1. Gin ango ma bino i wi ka itamo i kom Jehovah?

 TIKA dong itemo goyo i wi kit ma Jehovah nen kwede? Ka itye ka lega bote, gin ango ma bino i wi? Kadi bed pe watwero neno Jehovah, ento Baibul loko i kome i yo mapol mapatpat. Ginacoya olwongo Jehovah ni “ceng mewa dok kwotwa” ki “mac ma wango piny.” (Jab. 84:11; Ibru 12:29) Ejekiel otito ni deyo pa Jehovah ryeny calo got capir ma bulu, mola ma ryeny, ki dong danyu. (Ejek. 1:​26-28) Lok magi ma gitito kit ma Jehovah nen kwede-ni, twero weko wabedo ki ur nyo bene lworo makowa.

2. Gin ango ma romo weko bedo tek botwa me nyiko cok bot Jehovah?

² Pien pe watwero neno Jehovah, watwero nongo ni tek me ye ni en marowa. Jo mogo gitamo ni Jehovah pe twero marogi kulu pi gin ma otimme i kwogi i kare mukato. Me labolle, gwok nyo babagi onongo pe marogi. Jehovah niang kit ma wawinyo kwede dok en ngeyo pingo twero bedo tek botwa me nyiko cok bote. Jehovah tiyo ki Baibul me konyowa niang Ngat ma en obedo.

3. Pingo omyero wanyamu matut lok i kom mar pa Jehovah?

³ Nyig lok acel ma tito maber ngat ma Jehovah obedo aye mar. (1 Jon 4:8) Jami ducu ma en timo jenge i kom mar. Lubanga cinge yot dok marre tek adada ma oweko en nyuto kadi wa bot jo ma pe gimare. (Mat. 5:​44, 45) I pwony man, wabinyamo matut lok i kom Jehovah kacel ki marre. Ka ngecwa i kom Lubangawa woto ki medde, ci marwa pire bene dongo.

JEHOVAH MAROWA MATEK

4. Mar pa Jehovah weko iwinyo nining? (Nen bene cal.)

⁴ “Won kikome marowu.” (Jon 16:27) Baibul poro Jehovah  ki min latin ma maro latinne adada. (Ic. 66:​12, 13) Tam kong i kom min latin ma maro dok gwoko latinne maber. En tingo latinne ci tuko kwede kun loko kwede ki dwan me mar. Ka latin tye ka kok nyo tye ki arem, en tute me konyo latinne. Ka cwinywa otur, watwero bedo ki gen ni Jehovah marowa. Laco jabuli owaco ni: “Ka atamo pi jami mapol, in ikweyo cwinya ki kicani.”—Jab. 94:19.

5. Mar ma pe lokke pa Jehovah konyowa nining?

⁵ Mar ma pe lokke pa Jehovah dwong. (Jab. 103:8) En pe ilo cinge woko i komwa ka watimo bal. Rok me Icrael guturo cwiny Jehovah tyen mapol adada. Ento i kare ma gungut i kom balgi, en onyutigi mar mere ma pe lokke. Me labolle, en owaco ni: “In ibedo gin me wel mada bota, piri dit, dok amari adada.” (Ic. 43:​4, 5) Jehovah tye ki kit mar acel-lu piwa i kare-ni. Watwero jenge i kom mar meno kare ducu. Kadi bed watimo bal madit, Jehovah pe ilo cinge woko i komwa. Ka wangut dok wadwogo cen bot Jehovah, ci wabiniang ni en pud marowa matek. Jehovah ocikke ni ‘ebiweko balwa woko ducu.’ (Ic. 55:7) Baibul tito ni ka kitimiwa kica, ci ‘nino me yweyo ma a ki bot Jehovah bino botwa.’—Tic 3:19.

6. Jekaria 2:8 pwonyowa gin ango madok i kom Jehovah?

⁶ Kwan Jekaria 2:​8, NWT. a Pien Jehovah marowa, en niang oyotoyot kit ma wawinyo kwede dok tye ki miti me gwokowa. Ka cwinywa tye ka cwer, en bene cwinye cwer. Dong watwero bedo ki gen ni en biwinyo legawa ka walego ni: “Gwoka macalo igwoko nyig wangi kikome.” (Jab. 17:8) Wang obedo dul kom ma pud dong lwor loyo dok pire tek adada. Dong, kit macalo kiporowa ki tong wang Jehovah-ni, watwero bedo ki gen ni ka ngat mo otimo gin marac i komwa, nongo ogudo tong wang Jehovah kikome.

7. Pingo mitte ni wabed ki tekcwiny ni Jehovah marowa?

⁷ Jehovah mito ni imok ni emari matek adada. Ento Jehovah bene ngeyo ni jami mutimme i kwoni i kare mukato twero weko bedo tek me moko ka ada en mari. Nyo twero bedo ni i kare-ni itye ka kato ki i kwo  matek ma weko pe bedo yot me ye ni Jehovah mari. Gin ango ma biweko ibedo ki tekcwiny ni Jehovah mari? Pwonyo kit ma Jehovah onyuto kwede mare bot Yecu, jo ma kiwirogi, kacel ki wan ducu bikonyi.

KIT MA JEHOVAH NYUTO KWEDE MARE

8. Pingo Yecu onongo twero moko ni Wonne mare adada?

⁸ Jehovah gin ki Yecu gubedo kacel pi kare malac adada. Pi mwaki bilion mapol ata i polo, wat i kingi odongo matek. Jehovah otito ka maleng mare pi Yecu, kit ma kicoyo kwede i Matayo 17:5. Jehovah onongo twero waco mere ni, ‘Man aye ngat ma ayero.’ Ento, Jehovah onongo mito ni waniang tut pa mare pi Yecu, pi meno en olwonge ni “Woda ma amaro.” Jehovah onongo tye ki awaka madit i kom Yecu, tutwalle pien Yecu onongo tye atera me dyero kwone. (Ep. 1:7) Dok Yecu pe obedo ki akalakala mo keken i kom mar pa Wonne pire. Pi meno, kare ki kare Yecu otito ki tekcwiny ni Wonne mare matek.—Jon 3:35; 10:17; 17:24.

9. Nyig lok mene ma tito dit pa mar pa Jehovah pi jo ma kiwirogi? Tit kong. (Jo Roma 5:5)

⁹ Jehovah bene onyuto mare bot jo ma kiwirogi. (Kwan Jo Roma 5:5.) Nen kong nyig lok man ni “gionyo.” Buk mo acel ma loko i kom Baibul otito ni bedo “calo pii kulu ma kionyo i komwa.” Lapor man pud dong nyuto tut pa mar pa Jehovah pi Lukricitayo ma kiwirogi ya! Jo ma kiwirogi, gingeyo ni gitye i “mar pa Lubanga.” (Juda 1) Lakwena Jon otito kit ma jo ma kiwirogi giwinyo kwede ni: “Kong wunen kit mar madit ma Won omiyowa, ni gilwongowa ni wan litino pa Lubanga!” (1 Jon 3:1) Tika Jehovah maro jo ma kiwirogi keken? Pe tye kit meno, Jehovah onyuto mar mere ka maleng pi wan ducu.

10. Gin ango ma onyuto ni Jehovah marowa adada?

¹⁰ Gin madit loyo ma Jehovah omiyo me nyuto marre piwa, obedo ngo? Obedo mic me ginkok. I kare ma en omiyo mic meno, Jehovah onyuto mar madwong ma loyo ngat mo keken! (Jon 3:16; Rom. 5:8) Jehovah omiyo Wode acel keken, me oto pi dano ducu wek kitim kica pi balwa dok wabed lureme. (1 Jon 4:10) Ka wawoto ki lwodo matut gin ma Jehovah ki Yecu gutimo, wabiniang ni gimaro wan ducu matek adada. (Gal. 2:20) Pe kiculo ginkok pien ni Jehovah maro ngolo kop atir, ento obedo mic me mar piwa. Jehovah onyuto ni emaro wan ducu ki miyo ngat ma en maro loyo ducu—Yecu. Jehovah oye ni Wode oden can dok oto pi balwa.

11. Gin ango ma wapwonyo ki i Jeremia 31:3?

¹¹ Kit ma waneno kwede, Jehovah pe winyo ki i cwinye keken ni emarowa ento bene tito botwa ni emarowa matek. (Kwan Jeremia 31:3.) Jehovah onyikowa cok bote pien en marowa. (Por Nwoyo Cik 7:​7, 8.) Pe tye gin mo nyo ngat mo ma twero pokowa ki i mar pa Lubanga. (Rom. 8:​38, 39) Mar man weko iwinyo nining? Kwan Jabuli cura 23, wek inen kit ma mar pa Jehovah ogudo kwede Daudi kacel ki kit ma romo gudowa kwede.

MAR PA JEHOVAH WEKO IWINYO NINING?

12. Tit kong pen lok me Jabuli 23 wiye wiye?

¹² Kwan Jabuli 23:​1-6. I Jabuli 23, Daudi otito tekcwiny ma en tye kwede ni Jehovah mare dok bigwokke. En otito wat macok ma tye i kin en ki lakwatte Jehovah. Daudi owinyo agonya me ye ni Jehovah otele, dok en ojenge i Kome i yo ducu. Daudi onongo ngeyo ni Jehovah binyuto mare bote pi kare me kwone ducu. Gin ango ma oweko Daudi obedo ki tekcwiny ma kit meno?

13. Pingo onongo Daudi tye ki gen ni Jehovah bigwokke?

 ¹³ “Pe tye gin mo ma birem bota.” Daudi owinyo calo etye ki gwok maber pien Jehovah kare ducu onongo mine jami ma mitte. Daudi onongo bene ngeyo ni Jehovah tye lareme dok ni etye ki cwak pa Jehovah. Meno aye oweko en onongo tye ki tekcwiny ni kadi bed gin ango otimme i kome i anyim, Jehovah bimedde ki mine jami ma mitte. Pien Daudi onongo geno ni Jehovah mare dok bigwokke, man okonye pe me bedo ki par ento me bedo ki yomcwiny dok ma oyeng ki jami ma en tye kwede.—Jab. 16:11.

14. Jehovah twero gwokowa i yo me mar nining?

¹⁴ I yo me mar, Jehovah gwokowa, tutwalle ka jami maraco otimme i kwowa. Laminwa Claire, b ma dong otiyo pi mwaki makato 20 i Betel, onongo pe ngeyo gin me atima me konyo jo ganggi i kare ma gukato ki i pekki mapol ma lubbe aluba. Two akweya ogoyo wonne, laminne matidi kiryemo woko ki i kacokke, biacara pa jo ganggi otur, dok beng omayo otgi woko. Jehovah onyuto marre pi jo gang man nining? Claire owaco ni: “Jehovah oneno ni jo gangwa gitye ki jami ma mitte pi kwo nino ducu. Tyen mapol Jehovah onongo miniwa makato gin ma wamito! Pol kare atamo i kom kit ma Jehovah okonyowa kwede dok wiya pe biwil i kom marre. Bedo ka po i kom gin mutimme magi konya me medde ki tic pi Jehovah ki yomcwiny ka atye ka kato ki i pekki mukene.”

15. Pingo Daudi owinyo ni tekone odwogo cen? (Nen bene cal.)

¹⁵ “En roco kwona doko nyen.” I kare mogo, cwiny Daudi otur pi pekki ki atematema ma  obedo ka kato ki iye. (Jab. 18:​4-6) Kadi bed kit meno, mar pa Jehovah oroco kwone odoko nyen. Jehovah otero lareme muol-li i “olet maber” ki “wang pii mangic.” Macalo adwogine, teko pa Daudi odwogo cen dok onongo twero medde ki tic pi Jehovah ki yomcwiny.—Jab. 18:​28-32.

16. I yo ma nining ma mar pa Jehovah omini teko?

¹⁶ I kare-ni bene, pi “mar pa Rwot [Jehovah] ma pe lokke” watwero ciro pekki ma wakato ki iye i kwowa. (Koko 3:22; Kol. 1:11) Nen kong labol pa Rachel. Cwinye otur adada i kare ma cware oweke dok ojuko tic pi Jehovah woko i kare me two Korona. Gin ango ma Jehovah otimo me konyo Rachel? En owaco ni: “Jehovah oweko awinyo ni kimara. En oweko lurema gubedo ka limma, gukela cam, gucwala mecej kacel ki ginacoya ma cuko cwinya, gubwunyo kweda dok gubedo ka poyo wiya ni Jehovah onongo tye ka gwoka. Apwoyo Jehovah kare ducu pi mina omege ki lumege ma gimara adada.”

17. Pingo Daudi owaco ni, “pe abilworo gin marac mo”?

¹⁷ “Pe abilworo gin marac mo; pien in itye kweda.” Tyen mapol, kwo pa Daudi obedo ka mading, dok en onongo tye ki lumone matego. Ento, mar pa Jehovah oweko en owinyo ni etye ki gwok muromo. Daudi onongo winyo ni Jehovah tye kwede i kit kwo mo keken ma en okato ki iye, dok meno okweyo cwinye. Pi meno, en onongo twero wer ni: “[Jehovah] olara ki i kit lworo ducu ma onongo atye kwede.” (Jab. 34:4) Kadi bed i kare mogo Daudi onongo lwor adada, en oloyo lworone pien oniang ni Jehovah mare.

18. Ngeyo ni Jehovah mari mini teko nining ka itye ka kato ki i jami ma keli lworo?

¹⁸ Ngeyo ni Jehovah marowa miniwa teko nining ka watye ka kato ki i jami ma keliwa lworo? Lapainia mo ma nyinge Susi otito kit ma en ki cware guwinyo kwede i kare ma wodgi okwanyo kwone kekene: “Ka gin malik kit man otimme i kwoni atura, gudi i yo marac adada dok iwinyo calo jami maraco mukene bitimme. Ento mar pa Jehovah weko wawinyo ni watye ki gwok maber.” Rachel, ma kiloko i kome con-ni, wiye po ni: “I dyewor mo acel ma onongo cwinya tye ka cwer matek dok lworo omaka adada, akok ki dwan malongo bot Jehovah. Cutcut awinyo calo en okweyo cwinya, kit macalo min latin kweyo kwede cwiny latinne, ci anino woko.  Wiya pe biwil i kom dyewor meno.” Laelda mo ma nyinge Tasos obedo i buc pi mwaki angwen pien okwero donyo i mony. I yo ma nining ma en onongo kwede gwok kacel ki mar pa Lubanga? En owaco ni: “Jehovah omina jami ducu ma amito ki makato bene. Man oweko abedo ki tekcwiny ni atwero genne i yo ducu. Medo i kom meno, Jehovah otiyo ki cwiny mere maleng me mina yomcwiny kadi bed kwo i gang buc onongo tek adada. Man okonya me neno ni ka amedde ki geno Jehovah ci abimedde bene ki nongo marre. Pi meno, acako tic macalo painia marii i kare ma atye i buc.”

NYIKKE COK KI LUBANGAWA MA LAMAR-RI

19. (a) Ngeyo ni Jehovah marowa bigudo legawa nining? (b) Ginacoya mene ma tito mar pa Jehovah ma ogudo cwinyi loyo? (Nen bok ma wiye tye ni “ Nyig Lok Mogo ma Weko Wawinyo Mar pa Jehovah.”)

¹⁹ Jami mutimme i kwo pa jo mapatpat ma wanyamo lok i komgi i pwony man nyuto ni Jehovah, “Lubanga ma won mar,” tye kwedwa! (2 Kor. 13:11) En maro wan ducu ki acel acel. Pe watye ki akalakala mo keken ni ‘en gwokowa ki mar mere ma pe lokke.’ (Jab. 32:10) Ka wamedde ki lwodo kit ma Jehovah nyutiwa marre, ci wabimedde ki neno kit ma en gwokowa kwede dok wabinyikke cok kwede. Watwero lok kwede agonya kun watite kit ma wamito kwede marre i kwowa. Watwero tite parwa ducu pien wageno ni en niang dok mito konyowa.—Jab. 145:​18, 19.

20. I yo ma nining ma mar pa Jehovah nyikowa cok bote?

²⁰ Kit macalo mac miniwa lyeto ka piny ngic, mar pa Jehovah bene kweyo cwinywa ka watye ka kato ki i kwo matek. Pi meno, jol mar pa Jehovah wek omini kuc dok okwe cwinyi. Dong walego ni wan ducu wadok i marre ki waco ni: “Amaro [Jehovah]”!—Jab. 116:1.