1. Adwogi maber ango ma wanongo ki i bedo tye i Nipo me to pa Yecu mwaka ki mwaka?

 LABONGO akalakala mo, wan ducu waye ni ginkok obedo mic mamwonya adada! (2 Kor. 9:15) Pien Yecu oto piwa, itwero bedo larem Jehovah. Itye bene ki gen me kwo pi naka. Watye ki tyen lok mapol me nyuto pwocwa bot Jehovah ma ominiwa mic me ginkok pien en marowa matek! (Rom. 5:8) Me konyowa wek wamedde ki bedo ki pwoc pi mic me ginkok, Yecu ocako te kwer me Nipo me tone ma bedo mwaka ki mwaka.—Luka 22:​19, 20.

2. Gin ango ma wabinyamo i pwony man?

² I mwaka-ni, wabikwero Nipo i Ceng Abicel, nino dwe 12 me April, 2025. Labongo akalakala mo, wan ducu watye ka yubbe me bedo tye i kwer man. Wabinongo adwogi maber ka wakwanyo kare i cabit mogo ma peya kikwero Nipo, ki dok i ngeye, me bedo ka lwodo a gin ma Jehovah ki Wode gutimo piwa. I pwony man, wabinyamo gin ma mic me ginkok pwonyowa i kom Jehovah kacel ki Wode. Dok i pwony ma lubo man, wabinyamo adwogi maber ma wanongo ki i mic me ginkok ki kit ma watwero nyuto kwede pwocwa pire.

GIN MA GINKOK PWONYOWA I KOM JEHOVAH

3. I yo ma nining ma to pa dano acel twero koko dano milion mapol? (Nen bene cal.)

³ Ginkok pwonyowa ni Jehovah obedo Lubanga ma maro ngolo kop atir. (Nwo. 32:4) Pingo watwero waco kit meno? Tam kong: I kare ma Adam okwero bedo lawiny bot Lubanga, en odoko labal dok lacen oto woko. Kit ma wan ducu wabedo likwaye, walako bal kacel ki to. (Rom. 5:12) Me gonyowa ki i opii me bal ki to, Jehovah oketo yub me miyo Wode macalo ginkok. Ento twerre nining ni to pa dano acel  ma pe ki roc twero koko dano milion mapol ata? Lakwena Paulo ogamo lapeny meno kit man ni: “Pien macalo pi dano acel ma pe obedo ki winy [Adam] omiyo dano mapol ata gudoko lubalo, kit meno bene pi winy pa dano acel [Yecu] jo mapol ata gibikwanogi ni kitgi atir.” (Rom. 5:19; 1 Tem. 2:6) Dong Paulo onongo tye ka waco ni dano ducu gitye ki bal dok gito pien laco acel ma pe ki roc okwero bedo lawiny bot Lubanga. Pi meno, wek kigonywa ki i opii me bal ki to, onongo mitte ni laco acel ma pe ki roc obed lawiny bot Lubanga.

4. Pingo Jehovah pe oye mere ni likwayo pa Adam ma gitye luwiny gubed kwo pi naka?

⁴ Tika ada onongo mitte ni Yecu oto me larowa? Pingo Jehovah pe oye mere ni likwayo pa Adam ma gitye luwiny gubed kwo pi naka? Ki tung bot wan dano ma gitye ki roc, meno onongo twero nen calo gin mupore dok ma nyuto kica pa Jehovah. Ento ki tung bot Jehovah, meno onongo pe obedo gin ma atir me atima. Meno onongo twero weko nen calo Adam pe otimo bal madit dok likwayone pe gitye ki roc. Ento meno onongo pe tye lok ada.

5. Pingo watwero bedo ki gen ni Jehovah kare ducu bitimo gin ma atir?

⁵ Ka onongo Jehovah pe omiyo ginkok, dok oye ni likwayo pa Adam gubed kwo pi naka kadi bedo gitye ki roc, ci nongo Jehovah ocayo rwomme me gin ma atir ki gin marac. Macalo adwogine, dano onongo gibibedo ki par ka ce en bicayo rwomme me kit ma atir i nge kare mo doki. Me labolle, dano onongo gibibedo ki akalakala ka ce Jehovah bigwoko cikkene ducu. Ento pe mitte ni wabed ki par mo keken ni gin ma kit meno twero timme. Pingo? Pien Jehovah otimo gin ma atir kadi bed ni onongo mitte ni en omi Wode me amara kikome macalo gityer. Dong watwero bedo ki gen ni kare ducu en bitimo gin ma atir.

6. Kit mene ma otugo cwiny Jehovah me cwalo Wode me to piwa? (1 Jon 4:​9, 10)

⁶ Tye dok gin mukene ma otugo cwiny Jehovah me cwalo Wode wek oto piwa. Meno obedo marre piwa. (Jon 3:16; kwan 1 Jon 4:​9, 10.) Jehovah ocwalo Wode me to piwa pien en mito ni wabed kwo pi naka, ki dok pien en mito ni wabed i kin jo me ode. Tam kong: I kare ma Adam obalo, Jehovah okwanye woko ki i kin jo me ode. Macalo adwogine, wan ducu kinywalowa ma pe watye i kin jo me ot pa Jehovah. Ento pien kiculo ginkok-ki, dano ducu ma gitye ki niye dok gin luwiny bot Lubanga gitye ki gen me doko jo me ot pa Jehovah  doki i anyim. Kadi wa i kare-ni, Jehovah twero timo kica pi balwa dok watwero bedo ki wat macok ki Lubanga kacel ki utmegiwa. Ki lok ada, Jehovah marowa matek adada!—Rom. 5:​10, 11.

7. Arem ma Yecu okato ki iye konyowa nining me niang tut pa mar pa Jehovah piwa?

⁷ Watwero niang maber kit ma Jehovah marowa kwede matek ka watamo i kom kit ma cwinye ocwer kwede i kare ma oneno Wode tye ka deno can malit. Catan owaco ni pe tye latic pa Lubanga mo keken ma bimedde ki gwoko gennene ka tye ka kato ki i kwo matek. Me nyuto ni Catan lagoba, Jehovah oye ni Yecu oden can ma peya oto. (Yubu 2:​1-5; 1 Pet. 2:21) Jehovah oneno kit ma lupwonye dini gucayo kwede Yecu, lumony gugoye ki del anino, dok gugure i kom yat. I nge meno, Jehovah oneno ka Wode to to malit adada. (Mat. 27:​28-31, 39) Jehovah onongo tye ki teko me juko jami magi ducu. Me labolle, i kare ma dano guwaco ni: “wek Lubanga kong olare kombeddi, ka mite,” Jehovah onongo twero timo meno cutcut. (Mat. 27:​42, 43) Ento, ka onongo Lubanga otimo meno, kono onongo Yecu pe omiyo kwone macalo ginkok dok onongo wabibedo labongo gen. Pi meno, Jehovah oye ni Wode oden can nio wa i tone.

8. Pingo waromo waco ni Jehovah cwinye ocwer i kare ma oneno Wode tye ka deno can? (Nen bene cal.)

⁸ I kare ma Jehovah obedo ka neno ka Wode deno can ento pe ojuko canne, tika meno onyuto ni en pe owinyo arem cwiny? Pe tye kit meno. Wan dano kicweyowa i cal pa Lubanga dok watwero winyo arem. Meno tyen lokke ni Jehovah bene winyo arem cwiny. Baibul waco ni i kare ma Luicrael gujemo i kom Lubanga, “gucwero cwinye” dok ‘gumiyo kiniga omake.’ (Jab. 78:​40, 41) Tam bene i kom gin mutimme i kom Abraim gin ki Icaka. Jehovah owaco ki Abraim ni omi wode Icaka macalo gityer. (Acak. 22:​9-12; Ibru 11:​17-19) Go kong kit ma Abraim owinyo kwede i kare ma onongo tye ka yubbe me neko wode ki pala lucwan. Dong, Jehovah nen calo cwinye ocwer makato i kare ma oneno dano gitye ka uno Wode nio wa i nekone!—Nen ki i jw.org vidio ma wiye tye ni Lub Lanengi me Niye—Abraim, Bute me 2.

9. Pwony ango ma inongo ki i Jo Roma 8:​32, 38, 39 madok i kom mar pa Jehovah?

⁹ Mic me ginkok pwonyowa ni pe tye ngat mo ma marowa ma loyo Jehovah—kadi watwa nyo laremwa macok loyo. (Kwan Jo Roma 8:​32, 38, 39.) Watwero bedo ki gen matek ni Jehovah marowa ma loyo kit ma wamarre kwede kekenwa. Tika imito ni ibed kwo pi naka? Jehovah tye ki  miti madwong me mini kwo meno. Tika imito ni kitimmi kica pi balli? Jehovah mito timmi kica ma loyo. Gin ma en mito ni watim keken aye ni wanyut pwoc pi mic me ginkok, wabed ki niye, dok wabed luwiny bote. Ginkok obedo mic mamwonya ma nyuto tut pa mar pa Jehovah piwa. Dok i lobo manyen, wabipwonyo jami mapol ma kwako mar pa Jehovah.—Latit. 3:11.

GIN MA GINKOK PWONYOWA I KOM YECU

10. (a) Gin ango ma ocwero cwiny Yecu loyo i kare ma kingolo to i wiye? (b) To pa Yecu onyuto gin ango? (Nen bene bok ma wiye tye ni “ Gwoko Genne pa Yecu Okonyo me Lonyo Nying Jehovah.”)

¹⁰ Yecu paro pi kit ma dano gitamo kwede i kom Wonne. (Jon 14:31) Cwiny Yecu ocwer adada ni kingole to gobagoba ni eyeto Lubanga dok meno onongo bikelo cac i kom Wonne. Meno aye oweko en olego ni: “Wora ka ce imito, kwany kikopo man woko ki i koma.” (Mat. 26:39) Ento pien ni Yecu ogwoko gennene bot Jehovah nio wa i to, en onyuto ka maleng ni lok ma Catan owaco i kom Wonne obedo goba.

11. Yecu onyuto mar matut pi dano nining? (Jon 13:1)

¹¹ Mic me ginkok bene pwonyowa ni Yecu paro pi dano adada, tutwalle pi lupwonnyene. (Car. 8:31; kwan Jon 13:1.) Me labolle, Yecu onongo ngeyo ni jami mogo ma onongo ebikato ki iye gibibedo tek adada, tutwalle tone i kom yat. Ento, Yecu otimo jami magi ducu, pe ni pien meno tic ma Jehovah omine, ento pi marre pi dano. Yecu onyuto mar matut pi dano ki tito kwena botgi, pwonyogi, kacel ki konyogi. Kadi wa i dyewor me agikki ma peya kineke, Yecu okwanyo kare me lwoko tyen lukwenane, opwonyogi, dok ocuko cwinygi.  (Jon 13:​12-15) Dok kadi wa i kare ma tye ki arem malit dok cok to i kom yat, Yecu okwanyo kare me miyo gen bot labalo ma kiguro i ka ngete, dok onyuto ni eparo pi mine kun penyo Jon ni ogwok Maliam. (Luka 23:​42, 43; Jon 19:​26, 27) Dong, Yecu onyuto marre pi dano, pe ki to pigi keken, ento bene ki terogi i yo me mar ki kica.

12. I yo ma nining ma Yecu tye ka medde ki konyowa i kare-ni?

¹² Kadi bed Kricito oto “tyen acel keken,” ento en pud tye ka medde ki timo jami mapol piwa. (Rom. 6:10) Jami macalo mene? En tye ka medde ki tic me miniwa jami mabeco mapol ma mic me ginkok oweko twerre piwa. Tam kong i kom tic ma en tye ka timo. En tye ka tic macalo Kabakawa, Lalamdog Madit, kacel ki lawi kacokke. (1 Kor. 15:25; Ep. 5:23; Ibru 2:17) En tye ka doro tic me coko jo ma kiwirogi kacel ki lwak dano mapol ata-ni, dok tic meno bimedde cokcok nio wa i agikki me twon can madit atika-ni. b (Mat. 25:32; Mar. 13:27) En bene tye ka tic ki lagwok ot ma lagen dok maryek me miyo botwa jami ducu ma mitte wek wamedde ki bedo lugen bot Jehovah i kare man me agikki-ni. (Mat. 24:45) Dok i kare me Locce me Mwaka Alip Acel, en pud bimedde ki tic piwa. Yecu pud dong omine kene piwa ya! En obedo mot mamwonya ma oa ki bot Jehovah.

MEDDE KI PWONYO JAMI MANYEN

13. Lwodo lok twero konyi nining me medde ki pwonyo lok i kom mar ma Lubanga ki Kricito gitye kwede piwa?

¹³ Itwero medde ki pwonyo lok i kom mar ma Jehovah gin ki Yecu gitye kwede piwa, ka imedde ki lwodo lok i kom jami ma gutimo piwa. Gwok nyo i cabit mogo ma peya kikwero Nipo, ki dok i ngeye, itwero kwanyo kare me kwano Jiri acel i kin angwen-ni. Pe itute me tyeko cura mapol lawang acel. Me ka meno, kwan motmot kun iwoto ki yenyo tyen lok mukene mumiyo omyero wamar Jehovah ki Yecu. Dok inywak ki jo mukene gin ma ipwonyo i kare me kwanni.

14. Ma lubbe ki Jabuli 119:​97, i yo ma nining ma timo kwed twero konyowa me medde ki pwonyo lok i kom ginkok kacel ki pwony mukene? (Nen bene cal.)

¹⁴ Ka dong irii i ada pi mwaki mapol, iromo  bedo ka pennye kekeni ka ce pud tye gin mo manyen ma itwero pwonyo i kom jami ma ingeyogi con, calo ngolo kop atir pa Lubanga, marre, kacel ki ginkok. Ki lok ada, kare ducu wabibedo ki jami manyen me apwonya. Dong, gin ango ma iromo timone? Kwany kare me kwan matut kacel ki kwedo lok kun itiyo ki bukkewa ma jenge i Baibul. Ka inongo ka mo ma pe iniang iye maber, tim kwed iye. Ci i nino meno olu, bed ka lwodo gin ma ikwano ki gin ma ipwonyo i kom Jehovah, Wode, kacel ki margi piri.—Kwan Jabuli 119:97.

15. Pingo pire tek ni wamedde ki pwonyo jami manyen ki i Baibul?

¹⁵ Pe iwek cwinyi otur ka pe inongo gin mo manyen ka itye ka kwano Baibul nyo timo kwed. Tam i komi kekeni macalo ngat ma tye ka golo ngom me yenyo jabu. Pol kare, ngat ma tye ka golo ngom me yenyo jabu tero cawa malac nyo nino mapol ma nongo peya onongo jabu mo keken. Ento, ngat meno pe ilo cinge woko ento diyo cwinye dok medde ki yenyo jabu, pien ngeyo ni kadi jabu mo matidi ma enongo, welle dit adada. Dong lonyo me cwiny mo keken ma wanongo ki i Baibul welle dit makato jabu woko! (Jab. 119:127; Car. 8:10) Pi meno, di cwinyi dok imedde ki yubbi me kwano Baibul kacel ki yenyo jami manyen i kwanni.—Jab. 1:2.

16. Watwero lubo lanen pa Jehovah gin ki Yecu nining?

¹⁶ Ka itye ka kwan, tam i kom kit ma iromo keto kwede i tic gin ma itye ka pwonyo. Me labolle, lub kit me ngolo kop atir pa Jehovah ki tero jo mukene labongo apokapoka. Lub lanen me mar pa Yecu pi Wonne ki pi jo mukene, kun ibedo atera me deno can pi nying Jehovah dok imine keni me konyo Lukricitayo luwoti. Medo i kom meno, lub lanen pa Yecu ki tito kwena bot jo mukene wek gin bene gubed ki kare me jolo mot me ginkok ma Jehovah omiyo.

17. Gin ango ma wabinyamo i pwony ma lubo man?

¹⁷ Ka wamedde ki pwonyo lok i kom ginkok, ci marwa pi Jehovah gin ki Yecu bidongo medde ameda. Dok kit macalo wamarogi matek, meno biweko gin bene gimarowa matek. (Jon 14:21; Yak. 4:8) Dong omyero wamedde wunu ki tic ki jami ducu ma Jehovah miniwa me medde ki pwonyo lok i kom ginkok. I pwony ma lubo man, wabipwonyo lok mapol i kom mot ma wanongo pi ginkok, ki kit ma watwero nyuto kwede pwocwa pi mar pa Jehovah piwa.