1-3. Jami mene ma twero weko wakok?

AWENE ma igiko kok iye? I kare mogo wakok pien cwinywa yom. Ento pol kare wakok pien cwinywa tye ka cwer. Me labolle, watwero kok pien danowa me amara oto. Laminwa ma nyinge Lorilei, ma bedo i lobo Amerika ocoyo ni: “I kare mogo onongo cwinya cwer adada pi to pa nyara ma gin mo keken pe twero kweyo cwinya. I kare meno, onongo awinyo ni pe atwero kanyone.” *

² Watwero kok pi tyen lok mukene bene. Laminwa ma nyinge Hiromi, dok tye lapainia i lobo Japan, owaco ni: “I kare mogo cwinya cwer adada pien jo ma atito kwena botgi pe gitye ki miti me winyo lok me Baibul. Kare mogo alego bot Jehovah kun akok ki pig wanga ni okonya anong ngat mo ma tye ka yenyo ada.”

³ Tika in bene iwinyo calo lumegiwa magi? Pol pa wan wawinyo kit meno. (1 Pet. 5:9) Wamito ni ‘wati bot Jehovah ki yomcwiny,’ ento i kare mogo wakok pien danowa me amara oto, cwinywa otur, nyo watye ka kato ki i pekki ma weko bedo tek piwa me bedo lugen bot Lubanga. (Jab. 6:6; 100:2) Gin ango ma watwero timo ka wawinyo kit man?

4. Gin ango ma wabinyamo i pwony man?

⁴ Watwero nongo pwony ki i lanen pa Yecu. I kare mogo, Yecu okato ki i jami ma oweko en “okok ki pig wange.” (Jon 11:35; Luka 19:41; 22:44; Ibru 5:7) Kong wanyamu  jami magi. Ka wawoto ki nyamogi, wabineno pwony ma watwero nongone. Wabineno bene gin ma watwero timo ka watye ka kato ki i jami ma weko wakok.

5. Gin ango ma wapwonyo ki bot Yecu ma lubbe ki lok ma kicoyo i Jon 11:32-36?

⁵ I cwir me mwaka 32 K.M., larem Yecu me amara ma nyinge Lajaro kome odoko lit ci oto woko. (Jon 11:3, 14) Lajaro onongo tye ki lumegine aryo, Maliam ki Marita, dok Yecu onongo maro jo gang man adada. Lumege aryo magi onongo cwinygi otur adada pi to pa omingi. I nge to pa Lajaro, Yecu ocito i caro ma kilwongo ni Betania, ka ma Maliam ki Marita gibedo iye. I kare ma Marita owinyo ni Yecu tye ka bino, en oringo oyotoyot ka rwatte kwede. Go kong kit ma cwinye onongo otur kwede i kare ma owaco ni: “Rwot, kono nene itye kany, kono omera pe oto.” (Jon 11:21) Ma pe orii i kare ma Yecu oneno Maliam ki jo mukene ka koko, en bene “okok ki pig wange.”—Kwan Jon 11:32-36.

6. Pingo Yecu okok i nino meno?

⁶ Pingo Yecu okok i nino meno? Buk me Insight on the Scriptures gamo lapeny man ni: “To pa lareme Lajaro kacel ki arem ma okelo i kom lumegi Lajaro oweko Yecu ‘okok ki pig wange.’” * Yecu nen calo obedo ka tamo arem ma lareme me amara Lajaro okato ki iye i kare ma kome lit kacel ki kit ma Lajaro owinyo kwede i kare ma en oniang ni ebito woko. Labongo akalakala mo, Yecu bene okok pien oneno kit ma to pa Lajaro ogudo kwede Maliam ki Marita. Ka laremi nyo wati mo macok oto, ci in bene nongo ikato ki i arem ma kit man. Nen kong jami adek ma itwero pwonyo ki i gin ma otimme man.

7. Gin ango ma wapwonyo madok i kom Jehovah ki i koko pa Yecu i kare ma lareme oto?

⁷Jehovah niang kit ma iwinyo kwede.  Yecu obedo “cal” pa Wonne kikome. (Ibru 1:3) I kare ma Yecu okok, en onyuto kit ma Jehovah winyo kwede ka danowa me amara oto. (Jon 14:9) Ka danoni me amara oto, ci itwero bedo ki gen ni Jehovah neno dok niang arem cwiny ma itye ka kato ki iye. En mito cango cwinyi ma otur-ri.—Jab. 34:18; 147:3.

8. Pingo watwero moko ki tekcwiny ni Yecu bicero jowa me amara ma guto?

⁸Yecu mito cero joni me amara ma guto. Ma peya Yecu okok, en ocuko cwiny Marita ni: “Omeru bicer.” Marita oye lok pa Yecu meno. (Jon 11:23-27) Pien en onongo lawor Jehovah, Marita onongo ngeyo ni lunebi Elia ki Elica gucero dano i kare mukato. (1 Luker 17:17-24; 2 Luker 4:32-37) Dok nen calo en bene owinyo pi nicer mogo ma Yecu onongo otimo. (Luka 7:11-15; 8:41, 42, 49-56) In bene itwero bedo ki tekcwiny ni ibineno danoni me amara ma guto odoco. Dong, gin ango ma wapwonyo pien Yecu okok i kare ma tye ka cuko cwiny lureme ma gitye ka kumu. Wapwonyo ni en tye ki miti madit adada me cero jo muto!

9. Calo Yecu, itwero konyo jo ma gikumu nining? Mi labol.

⁹In bene itwero konyo jo ma gikumu. Yecu pe okok kacel ki Marita ki Maliam keken, ento en bene owinyo lokgi dok ocuko cwinygi. Wan bene watwero timo kit meno bot jo ma gitye ka kumu. Dan, ma tye laelda dok bedo i lobo Australia, owaco ni: “I kare ma dakona oto, onongo amito kony. Omege mapol ki mongi onongo kare ducu gitye atera me winyo loka. Gumiya kare me tito arem ma tye i cwinya, dok lewic pe omakogi i kare ma akok ki pig wanga. Dok gukonya ki tiyo tic mogo calo lwoko mutoka, wilo cam, kacel ki tedo dek i kare ma onongo awinyo ni pe atwero tiyo tic magi pira kena. Gulego kacel kweda bene. Gunyuto ni gibedo lurem me ada dok utmege ma ‘ginywalo me nywako peko.’”—Car. 17:17.

10. Tit gin ma otimme ma kicoyo i Luka 19:36-40.

¹⁰ Yecu oo i Jerucalem i nino dwe 9 me Nican, mwaka 33 K.M. I kare ma en tye ka wot kun nyiko cok ki boma man, lwak gucokke ci dano gucako peto ginarukagi i nyime i wang yo me jole macalo Kabakagi. Labongo akalakala mo, meno obedo kare me yomcwiny adada. (Kwan Luka 19:36-40.) Pi meno lupwonnyene nen calo pe gubyeko gin ma otimme i ngeye. Baibul tito ni, “Ka dong [Yecu] onyiko cok, ma oneno gang, okok pire.” Ki pig wange, Yecu otito jami maraco ma onongo bitimme ma pe orii i kom jo ma i Jerucalem.—Luka 19:41-44.

11. Pingo Yecu okok pi jo ma onongo gibedo i Jerucalem?

¹¹ Cwiny Yecu ocwer pien en onongo ngeyo ni kadi bed dano gujole ki yomcwiny, pol pa Lujudaya onongo pe gibijolo kwena me Ker-ri. Macalo adwogine, Jerucalem onongo kibijwerone dok Lajudaya mo keken ma biloyo kibimako macalo opii. (Luka 21:20-24) Ki cwercwiny, kit ma Yecu owaco kwede, pol pa dano gukwere woko. Pol pa dano ma i wang ticwu gidok i kwena maber me Ker-ri nining? Ka jo manok keken aye gijolo tuteni me pwonyogi ada, ci gin ango ma itwero pwonyo ki bot Yecu i kare ma en okok pi jo me en tito kwena botgi? Nen kong dok jami adek mukene ma itwero pwonyo.

12. Gin ango ma wapwonyo madok i kom Jehovah ki i koko pa Yecu pi jo ma en otito kwena botgi?

 ¹²Jehovah paro pi dano. Koko pa Yecu poyo wiwa i kom kit ma Jehovah paro kwede pi dano. Baibul tito ni, “En pe mito ni ngat mo orweny woko matwal, ento mito ni jo ducu guo i ningut.” (2 Pet. 3:9) I kare-ni, wanyuto ni wamaro luwotwa ka kare ducu watute me konyogi me pwonyo lok ada madok i kom Ker-ri.—Mat. 22:39.

13-14. Yecu onyuto ni eparo pi dano nining, dok wan watwero dongo kit meno nining?

¹³Yecu otiyo matek i tic me pwony. En onyuto marre pi dano ki medde ki pwonyogi i cawa mo keken ma owec bote. (Luka 19:47, 48) Gin ango ma otugo cwinye me timo meno? Kica omako Yecu i komgi. I kare mogo onongo dano mapol adada gimito winyo lok pa Yecu ma oweko en kacel ki lupwonnyene onongo “pe gitwero nongo kare me cam.” (Mar. 3:20) Dok i kare ma laco mo acel mito lok ki Yecu i dyewor, Yecu onongo tye atera me rwatte kwede. (Jon 3:1, 2) Pol pa dano ma guwinyo pwony pa Yecu pe gudoko lupwonnyene. Ento jo ducu ma en omiyo caden botgi, guniang pwonye maber. I kare-ni wan bene wamito ni wami ki dano ducu kare me winyo kwena maber. (Tic 10:42) Me timo man, twero mitte ni walok yo ma watito kwede ki kwena.

¹⁴Bed atera me timo alokaloka. Ka pe waloko cawa ma watito iye kwena, ci pe wabirwatte ki jo mogo ma gimito winyo kwena maber. Lapainia mo ma nyinge Matilda owaco ni: “An kacel ki cwara watito kwena bot dano i cawa mapatpat. I odiko, watito kwena i wang tic ka ma kitimo iye biacara. I dyeceng i cawa ma nongo dano tye mapol ka wot i gudi, watiyo ki lalor bukke. I otyeno, wanongo ni yot me nongo dano i gangigi.” Pe omyero wabed atera me tito kwena i cawa ma opore piwa keken, ento omyero watit kwena i cawa ma nongo watwero rwatte ki dano mapol. Ka watimo meno, watwero bedo ki gen ni cwiny Jehovah bibedo yom adada.

15. Gin ango ma otimme i dyewor me agikki me kwo pa Yecu kit ma kitito kwede i Luka 22:39-44?

¹⁵ I otyeno me Nican 14, mwaka 33 K.M., Yecu ocito i poto me Gececemane. Ki kunu, en olego bot Jehovah ki cwinye ducu. (Kwan Luka 22:39-44.) I cawa meno aye Yecu “ocwalo legane bot Lubanga . . . kun bako doge ma pe twere ki koko ki pig wange.” (Ibru 5:7) Gin ango ma Yecu olego pire i dyewor meno ma peya en oto? En olego pi teko me timo miti pa Jehovah ki gwoko genene bote. Jehovah owinyo lega pa Wode ma oa ki i cwinye ci ocwalo lamalaika me jingo cwinye.

16. Pingo Yecu onongo tye ki par madwong adada i kare ma en tye i poto me Gececemane?

¹⁶ Labongo akalakala mo, Yecu okok i kare ma tye ka lega i poto me Gececemane pien cwinye otur ni dano onongo gibinene macalo ngat ma pe woro nying Lubanga. En bene onongo ngeyo kit ma pire tek kwede ni omyero egwok genene wek elony nying Wonne. Ka itye ka kato ki i peko mo ma weko bedo tek boti me gwoko geneni bot Jehovah, ci gin ango ma itwero pwonyo ki i koko pa Yecu? Nen kong pwony adek mukene ma wanongo.

17. Gin ango ma wapwonyo i kom Jehovah ki i kit ma en ogamo kwede lega pa Yecu ma olego ki cwinye ducu?

¹⁷Jehovah winyo legani me bako dog. Jehovah owinyo lega pa Yecu. Pingo? Pien gin ma pire onongo tek loyo bot Yecu aye obedo gwoko genene bot Wonne ki lonyo Nyinge. Ka gin ma pire tek loyo botwa obedo me gwoko genewa ki lonyo nying Jehovah, ci en bigamo legawa pi kony.—Jab. 145:18, 19.

18. I yo ma nining ma Yecu tye calo larem ma lakica dok ma niang pekowa?

¹⁸Yecu niang kit ma iwinyo kwede. Ka par odiyowa, pol kare wabedo ki yomcwiny ka tye laremwa mo ma niang kit ma wawinyo kwede, tutwalle ka en bene okato ki i peko acel-li. Yecu obedo larem meno. En ngeyo kit ma iwinyo kwede ka igoro dok imito kony. En niang gorowa, dok en bineno ni wanongo kony ma wamito “i kare ma mitte.” (Ibru 4:15, 16)  Kit macalo Yecu ojolo kony ki bot lamalaika i poto me Gececemane, wan bene omyero wabed atera me jolo kony ma Jehovah miyo ki i bukkewa, vidio, pwony pi lwak, nyo lim ma ocuko cwinywa ki bot laelda nyo laremwa mo ma otegi i yo me cwiny.

19. Itwero nongo teko nining ka itye ka kato ki i peko mo ma temo geneni bot Lubanga? Mi labol.

¹⁹Jehovah bimini ‘kuc pa Lubanga.’ Jehovah bijingowa nining? Ka walego, wabinongo “kuc pa Lubanga ma kato ngec pa jo ducu.” (Pil. 4:6, 7) Kuc ma Jehovah miyo kweyo cwinywa dok weko wabedo ki wic ma opye mot. Man aye gin ma lamego mo ma nyinge Luz oneno. En owaco ni: “Pol kare awinyo ni atye kickic. I kare mogo tam ma kit man weko awinyo ni Jehovah pe mara. Ento ka atye ka winyo kit meno, atito ki Jehovah cutcut kit ma winyo kwede. Lega konya weko awinyo maber.” Kit ma gin ma otimme i kom laminwa-ni nyuto kwede, watwero bedo ki kuc ka walego.

20. Gin ango ma wapwonyo ki i koko pa Yecu?

²⁰ Pud dong tye pwony mapol ma cuko cwinywa ya ma watwero nongo ki i pig wang Yecu! Kipoyo wiwa ni omyero wacuk cwiny luremwa ma gikumu dok wagen Jehovah ki Yecu ni gibikonyowa ka danowa me amara oto. Kicuko cwinywa me nyuto cwiny me kica ka watye i ticwa me pwony pien Lubanga Jehovah kacel ki Yecu Kricito gin bene ginyuto kit mamwonya man. Dok wanongo cuko cwiny ki i ngeyo ni Jehovah kacel ki Wode me amara giniang pekowa ki gorowa, dok gimito konyowa me kanyo. Walego ni wan ducu wamedde ki keto i tic pwony ma wanongo wang ma Jehovah ‘ojwayo pig wangwa woko ducu’!—Yabo 21:4.