1, 2. Keto wangwa i kom Jehovah tyen lokke ngo?

WATYE ka kwo “i kare me agikki” dok piny tye “marac.” (2 Temceo 3:1) Kwo bimedde ameda ki doko rac wang ma Jehovah ojwero lobo man marac-ci ci okelo kuc me ada i wi lobo. Pi tyen lok man, omyero wapennye kekenwa ni, ‘Anga ma an ayenyo kony ki tira ki bote?’ Waromo gamone cutcut ni “Jehovah,” dok meno aye obedo lagam maber loyo.

² Keto wangwa i kom Jehovah tyen lokke ngo? Dok ngo ma watwero timone wek wangwa obed i kome i kare ma nongo watye ki peko? Laco Jabuli otito kit ma pire tek kwede me keto wangwa i kom Jehovah i kare ma nongo wamito kony. (Kwan Jabuli 123:1-4.) En owaco ni ka waketo wangwa i kom Jehovah, nongo watye calo latic ma neno bot laditte. I yo ma nining? Latic neno nyo jenge i kom laditte pi nongo cam ki gwok ki bote. Ento mitte bene  ni owiny laditte kare ki kare wek oniang gin ma laditte mito ki bote, ci otim. I yo acel-lu, omyero wakwan Lok pa Lubanga ki diro nino ducu wek waniang gin ma Jehovah mito ki botwa, ka dong watim. Dok man weko wabedo ki gen ni Jehovah bikonyowa ka watye i peko.​—Jo Epeco 5:17.

3. Ngo ma twero weko pe waketo wangwa i kom Jehovah?

³ Kadi bed wangeyo ni myero waket wangwa i kom Jehovah i kare ducu, ento i kine mukene jami mogo twero wiro tamwa woko. Man aye gin mutimme i kom Marita, larem Yecu. En “onongo obedo ka canne ki tic mapol.” (Luka 10:40-42) Ka dano ma lagen calo Marita tamme owire woko, kadi bed ni Yecu onongo tye kacel kwede, ci wan omyero pe wabed ki ur ni gin mo twero wiro tamwa bene. Dong, ngo ma twero wiro tamwa kun weko pe waketo wangwa i kom Jehovah? I pwony man, wabinyamo kit ma jami ma jo mukene timo twero wiro kwede tamwa woko. Dok wabipwonyo kit ma watwero medde ki keto wangwa i kom Jehovah.

4. Pingo watwero bedo ki ur ni Moses orwenyo mot me donyo i Lobo ma Kiciko Pire?

⁴ Moses oketo wange i kom Jehovah pi nongo tira. Baibul wacciwa ni en “ociro matek, macalo en neno Lubanga ma pe nen.” (Kwan Jo Ibru 11:24-27.) Baibul bene waco ni “lanebi mo mukene pe dok onen macalo Moses, ma yam Rwot [Jehovah] ngene kwede wang ki wang.” (Nwoyo Cik 34:10) Ento kadi bed ni Moses onongo tye larem Jehovah macok adada, en okeng mot me donyo i Lobo ma Kiciko Pire. (Wel 20:12) Ngo mutimme?

5-7. Ngo mutimme i nge kare manok ma jo Icrael guweko lobo Ejipt, dok gin ango ma Moses otimo?

⁵ I nge dwe makato acel ma jo Icrael gua ki i lobo Ejipt, dok ma peya guo i wi Got Cinai, gin mo marac otimme. Lwak gucako daa pien pii onongo pe. Gucako nguru i kom Moses dok gukeco matek adada mumiyo “Moses okok bot Rwot [Jehovah] ni, ‘Abitimo jo man nining? Gin dong gutyeko yubbe me cela woko ki got.’” (Nia 17:4) Jehovah otito bot Moses gin me atima. Jehovah owacce ni okwany odone ci ocit ogo pata got ma i Koreb. Baibul waco ni: “Moses otimo kit meno i nyim ludongo pa Icrael.” Pii okatti ki i pata got, jo Icrael ducu gumato oromogi, ci gityeko peko meno woko.​—Nia 17:5, 6.

⁶ Baibul tittiwa ni Moses ocako nying kabedo meno ni Maca ma te lokke ni ‘Atema’ ki Meriba ma gonye ni ‘Daa.’ Pingo? “Pien jo Icrael gukeco i kome, dok pien guomo i Rwot [Jehovah] kun giwaco ni, ‘Rwot mono tye i kinwa nyo pe?’”​—Nia 17:7.

⁷ Jehovah owinyo nining i kom gin mutimme i Meriba-ni? En owinyo calo jo Icrael gujemo i kome ki i kom twerone, ento pe i kom Moses. (Kwan Jabuli 95:8, 9.) Gin ma jo Icrael gutimo-ni onongo rac adada. Ento Moses otimo gin ma atir. En oketo wange i kom Jehovah ci olubo cikke kore ki kore.

8. Ngo mutimme i kare ma Luicrael onongo dong gicok tyeko wotgi i dye tim?

 ⁸ Ento, ngo ma Moses otimo i kare ma gin ma rom ki man dok otimme i nge mwaki 40? Jo Icrael onongo dong gicok tyeko wotgi i dye aroo. Guo i kabedo mo macok ki Kadec, ma onongo pe bor ki Lobo ma Kiciko Pire. Kabedo man bene lacen kilwongo ni Meriba. * (Nen lok ma tye i tere piny.) Pingo? Pien Luicrael dok gudaa ni pii pe. (Wel 20:1-5) Ento i wang-ngi, Moses otimo bal madit.

9. Ngo ma Jehovah owaco ni Moses myero otim, ento en otimo gin ango? (Nen cal ma tye i pot karatac 9.)

⁹ Ngo ma Moses otimo i kare ma lwak dok gujemo? En olokke bot Jehovah doki pi nongo tira. Ento i wang-ngi Jehovah pe owaco ki Moses ni ogo got. En owaco bot Moses ni okwany odone, ogur lwak kacel i nget got, ci olok aloka ki got. (Wel 20:6-8) Moses tika otimo meno? Pe. Akemo onongo dong omake matek mumiyo en odange i wi lwak ni: “Dong wuwiny ba, wun lujemo-ni. Wumito ni wan wakel pii nia ki i pata got man piwu?” Ka dong en ogoyo got-ti, pe kicel, ento kiryo kulu.​—Wel 20:10, 11.

10. Jehovah odok i kom gin ma Moses otimo nining?

¹⁰ Kiniga omako Jehovah i kom Moses. (Nwoyo Cik 1:37; 3:26) Pingo kiniga omako Jehovah? Tyen lok acel romo bedo pien ni Moses pe olubo tira manyen ma Jehovah omiyo bote-ni.

11. I kare ma Moses ogoyo got, pingo man onongo twero weko jo Icrael gitamo ni Jehovah pe otimo tango?

¹¹ Twero bedo ni tye tyen lok mukene doki mumiyo Jehovah okeco. Got madit ma i Meriba mukwongo ca obedo got lela matek adada. Kadi bed ngat moni ogo got lela ki kerone ducu, pii pe twero katti ki iye. Ento godi ma i Meriba me aryo-ni dok gipat. Pol pa godi magi obedo calo got guu. Kit ma got guu obedo got ma yom, pol kare pii modo i kome ci jolle i tere piny. Ka dong, dano gikwinyo got man ci gijolo pii ki i tere. Dong i kare ma Moses ogoyo got-ti ma ka lok aloka kwede, tika jo Icrael gutamo ni pii-ni okatti pire kene ento Jehovah pe otimo tango mo? * (Nen lok ma tye i tere piny.) Pe watwero gamone labongo akalakala mo.

12. Tyen lok mukene ango ma omiyo kiniga omako Jehovah i kom Moses ki Aron?

¹² Twero bedo ni tye dok tyen lok  mukene mumiyo kiniga omako Jehovah i kom Moses ki Aron. Moses owaco bot lwak ni: ‘Wumito ni wan wakel pii nia ki i pata got man piwu?’ I kare ma Moses owaco ni “wan,” twero bedo ni en onongo tye ka lok i kome ki Aron. Lok pa Moses man pe onyuto woro pien en pe omiyo deyo ducu bot Jehovah pi timo tango-ni. Jabuli 106:32, 33 waco ni: ‘Gumiyo kiniga omako Jehovah i nget pii me Meriba pi meno omiyo Moses oneno can malit pigi. Gumiyo cwiny Moses odoko kec, omiyo oloko lok ma onongo myero pe en oloki.’ * (Nen lok ma tye i tere piny.) (Wel 27:14) Moses pe omiyo bot Jehovah deyo ma opore Pire. Jehovah owaco bot Moses ki Aron ni: “Yam wujemo i kom cikka.” (Wel 20:24) Man obedo bal madit atika!

13. Pingo pwod ma Jehovah omiyo ki Moses onongo rwatte dok opore?

¹³ Jehovah onongo mito ni Moses ki Aron gunyut lanen maber pien gin aye gitye ka telo wi Jone. (Luka 12:48) I kare mukato angec, Jehovah onongo okwero ni yalwak acel kulu pa Luicrael pe gibidonyo i Lobo ma Kiciko Pire-ni pien gujemo i kome. (Wel 14:26-30, 34) Pi meno, onongo opore dok rwatte ni i kare ma Moses bene ojemo, Jehovah myero omine pwod i yo acel-lu. Calo lujemo mukene ca, Moses bene pe kiyene ni odony i Lobo ma Kiciko Pire-ni.

14, 15. Ngo mumiyo Moses ojemo i kom Jehovah?

¹⁴ Ngo mumiyo Moses ojemo i kom Jehovah? Kong dok wanenu Jabuli 106:32, 33 ma waco ni: ‘Gumiyo kiniga omako Jehovah i nget pii me Meriba pi meno omiyo Moses oneno can malit pigi. Gumiyo cwiny Moses odoko kec, omiyo oloko lok ma onongo myero pe en oloki.’ Dong kadi bed jo Icrael gujemo i kom Jehovah, Moses aye cwinye odoko kec. En pe ojukke kene ento oloko labongo tamo i kom adwogi me lokke.

¹⁵ Moses okwanyo wange woko ki i kom Jehovah pien oweko jami ma jo mukene gutimo owiro tamme. Tyen me acel ma lwak gubedo ka nguru pi pii, Moses otimo gin ma atir. (Nia 7:6) Ento romo bedo ni en ool woko pien Luicrael gubedo ka jemo pi mwaki mapol. Gwok nyo Moses onongo dong tye ka tamo pi mitine keken me kaka tamo pi kit ma etwero kelo kwede deyo bot Jehovah.

16. Pingo omyero watam i kom gin ma Moses otimo?

¹⁶ Ka lanebi ma lagen calo Moses tamme owire ci otimo bal, gin acel-lu bene twero timme i komwa. Moses onongo cok donyo i Lobo ma Kiciko Pire-ni,  wan bene wacok donyo i lobo manyen. (2 Petero 3:13) Labongo akalakala mo, pe wamito rwenyo mot ma pire tek meno. Ento me donyo i lobo manyen, omyero wamedde ki keto wangwa i kom Jehovah dok watim gin ma en mito kare ducu. (1 Jon 2:17) Pwony ango ma wanongo ki i bal ma Moses otimo?

17. Ka gin mo ocwero cwinywa, watwero juko akemowa nining?

¹⁷ Kadi iol woko, bed ma ijukke kekeni. I kine mukene wabedo ka kato ki i peko acel moni teretere. Ento Baibul tittiwa ni: “Pe myero waol ka tiyo gin maber, pien ka kare oromo, ka cwinywa pe odoko nyap, ci wabikayo kac.” (Jo Galatia 6:9; 2 Jo Tecalonika 3:13) Ka gin moni nyo ngat moni bedo ka cwero cwinywa kare ki kare, tika kong watamo ma peya waloko? Tika wajuko akemowa? (Carolok 10:19; 17:27; Matayo 5:22) Ka ngat mo ocwero cwinywa, myero wapwonnye me weko “kare ki kiniga pa Lubanga.” (Kwan Jo Roma 12:17-21.) Meno tyen lokke ngo? Me ka bedo ki akemo, wadiyo cwinywa kun wakuro Jehovah me timo gin mo i kom pekowa i kare ma en tamo ni opore. Ka  watemme me culo wang gin marac ma ka keto wangwa i kom Jehovah, nongo pe watye ka nyuto woro pire.

18. Ngo ma myero wiwa opo iye ka odok i kom lubo tira?

¹⁸ Lub kore ki kore tira manyen ducu. Tika watye lugen i lubo tira manyen ducu ma Jehovah miyo botwa? Pe omyero wamok i timo jami kit ma yam watimo kwede con, pien ni dong wangi woko ki timone. Ma ka meno, omyero wabed atera me lubo tira manyen mo keken ma Jehovah miyowa kun wok ki i dulle. (Jo Ibru 13:17) Medo i kom meno, myero wagwokke wek ‘pe wakat gin ma yam gicoyo.’ (1 Jo Korint 4:6) Ka walubo tira pa Jehovah kore ki kore, ci wabimedde ki keto wangwa i kome.

19. Watwero gwokke nining wek roc pa jo mukene pe obal watwa ki Jehovah?

¹⁹ Pe iwek roc pa jo mukene obal wati ki Jehovah. Ka waketo wangwa i kom Jehovah, ci pe wabibalo watwa kwede nyo waweko jami ma jo mukene gitimo cwero cwinywa. Man pire tek tutwalle ka watye ki mot me tic i dul pa Jehovah, calo Moses. Ngene kene ni, mitte ni ngat acel acel oti matek dok owiny Jehovah wek olarre. (Jo Pilipi 2:12) Ento, ka watye ki mot me tic i kacokke, ci nongo Jehovah mito ni wanyut lanen maber loyo. (Luka 12:48) Ka watye ki mar me ada pi Jehovah, ci pe tye gin mo keken ma twero miyo wapoto nyo ma twero pokowa ki i mar pa Lubanga.​—Jabuli 119:165; Jo Roma 8:37-39.

20. Myero wamok tamwa me timo gin ango?

²⁰ Watye ka kwo i kare marac dok kwo pe yot. Dong pire tek mada ni wamedde ki neno Jehovah, ‘ma bedo i wi komkerre i polo,’ wek waniang gin ma en mito ni watim. Pe myero wawek jami ma jo mukene timo obal watwa ki Jehovah. Gin mutimme i kom Moses miyowa pwony ma pire tek. Me ka bedo ki akemo ka jo mukene gutimo bal, wan omyero wamok tamwa me neno “bot Rwot Lubangawa, nio wang ma kica omake i komwa.”​—Jabuli 123:1, 2.