1. Watwero tero cawa kacel ki Jehovah nining?

WAN ducu wamaro bedo kacel ki jo ma waparo pigi. Jo munyomme pol kare gimaro bedo kacel. Jo matino bene gimaro bedo ki luwotgi macok. Wan ducu wamaro cwalo cawa kacel ki luye luwotwa. Ma dong pire tek loyo ducu, wamaro cwalo cawa kacel ki Lubangawa. Watimo man ki lega bote, kwano Lokke, ki lwodo yubbe kacel ki kite mamwonya. Cawa ma wacwalo kacel ki Jehovah pire tek adada!—Jab. 139:17.

2. Ariya ango ma wakato ki iye?

² Kadi bed wamaro cwalo cawa i lega ki kwan piwa kenwa, pol kare timo man pe yot. Wan ducu watye ki tic mapol, dok man twero weko bedo tek adada me nongo cawa me woro Jehovah. Dog ticwa, jo me gangiwa, kacel ki jami mukene twero camo cawawa adada ma weko wawinyo ni pe watye ki cawa me lega, kwan piwa kenwa, nyo lwodo gin ma wakwano.

3. Gin ango mukene ma twero camo cawawa woko?

³ Tye gin mo mukene bene ma twero camo cawa woko. Ka pe wagwokke, watwero bedo ka timo jami mogo ma pe rac ento nongo cwalo cawa malac adada ma weko bedo tek me nyiko cok ki Jehovah. Me labolle, pire tek ni wanong cawa me yweyo wiwa. Galowang ma wayero twero bedo ni pe rac, ento ka wacwalo cawa mukato kare woko iye, ci pe wabibedo ki cawa me woro Jehovah. Wiwa myero opo ni galowang pe obedo gin ma pire tek loyo.—Car. 25:27; 1 Tem. 4:8.

4. Gin ango ma wabinyamo kombeddi?

 ⁴ I pwony man, wabinyamo pingo omyero wayer gin ma pire tek loyo i kwowa. Wabinyamo bene kit ma watwero tic kwede ki cawawa i yo maber loyo i worowa kacel ki adwogi mabeco ma wabinongone.

5. Lwodo tira ma kimiyo i Jo Epeco 5:15-17 twero konyo bulu nining me yero kwo maber loyo pire?

⁵Yer kwo maber loyo. Bulu pol kare gibedo ki par i kom kit ma gitwero tic kwede ki kwogi i yo maber loyo. Ki tungcel, lupwonye ki jo me ganggi ma pe gitye Lucaden pa Jehovah gitwero cuko cwiny bulu me cito i univaciti ki me nongo dog tic maber wek guti cente madwong. Kwan ma kit man twero tero cawagi madwong adada. Ki tungcel, lunyodo kacel ki lurem ma i kacokke gitwero cuko cwiny bulu magi me tic ki kwogi i tic pi Jehovah. Gin ango ma twero konyo bulu ma maro Jehovah me moko tam maber loyo? Bibedo me kony bote ka okwano dok olwodo tira ma tye i Jo Epeco 5:15-17. (Kwan.) I nge kwano tyeng magi, bulu twero pennye kekene ni: ‘“Gin ma Rwot [Jehovah] mito” obedo ngo? Tam mene ma biyomo cwinye? Tam mene ma ka amoko biweko atiyo ki cawana i yo maber loyo?’ Wi opo ni, “nino me kare-ni opong ki gin marac,” dok lobo man ma Catan aye tye ka loyo-ni bigik woko ma pe orii. Bibedo me ryeko adada ka watiyo ki kwowa me timo jami ma yomo cwiny Jehovah.

6. Tam ango ma Maliam omoko, dok pingo man obedo tam me ryeko?

⁶Yer jami ma pigi tego loyo. Ka wamito tic ki cawa i yo maber loyo, ci twero mitte ni wayer gin acel i kin jami aryo ma pe giraco. Watwero neno man i gin mutimme i kare ma Yecu olimo Maliam ki Marita. Marita onongo cwinye yom adada me jolo Yecu macalo welone ma oweko en otedo cam madwong adada pi Yecu. Ki tungcel, laminne Maliam otiyo ki kare meno me bedo kacel ki Yecu me winyo pwonnye. Gin ma Marita otimo onongo pe rac ento Yecu owaco ni, Maliam “oyero dul maber.” (Luka 10:38-42) I nge kare mo, Maliam nen calo wiye owil woko i kom dek ma gucamo i nino meno, ento watwero bedo ki gen ni wiye pe owil i kom jami ma en opwonyo ki bot Yecu. Kit macalo Maliam omaro cawa ma gutero kacel ki Yecu, wan bene omyero water cawawa ki Jehovah calo gin ma pire tek adada. Watwero tic ki cawa meno i yo maber loyo nining?

7. Pingo pire tek adada me lega, kwan piwa kenwa, kacel ki lwodo lok?

⁷Omyero iniang ni lega, kwan piri keni, ki lwodo gin ma ikwano obedo but worowa. Ka walego, nongo watye ka lok ki Wonwa me polo ma marowa matek. (Jab. 5:7) Ka watye ka kwano Baibul, nongo watye ka nongo “ngec i kom Lubanga,” ma en aye Wang It me ryeko ducu. (Car. 2:1-5) Ka walwodo gin ma wakwano i kom Jehovah, watamo i kom kite mamwonya dok wiwa po i kom jami mabeco ma en mito timone piwa ki pi dano ducu. Man aye yo maber loyo ma watwero tic kwede ki cawawa. Ento gin ango ma twero konyowa me timo meno?

8. Pwony ango ma watwero nongone ki i kit ma Yecu otiyo kwede ki cawane i kare ma tye i dye tim?

⁸Ka twere yer kabedo ma woo pe iye.  Nen kong labol pa Yecu. Ma peya en ocako ticce me pwony, Yecu obedo i dye tim kene pi nino 40 kulu. (Luka 4:1, 2) I kabedo meno ma opye mot-ti, Yecu onongo twero lega bot Jehovah kun lwodo miti pa Wonne pire. Man okonyo Yecu me neno ni etye atera me kemme ki atematema ma onongo en bikato ki iye. Adwogi maber ango ma itwero nongone ki i labol pa Yecu? Ka ibedo i paco ma dano dwong iye, ci twero bedo tek me nongo ka ma piny oling iye i ot. Ka tye kit meno, ci itwero yenyo ka ma oling mot woko. Meno aye gin ma lamego Julie timo ka mito cwalo cawa i lega bot Jehovah. En kacel ki cware gibedo i ot mo matidi adada i lobo France, dok pe twere me bedo kakene labongo gin mo ma wiro tamme. Julie otito ni, “Pi meno acito ka wot i dye bar ma dano namo iye. Ki kunu atwero bedo kena, kun aketo tamma i lega dok alego ki cwinya ducu bot Jehovah.”

9. Kadi bed Yecu onongo tye ki tic mapol, en onyuto nining ni etero watte ki Jehovah calo gin ma pire tek?

⁹ Yecu onongo tye ki tic mapol adada. I kare me ticce me pwony i lobo kany, lwak onongo gilubo kore i kabedo ducu, dok gin ducu onongo gimito bedo kwede. I nino mo acel, ‘jo ducu ma i boma gucokke i doggola’ ka nenne. Kadi bed kit meno, Yecu oneno ni kare ducu enongo cawa me lega bot Jehovah. Ma ceng peya otuc, Yecu ocito i “kabedo ma dano pe iye” ka ma en onongo twero bedo iye kene kun lego bot Wonne.—Mar. 1:32-35.

10-11. Ma lubbe ki Matayo 26:40, 41, tira ma pire tek ango ma Yecu omiyo ki lupwonnyene i poto me Gececemane, ento gin ango ma otimme?

¹⁰ I dyewor me agikki me kwone i lobo, ma dong ticce me pwony woto ki tum, Yecu dok oyenyo ka ma oling mot me lwodo lok ki lega. En onongo ka ma oling mot man i poto me Gececemane. (Mat. 26:36) I cawa meno, Yecu omiyo ki lupwonnyene tira ma pire tek adada i kom lega.

¹¹ Nen kong gin mutimme. I kare ma guo i poto me Gececemane, onongo dong nen calo cwiny dyewor okato woko. Yecu owaco ki lupwonyene ni “wubed ka kiyo piny,” ci en ocito ka lega. (Mat. 26:37-39) Ento i kare ma en tye ka lega, lupwonnyene gunino woko. I kare ma en odwogo onongogi ka nino, en dok owaccigi ni ‘wuki piny dok wuleg kare ducu.’ (Kwan Matayo 26:40, 41.) En oniang ni gukato ki i par madwong dok onongo guol adada. Ki cwiny me kica, Yecu oye ni “kom aye nyap.” Kadi bed kit meno, pi tyen  aryo mukene, Yecu odok cen ka lega, dok i kare ducu ma en odwogo, en onongo lupwonnyene gitye ka nino me ka lega.—Mat. 26:42-45.

12. Gin ango ma watwero timone ka i kine mukene wawinyo ni waol adada me lega?

¹²Yer cawa ma opore. I kare mogo watwero winyo ni par odiyowa nyo waol adada ma pe watwero lega. Ka meno otimme i komi, ci wi opo ni ipe keni. Itwero timo gin ango? Jo mogo ma onongo gimaro lega bot Jehovah i cawa ma nongo gicok buto piny gunongo ni tye me kony adada ka gucwalo cawa i lega i wi otyeno ma nongo peya guol tutwal. Jo mukene doki guniang ni giketo cwinygi i lega ka gulego ma nongo gubedo abedo nyo gurumo conggi piny. Ento ket kong ni par odiyi matek nyo cwinyi otur adada ma pe itwero lega kono? Tit ki Jehovah kit ma iwinyo kwede kikome. Itwero bedo ki gen ni Wonwa ma lakica biniang pekoni.—Jab. 139:4.

13. Cim nyo tabuletwa twero wiro tamwa nining ka watye ka lega, kwan piwa kenwa, nyo ka watye i cokke?

¹³Pe iwek gin mo owir tammi ka itye ka kwan. Lega pe obedo yo acel keken ma watwero jingo kwede watwa ki Jehovah. Kwano Lok pa Lubanga piwa kenwa ki bedo tye i cokke twero bene konyowa me nyiko cok ki Lubanga. Tika tye gin mo ma itwero timone me weko cawa me kwan piri keni ki cawa me bedo i cokke nyako nyige? Pennye kekeni ni, ‘Gin ango ma pol kare maro wiro tamma i cawa me cokke nyo kwan pira kena?’ Tika twero bedo gamo cim ma kigoni, email, nyo mecej ma i cimmi nyo i tabuletti? I kare-ni, dano bilion mapol gitiyo ki tet magi. Lukwed mogo giwaco ni ka watye ka tute me keto cwinywa i gin moni, ci bedo ki cimwa i ka ngetwa twero wiro tamwa woko. Ladiro mo owaco ni, “Ka cimmi tye i ka ngeti, tammi bedo ka mukene. Pe iketo cwinyi i tic ma tye i nyimi.” I cawa ma nongo gure me adwol nyo gure madito peya ocakke, kipoyo wiwa ni omyero waket cimwa nyo tabuletwa obed i yo ma pe wiro tam pa jo mukene. Tika watwero timo gin acel-li ka watye kenwa wek cimwa pe owir tamwa dok obal cawawa kacel ki Jehovah?

14. Ma lubbe ki Jo Pilipi 4:6, 7, Jehovah bikonyowa me keto cwinywa i worowa nining?

 ¹⁴Leg wek Jehovah okonyi iket cwinyi i woroni. Ka iniang ni itye ka tamo jami mukene i cawa me kwan piri keni nyo cokke, leg Jehovah wek okonyi. Ka par odiyi, pe twero bedo yot me weko parri kun iketo cwinyi i kom jami me cwiny, ento pire tek ni omyero itim meno. Leg pi kuc ma pe bigwoko cwinyi keken ento bene bigwoko ‘tammi.’—Kwan Jo Pilipi 4:6, 7.

15. Adwogi maber ango ma watwero nongone ka watero kare kacel ki Jehovah i worowa?

¹⁵ Ka ikwanyo kare me lok, winyo, ki tam i kom Jehovah, ibinongo adwogi maber adada. Man timme nining? Mukwongo, ibimoko tam me ryeko. Baibul cuko cwinywa ni “ngat ma bedo kacel ki jo maryek pwonnye doko ryek bene.” (Car. 13:20) Pi meno, ka iwoto ki cwalo cawa kacel ki Jehovah, ma en aye Wang It me ryeko, ci in bene ryekoni bimedde. Ibiniang maber jami ma itwero timo me yomo cwinye ki kit me gwokke ki moko tam ma cwero cwinye.

16. Tero cawa i worowa kacel ki Jehovah twero dongo dirowa me pwony nining?

¹⁶ Me aryo, ibidoko lapwony ma ladiro. Ka watye ka kwano Baibul ki ngat mo, yubwa ma pire tek loyo obedo me konyo latin kwanwa me nyiko cok ki Jehovah. Ka waloko ki Wonwa me polo kare ki kare, ci marwa pire bidongo doko matek dok wabibedo ki kero me pwonyo lutino kwanwa me mare. Tam kong i kom labol pa Yecu. En oloko i kom Jehovah i yo me mar adada ma okonyo lupwonnyene me maro Jehovah bene.—Jon 17:25, 26.

17. Pingo lega ki kwan piwa kenwa twero konyowa me dongo niyewa?

¹⁷ Me adek, niyeni bidongo bedo matek. Nen kong gin ma timme ka ilego Lubanga ni omini tira, cuko cwiny, nyo kony. Kare ducu ma Jehovah gamo lega meno, niyeni i kome dongo. (1 Jon 5:15) Gin ango mukene ma twero jingo niyeni? Kwan piri keni. Wi opo ni “niye bino pi winyo lok ma gitito.” (Rom. 10:17) Ento, me dongo niye matek, mitte ni watim makato nongo ngec keken. Gin ango mukene ma mitte ni watim?

18. Mi lapor ma nyuto ni omyero walwod lok.

¹⁸ Mitte ni walwod gin ma watye ka pwonyone. Nen kong gin ma otimme i kwo pa laco Jabuli 77. Cwinye onongo otur adada pien en onongo tamo ni en kacel ki Luicrael luwote onongo dong gurwenyo cwak pa Jehovah woko. En onongo  pe twero nino i dyewor pien par onongo odiye adada i kom lok meno. (Tyeng 2-8) En otimo gin ango? En owaco ki Jehovah ni: “Abibedo ka tamo pi gin ducu ma dong itimo, dok abilwodo lok i kom ticci madito ducu ma yam itiyo.” (Tyeng 12) Ngene kene ni laco jabuli man onongo ngeyo maber adada jami ma Jehovah otimo pi Jone i kare mukato, kadi bed kit meno laco man otamo ni: “Lubanga mono dong wiye owil woko pi nyuto kicane i kom dano? En dong mono pe romo timo kica, pi kiniga ma omake?” (Tyeng 9) Laco jabuli man olwodo tic pa Jehovah kacel ki lok ada ni Lubanga onongo kong onyuto cwiny me kica i kare mukato angec. (Tyeng 11) Adwogine obedo nining? Laco jabuli man omoko tamme ni Jehovah pe biweko Jone matwal. (Tyeng 15) I yo acel-lu, niyeni bidongo matek ka iwoto ki lwodo jami ma Jehovah dong otimo piri ki pi jone.

19. Adwogi mukene ango ma wabinongo ka wakwanyo kare me bedo kacel ki Jehovah i worowa?

¹⁹ Me angwen, dok ma pire tek loyo, mari pi Jehovah bidongo. Mar aye obedo kit ma pire tek loyo ma bitugo cwinywa me bedo luwiny bot Jehovah, jalo jami wek wayom cwinye, ki me kanyo peko mo keken. (Mat. 22:37-39; 1 Kor. 13:4, 7; 1 Jon 5:3) Pe tye gin mo maber loyo bedo ki wat macok ki Jehovah!—Jab. 63:1-8.

20. Ibiyubo cawa me lega, kwan piri keni, ki lwodo lok nining?

²⁰ Wi opo ni lega, kwan piwa kenwa, kacel ki lwodo lok gubedo but worowa. Calo Yecu, yeny ka ma oling mot me lega bot Jehovah. Kwany gin mo keken ma pe mitte ma twero wiro tammi. Leg bot Jehovah wek okonyi iket tammi ka itye ka timo jami me cwiny. Ka itiyo ki kare ma itye kwede kombeddi maber, Jehovah bimini kwo ma pe tum i lobo manyen pa Lubanga.—Mar. 4:24.