1-2. Kodi pekki macalo mene ma lutic pa Jehovah ma lugen gikato ki iye?

 KA GIN mo marac otimme i komwa, kwowa twero lokke atura dok matwal. Me labolle, omego mo ma lagen ma nyinge Luis a kinongo ni tye ki two kanca mo ma kite dok pat. Daktar owacce ni odong ki dwe mogo manok keken me kwo. Monika ki cware onongo gitye ka nywako i tic mapatpat pi Jehovah. Ci nino mo acel, Monika oniang ni cware, ma onongo obedo laelda-ni, obedo ka timo bal i mung pi mwaki mapol. Laminwa mo ma nyinge Olivia, ma wiye nono, kiwacce ni oa woko ki i ode pien yamo kot magwar tye ka bino. I kare ma en odwogo, onongo ni yamo kot man obalo ode woko. I kare mo manok keken, kwo pa jo adek magi olokke woko kwicikwici. Tika dong gin mo marac otimme i komi ma oloko kwoni atura?

² Macalo lutic pa Jehovah ma lugen, wakato ki i pekki ma dano ducu bene gikato ki iye. Medo i kom meno, twero mitte ni wakany aunauna ma a ki bot jo ma gidag jo pa Lubanga. Kadi bed Jehovah pe gengo jami ducu maraco me timme i komwa, ento en ocikke me konyowa. (Ic. 41:10) Ki kony ma mege, watwero medde ki bedo ki yomcwiny, moko tam mabeco, kacel ki bedo lugen bote kadi bed watye ka kato ki i peko madit nining. I pwony man, wabinyamo yo angwen mapatpat ma Jehovah konyowa kwede i kare ma nongo peko obwoyowa woko. Wabinyamo bene gin ma omyero watim wek wanong kony ma en miyo.

 JEHOVAH BIGWOKKI

3. Ka watye ka kato ki i peko mo malit, gin ango ma watwero nongo ni timone tek?

³ Ariya ma twero bedo tye. Ka gin mo marac otimme i kwowa, watwero nongo ni tek me tam i yo matir kacel ki moko tam maber. Pingo? Pien nongo cwinywa tye ka cwer matek adada dok par onurowa woko. Watwero winyo calo wiwa onywene woko dok pe wangeyo ngo ma omyero watim. Nen kong kit ma lumegiwa aryo ma kiloko i komgi con-ni guwinyo kwede i kare ma gitye ka kato ki i pekkigi. Olivia owaco ni: “I nge yamo kot magwar balo oda, awinyo calo piny oloya woko.” Monika owaco kit man madok i kom tim abor pa cware: “Cwinya otur matek adada. Awinyo calo ngat mo ocoba ki pala. Obedo tek bota kadiwa me timo jami mayot ma atimogi nino ducu. Pe onongo abyeko kulu ni gin ma kit man twero timme i koma.” Jehovah ocikke me konyowa nining ka wawinyo ni piny dong oloyowa woko?

4. Ma lubbe ki Jo Pilipi 4:​6, 7, gin ango ma Jehovah ocikke me miniwa?

⁴ Gin ma Jehovah timo. En ocikke me miniwa gin ma Baibul lwongo ni “kuc pa Lubanga.” (Kwan Jo Pilipi 4:​6, 7.) Kuc man obedo wic ma opye mot ma bino pien watye ki wat macok ki Jehovah. Kuc man “kato ngec pa jo ducu”; ma te lokke ni ber kato gin mo keken ma watwero goyo i wiwa. Me labolle, tika nino mo ilego matek bot Jehovah ci i ngeye ibedo ki ur pien iwinyo ni wi opye mot? Iwinyo kit meno pien Jehovah omini “kuc pa Lubanga.”

5. Kuc pa Lubanga twero gwoko tamwa ki cwinywa nining?

⁵ Jo Pilipi 4:7 bene waco ni kuc pa Lubanga “gwoko cwinywu ki tamwu maber.” Nyig lok me leb Grik ma kigonyo ni “gwoko” onongo kitiyo kwede me lok i kom lumony ma gigwoko boma wek lumonegi pe gumonygi. Jo ma gibedo i boma meno onongo ginino mot ki kuc, pien gingeyo ni lumony tye ka gwoko dogcelgi. I yo acel-lu, ka kuc pa Lubanga tye ka gwoko cwinywa ki tamwa, wabedo ma wiwa opye mot pien wangeyo ni wabibedo maber. (Jab. 4:8) Calo Anna dako pa Elkana, kadi bed kwowa pe olokke cutcut, pud watwero bedo ki kuc. (1 Cam. 1:​16-18) Dok ka wiwa opye mot, pol kare wanongo ni yot me bedo ki tam ma atir kacel ki moko tam me ryeko.

6. Ngo ma watwero timo wek wanongo kuc pa Lubanga? (Nen bene cal.)

⁶ Gin ma omyero watim. Ka itye ka kato ki i peko mo malit, ci lwong ‘lagwok gang’ wek ogwok cwinyi ki tammi. Itwero timo man nining? Leg matek wang ma inongo kuc pa Lubanga. (Luka 11:9; 1 Tec. 5:17) Luis, ma kiloko i kome con-ni otito gin ma okonye ki dakone Ana i kare ma guniang ni en odong ki dwe manok keken me kwo. En owaco ni: “I  kare ma kit man, tek adada me moko tam madok i kom yotkom ki jami mukene. Ento lega obedo gin ma pud dong okonyowa loyo me bedo ki kuc i kare marac man.” Luis gin ki dakone guwaco ni gulego matek dok teretere, kun gipenyo Jehovah ni ominigi wic ki cwiny ma opye mot, kacel ki ryeko me moko tam mabeco. Dok guwinyo ni en ogamo legagi. Ka itye ka kato ki i peko mo madit, di cwinyi i lega, ci ibinongo kuc pa Lubanga ma bigwoko cwinyi ki tammi.—Rom. 12:12.

JEHOVAH BIMIYO ICUNG MATEK

7. Watwero winyo nining ka watye ka kato ki i peko mo matek adada?

⁷ Ariya ma twero bedo tye. Ka watye ka kato ki i peko mo madit, pe watwero tam, winyo, nyo timo jami kit ma watimo kwede nino ducu. Kit macalo meli ma tye ka wot i wi pii ma tye ka twagge matek bedo ka tagge tungi ki tungi, wan bene watwero winyo calo watye tye ka cabbe tungi ki tungi ki tam. Ana, ma kiloko i kome con-ni, owaco ni kit ma ewinyo kwede obedo ka lokke aloka i nge to pa cware Luis. En owaco ni: “I cawa mukene, onongo cwinya tur matek dok awinyo calo an aye dong lapeko loyo. Onongo bene kiniga maka ni cwara oto woko.” I kare mukene, Ana onongo bedo kickic dok iye wang ni omyero emok tam ma yam Luis aye moko. I cawa mukene, en onongo winyo calo ebedo meli ma tye i dye nam ma piine tye ka twagge matek. Jehovah konyowa nining ka dong wawinyo ni piny oloyowa matek?

8. Kit ma kitito kwede i Icaya 33:​6, cuko cwiny ango ma Jehovah miniwa?

⁸ Gin ma Jehovah timo. En ocuko cwinywa ni ebimiyo wacung matek. (Kwan Icaya 33:6.) Ka pii me nam ocako twagge matek, meli twero cako tagge tungi ki tungi. Me juko taggene meno, pol pa meli madongo gitye ki gin mo macal ki teg nyo bwom rec, ma yare ari ki i te meli. Bwom meli meno weko meli pe tagge tutwal. Meno weko jo ma gitye ka wot ki meli gibedo ma cwinygi opye mot dok wotgi bedo mamit. Kadi bed kit meno, bwom meli man tiyo maber ka meli tye ka medde ki wot anyim. I yo acel-lu, Jehovah bimiyo wacung matek ka wamedde ki tic pire ki gen i kare me peko.

9. Jami me kwedo lok twero konyowa nining me cung matek ma pe watagge? (Nen bene cal.)

⁹ Gin ma omyero watim. Ka iwinyo calo meli ma tye i nam ma piine tye ka twagge matek, medde ki lega, cito i cokke, kacel ki tito kwena. Ngene kene ni, pe oromo bedo yot boti me timo jami magi maber kit ma yam itimo kwede, ento wi opo ni Jehovah pe keto gingi ni itim gin makato keroni woko. (Por Luka 21:​1-4.) Medo i kom meno, kwany kare me kwan  piri keni ki lwodo lok. Pingo? Pien Jehovah tiyo ki dulle me miyowa pwony kacel ki vidio mamwonya ma twero konyowa me cung matek ma pe watagge. Me nongo ngec ma imito, ti ki jami me kwedo lok ma nonge i lebwu, calo JW Library^®, ki Buk ma Konyo Lucaden pa Jehovah me Kwedo Lok. Monika, ma kiloko i kome con-ni, owaco ni onongo etiyo ki jami me kwedo lok magi cutcut ka ewinyo calo par mito bwoye woko. Me labolle, en otimo kwed i kom nyig lok man ni “akemo.” I kare mukene, en okwedo lok i kom “turo gicikke” nyo “bedo lagen.” Ci en onongo kwano wang ma ocako winyo maberber. En owaco ni: “Kare ducu ka pud acako timo kwed acaka, nongo par onura woko. Ento ka amedde ki kwan, onongo awinyo calo Jehovah tye ka kwako kora. Ma amedde ki kwan, acako niang ni Jehovah niang kit ma awinyo kwede i kare mapatpat, dok en tye ka konya.” Kony ma kit meno ma a ki bot Jehovah twero konyi bene me doro kit ma iwinyo kwede wang ma dong wi opye mot.—Jab. 119:​143, 144.

JEHOVAH BIKONYI

10. Watwero winyo nining i nge kato ki i peko mo malit?

¹⁰ Ariya ma twero bedo tye. I nge kato ki i peko mo malit, i nino mogo watwero winyo ni waol dok wagoro adada. Watwero winyo calo langwec ma onongo yam dwir adada ento kombeddi tye ki awano dok komo akoma. Watwero nongo ni tek me timo jami ma onongo yam timogi yot, nyo waromo bedo pe ki miti me timo jami ma onongo yomo cwinywa. Calo lanebi Elia, watwero nongo ni tek kadi wa me a ki i kabuto. (1 Luker 19:​5-7) Gin ango ma Jehovah ocikke me timo piwa ka wagoro?

11. Gin ango mukene ma Jehovah ocikke me timo? (Jabuli 94:18)

¹¹ Gin ma Jehovah timo. En ocikke me konyowa. (Kwan Jabuli 94:18.) Kit macalo langwec ma onongo awano mito kony wek obed ki kare me komo, wan bene wamito kony wek wamedde ki tic pi Jehovah. I kare ma kit meno, Jehovah cuko cwinywa ni: “An a Rwot [Jehovah] Lubangawu, dong amako cingwu ma lacuc woko liking; an atye ka waco botwu ni: ‘Pe wulwor, an abikonyowu.’” (Ic. 41:13) Kabaka Daudi onongo kony ma kit meno. I kare ma en okemme ki pekki kacel ki lukworre, en owaco bot Jehovah ni: “Ijola ki cingi lacuc, kony ma imiya omiyo adoko dit.” (Jab. 18:35) Ento Jehovah miniwa kony man nining?

12. Jehovah romo tic ki jo mene me miniwa kony ka wawinyo ni wagoro?

 ¹² Jehovah pol kare tugo cwiny jo mukene me konyowa. Me labolle, nino mo acel ma onongo Daudi winyo ni egoro, lareme Yonacan olime me mine kero kun cuko cwinye. (1 Cam. 23:​16, 17) I yo acel-lu, Jehovah oyero Elica wek omi kony ma mitte ki Elia. (1 Luker 19:​16, 21; 2 Luker 2:2) I kare-ni, Jehovah twero tic ki jo gangwa, luremwa, nyo luelda me miniwa kony ma mitte. Ento, ka cwinywa otur, pol kare nongo pe wamito bedo i kin jo mukene. Wamito ni wabed kenwa. Man obedo gin ma niange. Dong ngo ma watwero timo wek wanong kony ki bot Jehovah?

13. Gin ango ma omyero watim wek wanong kony ki bot Jehovah? (Nen bene cal.)

¹³ Gin ma omyero watim. Tute matek pe me bedo keni keni. Ka wamaro bedo kekenwa, waromo lungo wiwa ka tam i kom pekkiwa keken. Dok meno romo weko pe wamoko tam mabeco. (Car. 18:1) Ngene kene ni, wan ducu wamito cawa mo me bedo kenwa, tutwalle ka gin mo marac otimme i kwowa. Ento ka wabedo kekenwa pi kare malac, ci twero bedo ni watye ka kwero kony pa jo ma Jehovah tye ka tic kwedgi me konyowa. Dong kadi bed inongo ni tek nining, tute me jolo kony ma a ki bot jo gangwu, luremi, kacel ki luelda. Nengi calo yo ma Jehovah tye ka tic kwede me konyi.—Car. 17:17; Ic. 32:​1, 2.

JEHOVAH BIKWEYO CWINYI

14. Jami ango ma kelo lworo ma waromo kato ki iye?

¹⁴ Ariya ma twero bedo tye. I kare mogo, watwero bedo ki lworo adada. I Baibul, lutic pa Lubanga ma lugen guloko i kom kare mogo ma can obwoyogi woko dok komgi obedo ka myel pi lumonegi nyo pi pekki mukene. (Jab. 18:4; 55:​1, 5) Marom aroma, wan bene watwero nongo adegadega ma a ki i cukul, i gang tic, ki bot lupacowa, nyo gamente me lobowa. Watwero bene bedo ki lworo ni wabito woko pi peko me two. I kare ma kit meno, watwero winyo calo latin matidi ma mito kony ki bot jo mukene. Jehovah konyowa nining i kare ma kit meno?

15. Ma lubbe ki Jabuli 94:19 ngo ma Jehovah bitimo piwa?

¹⁵ Gin ma Jehovah timo. En kweyo cwinywa ki kicane. (Kwan Jabuli 94:19.) Jabuli man twero weko watamo i kom latin anyaka mo matidi ma lworo omako dok pe twero nino pien lutkot tye ka mwoc matek. Watwero goyo kit ma wonne bicito kwede bote, tinge i kore, kun medde ki tinge wang ma onino.  Kadi bed lutkot pud tye ka mwoc, anyaka-ni nongo winyo maber dok cwinye kwe mot pien ni tye i cing wonne. Ka watye ka kato ki i peko ma keliwa lworo, watwero bedo ki miti ni Wonwa me polo otingwa i kore nio wang ma cwinywa okwe. Watwero nongo kwecwiny ma kit meno ki bot Jehovah nining?

16. Gin ango ma watwero timone me nongo kwecwiny ki bot Jehovah? (Nen bene cal.)

¹⁶ Gin ma omyero watim. Nino ducu, kwany kare me bedo kacel ki Jehovah—kun ilego bote dok ikwano Lokke. (Jab. 77:​1, 12-14) Ka dong iweko man odoko kiti, ci gin mukwongo ma ibitimo ka itye ka kato ki i lyeto aye me lokke bot Woru me polo pi kony. Tit ki Jehovah gin ma keli lworo ki gin ma itye ka parone. I nge meno winy dwane ki kwano Lokke, ci ibineno kit ma en bikweyo kwede cwinyi. (Jab. 119:28) Itwero nongo ni bukke mogo me Baibul tye me cuko cwiny adada ka lworo omaki. Me labolle, itwero nongo cuko cwiny ki i buk pa Yubu, Jabuli, ki Carolok kacel ki i lok pa Yecu ma nonge i Matayo cura 6. Ka iwoto ki lega bot Jehovah kacel ki kwano Lokke, ci ibinongo kwecwiny ma a ki bote.

17. Tekcwiny ango ma watwero bedo kwede?

¹⁷ Watwero bedo ki tekcwiny ni Jehovah kare ducu bikonyowa ka wawinyo calo piny dong oloyowa woko. En pe biwekowa kenwa. (Jab. 23:4; 94:14) Jehovah ocikke me gwokowa, konyowa, kweyo cwinywa kun bene weko wacung matek. Icaya 26:3 oloko kit man madok i kom Jehovah: “Ngat ma tamme tye i komi, imiyo bedo ki kuc me ada, pien nongo geni.” Pi meno, gen Jehovah, dok itim jami ducu ma mitte me nongo kony ki bote. Ka itimo meno, ci ibinongo teko odoco kadi wa i kare ma kwo tek.