1. Jo gang pa Yakobogi onongo gubedo dano ma nining?

YAKOBO omin Yecu odongo i gang ma jone gitye lugen bot Jehovah. Lunywalle Yucepu ki Maliam, onongo gimaro Jehovah matek dok gutute me tic pire. Yakobo bene onongo tye ki mot mukene. Omine madit odoko Meciya ma kiciko pire-ni. Man pud dong obedo mot madit pi Yakobo me bedo i kin jo me ot meno!

2. Tyen lok ango ma onongo Yakobo tye kwede me bedo ki woro i kom omine madit?

² Yakobo onongo tye ki tyen lok mapol me lubo lanen pa omine madit. (Mat. 13:55) Me labolle, i kare ma onongo Yecu tye ki mwaka 12, en onongo ngeyo Ginacoya maber adada mumiyo lupwonye ma gukwano i rwom ma lamal i Jerucalem gubedo ki ur adada. (Luka 2:46, 47) Twero bedo ni Yakobo gutiyo kacel ki Yecu i tic me payo bao. Ka tye kit meno, ci en nen calo ongeyo omine maber adada. Omego Nathan H. Knorr onongo pol kare waco ni, “Ipwonyo jami mapol i kom ngat moni ka wutiyo kacel kwede.” * Yakobo nen calo bene oneno ni “Yecu odongo kun medde i ryeko, kun dok medde ki nongo pwoc ki bot Lubanga ki bot dano bene.” (Luka 2:52) Pi meno waromo tamo ni Yakobo obedo i kin lupwonnye pa Yecu mukwongo. Ento meno aye pe gin mutimme.

3. Yakobo odok iye nining i kare ma Yecu ocako ticce me pwony?

³ I kare me tic me pwony pa Yecu i lobo, Yakobo pe odoko lapwonnyene. (Jon 7:3-5) Ki lok ada, Yakobo nen calo  obedo ngat acel i kin wadi pa Yecu ma otamo ni Yecu “opo woko.” (Mar. 3:21) Dok bene pe tye gin mo ma nyuto ni Yakobo obedo kacel ki mingi, Maliam, i kare ma Yecu tye ka to i kom yat.—Jon 19:25-27.

4. Pwony ango ma wabinyamogi?

⁴ Lacen, Yakobo odongo niye i kom Yecu dok en odoko laelda ma kiworo i kacokke pa Lukricitayo. I pwony man, wabinyamo jami aryo ma watwero pwonyone ki bot Yakobo: (1) gin mumiyo omyero wabed jo mamwol ki (2) kit ma watwero doko kwede lupwonye mucwiny.

5. Gin ango ma Yakobo otimo i kare ma Yecu onen bote i nge cerre?

⁵ Awene ma Yakobo odoko kwede lalub kor Yecu ma lagen? I nge cer pa Yecu, en ‘onen bot Yakobo, lacenne onen bot lukwena ducu.’ (1 Kor. 15:7) I nge rwattene meno ki Yecu, Yakobo odoko lapwonnye pa Yecu. En obedo tye i kare ma lukwena pa Yecu onongo gitye ka kuro cwiny maleng i kicika mo ma malo i Jerucalem. (Tic 1:13, 14) Lacen, Yakobo obedo ki yomcwiny me tic macalo lamemba me lukiko madit i cencwari me acel. (Tic 15:6, 13-22; Gal. 2:9) Dok ma peya mwaka 62 K.M. oromo, cwiny maleng okonye me coyo waraga bot Lukricitayo ma kiwirogi. Waraga meno konyowa i kare-ni, kadi bed genwa tye me kwo pi naka i polo nyo i lobo kany. (Yak. 1:1) Ma lubbe ki laco lok me tekwaro pa Lujudaya ma nyinge Josephus, kineko Yakobo woko kun kilubo rukca pa Lalamdog Madit ma nyinge Anania wod pa Anac. Yakobo obedo lagen bot Jehovah nio wang ma otyeko kwone i lobo kany.

6. I yo ma nining ma onongo Yakobo pat ki lutela dini me karene?

⁶Yakobo onongo mwol. Pingo watwero wacone kit meno? Nen kong apokapoka ma tye i kin kit ma Yakobo odok kwede i lwongo pa Yecu ki kit ma lupwonye dini mapol gudok kwede iye. I kare ma Yakobo oneno lanyut ma moko ni Yecu obedo Wod pa Lubanga, ki mwolo madit en oye meno. Ento lulamdog madito ma i Jerucalem pe guye Yecu. Me labolle, onongo pe gitwero kwero ni Yecu ocero Lajaro ki i kin jo muto. Ento gin pe guye ni Jehovah aye ooro Yecu. Me ka meno, gutemo neko Yecu kacel ki Lajaro. (Jon 11:53; 12:9-11) Lacen i kare ma kicero Yecu ki i  kin jo muto, guporo lok kacel wek gikan meno woko ki bot dano. (Mat. 28:11-15) Awaka pa lutela dini magi oweko gukwero Meciya woko.

7. Pingo omyero wagwokke ki awaka?

⁷Pwony ma wanongo: Gwokke ki awaka, dok ibed atera me nongo pwony ki bot Jehovah. Kit macalo two twero weko adunu pa ngat moni pe tiyo maber, awaka twero weko bedo tek adada piwa me lubo tira pa Jehovah. Luparicayo guweko cwinygi odoko nwang adada mumiyo gin gukwero lanyut ma moko ni Yecu aye Wod pa Lubanga dok onongo tye ki cwiny maleng. (Jon 12:37-40) Awaka meno obedo rac adada pigi pien ogengogi ki nongo kwo ma pe tum. (Mat. 23:13, 33) Pud dong pire tek ni wamedde ki ye ni Lok pa Lubanga ki cwiny mere maleng olok kitwa dok odor tamwa ki tam ma wamoko! (Yak. 3:17) Kit macalo Yakobo obedo ngat ma mwol, en onongo tye atera me nongo pwony ki bot Jehovah. Dok, kit ma wabineno kwede, en odoko lapwony mucwiny pi mwolone.

8. Gin ango ma twero konyowa me doko lupwonnye mucwiny?

⁸ Yakobo pe okwano i rwom ma lamal. Lupwonye dini ma i karene nen calo gunene kit ma onongo gineno kwede lukwena Petero ki Jon—calo “jo mogo ata ma pe gupwonnye.” (Tic 4:13) Ento Yakobo opwonnye me doko lapwony mucwiny. Waneno meno ka wakwano buk me Baibul ma kilwongo ki nyinge. Calo Yakobo, twero bedo ni wan bene pe wakwano i rwom ma lamal. Kadi bed kit meno, ki kony pa cwiny maleng pa Jehovah kacel ki pwonnye ma wanongo ki i dulle, wan bene waromo doko lupwonye mucwiny. Kong dong wanyamu labol ma Yakobo oweko macalo lapwony ki dok pwony ma watwero nongone ki bote.

9. Tit kong yo me pwony ma Yakobo onongo tiyo kwede.

⁹Yakobo pe otiyo ki lok madongo nyo otito lok i yo ma niang iye tek. Macalo adwogine, jo ma onongo gitye ka winyo lokke onongo gingeyo gin me atima ki kit me timone. Me labolle, nen kong kit ma  Yakobo opwonyo kwede i yo mayot ni Lukricitayo myero gubed atera me kanyo tim maraco labongo dongo kec cwiny. En ocoyo ni: “Jo ma yam guciro matek, walwongogi ni lugum kom. Wutyeko winyo bene kit macalo Yubu yam ociro kwede can, dok wuneno agikki me tic pa Rwot [Jehovah] i kome, kit ma Rwot won kica timo kwede ber bot dano.” (Yak. 5:11) Nen ni Yakobo ojenge i kom Ginacoya me pwonyo utmegine. En otiyo ki Lok pa Lubanga me konyo jo ma gitye ka winyo lokke me neno ni Jehovah kare ducu miyo mot bot jo ma gitye lugen bote, calo Yubu. Yakobo opwonyo lok meno kun tiyo ki nyig lok ma niang iye yot. I yo meno, en pe oywayo tam pa dano i kome, ento i kom Jehovah.

10. I yo mene ma watwero lubo kwede lanen pa Yakobo ka watye ka pwony?

¹⁰Pwony ma wanongo: Wek kwenani obed ma niang iye yot, dok jenge i Lok pa Lubanga. Ka wapwonyo jo mukene, yubwa pe myero obed me nyutigi ngec ma watye kwede, ento omyero wanyutigi ngec ma Jehovah tye kwede ki dok kit ma en paro kwede pigi. (Rom. 11:33) Watwero cobo yub meno ka lokwa ducu jenge i kom Ginacoya. Me labolle, me ka waco ki lutino kwanwa me Baibul gin ma onongo wabitimo, omyero wakonygi me tam i kom labol mogo me Baibul ki me niang tam pa Jehovah ki kit ma en winyo kwede. Man biweko giketo i tic jami ma gitye ka pwonyone pien nongo gimito yomo cwiny Jehovah, ento pe cwinywa.

11. Pekki ango ma onongo Lukricitayo mogo gitye kwede i kare pa Yakobo, dok tira ango ma en omiyogi? (Yakobo 5:13-15)

¹¹Yakobo obedo ki neno mupore. Ki i waragane, nen ka maleng ni Yakobo onongo ngeyo pekki ma omegine ki lumegine onongo gitye ka kato ki iye, dok en ominigi tira atyer i kom gin ma omyero gutim. Me labolle, Lukricitayo mogo onongo gigalle agala ki keto tira i tic. (Yak. 1:22) Jo mukene onongo gidworo kor lulonyo. (Yak. 2:1-3) Jo mukene onongo ginongo tek me juko lebgi. (Yak. 3:8-10) Lukricitayo magi onongo gitye ki pekki madongo, ento Yakobo obedo ki gen ni gitwero timo alokaloka. En omiyo tirane ki kica ento labongo mungu lok mo, dok ocuko cwiny jo ma gimito kony me penyo luelda pi kony me timo alokaloka.—Kwan Yakobo 5:13-15.

12. Watwero bedo ki neno mupore nining ka watye ka konyo lutino kwanwa me Baibul?

¹²Pwony ma wanongo: Bed ki neno mupore, ento pe irweny gen i kom jo mukene. Twero bedo tek ki jo mapol ma wakwano Baibul kwedgi me keto tira me Baibul i tic. (Yak. 4:1-4) Gitwero tero kare me juko timo jami maraco ki me dongo kit pa Lukricitayo. Calo Yakobo, mitte ni wabed ki tekcwiny me waco ki lutino kwanwa ka kwene ma myero gutim alokaloka iye. Mitte bene ni pe warweny gen i komgi, kun wageno ni Jehovah binyiko jo mamwol cok kwede dok bimiyo botgi teko me timo alokaloka ma mitte i kwogi.—Yak. 4:10.

13. Kit ma kinyuto kwede i Yakobo 3:2, gin ango ma Yakobo oniang iye?

¹³Yakobo obedo ki neno mupore i kome kekene. Yakobo pe otamo ni pire tek loyo Lukricitayo mukene-ni pien ni ebedo omin Yecu nyo pi mot me tic ma etye kwede-ni. En olwongo Lukricitayo mukene ni “utmegina ma amaro.” (Yak. 1:16, 19; 2:5) En pe otimme calo pe etye ki roc. Me ka meno, i kare ma en owaco ni,  “Wan ducu ngat acel acel timo lwak roc mapol,” en kikome bene okette i kingi.—Kwan Yakobo 3:2.

14. Pingo omyero wabed atera me ye balwa?

¹⁴Pwony ma wanongo: Wi opo ni wan ducu watye lubalo. Pe myero watam ni wan dok waber waloyo jo ma wapwonyogi. Pingo? Ka waweko latin kwanwa otamo ni pe watimo bal mo, cwinye twero tur woko pien nongo en tamo ni pe etwero tic pi Lubanga labongo timo bal mo. Ento ka waye ni pe obedo yot piwa me lubo cik ma igi lac me Baibul dok watito kit ma Jehovah okonyowa kwede me timo alokaloka i kwowa, wabikonyo latin kwanwa me neno ni en bene etwero tic pi Jehovah.

15. Kodi lapor mene ma Yakobo otiyo kwedgi? (Yakobo 3:2-6, 10-12)

¹⁵Yakobo otiyo ki lapor ma ogudo cwiny dano. Labongo akalakala mo cwiny maleng okonye, ento en bene nen calo opwonyo jami mapol ki kwano lapor ma omine madit, Yecu otiyo kwede. Lapor ma Yakobo otiyo kwede i waraga ma en ocoyo giyot adada, dok pwony ma nonge iye nen ka maleng.—Kwan Yakobo 3:2-6, 10-12.

16. Pingo omyero wati ki lapor ma gudo cwiny dano?

¹⁶Pwony ma wanongo: Ti ki lapor ma gudo cwiny dano. Ka itiyo ki lapor ma rwatte, dano pe giwinyo mere pwony ma imito ni guniang keken, ento bene gigoyo calle i wigi. Cal magi gikonyo jo ma winyo lokki wek wigi opo i kom pwony ma pigi tego me Baibul. Yecu onongo obedo ladiro adada i tic ki lapor ma gudo cwiny dano, dok omine Yakobo olubo lanene. Kong dong wanyamu lapor acel ma Yakobo otiyo kwede dok wanen pingo lapor meno tiyo maber adada.

17. Pingo lapor ma kicoyo i Yakobo 1:22-25 gudo cwiny dano?

¹⁷ Kwan Yakobo 1:22-25. Lapor pa Yakobo i kom kiyo gudo cwiny dano pi tyen lok mapol. En onongo tye ki pwony ma mito ni dano oniang iye, ma en aye ni, me nongo adwogi maber ki i Lok pa Lubanga, omyero pe wagik ki kwanone keken; omyero waket gin ma wakwano i tic. Yakobo oyero lapor ma jo ma winyo lokke gitwero niang iye oyotoyot—lapor pa  dano ma tye ka ngiyo wange i kiyo. Man aye pen lokke: Pe obedo gin ma nyuto ryeko ka ngat mo ongine kekene i kiyo, oneno bal mo ma myero oyubbi, ci oa ocito woko labongo yubone. I yo acel-lu, pe nyuto ryeko ka wakwano Lok pa Lubanga, waneno gin mo ma omyero watim alokaloka iye madok i kom kitwa, ento pe watimo gin mo iye.

18. Jami adek mene ma omyero watim ka watye ka tic ki lapor?

¹⁸ Ka itye ka tic ki lapor, iromo lubo lanen pa Yakobo ka itimo jami adek magi: (1) Nen ni lapor meno rwatte ki pwony ma itye ka nyamone. (2) Ti ki lapor ma jo ma tye ka winyo lokki gitwero niang iye oyotoyot. (3) Wek kit ma gitwero keto kwede lapor meno i tic onen ka maleng. Ka inongo ni tek me tamo i kom lapor ma opore, tim kwed i Watch Tower Publications Index. I te wi lok me “Lapor,” ibinongo lapor mapol adada ma itwero tic kwedgi. Ento wi myero opo ni, lapor bedo calo lakub dwan—giweko pwony ma itye ka nyamone cung woko ka maleng. Pi meno, nen ni itiyo ki lapor i kom pwony ma pigi tego keken ma imito ni dano oniang iye. Ngene kene ni, tyen lok ma pire tek loyo mumiyo wamito dongo dirowa me pwony pe obedo me ywayo tam pa dano i komwa, ento me konyo jo mapol kit ma watwero me doko jo me ot pa Jehovah.

19. Watwero nyuto nining ni wamaro omegiwa ki lumegiwa?

¹⁹ Yakobo onongo tye ki omine madit ma pe ki roc, ento wan wape kwede. Kadi bed kit meno, watye ki mot me tic pi Jehovah kacel ki omegiwa ki lumegiwa mapol adada. Wanyuto marwa pigi ka waribbe kwedgi, wanongo pwony ki botgi, dok watiyo kacel kwedgi i tic me tito kwena ki pwony. Ka watute me lubo lanen pa Yakobo i cwiny ma wanyuto, kitwa, ki yo me pwonywa, wakelo deyo bot Jehovah dok wakonyo jo ma cwinygi atir me nyikke cok ki Wonwa me polo ma lamar-ri.