1, 2. (a) Pingo tye me ryeko me cung tung bot Jehovah? (b) Ngo ma wabinyamo i pwony man?

TYE me ryeko piwa me bedo cok ki Jehovah. Pe tye ngat mo keken matek, maryek, dok lamar makato en! Ki lok ada, wan ducu wamito ni wabed lugen dok wacung tung bote. (Jabuli 96:4-6) Ento tye jo mogo ma onongo gubedo luwor Jehovah ma pe gutimo meno.

² I pwony man wabinyamo labol pa dano mogo ma onongo giwaco ni gitye tung bot Jehovah, ento ki tungcel dok gubedo ka timo jami ma Jehovah dagi. Pwony ma pigi tek ma wanongo ki i lanengi twero konyowa me bedo lugen bot Jehovah.

3. Pingo Jehovah otute me konyo Kain, dok en owaco bote gin ango?

³ Me labolle, tam kong i kom Kain. Kadi bed en onongo pe woro lubange me goba, ento Jehovah okwero  jolo worone. Pingo en okwero? Jehovah oneno ni Kain tye ki tam mogo maraco i cwinye. (1 Jon 3:12) Jehovah ociko Kain ni: “Ka itimo maber pe giye? Ka pe itimo maber, ci bal buto i doggola macalo nguu ma cwinye pyette i komi; ento myero iloye.” (Acakki 4:6, 7) Jehovah onongo tye ka nyuto ni, ka Kain ongut i kom balle ci oyero me cung tung bot Lubanga, En bene ebibedo kacel ki Kain.

4. Ngo ma Kain otimo i kare ma en onongo omyero oyer me bedo tung bot Jehovah?

⁴ Ka onongo Kain oloko tamme, Jehovah onongo bijolo worone. Ento Kain pe owinyo lok pa Lubanga, dok tamme kacel ki mitine maraco oweko en otimo bal. (Yakobo 1:14, 15) I kare ma Kain onongo pud tidi, nen calo en pe otamo ni etwero jemo i kom Jehovah. Ento en okwero winyo tira pa Lubanga, ojemo, dok oneko omine kikome!

5. Kodi tam ango ma miyo warwenyo cwak pa Jehovah?

⁵ Calo Kain, i kare-ni bene Lakricitayo twero waco ne ni eworo Jehovah kun nongo tye ka timo jami ma Jehovah dagi. (Juda 11) En twero tic matek i tito kwena kun bene pe keng cokke. Ento ki tungcel, en twero weko tam macilo, cwiny me adage nyo woro me jami doro tamme. (1 Jon 2:15-17; 3:15) Tam ma kit meno tero dano i bal. Romo bedo ni jo mukene pe gingeyo tamwa nyo jami ma watimo, ento Jehovah ngeyo. En ngeyo ka pe wacung tung bote ki cwinywa ducu.​—Kwan Jeremia 17:9, 10.

6. Jehovah konyowa me kwero miti maraco nining?

⁶ Kadi bed watimo bal, Jehovah pe ilo cinge i komwa oyotoyot. Ka watye ka wot ka ma terowa i bal, Jehovah lwongowa ni: “Wudwog bota, an bene abidwogo botwu.” (Malaki 3:7) Jehovah niang ni watye ki goro ma walwenyo kwede. Ento en mito ni wacung matek wek wakwer gin marac. (Icaya 55:7) Ka watimo kit meno, en ocikke ni ebikonyowa dok ebiminiwa kero me loyo miti maraco.​—Acakki 4:7.

7. Solomon obalo watte ki Jehovah nining?

⁷ I kare ma Solomon onongo pud tidi, en obedo ki wat maber adada ki Jehovah. Lubanga omiyo ki Solomon ryeko dok omiyo bote tic ma pire tek me gero ot pa Lubanga i Jerucalem. Ento Solomon obalo watte woko ki Jehovah. (1 Luker 3:12; 11:1, 2) Cik pa Lubanga onongo waco ni kabaka myero “pe onyom mon mapol, miyo ngako cwinye woko.” (Nwoyo Cik 17:17) Solomon okwero lubo cik pa Lubanga. Pe otero kare, en onyomo mon 700 kacel ki angeca 300 kulu! (1 Luker 11:3) Pol pa mon magi onongo gia ki i rok ma giworo lubange me goba. Dong Solomon bene oturo cik pa Lubanga ma wacci Luicrael myero pe gunyom mon ma lurok.​—Nwoyo Cik 7:3, 4.

8. Jami maraco ango ma Solomon otimo?

⁸ Mot mot, Solomon orwenyo marre pi cik pa Jehovah. Lacen, en otimo bal madongo. En ogero keno tyer me  woro jok ma dako ma nyinge Acitoret kacel ki jok ma kilwongo ni Kemoc, en bene oribbe kacel ki monne ka woro jogi magi. Solomon bene ogero keno tyer i wi got mo ma i nyim Jerucalem, ka ma en onongo ogero iye ot pa Jehovah! (1 Luker 11:5-8; 2 Luker 23:13) Nen calo Solomon obwolle kekene ni Jehovah bijalo balle magi woko ka pud emedde ki miyo tyer i ot pa Lubanga.

9. Ngo ma otimme i kare ma Solomon okwero winyo tira pa Lubanga?

⁹ Ento Jehovah pe jalo bal ajala. Baibul tittiwa ni: “[Jehovah] okeco i kom Solomon, pien onongo cwinye dong oweko Rwot Lubangane woko.” Lubanga onongo otute me konyo Solomon. Jehovah ‘yam onen bote tyen aryo, dok ocike i kom lok man kun waco bote ni pe olub kor lubanga mukene; ento en pe omako cik ma Jehovah omiye-ni.’ Macalo adwogine, en orwenyo cwak kacel ki gwok pa Lubanga. Jehovah pe oye ni likwayo pa Solomon gulo ker me Icrael ducu dok gubedo ki ayelayela pi mwaki mia mapol.​—1 Luker 11:9-13.

10. Ngo ma twero balo watwa ki Jehovah?

¹⁰ Ka wayero lurem ma pe giniang nyo pe giworo cik pa Lubanga, ci gitwero gudo tamwa i yo marac kun gibalo watwa ki Jehovah. Twero bene bedo ni gitye i kacokke, ento nongo  pe gitye ki wat macok ki Jehovah. Nyo gitwero bedo wadiwa, jiraniwa, lutic luwotwa, nyo lutino kwan luwotwa ma pe giworo Jehovah. Ka jo ma wamaro bedo kwedgi pe gikwo ma lubbe ki cik pa Jehovah, ci kitgi twero gudo kwowa ma weko warwenyo watwa ki Lubanga.

11. Ngo ma twero konyowa me yero lurem mabeco?

¹¹ Kwan 1 Jo Korint 15:33. Pol pa dano gitye ki kit mabeco mogo. Dok jo ma pe giworo Jehovah pe gitimo bal kare ducu. Oromo bedo ni ingeyo jo ma kit meno. Tika man tere ni gubedo lurem mabeco? Gigudu watti ki Jehovah nining? Tika gikonyi me nyikke cok ki Lubanga? Ngo ma pire tek loyo bot jo ma kit meno? Gin ango ma gimaro lok iye? Tika gimaro lok i kom cital bongi manyen, cente, cim, tabulet, kompiuta, galowang kacel ki jami ma kit meno? Tika gimaro kwoto nying dano? Tika gimaro loko lok ore macilo? Yecu ociko ni: “Lok ma ogurre i cwiny dano, en aye dog bene loko.” (Matayo 12:34) Ka iniang ni jo ma imaro bedo kwedgi gitye ka balo watti ki Jehovah, ci myero itim gin mo! Dwok cen cawa ma ibedo kacel kwedgi, dok ka twere juk lirem meno woko.​—Carolok 13:20.

12. (a) Gin ango ma Jehovah owaco bot jo Icrael i kare ma gua ki i Ejipt? (b) Ngo ma Luicrael gugamo i kare ma Lubanga owacci gubed lugen bote?

¹² Watwero bene nongo pwony ki i kom gin mutimme i kare ma Jehovah okwanyo Luicrael ki i opii i Ejipt. I kare ma lwak gugure i nyim Got Cinai, Jehovah onyutte botgi i yo me aura! Guneno pol ma col, lut kot, ki yito dok guwinyo mor kot kacel ki dwan obute ma kok malongo. (Nia 19:16-19) Ci guwinyo ka Jehovah waco ni en “Lubanga ma lanyeko.” En ocikke ni ebibedo lagen bot jo ma gimare dok gilubo cikke. (Kwan Nia 20:1-6.) Jehovah onongo tye ka waco bot Luicrael ni ka gucung tung bote, en bene ebicung tung botgi. Ka in bene onongo itye i kin lwak meno, onongo ibiwinyo nining i kare ma Jehovah owaco lok man? In bene nen calo onongo ibigamo kit ma Luicrael gugamo kwede ni: “Lok ducu ma Rwot [Jehovah] owaco wabitiyo.” (Nia 24:3) Ento pe otero kare malac gin mo otimme ma otemo gennegi i kom Lubanga adada. Meno onongo gin ango?

13. Ngo ma otemo genne pa Luicrael?

¹³ Lworo omako Luicrael i kare ma guneno teko pa Lubanga i yo me aura, pi meno Moses oito Got Cinai ci oloko ki Jehovah pigi. (Nia 20:18-21) Ento Moses ogalle woko i wi got. Onongo dong tye calo Luicrael gurweny woko i dye tim labongo latel wigi. Gutimo ngo? Nen calo Luicrael gubedo ka jenge tutwal i kom Moses, ma latela ma dano adana. Cwinygi otur ci guwaco bot Aron ni: ‘Yub ki wan lubanga, ma bitelo wiwa; pien Moses man, ma en aye dano ma yam okwanyowa woko ki i lobo Ejipt, pe  dong wangeyo gin mutimme i kome.’​—Nia 32:1, 2.

14. Luicrael gubwolle kekengi nining dok Jehovah odok iye nining?

¹⁴ Luicrael onongo gingeyo ni woro cal apaya rac. (Nia 20:3-5) Ento pud gucako woro cal wod twon me jabu! Kadi bed guturo cik pa Jehovah, pud gubwolle kekengi ni gitye tung bot Jehovah. Aron bene olwongo woro cal dyang man ni “kwero nino madit bot [Jehovah]”! Jehovah otimo gin ango? Jehovah owaco ki Moses ni lwak “guballe woko” dok ‘guweko kit ma yam en ecikogi kwede woko.’ Akemo omako Jehovah matek ma oweko en otamo ni ejwer rok me Icrael woko.​—Nia 32:5-10.

15, 16. I yo ango ma Moses ki Aron gunyuto ni gucung tung bot Jehovah ki cwinygi ducu? (Nen cal ma tye i pot karatac 15.)

¹⁵ Ento Jehovah obedo Lubanga ma lakica. En omoko tamme pe me jwero rok me Icrael. Ma ka meno, en pud dok aye omiyo kare ki Luicrael me nyuto ni gimito cung tung bote. (Nia 32:14) I kare ma Moses oneno ka dano gitye ka dange, wer, kacel ki myel i nyim cal-li, en owango cal wod twon meno ci orego woko mayom. Ci en odange ni: “Anga ma tye tung bot Rwot [Jehovah]? Obin bota.” Lacen “awobe pa Levi ducu gucokke kacel bote.”​—Nia 32:17-20, 26.

¹⁶ Kadi bed Aron aye oyubo cal wod twon me jabu-ni, en ongut i kom balle, dok kacel ki Lulevi mukene-ni, oyero me cung tung bot Jehovah. Jo ma lugen magi, gunyuto ka maleng ni pe gitye tung bot lubalo. Meno onongo bedo tam me ryeko adada pien lacen i nino meno dano alip mapol ma guworo cal wod twon me jabu-ni guto. Ento jo ma gucung tung bot Jehovah gubwot dok Lubanga ocikke me goyo laane i komgi.​—Nia 32:27-29.

17. Ngo ma wapwonyo ki i lok ma Paulo ocoyo i kom cal wod twon me jabu?

¹⁷ Pwony ango ma wanongo? Lakwena Paulo owaco ni: “Lok meno ducu odoko labol botwa,” wek “pe wawor jogi.” Paulo otito bene ni lok magi ducu “gicoyo me cikowa, wan jo ma agikki piny oo i komwa-ni. Pi meno ngat mo ma tamo ni etwero cung myero ogwokke wek pe opoti.” (1 Jo Korint 10:6, 7, 11, 12) Kit ma Paulo otito kwede, jo ma giworo Jehovah bene gitwero donyo i tim maraco. Gitwero bwolle kekengi ni, pud gitye ki cwak pa Jehovah. Ento kadi bed ni ngat moni mito bedo larem Jehovah nyo waco ni en lagen, meno pe te lokke ni en tye ki cwak pa Jehovah.​—1 Jo Korint 10:1-5.

18. Ngo ma twero weko waa woko ki bot Jehovah, dok adwogi maraco ango ma wanongo?

 ¹⁸ I kare ma Moses ogalle i wi got Cinai, Luicrael gucako bedo ki par. Ka agikki me lobo-ni pe obino i kare ma watamo ni myero obin iye, wan bene waromo bedo ki par. Waromo cako tamo ni anyim mamwonya ma Jehovah ociko piwa-ni pud tye mabor ata, ci waketo cwinywa i timo gin ma wamito me ka timo gin ma Jehovah mito. Ka pe wagwokke, ci watwero cako a woko motmot ki bot Jehovah dok wacako timo jami maraco ma onongo pe watamo ni watwero timogi.

19. Ngo ma myero wiwa opo iye dok pingo?

¹⁹ Jehovah mito ni wabed luwiny bote dok wawor en keken. (Nia 20:5) Pingo en mito ni watim man? Pien en marowa. Ka pe watimo gin ma Jehovah mito, ci wabitimo gin ma Catan mito, dok man bikeliwa peko. Paulo otito ni: ‘Pe wutwero mato ki kikopo pa Jehovah ki pa jogi. Pe wutwero cam i meja pa Jehovah ki dok i meja pa jogi.’​—1 Jo Korint 10:21.

20. Jehovah twero konyowa nining kadi bed watimo bal?

²⁰ Kain, Solomon, kacel ki Luicrael onongo gitye ki kare me ngut ki loko kitgi. (Tic pa Lukwena 3:19) Ngene kene ni Jehovah pe ilo cinge woko oyotoyot i kom jo ma gutimo bal. Tam kong i kom kit ma en otimo ki Aron kica. I kare-ni bene, Jehovah miniwa tira i yo me mar wek pe wapoti i bal. En tiyo ki Baibul, bukewa kacel ki Lukricitayo mukene. Ka wawinyo tira ma Jehovah miniwa, ci watwero bedo ki gen ni en bitimiwa kica.

21. Ngo ma omyero watim ka kitemo genewa?

²¹ Kica pa Jehovah ma pe wapore pire-ni tye ki ticce. (2 Jo Korint 6:1) Miniwa kare me “kwero lubo kit pa jo ma pe lworo Lubanga, kacel ki miti ducu me lobo man.” (Kwan Tito 2:11-14.) I lobo man, wabibedo ka rwatte ki jami ma temo genewa bot Jehovah kare ducu. Mok tammi me bedo tung bot Jehovah, dok wi opo me ‘lworo Jehovah Lubangani, tic pire kun imoko i kome matek.’!​—Nwoyo Cik 10:20.