1-2. (a) Watwero winyo nining ka watamo i kom kwo pa Yecu ki ticce me pwony? (b) Gin ango ma wabinyamo i pwony man?

 KA DANOWA me amara oto, wapare matek adada! I acakkine, watwero bedo ki arem cwiny madwong adada ka watamo i kom nino mogo manok ma ngat meno onongo peya oto, tutwalle ka onongo en tye i arem madwong. I nge kare mo, watwero cako bedo ki yomcwiny mo manok ka watamo i kom gin mo ma en opwonyowa nyo gin ma en owaco nyo otimo me cuko cwinywa nyo me yomo cwinywa.

² I yo acel-lu, cwinywa cwer ka wakwano lok i kom can malit ma Yecu odeno kacel ki tone. I kare me Nipo, wakwanyo kare me lwodo kit ma ginkok pa Yecu pire tek kwede. (1 Kor. 11:24, 25) Ento, wanongo yomcwiny madit ka walwodo i kom jami mapol ma Yecu owaco dok otimo i kare ma en tye i lobo. Cuko bene cwinywa ka watamo i kom jami ma en tye ka timone i kare-ni ki gin ma en bitimo piwa i anyim. Lwodo lok i kom jami magi kacel ki marre piwa twero tugo cwinywa me nyuto pwocwa i yo mapatpat, kit ma wabineno kwede i pwony man.

3. Tyen lok ango ma watye kwede me bedo ki pwoc pi ginkok?

³ Wabedo ki pwoc madit adada ka walwodo lok i kom kwo pa Yecu ki tone. I kare me ticce me pwony i lobo, Yecu opwonyo dano lok i kom jami mabeco mapol ma Ker pa Lubanga bitimone. Wamaro gin ma Baibul pwonyo i kom ginkok ki jami mabeco ma ginkok oweko twere. Watye ki pwoc madit pi ginkok pien oyabiwa yo me  bedo ki wat macok ki Jehovah kacel ki Yecu. Jo ma ginyuto niye i kom Yecu bene gitye ki gen me kwo pi naka ki me neno jogi me amara ma guto odoco. (Jon 5:28, 29; Rom. 6:23) Pe watimo gin mo ma weko wabedo ma wapore me nongo mot magi; dok pe waromo culo Lubanga ki Kricito pi jami mabeco ma gutimo piwa. (Rom. 5:8, 20, 21) Ento watwero nyutigi pwoc madit ma watye kwede. Watimo meno nining?

4. Maliam Lamagdala onyuto pwocce nining pi gin ma Yecu otimo pire? (Nen cal.)

⁴ Tam kong i kom labol pa dako mo ma Lajudaya ma nyinge Maliam Lamagdala. En onongo tye ka deno can malit adada pien cen maraco abiro onongo giune. En nen calo onongo winyo ni pe tye ngat mo keken ma twero konye. Dong go kong pwoc madit ma en obedo kwede i kare ma Yecu ogonye ki i te twec pa jogi magi! Pwoc ma en obedo kwede otugo cwinye me doko lalub kor Kricito ki me tic ki cawane, kerone, ki jamine me miyo kony bot Yecu i ticce me pwony. (Luka 8:1-3) Kadi bed Maliam obedo ki pwoc madit adada pi gin ma Yecu otimo pire, twero bedo ni en pe ongeyo ni Yecu bitimo makato meno pire i kare me anyim. Yecu onongo bimiyo kwone pi dano, “wek dano ducu ma ye en” obed ki kwo ma pe tum. (Jon 3:16) Kadi bed kit meno, Maliam pud onyuto pwocce bot Yecu ki bedo lagen. I kare ma Yecu onongo tye ka deno can i kom yat, Maliam ocung ka ngete, pien en onongo paro pi Yecu dok mito kweyo cwiny jo mukene ma gitye. (Jon 19:25) I nge to pa Yecu, Maliam ki mon aryo mukene gukelo moo ma ngwece kur i lyel pa Yecu me yubo kome. (Mar. 16:1, 2) Jehovah omiyo mot madit adada bot Maliam pi bedo lagen bot Yecu. Yecu orwatte ki Maliam i nge cerre dok oloko kwede. Man mot  ma lupwonnye manok keken aye gubedo kwede.—Jon 20:11-18.

5. Watwero nyuto pwocwa nining pi jami ducu ma Jehovah gin ki Yecu gutimo piwa?

⁵ Wan bene watwero nyuto pwoc pi jami ducu ma Jehovah ki Yecu gutimo piwa ka watiyo ki cawawa, kerowa, ki centewa me cwako tic me Ker-ri. Me labolle, watwero nywako i tic me gero ki roco odi me worowa.

6. Pingo watwero waco ni ginkok obedo mot bot wan ducu ki acel acel?

⁶ Ka walwodo kit ma Jehovah ki Yecu gimarowa kwede, man tugo cwinywa me marogi bene. (1 Jon 4:10, 19) Marwa pigi medde matek ka waniang ni Yecu oto piwa ki acel acel. Lakwena Paulo oye lok man dok onyuto pwocce i kare ma ocoyo bot jo Galatia ni: ‘Wod pa Lubanga ceng omara ka omine gire pire kene pira.’ (Gal. 2:20) Pien Yecu oto piwa, Jehovah twero nyikki cok bote wek idok lareme. (Jon 6:44) Tika man pe yomo cwinyi tutwal me ngeyo ni Jehovah oneno gin mo maber i cwinyi dok ni en oculo wel madit loyo ducu wek idok lareme? Tika man pe jingo mar ma itye kwede pi Jehovah ki Yecu? Dong pire tek ni wapennye kekenwa ni, ‘Mar meno bitugo cwinya me timo gin ango?’

7. Kit ma kinyuto kwede i cal-li, wan ducu watwero nyuto marwa pi Jehovah ki Yecu nining? (2 Jo Korint 5:14, 15; 6:1, 2)

⁷ Marwa pi Lubanga ki Kricito tugo cwinywa me maro jo mukene bene. (Kwan 2 Jo Korint 5:14, 15; 6:1, 2.) Yo acel ma wanyuto kwede mar meno aye ki nywako i tic me tito kwena ki mit kom. Waloko ki jo ducu ma warwatte kwedgi i tic me pwony. Pe wakwero lok ki ngat  moni pien ni en a ki i rok nyo kaka mapat. Dok waloko ki dano ducu kadi bed gin lulonyo dok gukwano, nyo gin lucan dok pe gukwano. Ka watimo meno, nongo watye ka tic ma rwatte ki miti pa Jehovah pien en “mito laro jo ducu, dok mito ni jo ducu gunge lok me ada.”—1 Tem. 2:4.

8. Watwero nyuto mar pi omegiwa ki lumegiwa nining?

⁸ Wanyuto bene marwa pi Lubanga ki Kricito ka wanyuto mar bot omege ki lumege. (1 Jon 4:21) Waparo pigi adada dok wakonyogi ka gitye ka kato ki i peko. Wakweyo cwinygi ka gurwenyo danogi me amara i to, walimogi ka komgi lit, dok watute matek me cuko cwinygi ka cwinygi otur. (2 Kor. 1:3-7; 1 Tec. 5:11, 14) Wamedde ki lega pigi pien wangeyo ni “lega pa dano ma kite atir tek, tye ki twero madwong.”—Yak. 5:16.

9. I yo mukene ango ma watwero nyuto kwede mar pi omegiwa ki lumegiwa?

⁹ Wanyuto bene mar pi omegiwa ki lumegiwa ka watute matek me gwoko kuc i kinwa. Watute matek me lubo lanen pa Jehovah me timo kica. Ka Jehovah onongo tye atera me miyo Wode me to pi balwa, ci tika omyero pe wabed atera me timo kica ki omegiwa ki lumegiwa ka gubalo i komwa? Pe wamito bedo calo opii ma kite rac ma Yecu oloko i kome i carolokke. Kadi wa i kare ma laditte oweko banya madit adada ma en onongo tye kwede, opii meno okwero timo kica ki opii lawote ma onongo tye ki banya mo matidi. (Mat. 18:23-35) Ka itye ki niang manok ki ngat mo me kacokke, tika ibikwanyo kare me yubo wat i kinwu ma peya wucito i kwer me Nipo? (Mat. 5:23, 24) Ka itimo meno, ibinyuto ni itye ki mar matut pi Jehovah ki Yecu.

10-11. Luelda gitwero nyuto mar pi Jehovah ki Yecu nining? (1 Petero 5:1, 2)

¹⁰ Luelda gitwero nyuto nining ni gimaro Jehovah ki Yecu? Yo acel ma pire tek aye ki kwayo romi pa Yecu maber. (Kwan 1 Petero 5:1, 2.) Yecu otito lok meno ka maleng bot lakwena Petero. I nge kwero Yecu tyen adek kulu, Petero nen calo onongo tye ki miti madit me nyuto ni emaro Yecu. I nge cere, Yecu openyo Petero ni: “Cimon wod pa Jon, in imara?” Watwero bedo ki gen ni Petero onongo tye atera me timo gin mo keken me moko ni ada emaro Laditte. Yecu owaco bot Petero ni: “Gwok romina.” (Jon 21:15-17) Dok pi kare me kwone ducu, Petero okwayo romi pa Yecu, ma meno onyuto ni ada en maro Yecu.

¹¹ Wun luelda, i cabit mogo ma peya kikwero Nipo ki dok i ngeye, wutwero nyuto nining ni lok ma Yecu owaco bot Petero-ni pire tek adada botwu? Wutwero nyuto marwu pi Jehovah ki Yecu ki kwanyo kare me cuko cwiny omege ki lumege ki bene konyo jo ma ticgi okwe woko me dwogo cen bot Jehovah. (Ejek. 34:11, 12) Wutwero bene cuko cwiny lutino kwan me Baibul ki jo mukene ma gubedo tye i Nipo. Wamito ni gubed agonya pien watye ki gen ni gin bene gibidoko lulub kor Yecu.

12. Pingo lwodo lok ma Yecu owaco i dyewor ma en peya oto miniwa tekcwiny? (Jon 16:32, 33)

¹² I dyewor ma en peya oto, Yecu owaco bot lupwonnyene ni: “I lobo wutye ki can; ento wudi cwinywu, an dong aloyo  lobo.” (Kwan Jon 16:32, 33.) Gin ango ma okonyo Yecu me nyuto tekcwiny i kare ma lumonene gubwuro kwone ki me gwoko gennene nio wa i to? En ojenge i kom Jehovah. Yecu olego Jehovah ni ogwok lulub kore pien onongo ngeyo ni gibikato ki i atematema marom. (Jon 17:11) Pingo meno miniwa tekcwiny? Pien Jehovah tek loyo lamonewa mo keken. (1 Jon 4:4) Jehovah neno jami ducu. Waye labongo akalakala mo keken ni ka wajenge i kom Jehovah, en twero konyowa me loyo lworowa ki me nyuto tekcwiny.

13. Yucepu me Arimataya onyuto tekcwiny nining?

¹³ Nen kong labol pa Yucepu me Arimataya. En onongo obedo dano ma Lujudaya giworo adada. En onongo obedo lamemba me Lukiko Madit pa Lujudaya. Ento, i kare me tic me pwony pa Yecu i lobo, Yucepu onongo pe ki tekcwiny. Jon owaco ni onongo “en lapwonnye pa Yecu, ento i mung pi lworo Lujudaya.” (Jon 19:38) Kadi bed Yucepu onongo tye ki miti madwong i kom kwena me Ker-ri, en okano woko ki bot jo mukene ni etye ki niye i kom Yecu. En nen calo obedo ki lworo ni dano pe gibiwore ka guniang ni ebedo lapwonnye pa Yecu. Ento, Baibul wacciwa ni i nge to pa Yecu, Yucepu “odiyo cwinye, ci odonyo wa bot Pilato, olego kom Yecu.” (Mar. 15:42, 43) Yucepu pe dong omedde ki bedo lapwonnye pa Yecu i mung.

14. Gin ango ma myero itim ka ilworo dano?

¹⁴ Tika in kare mukene ilworo dano kit ma Yucepu onongo lworo kwede dano? Ka itye i cukul nyo i ka ticci, tika lewic maki me nyutte bot jo mukene ni ibedo Lacaden pa Jehovah? Tika itye ka galle ki doko latit kwena nyo nongo batija pien itye ki lworo i kom gin ma jo mukene bitamo i komi? Pe iwek lworo ma kit meno ogengi ki timo gin ma ingeyo ni tye atir. Leg ki cwinyi ducu bot Jehovah. Penye wek omini tekcwiny me timo mitine. Ka iwoto ki neno kit ma Jehovah gamo kwede ki legani, ibinongo teko dok ibidongo tekcwiny bene.—Ic. 41:10, 13.

15. I nge Yecu nen bot lupwonnyene, yomcwiny ma gubedo kwede okonyogi me timo gin ango? (Luka 24:52, 53)

¹⁵ Lupwonnye pa Yecu cwinygi ocwer adada i kare ma en oto. Go kong ni ibedo ngat acel i kingi. Onongo pe gurwenyo  laremgi me amara keken, ento bene guwinyo calo gurwenyo gengi woko. (Luka 24:17-21) Ento, i kare ma Yecu onen botgi, en okwanyo kare me konyogi niang kit ma ecobo kwede lok pa lunebi me Baibul. En bene ominigi tic ma pire tek me atima. (Luka 24:26, 27, 45-48) I kare ma Yecu odok cen i polo i nge nino 40, cwercwiny pa lupwonnyene onongo olokke odoko yomcwiny. Cwinygi onongo yom adada pien gungeyo ni Yecu tye kwo dok ni en bikonyogi me cobo tic ma ominigi. Yomcwinygi okonyogi me pako Jehovah labongo ilo cinggi.—Kwan Luka 24:52, 53; Tic 5:42.

16. Watwero lubo lanen pa lupwonnye pa Yecu nining?

¹⁶ Watwero lubo lanen pa lupwonnye pa Yecu nining? Watwero nongo yomcwiny i woro Jehovah pe i kare me Nipo keken ento i kare ducu. Man tyen lokke ni omyero waket pi Ker pa Lubanga mukwongo i kwowa. Me labolle, jo mapol gudwoko piny cawa ma gicwalo i dog i ticgi wek gunywak i tic me pwony, gubed tye i cokke ducu, dok gubed ki woro pi jo me ot cabit ducu. Jo mogo gujalo jami me kom ma jo mukene neno calo pigi tek adada wek gumed ticgi i kacokke nyo gukob i kabedo mukene ka ma can lutit kwena tye iye. Kadi bed mitte ni wadi cwinywa wek wamedde ki tic pi Jehovah, en ocikke me goyo laane i komwa ka waketo pi Ker-ri mukwongo i kwowa.—Car. 10:22; Mat. 6:32, 33.

17. Gin ango ma imoko tammi me timone i kare man me Nipo? (Nen cal.)

¹⁷ Watye ki miti madit me kwero Nipo i Ceng Aryo, nino dwe 4 me April. Ento, pe ikur nio wa i nino meno ka icak lwodo lok i kom kwo ki to pa Yecu, kacel ki mar ma en ki Jehovah gunyuto piwa. Lwod lok i kom jami magi i cabit mogo ma peya kikwero Nipo ki dok i ngeye. Me labolle, kwany kare me kwano ki lwodo jami ma kititogi i chart ma wiye tye ni “Cabit pa Yecu me Agikki i Lobo,” ma nonge i Yub me Cokke me April 2019, pot karatac 4. Ka iwoto ki kwano lok i kom kwo pa Yecu, yeny wang Baibul ma jingo pwocci, marri, tekcwiny kacel ki yomcwiny ma megi. I nge meno, yeny yo mapatpat ma itwero nyuto kwede pwoc ma itye kwede. Itwero bedo ki gen ni Yecu bipwoyo jami ducu ma itimo me po pire i kare me Nipo.—Yabo 2:19.