaccigi ni gucam dok gumati. Yecu oloko kwedgi i kom gicikke aryo—gicikke manyen ki gicikke me Ker. * (Luka 22:19, 20, 28-30) Gicikke aryo magi oweko twere pi lukwena ki jo mukene ma welgi nok me doko luker ki lulamdog i polo. (Yabo 5:10; 14:1) Odong jo ma kiwirogi, * ma gitye i gicikke aryo magi, gin keken aye gitwero camo mugati ki mato kongo vino i kwer me Nipo.
5. Gin ango ma jo ma kiwirogi giniang iye madok i kom gen ma kiminigi?
5 Nen kong tyen lok mukene mumiyo jo ma kiwirogi gibedo tye i Nipo: Kwer man miyogi kare me tam matut i kom gengi. Jehovah omiyo botgi gen mamwonya—me bedo ki kwo ma pe to ki kom ma pe balle i polo, me loc ki Yecu ma kicero-ni kacel ki jo 144,000 mukene-ni, ki dong, ma pire tek loyo, me bedo ki mot me neno Jehovah kikome! (1 Kor. 15:51-53; 1 Jon 3:2) Jo ma kiwirogi gingeyo ni kilwongogi me nongo mot magi i polo. Ento wek kiye ni gudony i polo, mitte ni gubed lugen nio wa i togi. (2 Tem. 4:7, 8) Tamo i kom gengi me kwo i polo kelo yomcwiny madit adada bot jo ma kiwirogi. (Tito 2:13) ‘Romi mukene-ni’ kono? (Jon 10:16) Tyen lok ango mumiyo gin gibedo tye i kwer me Nipo?
GIN MUMIYO ROMI MUKENE-NI GIBEDO TYE I NIPO
6. Pingo romi mukene-ni gibedo tye i kwer me Nipo mwaka ki mwaka?
6 Romi mukene-ni cwinygi yom me bedo tye i Nipo kadi bed pe gicamo mugati nyo gimato vino. I mwaka 1938, jo ma gitye ki gen me kwo i lobo kilwongogi pi tyen me acel me bedo tye i kwer me Nipo. Watchtower me Marci 1, 1938, otito ni: “Bibedo mupore adada pi [romi mukene-ni] me bedo tye i cokke man wek ginen gin ma timme iye. . . . Man myero obed dok bene obedo kare me yomcwiny pi gin bene.” Calo lurem jo ma gitye ka nyomme, ma cwinygi bedo yom ka kilwongogi i nyom meno, romi mukene-ni cwinygi yom adada me bedo tye calo jo ma gineno gin ma timme i kwer me Nipo.
7. Pingo romi mukene gikuro pwony me Nipo ki miti madit?
7 Romi mukene-ni bene gibedo ka tamo i kom gengi. Gibedo ki miti me winyo pwony me Nipo, pien pwony man loko tutwalle i kom gin ma Kricito ki luloc luwote 144,000 gibitimo pi dano ma lugen i kare me Loc me Mwaka Alip Acel. I te loc pa Kabakagi Yecu Kricito, luloc magi gibitic me loko lobo me doko paradic ki konyo dano me bedo labongo roc. Pud dong yomo cwiny dano milion mapol ma gibedo tye i kwer me Nipo me goyo i wigi cobbe pa lok pa lunebi me Baibul i anyim, calo mogo ma nonge i Icaya 35:5, 6; 65:21-23; ki Niyabo 21:3, 4. Ka gigoyo kit ma gin ki jogi me amara gibikwo kwede i lobo manyen, gijingo gengi pi anyim ki mitigi pe me juko tic pi Jehovah.—Mat. 24:13; Gal. 6:9.
8. Tyen lok mukene ango mumiyo romi mukene-ni gibedo tye i Nipo?
8 Nen kong tyen lok mukene mumiyo romi mukene-ni gibedo tye i Nipo. Gimito nyuto margi ki cwakgi pi jo ma kiwirogi. Lok pa Lubanga otito con ni jo ma kiwirogi ki jo ma gitye ki gen me kwo i lobo gibitic kacel. I yo ma nining? Kong dong wanyamu labol mogo manok.
9. Lok pa lanebi ma kicoyo i Jekaria 8:23 nyuto ni romi mukene-ni giwinyo nining i kom jo ma kiwirogi?
9 Kwan Jekaria 8:23. Lok pa lanebi man tito i yo mamwonya adada kit ma romi mukene-ni giwinyo kwede i kom omegigi ki lumegigi ma kiwirogi. Lok man ni “Lajudaya” ki “kwedwu” loko i kom gurup acel—udong jo ma kiwirogi. (Rom. 2:28, 29) “Jo apar ma gua ki i lwak rok ma lebgi patpat” gicung pi romi mukene-ni. “Gibimako”—nyo moko matek i kom—jo ma kiwirogi, kun giribbe kwedgi i woro me ada. Pi meno, i nino me Nipo, romi mukene-ni ginyuto ni gitye cok ki jo ma kiwirogi ka gibedo tye i kwer man.
10. Gin ango ma Jehovah otimo me cobo lok pa lanebi ma nonge i Ejekiel 37:15-19, 24, 25?
10 Kwan Ejekiel 37:15-19, 24, 25. Me cobo lok pa lanebi man, Jehovah oribo jo ma kiwirogi ki romi mukene kacel. Lok pa lanebi man loko i kom odoo aryo. Jo ma gitye ki gen me kwo i polo gitye calo odoo “pi Juda” (kaka ma onongo luker me Icrael kiyerogi ki iye), dok jo ma gitye ki gen me kwo i lobo gitye calo odoo pi “Epraim.” * Jehovah onongo biribo gurup aryo magi kacel wek gidok “odoo acel.” Man te lokke ni gitiyo kacel i te loc pa Kabakagi, Yecu Kricito. Mwaka ki mwaka, jo ma kiwirogi ki romi mukene-ni gibedo tye i Nipo, pe macalo gurup aryo mapatpat, ento macalo “lwak acel” i te “lakwat acel”—Jon 10:16.
11. “Romi” ma kiloko i komgi i Matayo 25:31-36, 40 ginyuto cwakgi nining pi omegi Kricito?
11 Kwan Matayo 25:31-36, 40. “Romi” ma Yecu oloko i komgi-ni gicung pi jo ma kitgi atir i kare me agikki ma gitye ki gen me kwo i lobo—nyo, romi mukene-ni. Gin giteno kor omegi Kricito ma pud gudong i lobo tutwalle ki konyogi me cobo tic madit adada—tic me tito kwena ki loko dano me doko lupwonnye pa Kricito.—Mat. 24:14; 28:19, 20.
12-13. I yo mukene ango ma romi mukene-ni ginyuto kwede cwakgi pi omegi Kricito?
12 Mwaka ki mwaka, i cabit mogo ma nongo Nipo peya otimme, romi mukene-ni ginyuto cwakgi pi omegi Kricito ki nywako i rwec ma kwako wi lobo ducu me lwongo jo ma gunyuto miti pi kwer me Nipo. (Nen bok ma wiye tye ni “ Tika Itye ka Yubbe pi Kare me Nipo?”) Gitute bene me keto yub ducu ma mitte wek kibed ki Nipo i kacokke ducu ma i wi lobo, kadi bed ni pol pa kacokke pe gitye ki ngat mo ma camo mugati nyo mato vino. Romi mukene-ni cwinygi yom adada me cwako kor omegi Kricito i yo magi. Romi magi gingeyo ni Yecu neno gin ma gitimo pi omegine ma kiwirogi calo gitye ka timone pire.—Mat. 25:37-40.
13 Tyen lok ango mukene mumiyo wan ducu, kadi bed genwa tye me kwo i polo nyo i lobo, wabedo tye i Nipo?
GIN MUMIYO WAN DUCU WABEDO TYE I NIPO
14. Jehovah gin ki Yecu gunyuto mar madit adada piwa nining?
14Watye ki pwoc pi mar ma Jehovah ki Yecu gunyutiwa. Jehovah onyuto marre piwa i yo mapol. Ento yo ma pire tek loyo ma en onyutiwa kwede mar aye ki cwalo Wode me amara wek oden can dok oto piwa. (Jon 3:16) Wangeyo ni Yecu bene onyuto mar madit piwa ki jalo kwone piwa. (Jon 15:13) Pe watwero culo Jehovah gin ki Yecu pi mar ma gunyutiwa. Ento watwero nyuto pwocwa ki kit ma wakwo kwede kwowa me nino ducu. (Kol. 3:15) Dok bene wabedo tye i kwer me Nipo pien wamito po i kom mar ma gunyutiwa ki bene me nyuto marwa pigi.
15. Pingo jo ma kiwirogi ki romi mukene-ni gitye ki pwoc madit adada pi ginkok?
15Watye ki pwoc madit adada pi mic me ginkok. (Mat. 20:28) Ginkok pire tek adada bot jo ma kiwirogi pien weko gengi mamwonya-ni twere. Pi niyegi i kom ginkok pa Kricito, Jehovah olwongogi ni jo ma kitgi atir dok olokogi me doko lutinone. (Rom. 5:1; 8:15-17, 23) Romi mukene-ni bene gitye ki pwoc pi ginkok. Pien gitye ki niye i kom ginkok pa Kricito, Lubanga nenogi ni gin jo maleng, gitwero tic pire, dok gitye ki gen me bwot ki i “can madit atika.” (Yabo 7:13-15) Yo acel ma jo ma kiwirogi ki romi mukene-ni ginyuto kwede pwoc pi ginkok aye ki bedo tye i kwer me Nipo mwaka ki mwaka.
16. Tyen lok mukene ango mumiyo wabedo tye i kwer me Nipo?
16 Tyen lok mukene mumiyo wabedo tye i Nipo aye pien wamito bedo luwiny bot Yecu. Labongo paro pi gen ma watye kwede, wan ducu wamito ni walub cik ma Yecu omiyo i dyewor ma en ocako kwer me Nipo ni: “Wutim kuman me po pira.”—1 Kor. 11:23, 24.
ADWOGI MABER MA WAN DUCU WANONGO PI BEDO TYE I NIPO
17. Kwer me Nipo konyowa nining me nyikke cok bot Jehovah?
17Wanyikke cok ki Jehovah. (Yak. 4:8) Kit ma wapwonyo kwede, Nipo miyo botwa kare me tamo i kom gen ma Jehovah ominiwa ki me lwodo mar madit ma en onyutiwa. (Jer. 29:11; 1 Jon 4:8-10) Ka watamo i kom genwa pi anyim ki mar ma pe lokke pa Lubanga piwa, wadongo marwa pi Jehovah dok wajingo watwa kwede.—Rom. 8:38, 39.
18. Lwodo lok i kom labol pa Yecu tugo cwinywa me timo gin ango?
18Tugo cwinywa me lubo lanen pa Yecu. (1 Pet. 2:21) I nino mogo manok ma nongo Nipo peya otimme, wabedo ka kwano lok me Baibul madok i kom cabit me agikki me kwo pa Yecu i lobo, tone, ki cerre. Ki dong, i otyeno me Nipo, pwony me Nipo poyo wiwa i kom mar pa Yecu piwa. (Ep. 5:2; 1 Jon 3:16) Ka wawoto ki kwano kacel ki lwodo labol me jalle ken pa Yecu, man tugo cwinywa me ‘lubo kit kwo acel ma yam Yecu olubo.’—1 Jon 2:6.
19. Watwero medde ki bedo i mar pa Lubanga nining?
19Wamoko tamwa matek me medde ki bedo i mar pa Lubanga. (Juda 20, 21) Wabedo i mar pa Lubanga ka watimo jami ducu ma twere me bedo luwiny bote, lonyo nyinge, ki yomo cwinye. (Car. 27:11; Mat. 6:9; 1 Jon 5:3) Kwer me Nipo weko wamoko tamwa matek me kwo kwowa me nino ducu i yo ma nyuto bot Jehovah ni, ‘Amito bedo i marri pi naka!’
20. Tyen lok ma pigi tego ango ma watye kwede me bedo tye i kwer me Nipo?
20 Kadi watye ki gen me kwo i polo nyo i lobo kany, watye ki tyen lok mabeco me bedo tye i kwer me Nipo. Mwaka ki mwaka ka wagure kacel i nino meno, wiwa po i kom to pa ngat mo ma wamaro adada, Yecu Kricito. Ma dong pire tek loyo, wiwa po i kom mar madit loyo ma kinyuto botwa—mar ma Jehovah onyutiwa ki miyo Wode macalo ginkok. I mwaka-ni, wabikwero Nipo i otyeno me Ceng Abic, 15 April, mwaka 2022. Wamaro Jehovah ki Wode. Pi meno, i nino me to pa Yecu, pe tye gin mo ma pire twero bedo tek botwa loyo bedo tye i kwer me Nipo.
WER 16 Pak Jah pi Wode ma Kiwiro
^ para. 5 Kadi bed watye ki gen me kwo i polo nyo i paradic i lobo, wabedo ki miti madit me bedo tye i kwer me Nipo mwaka ki mwaka. I pwony man, wabinyamo tyen lok mogo mabeco ma jenge i Ginacoya ma omiyo wabedo tye i kwer man ki adwogi maber ma wanongo ka watimo meno.
^ para. 4 Pi ngec mukene i kom gicikke manyen ki gicikke me Ker, nen pwony ma wiye tye ni “Wubibedo ‘Ker ma Lwakke Ajwagi [Lulamdog]’” i Wi Lubele me Oktoba 1, 2014, pot 16-20.
^ para. 4 LOK MA KITITO TERE: Lok man ni udong jo ma kiwirogi kitiyo kwede me lok i kom Lukricitayo ma kiwirogi ma pud gudong i lobo kany.
^ para. 10 Me nongo ngec mukene i kom lok pa lanebi madok i kom odoo aryo ma kicoyo pire i Ejekiel cura 37, nen buk me Pure Worship of Jehovah—Restored At Last!, pot 130-135, para. 3-17.
