1. Tit kong tyen lok acel mumiyo Jehovah ocako te yub me nyom.

 JEHOVAH obedo “Lubanga ma layomcwiny,” dok en mito ni wan bene wabed ki yomcwiny. (1 Tem. 1:​11, NWT) En omiyo botwa mot mapol wek wanong mit pa kwo. (Yak. 1:17) Mot acel i kin magi obedo nyom. I kare ma laco ki dako ginyomme, gikwonge me nyuto mar kacel ki woro i kingi. Ka laco ki dakone gigwoko mar ma i kingi bedo matek, ci gibedo ki yomcwiny madwong adada i nyomgi.—Car. 5:18.

2. Gin ango ma timme i nyom mapol i kare-ni?

² Tye me cwercwiny ni, co ki mon mapol i kare-ni wigi wil woko i kom kwonge ma gukwongo i nino nyomgi. Macalo adwogine, cwinygi pe bedo yom. Kwed mo ma pud kitimo cokcok-ki onyuto ni co mapol gigoyo mongi, giyeto mongi, nyo gitero mongi marac i yo mukene. Laco ma timo jami magi i kom dakone twero poro odenge ni emaro dakone ka tye i kin lwak, ento ka gudok paco kite lokke woko. Co mapol bene gimaro neno cal macilo a dok man weko mongi winyo ni pe kimarogi.

3. Pingo co mogo gitero mongi i yo marac?

³ Pingo co mukene gitero mongi i yo marac adada? Co mukene gudongo ma gineno ka wongi tero mamagi ki gero, pi meno gitamo ni meno aye kit ma nyom ducu bedo kwede. Co mukene gitero mongi ki gero pien meno aye gin ma pol pa co ma i tekwarogi gitimo. Co magi gitamo ni “laco kikome” myero oti ki gero wek dakone onge ni en aye won gang. Co mukene gudongo ma pe kipwonyogi ki kit me juko akemogi. Dok co mukene gimaro neno cal macilo ma weko gitamo ni tic pa mon tye mere me cobo miti me buto pa co. Medo i kom meno, kwed ma kitimo onyuto ni i kare me two  Korona, wel co ma gitero mongi ki gero omedde matek. Ento, laco myero pe ogeng ngeye ki lok mo keken me tero dakone i yo marac.

4. Gin ango ma myero co ma Lukricitayo gugwokke kwede, dok pingo?

⁴ Co ma gitiyo pi Jehovah myero gugwokke wek kit ma jo me lobo gineno kwede mon pe ocak doro tamgi. b Pingo? Tyen lok acel aye ni gin ma ngat moni tamo aye en bene timo. Lakwena Paulo ociko Lukricitayo ma kiwirogi ma gibedo i Roma ni, “pe wulub tam me lobo man.” (Rom. 12:​1, 2) I kare ma Paulo ocoyo lok meno botgi, jo ma i kacokke meno onongo dong gurii i ada pi mwaki mapol. Kadi bed kit meno, lok pa Paulo onyuto ni jo mogo i kingi onongo pud gitye ka lubo tam kacel ki tekwaro me lobo man. Meno aye tyen lok mumiyo en ocuko cwinygi me loko tamgi kacel ki kitgi. Tira meno pud tiyo wa bot co ma Lukricitayo i kare-ni. Ki cwercwiny madit, omege mogo guweko tam ki tekwaro me lobo-ni odorogi ci gucako tero mongi ki gero. c Jehovah mito ni laco oter dakone nining? Wanongo lagamme i wang ginacoya ma pwony man jenge iye.

5. Ma lubbe ki 1 Petero 3:​7, laco myero oter dakone nining?

⁵ Kwan 1 Petero 3:7. Jehovah ociko co ni omyero gumi deyo bot mongi. Wamiyo deyo bot ngat ma nongo watye ki woro i kome. Laco ma miyo deyo bot dakone tero dakone ki kica dok ki mar. I pwony man, wabinyamo kit ma laco twero miyo kwede deyo bot dakone. Ento mukwongo, kong wanyamu tim mogo ma pe nyuto mar ki woro bot mon.

PE ITIM GIN MO KEKEN MA PE NYUTO WORO BOT DAKONI

6. Jehovah winyo nining i kom co ma gigoyo mongi? (Jo Kolocai 3:19)

⁶ Goyo dakoni. Jehovah dag ngat mo keken ma timo tim gero. (Jab. 11:5) En tutwalle dag ka laco timo tim gero i kom dakone. (Mal. 2:16; kwan Jo Kolocai 3:19.) Ma lubbe ki ginacoya ma pwony man jenge iye, 1 Petero 3:​7, ka laco pe tero dakone maber, ci watte ki Jehovah biballe woko. Jehovah twero kwero winyo legane woko.

7. Ma lubbe ki Jo Epeco 4:​31, 32, kodi lok mene ma laco myero ogwokke kwede? (Nen bene “Lok ma Kitito Tere.”)

⁷ Yeto dakoni. Co mogo giloko ki mongi ki gero dok gitiyo ki leb makec adada. Ento Jehovah dag “wang-ic ki kiniga, da i wi dano mukene, [ki] yet.” d (Kwan Jo Epeco 4:​31, 32.) Jehovah winyo lokwa ducu. Jehovah keto cwinye i kom kit ma laco loko kwede ki dakone, kadi bed gitye kengi. Laco ma loko ki dakone ki gero pe balo nyomme keken, ento bene watte ki Lubanga.—Yak. 1:26.

8. Jehovah winyo nining i kom tim me neno cal macilo, dok pingo?

⁸ Neno cal macilo. Jehovah winyo nining i kom tim me neno cal macilo? En dag tim meno adada. Pi meno, laco ma neno cal macilo balo watte ki Jehovah dok nongo pe miyo deyo ki dakone. e Jehovah mito ni laco obed lagen bot dakone. Laco ma lagen pe bitimo tim mo macilo  ki dako mukene. Dok bene pe bilwodone i cwinye. Yecu owaco ni laco ma bedo ka neno dako mukene ki wang me miti nongo dong otimo abor woko “ki i cwinye.” f—Mat. 5:​28, 29.

9. Pingo cwero cwiny Jehovah adada ka laco diyo dakone me timo tim me buto me lewic?

⁹ Tim me buto me lewic. Co mukene gidiyo mongi me ye yo me buto mogo ma tye me lewic, ma weko dakone winyo ni pe kimare, nyo kitye ka nyware nyo weko cwinye pide. Jehovah dag kodi tim meno ma nyuto ni pe iparo pi dakoni. Jehovah mito ni laco omar dakone dok onyut woro pi kit ma dakone winyo kwede. (Ep. 5:​28, 29) Ento, ket kong ni Lakricitayo tero dakone ki gero nyo neno cal macilo nyo diyo dakone me timo jami me lewic kono? En twero loko tamme ki kit ma tero kwede ki dakone nining?

KIT MA LACO TWERO JUKO KWEDE TIM MA PE NYUTO WORO I KOM DAKONE

10. Lanen pa Yecu twero konyo co nining?

¹⁰ Gin ango ma twero konyo laco me juko timo jami ma pe nyuto woro bot dakone? En myero otute me lubo lanen pa Yecu. Kadi bed Yecu pe onyomme, ento kit ma en onongo tero kwede lupwonnyene oweko lanen maber adada pi co i kom kit ma myero guter kwede mongi. (Ep. 5:25) Kong dong wanyamu pwony ma co twero nongo ki i kit ma Yecu otero kwede lupwonnyene kacel ki kit ma oloko kwedgi.

11. Yecu onongo tero lupwonnyene nining?

¹¹ Yecu onongo kare ducu nyuto kica bot lupwonnyene dok terogi i yo me woro. En onongo pe terogi ki gero. Kadi bed en aye onongo Rwotgi ki Laditgi, en pe otiyo ki twerone me bwurogi wek gubed ki lworo i kome. Me ka meno, en otiyo pigi ki mwolo. (Jon 13:​12-17) En owaco bot lupwonnyene ni: “Wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu.” (Mat. 11:​28-30) Nen ni Yecu onongo mwol ki i cwinye. Ngat mamwol pe obedo ngat magoro. Me ka meno, en nongo tye ki teko me jukke kene. Ka ngat mo ocwero cwinye, en medde ki bedo ma kome opye mot dok doro kit ma en winyo kwede.

12. Yecu onongo loko ki jo mukene nining?

¹² Yecu onongo tiyo ki lokke me cuko cwiny jo mukene. En pe oloko bot lulub kore ki gero. (Luka 8:​47, 48) Kadi wa i kare ma lumonene guyete dok gucwero cwinye, “en pe oyetogi.” (1 Pet. 2:​21-23) I kare mogo, Yecu oyero me ling alinga me ka lok i yo me gero. (Mat. 27:​12-14) Man pud dong obedo lanen maber pi co ma Lukricitayo ya!

13. Kit ma kitito kwede i Matayo 19:​4-6, laco twero medde ki “moko i kom dakone” nining? (Nen bene cal.)

¹³ Yecu omiyo tira bot co ni omyero gubed lugen bot mongi. En onwoyo lok pa Wonne, ma owaco ni laco myero ‘omok i kom dakone.’ (Kwan Matayo 19:​4-6.) Nyig lok me leb Grik ma kigonyo i tyeng meno ni “moko i kom” tyen lokke atir atir tye ni “mwono.” Pi meno, mar ma tye i kin laco ki dakone myero obed matek ma bedo calo kimwonogi amwona kacel. Ka ngat acel i kingi otimo gin ma ocwero cwiny lawote, ci gin aryo ducu gideno can. Laco ma tye ki wat macok ki dakone pe biye neno cal macilo. En biloko wange cen cutcut ki i “neno jami atata ma konygi pe.” (Jab. 119:37) Calo Yubu, en bimoko gicikke ki wange pe me neno dako mukene ki wang me miti.—Yubu 31:1.

14. Jami ango ma laco ma tero dakone marac myero otim me yubo watte ki Jehovah kacel ki dakone?

 ¹⁴ Laco ma goyo nyo yeto dakone myero otim jami mapol me yubo wat ma oballe i kin en ki Jehovah kacel ki dakone. Jami ango ma myero en otim? Mukwongo, en myero oye ni gin ma etye ka timo-ni rac. Jehovah neno dok winyo jami ducu. (Jab. 44:21; Latit. 12:14; Ibru 4:13) Me aryo, en myero ojuk goyo nyo yeto dakone, dok olok kite. (Car. 28:13) Me adek, en myero okwa kica ki bot dakone kacel ki bot Jehovah bene. (Tic 3:19) En bene myero obak doge bot Jehovah pi miti me loko kite kacel ki kony me jukke kene ka odok i tamme, lokke ki jami ma en timo. (Jab. 51:​10-12; 2 Kor. 10:5; Pil. 2:13) Me angwen, en myero otim jami ma rwatte ki legane, kun pwonnye me kwero tim me gero mo keken kacel ki yeto dano. (Jab. 97:10) Me abic, en myero ocit bot luelda cutcut ka yenyo kony ki botgi. (Yak. 5:​14-16) Me abicel, en myero oket yub ma bikonye me gwokke ki timo jami maraco magi odoco. Laco ma neno cal macilo bene myero otim jami abicel magi. Jehovah bigoyo laane i kom tutene me loko kite. (Jab. 37:5) Ento kwero timo jami ma pe nyuto woro i kom dakoni keken pe romo. Mitte bene ni laco opwonnye me miyo deyo bot dakone. En twero timo meno nining?

KIT ME MIYO DEYO BOT DAKONI

15. Laco twero nyuto mar bot dakone nining?

¹⁵ Nyute ni imare. Omege mogo ma gitye ki yomcwiny i nyomgi gitute me timo gin mo nino ducu me nyuto bot mongi ni gimarogi. (1 Jon 3:18) Laco twero nyuto marre pi dakone ki timo jami mogo mayot calo mako cinge ka gitye ka wot, nyo kwako kore. En twero cwalo bot dakone mecej kun wacce ni “Atye ka paro neni” nyo penye ni “Ninoni tye ka wot nining?” Kare ki kare, en twero yero me nyuto marre pi dakone kun coyo lok mogo me mar i kad. Nyo en twero wilo ki dakone dek ma dakone maro loyo. Ka laco timo jami magi, en miyo deyo bot dakone dok jingo nyomgi.

16. Pingo omyero laco opwo dakone?

 ¹⁶ Pwo dakoni. Laco ma miyo deyo bot dakone weko dakone ngeyo pingo pire tek bote dok cuko cwiny dakone. Yo acel ma en twero timo kwede man aye ki nyuto pwoc pi kony ducu ma dakone miyo bote. (Kol. 3:15) Ka laco pako dakone, man yomo cwiny dakone adada. Dakone biwinyo ni etye ki gwok muromo, kimare, dok kimine deyo.—Car. 31:28.

17. I yo ma nining ma laco twero nyuto kwede woro bot dakone?

¹⁷ Bed lakica dok inyut woro. Laco ma maro dakone tero dakone calo ngat ma pire tek. En neno dakone calo mot mamwonya ma oa ki bot Jehovah. (Car. 18:22; 31:10) Macalo adwogine, en tero dakone i yo me kica dok ki woro, ka odok i kom jami ma timme i tyelo. En pe bidiyo dakone me ye yo me buto mogo ma tye me lewic, ma weko dakone winyo ni pe kimare, nyo kitye ka nyware, nyo weko cwinye pide. g En laco bene pe myero otim gin mo ma weko cwinye bedo ka pide i nyim Jehovah ka odok i lok man.—Tic 24:16.

18. Gin ango ma co myero gumok tamgi me timone? (Nen bene bok ma wiye tye ni “ Yo Angwen ma Laco Twero Nyuto Kwede Woro bot Dakone.”)

¹⁸ Wun co, wutwero bedo ki gen ni cwiny Jehovah bedo yom ka oneno wutye ka tute matek me miyo deyo bot monwu i lokwu kacel ki jami ma wutimo. Mok tammi me miyo deyo bot dakoni kun pe itimo jami ma cwero cwinye ento ibedo lakica dok inyuto woro kacel ki mar bote. Ka itimo jami magi, ci nongo itye ka nyuto ki dakoni ni imare dok pire tek boti. Mi deyo bot dakoni, ci ibigwoko wat ma pud dong pire tek loyo ma itye kwede—watti ki Jehovah.—Jab. 25:14.