Dong Cwiny me Kica pi “Jo Ducu”
I KARE ma Yecu opwonyo lulub kore kit me tito kwena maber, en ocikogi ni i kine mogo dano pe bibedo ki miti me winyo lokgi. (Luka 10:3, 5, 6) Tye bene kit meno i kare-ni i ticwa me pwony. Jo mogo ma warwatte kwedgi gitwero bedo ger. Dok ka gugere i wiwa, romo bedo tek me nyuto cwiny me kica kacel ki tito kwena botgi.
Ngat ma tye ki cwiny me kica neno peko pa jo mukene, kica make i komgi dok bedo ki miti me konyogi. Ngo ma bitimme ka pe wabedo ki cwiny me kica i kom jo ma warwatte kwedgi i ticwa me pwony? Man biweko warwenyo mit komwa me tito kwena botgi, dok pe wabibedo ki miti me konyogi. Watwero poro mit komwa ki mac. Wek mac olyel maber, omyero wabed ka medo yen iye. I yo acel-lu, wek mit komwa i tito kwena omedde, omyero wabed ki cwiny me kica!—1 Jo Tecalonika 5:19.
Watwero pwonnye me bedo ki cwiny me kica nining, kadi bed pe yot? Kong dong wanyamu lanen pa jo adek ma watwero lubone: Jehovah, Yecu, kacel ki lakwena Paulo.
LUB LANEN ME KICA PA JEHOVAH
Pi mwaki alip mapol, dano guwaco lok goba madongo i kom Jehovah. Ento en medde ki “timo ber bot jo ma pe pwoye ki bot jo maraco.” (Luka 6:35) En nyuto kicane nining? En diyo cwinye i kom dano ducu. Jehovah tye ki mitti me laro “jo ducu.” (1 Temceo 2:3, 4) Kadi bed Lubanga dag tim maraco, kwo pa dano pire tek bote dok pe mito ni ngat mo oto.—2 Petero 3:9.
Jehovah ngeyo ni Catan tye ki diro me bwolo dano wek guye lok goba. (2 Jo Korint 4:3, 4) Jo mapol adada kipwonyogi lok goba nicakke ma pud gitino. Pi meno, kit ma gitamo dok giwinyo kwede weko bedo tek adada pigi me ye lok ada. Ento Jehovah tye ki miti madwong me konyogi. Wangeyo nining?
Me labolle, tam kong kit ma Jehovah owinyo kwede i kom jo ma i boma me Nineve. Kadi bed ni onongo giger, Jehovah owaco bot Yona ni: “An pe myero kica omaka pi Nineve ma en gang madit, ma tye iye jo makato 120,000 ma pe gingeyo poko kin cinggi ma lacuc ki ma lacam, ki dok bene dyangi mapol-gu?” (Yona 4:11) Kica omako Jehovah i kom jo meno ma onongo pe gingeyo lok ada i kome. Pi meno en ooro Yona wek ocikgi.
Wan bene omyero wabed ki kit cwiny ma Jehovah tye kwede-ni. Dano ducu pigi tek. Calo Jehovah, wan bene watye ki miti me konyogi wek gupwony lok i kome kadi bed nen calo pe gibijolo ada.
LUB LANEN ME KICA PA YECU
Macalo wonne, Yecu bene kica omake i kom jo mukene “pien onongo gitye ka unogi matek, dong gudoko goro, calo romi ma lakwatgi pe.” (Matayo 9:36) Yecu oniang pingo onongo gitye ka kato ki i peko meno. Lutela dinigi onongo terogi marac dok gipwonyogi lok goba. Dok kadi bed Yecu onongo ngeyo ni jo mapol ma gibino ka winyo lokke pe gibidoko lulub kore pi tyen lok ma gingeyo kengi, en pud omedde ki pwonyogi jami mapol.—Marako 4:1-9.
Pe iwek cwinyi otur ka ngat moni okwero winyo lokki tyen mukwongo
Ka kwo pa dano olokke, gitwero dok i kwenawa i yo mapat
Ka dano gudok marac i kom kwenawa, watute me niang pingo gitimme kit meno. Romo bedo ni gitye ki tam marac i kom Baibul nyo Lukricitayo pien guneno ni jo mogo ma gilwonge ni Lukricitayo gitimo jami maraco. Jo mogo nongo guwinyo lok goba i kom pwonywa. Jo mukene gitye ki lworo ni wadigi nyo jiranigi binywarogi ka guloko kwedwa.
Jo mogo ma warwatte kwedgi nongo guwok ki i peko matek adada. Lamiconari mo ma nyinge Kim owaco ni jo mapol i wang ticgi gukato ki i lweny ci gurwenyo jamigi ducu. Pi meno pe gitye ki gen mo pi anyim. Cwinygi tye ma otur dok pe gigeno ngat mo keken. Jo ma i wang tic meno pol kare gitute me juko Lucaden wek pe gutit kwena. I nino mo acel, rwod ot mo obino ka lweny i kom Kim i kare ma en tye ka tito kwena.
Laminwa Kim tute me paro pi jo mukene nining kadi bed ni gitere marac? En po i kom lok ma kicoyo i Carolok 19:11 ma wacci: “Dano ma tye ki ryeko maber kiniga pe mako oyot.” Ka en otamo i kom peko ma jo ma i wang ticce guwok ki iye, man konye me paro pigi. Dok bene pe dano ducu ma en rwatte kwedgi giger. I wang tic acel-lu, en onongo jo ma gitye ki miti ma en dok cen ka limogi.
Watwero pennye kekenwa ni: ‘Kono onongo pe angeyo ada, ci Lucaden pa Jehovah gubino ka tito kwena bota, onongo abidok iye nining?’ Tam kong ni onongo iwinyo lok goba mapol i kom Lucaden. Ki lok ada, wan bene onongo wabibedo ger i komgi ma nongo mitte ni guterwa ki cwiny me kica. Yecu owacci omyero water jo mukene kit ma wamito ni guterwa kwede. Pi meno, mitte ni watem niang kit ma jo mukene winyo kwede dok wadi cwinywa i komgi, kadi bed timo meno pe yot.—Matayo 7:12.
LUB LANEN ME KICA PA PAULO
Lakwena Paulo onyuto cwiny me kica kadi wa bot jo ma gudok i lokke ki gero. Pingo? Pien wiye obedo ka po i kom kite macon. En owaco ni: “Yam abedo ka yete pi keto ayela i kome ki balo nyinge. Ento en otimma kica, pien ceng atimo meno ki kwiya piny labongo niye.” (1 Temceo 1:13) Paulo onongo ngeyo ni Jehovah kacel ki Yecu gunyuto kica bote. En onongo twero niang pingo jo mukene gimito juko ticce me tito kwena, pien en bene yam obedo calo gin.
I kine mukene, Paulo orwatte ki jo ma giye i pwony me goba matek. Man omiyo en owinyo nining? Ma lubbe ki Tic pa Lukwena 17:16, i kare ma Paulo tye i Atene, en oneno ni ‘gang meno opong ki cal jogi, ci ocwero cwinye mada.’ Ento en otiyo ki jami magi ma ocwero cwinye-ni me pwonyo jo mukene. (Tic pa Lukwena 17:22, 23) En oloko yone me tito kwena dok onongo pwonyo jo ma gia ki i rok mukene i yo mapatpat, ‘wek omiye elar jo mogo.’—1 Jo Korint 9:20-23.
Ka watito kwena bot jo ma ger nyo jo ma giye i pwony goba, omyero watim gin ma Paulo otimo. Watwero tic ki gin ma wangeyo i komgi me konyogi wek gupwony ‘kwena maber me gin maber.’ (Icaya 52:7) Laminwa mo ma nyinge Dorothy owaco ni: “I wang ticwa, pol pa dano kipwonyogi ni Lubanga ger dok mako lok i kom dano. Apwoyo dano ma kit meno pi bedo ki niye matek i kom Lubanga ci anyutigi gin ma Baibul waco i kom kit pa Jehovah ki cikkene pi anyim.”
“WULO GIN MARAC KI TIMO GIN MABER”
Ka wawoto ki dirre cok ki agikki piny, omyero wange ni kit pa dano bene ‘bimedde ki bedo marac mukato kare.’ (2 Temceo 3:1, 13) Ento pe myero wawek nyuto cwiny me kica dok pe warweny yomcwinywa pi kit ma dano gidok kwede i lokwa. Jehovah twero miniwa kero me loyo “gin marac ki timo gin maber.” (Jo Roma 12:21) Lapainia mo ma nyinge Jessica owacci, pol kare erwatte ki dano ma giwakke dok gicayowa kacel ki kwena ma watito. En omedde ni: “Man twero cwero cwinyi adada. Ka acako lok ki dano, alego laling bot Jehovah ni okonya wek anen dano meno kit ma en nene kwede.” Man konyo Jessica pe me keto tamme i kom kit ma en winyo kwede keken, ento i kom kit me konyo dano meno.
Wan wamedde ki yenyo jo ma gimito ngeyo ada
Lacen, jo mukene gitwero ye konywa ci gipwonyo ada
Omyero bene watute me cuko cwiny omege ki lumege ka watye ka tito kwena kwedgi. Jessica owaco ni, ka etye ka tito kwena ki ngat mo, ce kitero ngat meno marac, etute pe me keto tamme i kom gin ma otimme. Me ka meno en loko i kom adwogi mabeco ma tito kwenawa okelo, kadi bed jo mukene pe gijolo maber.
Jehovah ngeyo maber ni i kine mukene pe yot botwa me tito kwena. Ento cwinye bedo yom ka walubo lanene me kica! (Luka 6:36) Ngene kene ni Jehovah pe bibedo ka diyo cwinye kun nyuto kica bot jo maraco ma i lobo-ni pi naka. Watye ki gen ni, en ngeyo awene ma myero ekel iye agikki piny. Ka wawoto ki kuro, pire tek ni wamedde ki tito kwena. (2 Temceo 4:2) Pi meno, omyero wamedde ki tito kwena ki mit kom dok wabed ki cwiny me paro pi “jo ducu.”
