1. Gin ango ma jo mapol i kare-ni giketo tamgi iye?

 TIKA dong ineno ni pol pa dano i kare-ni giparo pigi kengi? Me labolle, jo mogo gitiyo ki kabedo me nywako lok i Intanet me wakke pi jami ma gucobo. Ento, jo manok keken aye gitamo me miyo deyo bot Jehovah i kare-ni. I pwony man, wabinyamo gin ma miyo deyo bot Jehovah kwako ki gin ango ma myero otug cwinywa me timo meno. Wabinyamo bene kit ma watwero miyo kwede bot Jehovah deyo ma en opore me nongone ki dong kit ma en bilonyo kwede ki nyinge i anyim.

TYEN LOKKE NGO ME MIYO DEYO BOT JEHOVAH?

2. Jehovah onyuto deyone nining i kare ma Luicrael onongo gitye i te Got Cinai? (Nen bene cal)

² Deyo obedo gin ango? I Baibul, nyig lok man ni “deyo” kitwero tic kwede me lok i kom gin mo keken ma weko ngat moni twero winyo ni rwomme dit. I nge nino mogo manok keken ma Jehovah ogonyo rok me Icrael ki i Ejipt, en onyuto botgi deyone. Go kong gin man i wi: Luicrael milion mapol gugure i te Got Cinai me winyo gin ma Lubanga onongo bitittigi. Pol mapek oumo wi got woko. Cutcut, yito oboyo kom Got Cinai woko. Ngom oyenge matek dok piny obedo ka mor ma onongo lutkot wil awila, dok dwan obute obedo ka kok malongo tutwal. (Nia 19:​16-18; 24:17; Jab. 68:8) I kare ma Jehovah otimo jami magi, Luicrael nen calo gubedo ki ur madit adada i kom tekone.

3. I yo ma nining ma watwero miyo kwede deyo bot Jehovah?

³ Ento tika dano gitwero miyo deyo bot Jehovah? Ada, watwero. Yo acel ma watwero miyo kwede ki deyo bot Jehovah aye ki tito pi jami me aura ma en otimo kacel ki kite mamwonya. Wamiyo bene deyo bot Lubanga ka wapakke pi jami ma en okonyowa me cobone. (Ic. 26:12) Kabaka Daudi obedo lanen maber pa ngat ma omiyo deyo i  rwom ma lamal bot Jehovah. I legane ma en olego i nyim lwak me Icrael, Daudi owaco bot Lubanga ni: “Ai Rwot [Jehovah], dit ki tek ki deyo ki loc ki woro ducu meri, pien jami ducu ma tye i polo ki ma tye i lobo ducu meri.” I nge Daudi tyeko legane, ‘lwak mucokke ducu gucako pako Jehovah.’—1 Tekwaro 29:​11, 20.

4. Yecu omiyo deyo bot Jehovah nining?

⁴ I kare ma Yecu onongo tye i lobo, en omiyo deyo bot Wonne ki tito bot dano ni Jehovah aye ma omine teko me timo tango. (Mar. 5:​18-20) Yecu bene omiyo deyo bot Jehovah i kit ma en oloko kwede i kom Wonne ki kit ma en otero kwede jo mukene. I nino mo acel, Yecu onongo tye ka pwony i kacokke. I kin jo ma gubedo ka winyo lokke, onongo tye iye dako mo ma cen okelo goro i kome ma orii pi mwaki 18. Cen man onongo dong oweko kor dako-ni ogom matek ma pe twero tirre. Yecu oniang ni peko man kelo arem ki turcwiny bot dako-ni dok onongo mito konye. Pi meno, en ocito bot dako-ni ci oloko kwede i yo me kica. Yecu owacce ni: “Dako, gigonyi woko i kom goroni.” I nge meno, en oketo cinge i kom dako-ni ci cutcut, dako-ni otirre “ci opako Lubanga.” Cwinye obedo yom ni Jehovah ocange woko. (Luka 13:​10-13) Dako meno onongo tye ki tyen lok maber me miyo deyo bot Lubanga dok wan bene watye ki tyen lok mapol me timo meno.

GIN ANGO MA TUGO CWINYWA ME MIYO DEYO BOT JEHOVAH?

5. Tyen lok mapatpat ango ma watye kwede me miyo woro bot Jehovah?

⁵ Wamiyo deyo bot Jehovah pien watye ki woro matut pire. Watye ki tyen lok mapol me woro Jehovah. Jehovah aye Won Twer ducu; en tye ki teko ma lapore pe dok pe ol. (Jab. 96:​4-7) Ryekone ma lapore pe nen ka maleng i jami ma en ocweyo. En aye ma ominiwa kwo ki jami ma mitte wek wabed kwo. (Yabo 4:11) En lagen. (2 Cam. 22:26) Jami ducu ma en timo cobbe kakare, dok en kare ducu gwoko cikkene. (Yoc. 23:14) Meno aye oweko lanebi Jeremia oloko kit man i kom Jehovah: “Pe tye ngat mo macalo in i kin luryeko ducu me rok mapatpat, kadi ki i te kergi ducu”! (Jer. 10:​6, 7) Ada, watye ki tyen lok mapol me miyo woro bot Wonwa me polo. Ento Jehovah pe obedo mere ngat ma opore me nongo worowa keken. En tye ki kite mamwonya mapol ma miyo wamare matek.

6. Pingo wamaro Jehovah?

⁶ Wamiyo deyo bot Jehovah pien wamare matek. Wamaro Jehovah pi kite mapatpat mamwonya. En lakica dok paro pi dano. (Jab. 103:13; Ic. 49:15) Ka cwinywa tye ka cwer, en bene cwinye cwer. (Jek. 2:8) En konyowa me ngeye maber ki me doko Lureme. (Jab. 25:14; Tic 17:27) Dok en mwol; En “kulle neno piny ka mabor ki kunnu, ma neno polo ki lobo. En ilo lucan malo nia ki i apwa.” (Jab. 113:​6, 7) Pi tyen lok magi ducu, wamito pako Lubangawa.—Jab. 86:12.

7. Watye ki kare me timo gin ango?

⁷ Wamiyo deyo bot Jehovah pien wamito ni jo mukene gunge en. Pol pa dano pe gingeyo lok ada madok i kom Jehovah. Pingo? Pien Catan owaco lok goba mapol i kom Lubanga dok dano giye lok goba magi. (2 Kor. 4:4) Catan obwolo dano ni Jehovah obedo Lubanga mager, pe paro piwa, dok en aye okelo pekki ducu ma dano gitye ka kato ki iye i kare-ni.  Ento wan wangeyo lok ada madok i kom Lubangawa! Watye ki kare me tito ki dano kit pa Lubangawa kikome ki me kelo deyo bote. (Ic. 43:10) Jabuli 96 loko tutwalle i kom miyo deyo bot Jehovah. Ka wawoto ki nyamo lok ma i Jabuli meno, tam i kom yo mogo ma in itwero miyo ki Jehovah deyo ma en opore me nongone.

WATWERO MIYO BOT JEHOVAH DEYO MA EN OPORE ME NONGONE NINING?

8. Tit kong yo acel ma watwero miyo kwede deyo bot Jehovah. (Jabuli 96:​1-3)

⁸ Kwan Jabuli 96:​1-3. Watwero miyo deyo bot Jehovah ki i kit ma waloko kwede i kome. I tyeng magi, kiwaco ki jo pa Jehovah ni “wuwer bot [Jehovah],” dok “wupwo nyinge,” dok “wutit pi larre,” ki dok “wutuc deyone bot lurok.” Magi ducu gubedo yo mapatpat ma watwero miyo kwede deyo bot Jehovah i lokwa. Lutic pa Jehovah me kare macon onongo gitye ki miti madwong me tito ki jo mukene anga ma Jehovah obedo kacel ki jami mabeco ma en otimo. (Dan. 3:​16-18; Tic 4:29) Watwero timo meno nining?

9-10. Pwony ango ma wanongo ki i gin mutimme i kom Angelina? (Nen bene cal.)

⁹ Nen kong gin mutimme i kom laminwa mo ma nyinge Angelina, a ma bedo i lobo Amerika. En onyuto tekcwiny me cung matek pi nying Jehovah i gang ticce. Kit macalo en onongo pud ocako tic acaka i kampuni meno, kilwonge i cokke mo kacel ki lutic mukene manyen. I cokke meno, kimiyo ki dano ducu kare me tito lok mogo manok i komgi. Angelina oyubbe me nyuto cal mogo ma nyuto yomcwiny ma etye kwede macalo Lacaden pa Jehovah. Ento, i kare ma onongo en dong cok cako lokke, latic lawote mo ma laco oa malo ci otito ni edongo i cing lunyodo ma gitye Lucaden. En ocako loko lok maraco i kom Lucaden kacel ki niyegi. Angelina owaco ni: “Cwinya ocako gone matek. Ento atamo kekena ni: ‘Tika abiye ni ngat mo owac lok goba i kom Jehovah? Nyo mono abitito lok ada i Kome?’”

¹⁰ I kare ma latic lawote otyeko lokke, Angelina olego lega macek laling ling. Ci Angelina oloko bot laco-ni ki mwolo, ni: “An bene adongo i paco macal ki megi-ni. Lunywala gubedo Lucaden pa Jehovah dok an bene atye Lacaden wa kombeddi.” Kadi bed pinye olyetti matek i cawa meno,  ento Angelina omedde ki bedo ma kome opye mot. En onyuto ki lutic luwote calle kacel ki luwote ma gitye i yub mapatpat pa dul pa Jehovah dok en otito pi niyene ki diro. (1 Pet. 3:15) Adwogine obedo nining? I kare ma Angelina otyeko lokke, onongo dong cwiny laco-ni ocako dok cen. Laco-ni bene ocako tito jami mogo mabeco mutimme i kwone i kare ma en pud latin dok onongo ribbe ki Lucaden. Angelina owaco ni: “Opore piwa me cung matek pi nying Jehovah. Obedo deyo madit me tito lok ada madok i kome.” Wan bene watye ki deyo me pako Jehovah ka jo mukene guloko marac i kome.

11. I yo ma nining ma luworo me ada gulubo kwede lok ma nonge i Jabuli 96:8 nicakke wacon?

¹¹ Kwan Jabuli 96:8. Watwero miyo deyo bot Jehovah ki mine jamiwa me wel. Nicakke wacon, luwor Jehovah gubedo ka miyo deyo bot Jehovah i yo meno. (Car. 3:9) Me labolle, Luicrael gumiyo mot ma kitiyo kwede me gero kacel ki roco ot pa Lubanga. (2 Luker 12:​4, 5; 1 Tekwaro 29:​3-9) Lupwonnye pa Yecu mogo ‘gukonye ki limgi,’ ma oweko Yecu ki lukwenane onongo gitye ki jami ma mitte. (Luka 8:​1-3) Dok Baibul tito ni i cencwari me acel i kare ma kec opoto i kom Lukricitayo ma i Judaya, utmegigi ma gikwo i kabedo mapatpat gucwalo botgi cente. (Tic 11:​27-29) I kare-ni, wan bene watwero pako Jehovah ki mot me cente ma wamiyo.

12. I yo ma nining ma mot ma wamiyo twero kelo kwede deyo bot Jehovah? (Nen bene cal.)

¹² Kong wanenu labol acel ma nyuto kit ma mot ma wamiyo kelo kwede deyo bot Jehovah. I mwaka 2020, lobo Zimbabwe obedo ki peko me two pa piny ma orii pi kare malac. Dano makato milion acel kulu gubedo marac adada pi kec ma poto, kadi wa laminwa mo ma nyinge Prisca. Kadi bed kec opoto, Prisca omedde ameda ki yubbe me tito kwena i Ceng Adek ki Ceng Abic ducu, kadi wa i kare me pito kodi. Jiranine gubedo ka caye matek pi bedo ka cito i tic me pwony me ka cito i poto, kun giwacce ni, “Ibito ki kec.” Prisca onongo tye ki gen matek ni Jehovah bigwokke mumiyo kare ducu en onongo gamo ni, “Jehovah ma naka yam peya oweko luticce liyak.” Ma pe orii i nge meno, Prisca onongo kony ma dulwa omiyo. Prisca onongo cam kacel ki jami mukene ma mitte pi mot ma wan ducu  ki acel acel wamiyo. Gin mutimme man ogudo cwiny jirani pa Prisca matek, ma oweko guwacce ni, “Lubanga kare ducu konyi, dong wan bene wamito pwonyo lok i kome.” Pi meno, jiranine ma romo gin abiro gucako kwano Baibul kacel ki wot i cokke.

13. Ma lubbe ki Jabuli 96:​9, gin ango ma omyero watim wek wakel deyo bot Jehovah?

¹³ Kwan Jabuli 96:9. Watwero miyo deyo bot Jehovah ka kitwa tye “maleng.” Onongo mitte ni lulamdog ma gitiyo i ot pa Jehovah gulwokke dok gubed maleng i cawa me ticgi. (Nia 40:​30-32) Wan bene omyero wabed jo maleng, pe ki gwoko lengo me komwa keken, ento kadi wa kitwa bene. (Jab. 24:​3, 4; 1 Pet. 1:​15, 16) Baibul waco ni omyero wawek ‘kit me kwowa macon’ dok waruk kit pa “dano manyen.” Man tyen lokke ni watute matek me gwokke ki tam kacel ki tim maraco ma pe yomo cwiny Jehovah. Me ka meno, wapwonnye me tam kacel ki kwo i yo ma nyuto ni watye ka lubo kit pa Jehovah. (Kol. 3:​9, 10) Ki kony pa Jehovah, kadi wa lutim maraco adada pud gitwero loko kitgi ci giruko kit pa dano manyen.

14. Pwony ango ma inongo ki i gin mutimme i kom Jack? (Nen bene cal.)

¹⁴ Me labolle, tam kong i kom latim aranyi mo ma nyinge Jack, ma onongo ger adada mumiyo onongo kilwonge ni Cen. Pi bal madongo ma Jack otimo, oweko kingole to. Ento i kare ma Jack tye ka kuro nino ma kibineke iye, omego mo ma limo gang buc meno, odyere me kwano Baibul kwede ci en oye. Kadi bed Jack onongo otimo jami maraco mapol, en oloko kite dok i nge kare mo en onongo batija macalo Lacaden pa Jehovah. Jack olokke adada ma oweko i nino ma kineke iye, acikari mogo ma i gang buc meno gubedo ka koko i kare ma gitye ka lok kwede me agikki. Acikari mo acel ma tiyo i gang buc meno owacci: “Jack aye onongo lamabuc marac loyo i gang buc man. Ento kombeddi dong tye i kin jo mabeco loyo.” I cabit ma lubo, omege ma gudwogo i gang buc man ka doro cokke, gurwatte ki lamabuc mo ma obino i cokke pi tyen mukwongo. Gin ango ma otugo cwiny lamabuc man me bino i cokke? Kit ma Jack olokke kwede ogudo cwinye dok onongo mito ngeyo gin ma myero etim me woro  Jehovah. Onen ka maleng ni kitwa twero kelo deyo bot Wonwa me polo.—1 Pet. 2:12.

JEHOVAH BIKETO DEYO I KOM NYINGE I ANYIM NINING?

15. Jehovah biketo deyo i kom nyinge i anyim macok cok-ki nining? (Jabuli 96:​10-13)

¹⁵ Kwan Jabuli 96:​10-13. Tyeng magi me agikki me Jabuli 96 loko i kom Jehovah macalo Langolkop ki Kabaka ma kite atir. Jehovah biketo deyo i kom nyinge i anyim macok cok-ki nining? En bitimo meno ki ngolo kop atir. Macok cok-ki, en bijwero Babilon Madit pien dini goba dong gutimo jami maraco mapol dok gipwonyo lok goba i kome. (Yabo 17:​5, 16; 19:​1, 2) Jo mogo ma gibineno ka kijwero Babilon Madit, guromo moko tamgi me ribbe kwedwa ka woro Jehovah. Dong, i lweny me Armagedon, Jehovah bijwero but lobo pa Catan mudong-ngi woko, kun jwero jo ducu ma gijemo i kome dok gibalo nyinge ento en bilaro jo ma gimarre dok gikelo deyo bote. (Mar. 8:38; 2 Tec. 1:​6-10) I nge atematema me agikki ma bibedo tye i agikki me Mwaka Alip Acel me Loc pa Kricito, nongo dong Jehovah olonyo nyinge i yo ducu. (Yabo 20:​7-10) I kare meno, “lobo bipong ki ngec me deyo pa Rwot [Jehovah] macalo pii ma pong i nam.”—Kab. 2:14.

16. Gin ango ma imoko tammi me timone? (Nen bene cal.)

¹⁶ Pud dong bibedo me yomcwiny madit ya ka dong dano ducu gimiyo bot Jehovah deyo muporo nyinge! Ento nio wa i kare meno, watwero timo gin ducu ma watwero me miyo deyo bot Lubanga. Me konyowa wek waket cwinywa i kom lok ma pire tek man, Lukiko Madit oyero Jabuli 96:8 me bedo ginacoyawa me mwaka 2025: ‘Wumi deyo bot Jehovah muporo nyinge.’