1-2. Pingo wabedo tye i kwer me Nipo mwaka ki mwaka?

 MWAKI ma romo 2,000 angec, Yecu omiyo kwone piwa, dok man oyabiwa yo me nongo kwo ma pe tum. I dyewor ma peya en oto, Yecu ociko lulub kore ni omyero gupo pi gityer me mar ma en omiyo pigi ki yubo kwer mo mayot ma kwako mugati ki kongo vino.—1 Kor. 11:23-26.

² Walubo lok pa Yecu meno pien wamare matek adada. (Jon 14:15) Mwaka ki mwaka, i cabit mogo ma peya Nipo otimme ki dok i ngeye, wanyuto pwocwa pi gin ma Yecu otimo piwa ki kwanyo cawa me lega kun walwodo tyen lok me tone. Ki yomcwiny, wamedo cawawa i tic me pwony, kun wacuko cwiny jo mapol kit ma watwero me ribbe kwedwa i kwer man ma kite dok pat-ti. Dok labongo akalakala mo, wamoko tamwa pe me ye ni gin mo keken ogengwa ki bedo tye i kwer me Nipo.

3. Gin ango ma wabinyamo i pwony man?

³ I pwony man, wabinyamo jami adek ma nyuto ni jo pa Jehovah gitute matek me kwero to pa Yecu: (1) ki kwero Nipo kit ma Yecu opwonyogi me timo kwede, (2) lwongo dano me bino i Nipo, ki dong (3) kwero Nipo kadi bed ariya tye.

4. Lok ada mene ma kipwonyo mwaka ki mwaka i kwer me Nipo, dok pingo pe omyero water lok ada magi tuko tuko? (Luka 22:19, 20)

⁴ Mwaka ki mwaka i kwer me Nipo, wawinyo pwony ma kikwanyo ki i Baibul ma gamo lapeny mapatpat ma  watye kwede. Wapwonyo pingo dano mito ginkok ki kit ma to pa ngat acel twero kwanyo kwede bal pa jo mapol. Kipoyo wiwa i kom gin ma mugati ki kongo vino gicung pire ki dok angagi ma myero gucam dok gumati. (Kwan Luka 22:19, 20.) Dok walwodo mot mamwonya ma tye ka kuro jo ma gitye ki gen me kwo pi naka i lobo. (Ic. 35:5, 6; 65:17, 21-23) Omyero pe water lok ada magi tuko tuko. Dano bilion mapol pe gingeyo lok ada magi, dok pe gineno ginkok pa Yecu calo gin ma pire tek adada. Pe bene gikwero Nipo me tone kit ma en opwonyo ki lulub kore ni gutim kwede. Pingo tye kit meno?

5. I nge to pa lukwena pa Yecu, i yo ma nining ma dano gucako kwero kwede Nipo?

⁵ Ma pe orii i nge to pa lukwena pa Yecu, Lukricitayo ma lugoba gudonyo i kacokke. (Mat. 13:24-27, 37-39) Guwaco ‘lok ma ngako dano ci gubwolo lupwonnye wek gulubo korgi.’ (Tic 20:29, 30) “Lok ma ngako dano” ma Lukricitayo ma lugoba gubedo ka pwonyo aye ni, Yecu pe “otyerre kene kicel [keken] me tingo bal pa jo mapol,” kit ma Baibul waco kwede, ento ni omyero kibed ka tyero gityer meno teretere. (Ibru 9:27, 28) I kare-ni, dano mapol ma cwinygi tye atir giye pwony goba meno. Gigure i kanicagi kare ki kare—nyo nino ki nino—me kwero gin ma gilwongo ni “Kommunio Maleng [Eukaristia].” b Kanica mogo pa Lukricitayo ata-ni pe gikwero to pa Yecu teretere calo mukene, ento pol pa dano me kanica magi pe giniang maber tyen lok me gityer pa Yecu. Jo mogo i kingi gipennye kekengi ni, ‘Tika ada to pa Yecu twero weko kitimma kica pi balla?’ Pingo gipennye ki lapeny ma kit meno? Pien jo ma pe giye ni to pa Yecu twero jwayo bal pa dano gubwologi dok guye goba meno. Lulub kor Yecu me ada gitye ka konyo dano nining me niang tyen lok me ginkok pa Yecu ki kit me kwero Nipo?

6. Me o i mwaka 1872, lok ada mene ma lutino kwan me Baibul onongo dong guniang?

⁶ I mwaka 1870, gurup pa lutino kwan me Baibul ma onongo Charles Taze Russell aye telogi gucako kwano Baibul i yo matut. Gin onongo gimito ngeyo ada madok i kom ber pa ginkok ma Yecu omiyo ki kit ma Nipo me tone omyero kipo kwede. Me o i mwaka 1872, onongo dong guniang woko ka maleng ni Yecu omiyo ginkok ki dano ducu. Pe gukano lok ada meno ki bot lwak. Ento me ka meno, gin gutito pire bot dano kun gitiyo ki bukke, gajeti, ki magajin mapol. Dok ma pe orii, gin gulubo lanen pa Lukricitayo me cencwari me acel, ci gucako cokke kicel i mwaka acel me kwero Nipo.

7. Adwogi maber ango ma watye ka nongone ki i kwed pa lutino kwan me Baibul macon magi?

⁷ I kare-ni, wanongo adwogi maber ki i gin ma Lukricitayo magi gukwedo mwaki mapol angec. Man twere nining? Jehovah okonyowa me niang tyen lok me gityer pa Yecu kacel ki adwogine piwa ki pi dano ducu. (1 Jon 2:1, 2) Wapwonyo bene ni Baibul miyo gen aryo mapatpat pi dano ma giyomo cwiny Lubanga—gen me kwo labongo to i polo ki gen me kwo pi naka bot dano milion mapol i lobo. Wanyikke cok ki Jehovah ka wanyamo  kacel kit ma en marowa kwede ki adwogi maber ma wanongo ki i gityer pa Yecu. (1 Pet. 3:18; 1 Jon 4:9) Calo utmegiwa ma lugen magi, wan bene walwongo dano me bino ka ribbe kwedwa i kwero Nipo kit ma Yecu ociko lulub kore ni gutim kwede.

8. Gin ango ma jo pa Jehovah gutimo me lwongo dano pi kwer me Nipo? (Nen cal.)

⁸ Jo pa Jehovah dong gulwongo dano me bino ka ribbe kwedgi i kwero Nipo pi mwaki mapol adada. Cakke wa con i mwaka 1881, lok angeya ma okatti i Watchtower olwongo omege ki lumege ma i lobo Amerika me cokke kacel i gang pa omego mo i Allegheny, Pennsylvania, pi kwer man. Lacen, kacokke acel acel ocako keto yub me kwero Nipo pigi kengi. I Marci 1940, kiwaco ki lutit kwena ni gitwero lwongo ngat mo keken ma onyuto miti ki i wang ticgi. Pi tyen mukwongo i mwaka 1960, Betel ocwalo i kacokke mapatpat waraga ma kirudo me lwongo dano. Cakke i kare meno, kopi bilion mapol me waraga me lwongo pi Nipo dong kipoko i kin piny. Pingo wacwalo cawa ki kero madwong me lwongo jo mukene pi kwer me Nipo?

9-10. Angagi ma ginongo adwogi maber ki i tutewa me lwongo dano pi kwer me Nipo? (Jon 3:16)

⁹ Tyen lok mumiyo walwongo dano me bino ka kwero Nipo kacel kwedwa aye ni, wamito ni gupwony lok ada madok i kom gin ma Jehovah ki Yecu gutimo piwa. (Kwan Jon 3:16.) Genwa tye ni jami ma gibineno ki ma gibiwinyo i Nipo, biweko  gibedo ki miti me pwonyo jami mukene mapol ki me doko lutic pa Jehovah. Ento tye jo mukene bene ma ginongo adwogi mabeco.

¹⁰ Walwongo bene jo ma yam con gutiyo pi Jehovah ento lacen ticgi okwe woko. Watimo meno pien wamito ni wigi opo ni Lubanga pud marogi matek. Polgi gijolo lwongowa, dok cwinywa bedo yom adada me nenogi. Bedo tye i Nipo poyo wigi i kom kit ma tic pi Jehovah i kare mukato angec oyomo kwede cwinygi. Nen kong labol pa Monica. c En ocako tic odoco macalo latit kwena i kare me two Korona. I nge bedo tye i Nipo me mwaka 2021, en owaco ni: “Nipo man i wang-ngi obedo mwonya adada pira. Pi tyen mukwongo i nge mwaki 20, abedo ki kare me tito kwena bot dano dok alwongogi i Nipo. Atute ki kerona ducu me lwongogi pien atye ki pwoc madit adada pi gin ma Jehovah gin ki Yecu gutimo pira.” (Jab. 103:1-4) Kadi bed dano gujolo lwongowa nyo pe, watimo jami ducu ma watwero me lwongo dano ka kwero Nipo, pien wangeyo ni Jehovah pwoyo tutewa.

11. Jehovah ogoyo laane i kom tutewa nining me lwongo dano pi kwer me Nipo? (Aggai 2:7)

¹¹ Jehovah ogoyo laane i kom tutewa me lwongo dano me bino i Nipo. I mwaka 2021, kadi bed kigeng onongo tye pi two Korona, dano 21,367,603 gubedo tye pi kwero Nipo dok man obedo wel dano madwong loyo ma wabedo kwede me o i mwaka meno. Wel man mito dodo wel Lucaden pa Jehovah ducu ma i wi lobo tyen aryo ki nucu kulu! Ngene kene ni, Jehovah pe tye ki miti i kom wel dano ma gubedo tye keken ento bene i kom ngat acel acel ma obino. (Luka 15:7; 1 Tem. 2:3, 4) Watwero bedo ki gen ni ka wapoko waraga me lwongo bot dano, ci Jehovah bikonyowa me nongo jo ma cwinygi atir.—Kwan Aggai 2:7.

12. Ngo ma twero weko bedo tek piwa me kwero Nipo? (Nen cal.)

¹² Yecu otito ni i kare me agikki, wabibedo ki pekki mapol—adage ma a ki bot wadiwa, aunauna, lweny, two, kacel ki pekki mukene. (Mat. 10:36; Mar. 13:9; Luka 21:10, 11) I kare mogo, pekki magi weko pe bedo yot piwa me kwero to pa Yecu. Ngo ma omege ki lumege gutimo me loyo ariya magi dok Jehovah okonyogi nining?

13. Jehovah ogoyo laane nining i kom tekcwiny ki tute pa Artem me kwero Nipo i kare ma en tye i buc?

¹³ Bedo i buc. Omegiwa ma kitweyogi i buc pi niyegi gitimo jami ducu ma gitwero me kwero to pa Yecu. Nen kong labol pa omego Artem. I kare me Nipo me mwaka 2020, onongo kitweye i ot buc mo ma borre ki lacce romo mita 4, ma onongo i kare mukene bedo ki lumabuc abic nyo abicel. Kadi bed en onongo tye i buc, en otiyo ki jami ma twero nongone macalo mugati ki kongo vino, dok oyubbe woko me miyo pwony me Nipo pire kene. Ento lumabuc ma i ot meno onongo gimato taa dok gitiyo ki leb macilo adada. En otimo gin ango? En olegogi ni kong gujuk mato taa ki tic ki leb macilo pi cawa acel keken. Artem obed ki ur madit ni co magi guye ni pe gibimato taa nyo tic ki leb macilo i cawa me Nipo.  Artem owaco ni, “Adyere me tittigi lok i kom Nipo con.” Kadi bed guwaco ni pe gimito winyo pire, ento i nge neno ka Artem kwero Nipo, gucako pennye lapeny mapol.

14. Jo pa Jehovah gutute nining me kwero Nipo kadi bed two Korona onongo tek adada?

¹⁴ Two Korona. I kare ma two man ocakke, jo pa Jehovah onongo pe gitwero rwatte wang ki wang me kwero Nipo. Ento meno pe ogengogi ki kwero Nipo. d Kacokke ma onongo gitwero tic ki Intanet, gukwero Nipo kun gikubbe ki vidio. Ento lutit kwena milion mapol ata ma pe gitye ki Intanet kono? I lobe mogo, jang gang kal oketo yub wek dano gunen pwony me Nipo i telebijon nyo guwiny ki i redio. Medo i kom meno, jang gang kal mapatpat gumako pwony meno i leb makato 500 kulu wek kadi wa dano ma gibedo i caro ka mabor gukwer Nipo. Dok omege ma lugen gubedo ka tero pwony man ma kimako-ni bot omege ma i caro magi.

15. Ngo ma ipwonyo ki i labol pa latin kwan me Baibul ma nyinge Sue?

 ¹⁵ Adage ma a ki bot wadiwa. Ki bot jo mukene, ariya matek loyo ma twero gengogi kwero Nipo obedo adage ma a ki bot wadigi. Nen kong labol pa latin kwan me Baibul ma nyinge Sue. I mwaka 2021, ma odong nino acel me kwero Nipo, Sue otito ki lapwonye me Baibul ni pi adegadega ma tye ka a ki bot jo ganggi pe ebitwero bedo tye i Nipo. Lapwonye me Baibul okwano Luka 22:44. Ci otitte ni ka watye ka kato ki i kwo matek, omyero walub lanen pa Yecu kun walokke bote Jehovah i lega dok waketo genwa ducu i Kome. I nino me Nipo, Sue oyubo mugati ki kongo vino dok oneno Woro me Odiko i Nino me Nipo ki i jw.org. I otyeno meno, en ocito i ot butone ci owinyo pwony me Nipo ki i cimme. I ngeye, Sue ocoyo bot lapwonye me Baibul ni: “Icuko cwinya adada laworo. Atimo jami ducu ma atwero me bedo tye i Nipo, dok Jehovah okonya adada. Pe atwero tito yomcwiny ki pwoc madit ma atye kwede bot Jehovah!” Tika itamo ni Jehovah twero konyi me loyo peko ma kit meno?

16. Pingo watye ki gen ni Jehovah bigoyo laane i kom tutewa me bedo tye i Nipo? (Jo Roma 8:31, 32)

¹⁶ Jehovah pwoyo tutewa me kwero to pa Yecu. Watwero bedo ki gen ni en bigoyo laane i komwa ka wanyuto pwoc pi gin ma en otimo piwa. (Kwan Jo Roma 8:31, 32.) Dong wamoku tamwa me bedo tye i Nipo me mwaka-ni. Dok wamito ni wamed ticwa pi Jehovah i cabit mogo ma peya wakwero Nipo ki dok i ngeye.